1Sàlà màlà kaleta Paul winàpaino, Christ Jesus neunokoppù Katù yeselu yawà nùmenukappù, molopai kùtonpa kon Timothy winàpaino.
Katù sochiyi Corinth pon piyak, molopai tamù'nawolon kon Katù ponalok kon kappon yamùk Achaia yawolon kon piyak inmenukappù.
2Tàwà Katù kùkàipùnù kon molopai Itepulu Jesus Christ elepai'nokon wakù pe we'nàtok molopai echitonpa pe we'nàtok ke.
Paul Uya Tenki Te Katù Pàk
3Tenki tepai'nokon uchi Katù Kùyepulu kon Jesus Christ Kàipùnù pàk, Kàipùnù kon, Katù tùsentuppasen tamù'nawolon ewan ipik uyàttok iwinàpai pàk! 4Ina yewan ipik mùkkàlà tamù'nawàlà ina talumattàtok yau, mùkyamlo yà'là yekkwa là wettalumattàntok yawà tùutàsan yewan ipittàtoppe ina uya, màlà ewan ipik Katù uya ina yewan ipittàppù lùppù ike ke. 5Tukkan Christ talumattàtok pùkkù pe ina wechi kasa làma, Christ yai nàlà ina yewan ipik wechi màlà tukke. 6Ina wettalumattà yau, eyewan kon ipik pe iwechi màlà molopai ewepùikattàtok kon iwinà pe. Ina yewan ipittàsak yau, eyewan kon ipik pe iwechi màlà talumattàntok ina nùpàlikappù yekkwa lùppù pàlika auya'nokon yau. 7Enpen ina wettok àpàkù'nokon meluntà pe man. Masapùla ina nùttuyan ina wettalumattàtok pùkkù pe ewechi kon kasa làma, ina yewan ipittàtok pùkkù pe nàlà ewechi kon màlà.
8Ina wettalumattàppù Asia po ittu auya'nokon iche ina man utonpa yamùk. Eke pe kulu wettalumattàntok wechippù ina po, ipàlika ina uya yentai, màlàpàk tùwelikù kon pe ina uya ittuppù. 9Ina yewan yau weli'nà pe ittuppù ina uya. Tùse sàlà wekkupùppù màlà tùpàkù'nokon enpen ina wechi tukaik, tùse Katù iwelichak kon wuluukanài pàk neken enpen ina wettoppe. 10Àsà kulu weli'nàtok yapai ina mokkappù Katù uya, molopai ina mokka ya màlà. Enpen ina wettok tùsak ina uya man ipàk ina mokkatukkatok ya pàk. 11Àwàpùlema kon winà nàlà ina ipùikattàtàk kon. Màlà kasaichi iwechi màlà àwàpùlematok kon ina pona useiku molopai Katù uya ina pùlema màlà, tukkan kon uya tenki te toppe ina pàkànsau.
Paul Wekkuttok Ikupù Pàk Wemyakanmatok
12Sàlà màlà ina yauchinapanài. Ina usenumenkatok nekamayan tamù'nawolon ina nùkupùppù sàlà wolù yau, ailon pe wakù pe ina wechippù ànù'là tennakaik pùla, ina welaikatok ewinàkàik nokon yau kulu. Ina wessak man enpen Katù pàk ina pùikattàtoppe ya, sàlà non pon yapàiketù ke pùla. 13-14Masapùla emenukanài'nokon ina enene kon molopai ànùttu kon neken pàk. Sàlà pe wakù pe ina ittu auya'nokon pen, tùse itepulu Jesus weyu yattai tamù'nawolon ittu auya'nokon màlà wakù pe. Ina yapulà kon pa, ina uya ayapulàkon kasa làma.
15Sàlà ittui'ma kulu akakklanpa kon pàk wekkupùppù wapiya, autauchinpa kon pa asak itekkwa. 16Masapùla akakklanpa kon pàk wekkussak man Macedonia pona utà pe molopai tu'ma wennapo pe upùkattàtok auya'nokon yau utàtoppe Judea pona. 17Sàlà kupù pàk wekkupù yau, usennaka pe na' mekamatantàu? Unkupù kupù uya yau na' iku'nài Iulà kappon kasa, “Ewaik, ewaik,” molopai “Kane, kane,” tetoppe uya màlà yattai lùppù? 18Katù wechi ailon pe kasa, ikupù uya tetok uya àpàkù'nokon wechippù màlà, “Ewaik” molopai “Kane” tawon pe pùla. 19Masapùla Jesus Christ, Katù Mumu, yekamasak lùppù àpàkù'nokon Silas, Timothy, molopai Iulà tawonnan nekamappù, mùkkàlà “Ewaik” molopai “Kane” tetok pen. Tùse làkku “Ewaik” mùkkàlà tàwàlàlà. 20Masapùla Christ uchi mùkkàlà “Ewaik” tetok Katù uya ikupù tùuya tetok yau. Sàlà wenai uchi Jesus Christ yau “Emen” te màlà, Katù yapulàtok iwinà pe. 21Masapùla Katù mùkkàlà ina ku'nài ailon pe kulu ina wettoppe, àpokon pe'nokon, wema'nàtok kù'nokon Christ yau pàk. Katù uchi mùkkàlà kùyamanàippù tùponaloppe. 22Mùkkàlà tùponaloppe we'nà'nokon yentok ipàkàlà tùnài kùpàkù'nokon, molopai Wakù Akkwalù ke kùlepanài'nokon kùyewan kon yak tamù'nawolon itesappe tùwettok lepantok tùuya kùponalok kon pe yentok ipàkàlà pe.
23Katù tekamappoyaik uyekamanài pe, uyewan ittunài mùkkàlà. Usentuppa àpàkù'nokon pàk “Corinth pona utà pen” teppù uya. 24Ailon tetok auya'nokon ipàk woton yekamaiche eyepulu kon pe ina wechi pen sàlà. Autauchinpatok kon ponaloppe làkku ina we'wotokoma sàlà àpokonpe'nokon, meluntà pe ewechi kon ailon tetok yau pàk.
