Yeunossak kon Wotokoyi 10

₁Kàyik wechippù molo Caesarea po Cornelius itesek. Mùkkàlà wechippù màlà Roman soichayi yamùk yepulu, Italy poino kon soicha yamùk yepulu. ₂Mùkkàlà molopai itùwùk tawon kon wechippù wakù pe. Katù namappù tok uya. Eke pe kulu yà'làlà kupùppù ya entuppa'nokon Jew yamùk pùikattà pe, molopai tàwàlàlà tùwàpùlemasen pe iwechippù Katù pàk. ₃Tewin wei 3 o'clock yattai we'neppà'nàtok walai yeneppù ya wakù pe, màlàyau Katù inchelùyi uyàpù yeneppù ya molopai ipàk, “Cornelius!” teppù ya. ₄Inchelù yenupàkà iwechippù tùusenalippai'ma molopai, “Yà'là pe nai, Uyepulu?” teppù ya. Inchelù uya imaimu yeikuppù, “Katù uya àwàpùlematok molopai entuppa'nokon lepa pàk ewe'wotokoma tok yanùnsak man, molopai eyittusak ya man. ₅Màlàpàk kàyik yamùk yeunokkà Joppa pona, kàyik Simon Peter itesek kà'mase. ₆Kamo pippà pàk tùwe'wotokomassen Simon itesek, tuna yena po tùwemassen yùwùk tau man, ikaklamu pe,” tukaik. ₇Màlàyau inchelù ipokonpe ichelupasak lùppù utàppù, molopai Cornelius uya asa'là tapyoto yamùk tùwùk tawon kon kà'mappù molopai soicha poitolù, wakù kàyik, tùwàpùlematok yawon. ₈Iwekkussak lùppù yekamappù ya tok pàk molopai tok yeunokoppù ya Joppa pona.

₉Yakon wei yattai te'ma kon tawà tok wechi tùse molopai Joppa winàkàik lùiwa là tok uyàssak tùse, Peter wenukuppù tapùi ipu pona àpùlemase, inakattapailà wei wechi tùse. ₁₀Iwapàkkapùppù molopai ata'lettàpai iwechippù; kàyali wekoneka tùse we'neppà'nàtok walai yeneppù ya màlà. ₁₁Epùn utakkokasak yeneppù ya molopai yà'là lànan eke lùmà assan walai iichensak nuttà asakùlà'nan ipana'mu pàk non pona. ₁₂Sàlà yau màlà tùpatalà'nan kon asakùlà'nan itta ton kamo yamùk wechippù, molopai tùwe'wolokasan, molopai tolon yamùk. ₁₃Mayin uya Peter pàk, “E'wuluukakà, Peter, ànwàkà molopai ata'lettàkà!” teppù. ₁₄Tùse Peter uya, “Kane, Uyepulu, wapùla! Yà'làlà àli tetok wapùla ene là yannàippù pen Iulà,” teppù. ₁₅Mayin uselupappù tu'ma ipokonpe, “Àli kùkai yà'làlà Katù nùkupùppù wakù pe pàk,” tukaik. ₁₆Sàlà wekkupùppù màlà àsolùwau itekkwa; molopai nen uchi tiwinampa yanùntukkappù kakàik epùn pona.

₁₇Peter utaimelunpasak kulu wechippù sàlà tùneneppù we'neppà'nàtok walai pàk, yà'làlà yekamanài pe ittuiche. Màlà yattai Cornelius neunokossan uya Simon yùwùk ittuppù, i'nailà là iwechi tekamappose, molopai nàlà satippe tok wechippù kulala mùlatta po. ₁₈Tok wentaimeppù molopai tapùi yesak yekamappoppù tok uya, “Kaklan na' talà nai, Simon Peter itesek?” tukaik. ₁₉Peter wechippù lùppù we'neppà'nàtok walai wechi yà'làlà yekamanài pe ittuiche tùse, Wakù Akkwalù uya, “Yetakà! Àsolùwawon kon kàyik yamùk talà man eyiwayan tok,” teppù. ₂₀“Màlàpàk à'mùssakkakà molopai àwuttàkà, molopai tok ya'là itàpai pùla kechii, masapùla tok yeunossak uya màlà,” teppù ya. ₂₁Màlàyau Peter uttàppù molopai tok pàk, “Iulà mùkkàlà mùwayatài'nùk. Yà'là pe iwechi pàk àuyàssak kon màlà?” teppù. ₂₂“Roman soichayi yepulu Cornelius uya ina yeunossak sàlà,” tukaik, tok uya imaimu yeikuppù. “Wakù mùkkàlà kàyik Katù namanài eke, tùnamasen tamù'nawolon kon Jew yamùk nùnama. Wakù inchelù uya yekamappù màlà àkà'matoppe ya tùwùk tak, yà'là te là auya yetatoppe tùuya,” teppù kàyik yamùk uya. ₂₃Peter uya kàyik yamùk yewonnùpùppù molo tok wettoppe màlà yewalupàyi tau.

