1 Timothy 3

₁Sàlà màlà ailon mayin. Kàyik wechi sochi yesappe kulu eppai yau, iwalai wakù wotoko iche iwechi màlà. ₂Sochi yesak wechi màlà àli pe ipantomù pùla, tewin neken inoppù, tùttuik tùwemassen pe, wakù pe itesek, wakù pe kakklan yamùk pàk tùwessen pe tùwùk tau, enupanài yeppe nàlà. ₃Tùwetùnsen pe pùla, wapùla àsà pe tùwessen pe pùla, tùse yà'làlà pàlikanài pe molopai echitonpa pe, pùlayatta pùnùnmanài pe pùla. ₄Tùwùk tawon kon yesappe molopai wakù pe tùmunkà yamùk ku'nài pe tùmaimu yawàlà, tùnamasen pe tùwettoppe. ₅Masapùla ànù'là kàyik, tùmunkà molopai tùnoppù yesak pen molopai tok mainanpa tùuya ittunài pen wechi yau, yà'là kasa ken Katù sochiyi yesappe iwechi? ₆Emennappe là Katù yemyak iwettùsak pe pùla , wakù pe tùwechi tùtonpa yentai pàk tùusenumenkasen pe iwechi tukaik, molopai tùtalumattùtok yepolo ya tukaik Makui, wechippù kasa. ₇Tùnamasen pe iwechi màlà sochi tawon kon pen winà, iwekkuli'ma tukaik molopai iwekkawai'ma Makui uya tùppùlantok yak tukaik.

₈Sochi tau pùikattànnan wechi màlà wakù pe iwemattok molopai ailon pe, tùusentaikaik eke pe kulu tùwuku inchinài pe pùla wapùla pùlayatta pàk tùuseka'nonkasen pe pùla. ₉I'napailon ailon, Katù nekamappù lùppù kùpàk yawàlà tok nechii molopai iwalai kupùi tok tùwanmùla tùwettok kon pe. ₁₀Tok ittu màlà wapiya molopai tùttutok yentakasak tok uya wakù pe yau, tok we'wotokoma màlà Katù wotokoyi yau. ₁₁Tok noppù wechi nàlà màlà wakù pe, àli pe tùuselupasen tùtonpa pàk pe pùla; wakù pe tùttuik tùwemassen pe, ailon pe tamù'nawolon yau tùwessen pe. ₁₂Sochi tau pùikattànài wechi màlà tewin inoppù molopai tùnoppù, tùmunkà tawonnan yesappe molopai tok mainanpanài pe tùwessen pe wakù pe. ₁₃Mùkyamlo wakù pe wotoko ku'nàinan wechi màlà wakù pe ipantomù, molopai ailon tetok ya Christ Jesus pàk yau tùnamasen pe iwechi.

₁₄Sàlà menukai'ma, enpen wessaik uyàpù eyense pàk tachinpe kulu tùpo pùla. ₁₅Tùse uko'mamù yau, sàlà kaleta uya atta we'nàtok Katù munkà yamùk pe yekama màlà, màlà nulànan Katù sochiyi tau, ailon wakapuli molopai itessek yekama uya. ₁₆Ewaik lù'na'mà lù tetok pùn màlà ailon tetok kùuya'nokon eke kulu. Ichenpoikappù kappon pun yau, ailon pe iwechi yenpoikappù Wakù Akkwalù uya, molopai inchelù yamùk uya yeneppù. Kappon yamùk kùlottau Jesus yekale yekamappù màlà, tukkan kon kappon yamùk, wolù yawolon kon uya ailon teppù ipàk, molopai yanùmùppù epùn pona.