1 Timothy 4

₁Wakù Akkwalù uya yekamasak man ailon pe, tùulon kon kappon yamùk uya ailon tetok nonka pata wenukapù peiwa; ailon ton pen, kasei ton akkwalù maimu yawàlà tok wechi màlà molopai àliton akkwalù yamùk uya enupantok maimu yawàlà tok wechi màlà. ₂Sàlà enupantok màlà tùuyàssen kappon yamùk ennakannan kasei ton winà, molopai ittutok tok yewan uya welichak màlà, a'nek ayan nùpuluppù kasa. ₃Mùkyamlo walai non kappon yamùk uya enupan màlà, wemali'man wechi màlà ikasa pùla molopai yà'là yekkwa là kùyali màlà tùnassen pen, tukaik. Tùse Katù uya màlà sàlà yamùk kùyali konekappù ailon tawonnan molopai ailon ittunnan nùnapù pe tenki tukaik. ₄Tamù'nawolon Katù nùkonekappù màlà wakù; molopai tùnulunpasen pe pùla iwechi, tùse tamù'nawolon wechi màlà tanùnsen pe tenki tei'ma; ₅Masapùla Katù Maimu molopai àwàpùlematok uya ikussak màlà tùwanmùla inapù pa.

₆Sàlà yamùk usenupantok iwinà yekamasak auya ailon tawonnan pàk yau, wakù pe Jesus yapyoto pe tùwessen pe ewechi màlà, ailon itekale yau yemokkasak pe molopai wakù enupantok yawàlà iwessak pe. ₇Kappon yamùk mùkyamlo italumayiichan, ailon ton pen nà panton yekamannan, tùse màlà yamùk uya enupantok yawàlà kechii, Katù uya neken enupantok yawàlà ewechi pa esenupakà. ₈Ànù'là yenupa aitunpe utàntok pe wapùla wenkalunàtok màlà wakù molopai tepeppù kenan, tùse akkwalù yenupatok Katù wettok iche kasa màlà wakùiwa tamù'nawolon yau, masapùla wema'nàtok sàlà pe molopai ewanawolok yau tàwàlàlà wema'nàtok ke lepan tùuya tesak ya pàk. ₉Sàlà màlà ailon wa tetok, tanùnsen pe kulu iwechi. ₁₀Màlàpàk uchi sàlà wakù pe wema'nà'nokon molopai sa'man pe we'wotokoman nokon iche we'nà, masapùla enpen we'nàtok kon nonkasak nulànan Katù pàk tamù'nawolon kappon yamùk Pùikattànài, molopai mùkyamlo kulu ailon tawonnan pe nai'nannùk pàk pàk.

₁₁Sàlà yamùk pàk tok yekamappokà molopai sàlà pàk tok yenupakà. ₁₂Ànùklà tùma'le tukaikno eyentak mule pe là ewechi pàk, tùse ailon tawonnan uya yentok ipàkàlà pe ekkà, euselupatok yau, eyeselu yau, euchi'nùnmantok yau, ailon tetok auya yau, molopai wakù pe esuken, àli pùla ewettok yau. ₁₃Tamùkke kappon yamùk tipiliche Katù Maimu yenkà, itekale yekamakà, molopai tok yenupakà uyàpù ponalà. ₁₄Wakù Akkwalù uya lepantok ayau nai'nùk tapulàse pùla kùkkupùi, elepappù lùppù ike Katù Maimu yenpoikannan uselupappù ipàk lùppù molopai sochi yennàinan temyatù tùtai àpona. ₁₅Sàlà yamùk kupù pàk uchi ekkà. Ewemapù yawàlà ikukkà, tamù'nawolon kon uya Katù wettok iche kasa ewena yentoppe. ₁₆Tùttuik emakkà molopai kappon yamùk yenupatok auya ike yenkà wakù pe. Sàlà yamùk kupù pàk ekkà, masapùla ikupù auya yau ewepùikattà màlà àmàlà molopai eyetannan nàlà.