Iwemassak pe iwessalattàppù tok ya'là iitàppù; molopai itepulu ya'lon kon tonpa yamùk Joppa pon kon utàppù nàlà ya'là. ₂₄Ite'mappù pokon wei yattai iwelepamùppù Caesarea pona, Cornelius uya tùmàmuttok motak, tamùkke tùtonpa yamùk molopai tùwechi yakon non tùnkà'massan pokonpe. ₂₅Peter wewomù tùse, Cornelius uya yepoloppù, molopai iwettolùpattàppù itta piyau molopai iwepeimappù itemlotopo yapulài'ma. ₂₆Tùse Peter uya iwe'wuluuka toppe ikupùppù, “E'wuluukakà, Iulà nàlà nen mùkkàlà kàyik,” teppù ya. ₂₇Peter uselupappù lùppù màlà Cornelius pokonpe itùwùk tak tùutà pe; molo tukke kappon yamùk wepilichak yepoloppù ya. ₂₈Peter uya tok pàk, “Tamù'nawolon kon amyamlo nùttuyan law yawàlà pùla Jew yamùk wechi Jew yamùk pen pokonpe echitonpa pe molopai tok kaklanpa tok uya wechi. Tùse Katù uya upàk yekamasak man ànù'là pàk àli wapùla wakù pen te uya tukaik,” teppù. ₂₉“Màlàpàk uyennàinan yeunossak auya yau uyàpùi, yà'làlà tukaik pùla. Màlàpàk eyekamapoyan nen uchi Iulà, yà'là pe iwechi pàk uyennài nan yeunossak auya màlà?” tukaik.

₃₀Cornelius uya, “3 o'clock yattai, asakùlà'ne wei utàppù man wàpùlema pàk wettai uyùwùk tau wei welattàsak pe ko'man pe wàpùlemantok yattai. Kàyik wepontàsak enkek pon yak nùsenpoikatai asse'ne uyemloto po. ₃₁Molopai, ‘Cornelius! Katù uya àwàpùlematok yetasak man molopai wakù pe entuppa'nokon lepa pàk ewe'wotokomatok ittusak ya man. ₃₂Kappon yeunokkà Joppa pona kàyik kà'mase Simon Peter itesek. Simon kamo pippà iwotokoyi tuna yena po tùwemassen kaklamu pe man,’ nùkatai upàk. ₃₃Màlàpàk asse'ne eyennài nan teunottai, molopai wakù pe kulu ewessak man àuyàpù pàk. Sàlà pe nen uchi tamù'nawàlà talà we'nà man Katù yemloto po, yà'làlà Itepulu Katù nekamappù yekamapa, màmuku pàk yeta toppe,” teppù ya Peter pàk.

₃₄Peter wessa'molùkappù tùuselupa pàk. “Tùttuyaik nen uchi ailon pe iwechi Katù uya ekkaichalà tamù'nawolon kon kappon yamùk kupù. ₃₅Ànù'là inamanài molopai iwalai ku'nài wechi màlà inanùmù pe, i'nailà pailà iyàssak pe tùse. ₃₆Mùttuyatàik itekale ineunokoppù kappon yamùk Israel pon kon piyak, Wakù Itekale wàlàkka'nàtok yekama pe Jesus Christ yai. Mùkkàlà tamù'nawolon kon Yepulu. ₃₇Mùttuyatàik màlà iwekkussak lùppù tamù'nawàlà Judea yawàlà Galilee poi tùwepyattàik, usenpataukantok, John nekamappù ye'mappù tak. ₃₈Mùttuyatàik Katù uya Wakù Akkwalù molopai meluntà tùlùppù Jesus, Nazareth pon pona. Iitàppù mailàlà wakù kupù pe, Makui meluntàlù yo'non kon ipittà pe, masapùla Katù wechippù ya'là. ₃₉Ina mùkyamlo tamù'nawolon inkupùssan Jew yamùk patassek yau molopai Jerusalem po yekaman nan. Tok uya iwànàppù, tùpukapàsse yei pona. ₄₀Tùse Katù uya weli'nàtok yapai iwuluukappù icholùwano wei yattai molopai iichenpoika toppe ikupùppù ya. ₄₁Tamù'nawolon kon kappon yamùk uya yeneppù pen màlà, tùse ina neken Katù uya iwuluukasak weli'nàtok yapai yekaman nan pe Katù nanùmùssan. Ina uta'lettàppù molopai tinchisen inchippù ina uya ipokonpe, Katù uya iwelichak wuluukasak ye'mappù tak. ₄₂Molopai ina yapyontàppù ya kappon yamùk pàk itekale yekama pàk, imàlà wechi Katù nanùmùppù pe nulà nan kon molopai iwelichak kon ittunài pe iwettoppe yekama toppe ina uya. ₄₃Tamù'nawàlà Katù Maimu yenpoikannan uselupasak màlà ipàk, ànù'là ailon tawon ipàk uya màlà usentuppantok tùmakuyi pàk yepolo itesek yapàikketù yai,” teppù Peter uya tok pàk.

₄₄Peter uselupa lùppù tùse, Wakù Akkwalù uttàppù tamù'nawolon kon itekale yetan nan pona. ₄₅Jew yamùk ailon tawonnan, Joppa poi iyàssak kon Peter ya'là usenumenkappù kulu màlà masapùla Katù uya lepantok tùuya Wakù Akkwalù tùsak Jew yamùk pen pona nàlà pàk. ₄₆Masapùla tok uselupa tùpatalo'nan mayin yau yetappù tok uya, molopai Katù wettok eke pe yapulàppù tok uya.

Màlà yattai Peter uselupappù: ₄₇“Pùsamlo kappon yamùk uya Wakù Akkwalù yanùnsak man, yanùmù nettai nùk kasa làma. Ànù'là uya ken na' tok yeleutanàppù tok usenpataukatok tuna ke winàpai?” tukaik. ₄₈Màlàyau tok usenpatauka toppe ikupùppù ya Jesus Christ yesek yai. Màlàyau tok uya yekamappoppù tùpyau'nokon iwettoppe mala là.