2 Corinthians 2

₁Màlàyau usenumenkappù sàlà pàk. Utà tukka pen màlà apyakù'nokon eyewankono'mase'nokon. ₂Masapùla eyewankono'ma kon uya pe iwechi yau, ànùk wechi ken molo uyewan yapon pe? Mùkyamlo neken kappon yamùk unewankono'massan wechi molo! ₃Màlàpàk uchi kaleta menukappù uya, apyakù'nokon uyàssak yau esewankono'mapai pùla wechi pàk mùkyamlo kappon yamùk uyauchinpanài pan kon winà. Masapùla ailon ukayaik, utauchinpa yau, tamù'nawàlà nàlà nen uchi autauchinpa kon. ₄Emenukappù kon uya eke pe kulu tùusewankono'mase molopai eme'neppe itewan, molopai eke pe itenu palu echii'ma, eyewankono'manài'nokon pe pùla, tùse eke pe tamù'nawàlà à'nùnma kon uya ittu kon pa.

₅Ànù'là uya tùulon ànù'là yewankono'masak yau, uwinàkàik ikussak pen màlà, tùse tamu'nawàlà ewinàkài'nokon, wa te uya sàlà sa'man pe kulu àsà pe eppai pùla wechi ipàk pàk. ₆Eichilà man pùsàlà kappon talumattàppù tamù'nawolon kon lùiwa lànen amyamlo winà. ₇Sàlà peichi, mesentuppatàik ipàk molopai itewan mipittàtàik, ippla kulu ichewankono'ma tukaik molopai iwe'nonka tukaik. ₈Apawanattàyatàu uchi Iulà, à'nùn kon pe kulu iwechi yekama kon pa ipàk. ₉Masapùla kaleta menukappù uya màlà apyakù'nokon ittuntok pàlikappù auya'nokon ànùttupai wechi pàk, molopai enupantok uya maimu yawàlà ewechi kon ànùttupai wechi pàk. ₁₀Kappon pàk eusentuppa kon àli inkupùppù pàkànsau yau, ipàk nàlà usentuppa màlà. Usentuppasak ipàk lùppù wechi yau, usentuppasak màlà àpàkànsau'nokon Christ yemloto po. ₁₁Settan uya kùyentaika kon tukaik, masapùla ikupù pàk iwekkuttok ittu'nokon man.

₁₂Troas pona welepansak Christ yekale yekamase yau, Itepulu uya asanta yakkokasak uponaloppe yepoloppù uya màlà. ₁₃Tùse utaimelunpappù kulu màlà, masapùla utonpa Titus yepoloppù uya pùla iwechi pàk molo. Màlàpàk kappon yamùk nàmàppù uya màlà màlà motau molopai Macedonia pona utàppù.

₁₄Tùse tàwà tenki tetok Katù pàk molo nechii! Masapùla Katù uya ina yalà màlà entaikantok yak Christ yai. Katù uya ina yai tekale yeunoko màttawàlà tùkà'nùnsen kà'nùmù i'nailàlà kasa. ₁₅Masapùla wakù pe tùkà'nùnsen tùpottàsen walainon ina Christ nùpottà Katù ponaloppe tùutàsen mùkyamlo tùwepùikatàsan piyak molopai àli pe we'nàtok yawon kon piyak. ₁₆Mùkyamlo àli pe we'nàtok yawon kon pona weli'nàtok màlà ikàtun, mùkyamlo tùwepùikattàsan pona wema'nàtok ne'nài màlà ikàtun. Ànùk ken sàlà yekkwa wotoko ku'nài yek pe nài? ₁₇Tukkan kon tùulon kon kappon yamùk walai non pen ina mùkyamlo Katù Maimu yapulànnan temamin molopai iche tùwettok kon yepotok tùuya'nokon iwinà pe neken, tùse Katù uya ina yeunossak pàk, tùuselupasan ina ailon pe itemlotopo, Christ yapyoto pe.