Yeunossak kon Wotokoyi 9

₁Màlà yattai Saul wechippù àsà pe tùusàulàma pàk Itepulu ya'lonkon winàkàik, tok àntùkkapai tùwechi pàk. Iitàppù Eke kulu paatele piyak ₂molopai kaleta menukasak Jew yamùk wepilittok itak Damascus pon piyak yennappù ya; ànù'là Itepulu Jesus yeselu yawàlà tùwessen yeposak tùuya molo yau, yachi toppe tùuya, asakklàma kàyik yamùk molopai nossan yamùk molopai tok yatoppe tùuya Jerusalem pona.

₃Damascus pona iità yau, mei pùla là pata piyak iwenasak yau, asse'ne kaupai akkwa ulenpamùppù tamù'nawàlà iwoi. ₄Iwekkawai'mappù non pona molopai mayin uya telupa yetappù ya, “Saul, Saul! Yà'là pe iwechi pàk utalumattà auya màlà?” tukaik. ₅“Ànùk ken àmàlà, uyepulu?” tukaik, Saul uya yekamappoppù. “Jesus Iulà, mùtalumattàyai'nùk,” teppù mayin uya. ₆“Tùse e'wuluukakà molopai itàkà pata yak, molo ànkupù yekama màlà,” teppù mayin uya. ₇Sàlà yattai kàyik yamùk Saul ya'là tùutàsan weleutasak wechippù satippe tok upakotasak, tok uya mayin yetappù tùse ànù'là yeneppù tok uya pen. ₈Saul we'wuluukappù non poi molopai tenu yakkokappù ya, tùse yà'làlà yene ya pùla iwechippù. Màlàpàk tok uya yachippù itemyatù pàk, molopai yalàppù tok uya Damascus pona. ₉Àsolùwau wei en pùla iwechippù, molopai màlà yattai iita'lettàppù pen molopai yà'làlà inchippù ya pen.

₁₀Jesus ya'lon wechippù màlà molo Damascus po Ananias itesek. We'neppà'nàtok walai yeneppù ya màlà, sàlà yau Itepulu Jesus uya ipàk, “Ananias!” teppù. “Talà wessaik, Itepulu,” tukaik yeikuppù ya. ₁₁Itepulu uya ipàk, “Itàkà, Tossalon tukaik tesassen asanta tawà, molopai Judas yùwùk tau kàyik Tarsus pon Saul itesek mekamappoik. Nàpùlemayan. ₁₂Molopai we'neppà'nàtok walai yau kàyik Ananias itesek uyàpù yeneppù ya man temyatù nonkase tùpona yentoppe tu'ma tùuya,” teppù ya. ₁₃Ananias uya yeikuppù, “Uyepulu, tukkan kon uya pùsàlà pàk uyelupasa'man, tamù'nawàlà àli ton inkupùssan àponalok kon kappon yamùk Jerusalem pon kon winàkàik pàk. ₁₄Molopai iyàssak màlà Damascus pona, eke ton paatele yamùk yepulu ton winàpai tapàikketù tepose, molopai tamù'nawàlà eyesek yesa'nài nan yachise,” tukaik. ₁₅Tùse Itepulu Jesus uya, “Itàkà, masapùla yanùnsak uya màlà uyapyoto pe iwettoppe uyesek yekama toppe ya Jew yamùk pen pàk molopai tok kinù yamùk pàk molopai Israel pon kon pàk. ₁₆Molopai Iulà uya nàlà yekama màlà ipàk tamù'nawolon iwettalumattàtok uponaloppe,” teppù.

₁₇Màlàpàk Ananias utàppù, iwewomùppù tapùi tak molopai temyatù tùlùppù ya Saul pona. “Utonpa Saul, Itepulu uya uyeunossak sàlà, Jesus uya. Mùkkàlà mentai nùk asantau àuyàpù sàlà motak yau. Uyeunossak ya sàlà yene pa tu'ma, molopai Wakù Akkwalù ke awanùppù pa,” teppù ya. ₁₈Màlà yattai molok pippà walainon wessolokappù Saul yenu yamùk yapai molopai yennài pe tu'ma iwenappù màlà. Iwe'wuluukappù molopai Ananias uya yenpataukappù, ₁₉molopai tùuta'lettà tùpo inmeluntàtappù.

Saul wechippù Itepulu ya'lon kon piyau Damascus po tachin pe lùkwà là. ₂₀Màlà pe là itekale yekamappù ya Jew yamùk wepilittok itak yamùk tau “Jesus mùkkàlà Katù Mumu,” teppù ya. ₂₁Tamù'nawolon kon yetan nan nùssan usenumenkappù kulu màlà molopai tok usekamappopàtùppù, “Pùsàlà pen ken na' uchi mùkkàlà kàyik sàlà esek kà'man nan yaimelunpanài lùppù Jerusalem po? Molopai iyàpùppù pen ken na' sàlà motak màlà kusse tok yachise molopai tok yase eke ton paatele yamùk yepulu ton piyak?” tukaik.

₂₂Tùse Saul wenappù meluntà peiwa, molopai Jesus wechi Christ pe yekamatok ya uya Jew yamùk Damascus po tùwemassan yaimelunpasak uya yeiku pùla iwechippù.

₂₃Tukke wei utà tùpo Jew yamùk wepilipùppù molopai Saul wàtoppe tùuya'nokon tok wekkupùppù. ₂₄Tùse tùwànà pàk tok wekkussak yetappù ya. Wei kaichalà molopai ewalupàttawàlà tok wechippù pata mùlatta yenupàkà yeneiche, iwàtoppe tùuya'nokon. ₂₅Tùse tewin nà ewalupà yattai Saul ya'lon kon uya yalàppù molopai tok uya inuttàppù pata we'na wechi teuta ke yai walicha yau.

₂₆Jerusalem pona tùutàsak yau Jesus ya'lon kon kùlottau tùwechi iche iwechippù. Tùse tok uya ailon te pùla iwechippù yà'là kasa là Jesus ya'lon nà pe iwechi, tamù'nawàlà tok usenalipappù ipàk. ₂₇Màlàyau Barnabas uya yalàppù yeunossak kon piyak. Barnabas uya yekamappù tok pàk Saul uya Itepulu Jesus yeneppù asantau, molopai Itepulu Jesus uya yelupappù. Molopai Saul uya Itekale yekamappù tùsenalippaik pùla Jesus yesek yau Damascus po yekamappù ya. ₂₈Màlàpàk Saul wechippù tok piyau molopai iitàpàtùppù tok kùlottak Jerusalem po tùwanmùla. Meluntà pe Itepulu Jesus yesek yau Wakù Itekale yekama pe. ₂₉Jew yamùk Greek pe tùuselupasan pokonpe nàlà ichelupappù, molopai tok yeippàtùppù ya, tùse tok wechippù iwànàiche. ₃₀Ailon tawon nan uya yetasak tùuya'nokon yau, Saul yalàppù Caesarea pona molopai tok uya yeunokoppù Tarsus pona.

₃₁Màlàyau sàlà kasa iwechippù màlà tamù'nawàlà Judea yawàlà, Galilee molopai Samaria yawolon kon sochi yamùk wechippù wàlàkka'nàtok yau. Meluntà pe tok wenappù molopai tukke tok wenappù, Wakù Akkwalù uya tùpùikattàse, tùwemapùi'ma nokon Itepulu Jesus namatok yau.

₃₂Peter utàppù mailàlà, Katù ponalok kon kappon yamùk Lydda po tùwemassan kaklanpaik iitàppù màlà. ₃₃Molo kàyik yepoloppù ya Aeneas itesek, iitokkassak molopai tekwek tapai iwuttà pùla iwechippù màlà 8 pe kilichimochi. ₃₄“Aeneas, Jesus Christ uya eyipittà màlà. E'wuluukakà molopai eyekwek ikonekakà,” teppù Peter uya ipàk. Asse'ne Aeneas we'wuluukappù. ₃₅Tamù'nawolon kon kappon yamùk tùwemassan Lydda po molopai Sharon po uya yeneppù molopai tok welattàppù Itepulu Jesus winàkàik.

₃₆Joppa po nossan wechippù màlà Tabitha itesek, mùkkàlà ailon tawon. Itesek Greek yau màlà Dorcas. Tàwàlàlà wakù kupù pàk iweppàtùppù molopai entuppa'nokon pùikattà pàk. ₃₇Màlà yattai e'nek pe iwenappù, molopai iwelikùppù. Ekek kukasak wechippù màlà molopai inonkasak wechippù kawonpan tapùi tak. ₃₈Joppa wechippù màlà mei kulu pùla Lydda poi, molopai ailon tawonnan uya Peter wechi Lydda po yetasak tùuya'nokon yau, asa'là kàyik yamùk yeunokoppù tok uya ipyak, tùmaimu kon yekamase, “Asse'ne tàwà àikkà ina piyak,” teppù tok uya. ₃₉Màlàpàk Peter utàppù tok ya'là. Iwelepansak yau tok uya yalàppù kawonpan tapùi we'wakkàtok tak. Itayappù iwelichak kon nùssan wepilipùppù Peter woi, tùkalawùi'ma'nokon pon yepoino molopai pon yamùk yenpoikappù tok uya itemyak, pàli'yau tùwechi yau Dorcas nùkonekapàtùssan. ₄₀Tamù'nawàlà Peter uya tok yenpakkappù polo pona, màlà iwakkàssak tapùi tapai, molopai tese'mu yok iwenappù molopai iwàpùlemappù. Màlà tùpo iwelattàppù ekek winàkàik molopai, “Tabitha, e'wuluukakà!” teppù ya. Iwàssànkappù ya, molopai Peter yensak tùuya yau iwe'wuluukappù chichiu pe. ₄₁Peter usenkappù ipùikattàse iwe'wuluuka tùse. Màlàyau Katù ponlok kon molopai itayappù iwelichak kon nùssan kà'mappù ya molopai itùlùppù ya pàli'yau tok yemyak. ₄₂Sàlà yekale usetappù màlà tamù'nawàlà Joppa polo, molopai tukkan kon kappon yamùk uya ailon teppù Itepulu Jesus pàk. ₄₃Peter wechippù màlà Joppa po tukke wei kàyik Simon itesek, kamo pippà koneka iwotokoyi piyau.