Yeunossak kon Wotokoyi 19

₁Apollos wechi Corinth po tùse, Paul utàppù màlà pata yamùk yawàlà palau yena winàpai molopai iwelepamùppù Ephesus pona. Molo Jesus ya'lon kon yepoloppù ya màlà. ₂Tok yekamappoppù ya, “Wakù Akkwalù na' manùntantàu ailon tawonnan pe ewenasak kon yau?” tukaik. “Wakù Akkwalù wechi molo yekale yetasak là ina uya pùla man,” tukaik tok uya imaimu yeikuppù. ₃“Yà'là yekkwa ken uchi usenpataukantok manùntantàu?” tukaik Paul uya tok yekamappoppù. “John uya enpataukantok,” tukaik tok uya yeikuppù. ₄Paul uya: “John uya enpataukantok màlà mùkyamlo tùmakuyi kon winàpai iwelattàsak kon ponalok, molopai John uya yekamappù kappon yamùk pàk, ailon tetoppe tok uya te'mappù pàk tùuyàssen Jesus Christ pàk,” teppù. ₅Sàlà yetasak tùuya'nokon yau, tok usenpataukappù màlà Itepulu Jesus yesek yau. ₆Paul uya temyatù tùlùppù tok pona, màlàyau Wakù Akkwalù uttàppù tok pona. Molopai tok uselupappù tùulon mayin yamùk yau molopai nàlà tok uya Katù Maimu yenpoikappù. ₇12 pe kàyik yamùk wechippù màlà tamù'nawàlà.

₈Paul utàppù màlà Jew yamùk wepilittok itak tak, molopai àsolùwau kapùi kaichalà ichelupappù kappon yamùk pokonpe, tùwettalipaik pùla meluntà pe, molopai Katù wettok itepulu pe yekamappù ya tok pàk. Ailon tetoppe tok uya. ₉Tùse tùulon kon wechippù màlà sa'man pe molopai ailon te tok uya pùla iwechippù. Molopai àli pe tok uselupappù Itepulu Jesus yeselu pàk tukkan kon kappon yamùk yemloto po. Màlàpàk Paul uya tok nàmàppù molopai ailon tawonnan yalàppù ya ta'là molopai tok yenupappù ya wei kaichalà Tyrannus uya enupan yùwùk tau. ₁₀Sàlà kasa iwechippù màlà asa'là kilichimochi, màlàpàk tamù'nawolon kon Asia yawolon kon pata yamùk yau tùwemassan, asakklàma Jew yamùk molopai Jew yamùk pen uya Katù Maimu yetappù.

₁₁Katù uya eke ton yà'là yekkwa ton nà kappon nùkupù yentaino kon kupùppù Paul yai. ₁₂Paul yappà'nàinanùssan enkicha yamùk molopai pon yamùk yalàppù màlà e'nek ton piyak, màlàyau tok yepalan uchipittàppù màlà molopai àli akkwalù yamùk wepakkappù màlà tok yapai. ₁₃Tùse tùulon kon Jew yamùk tùusalà kon pàk tùwessan molopai àli akkwalù yenpakkanài nan wechippù nàlà Jesus yesek yapulàiche màlà kuttoppe tùuya'nokon. Tok uya àli akkwalù pàk, “Epakkatàk kon nùkayan ina àpàkù'nokon Jesus, Paul nekamayai'nùk yesek yau,” teppù. ₁₄Sàlà ku'nài nan wechippù màlà 7 pan kon, Jew eke paatele Sceva itesek munkà pe. ₁₅Tùse àli akkwalù uya tok pàk, “Jesus mùkkàlà unùttu molopai Paul nàlà mùkkàlà unùttu, tùse ànùk yan ken amyamlo?” teppù. ₁₆Kàyik àli akkwalù yen waplùmùppù àsà pe tok pona, molopai tok yentaikappù ya. Tok wepeppù màlà itùwùk tapai tùumattase ipon pùla. ₁₇Tamù'nawàlà Jew yamùk molopai Jew yamùk pen Ephesus po tùwemassan uya sàlà yetappù màlà. Tok usenalipappù molopai Itepulu Jesus yesek yapulàppù molopai inamappù tok uya màlà eke pe. ₁₈Tukke ailon tawonnan Jesus pàk uyàpùppù màlà tùnkupùppù kon lùppù molopai tùusewankono'matok kon yekamase ayupo. ₁₉Tukke piyassan nùkupù walai ku'nài nan uya tùkaletayi kon nepùppù tamùkke molopai tok uya ipottàppù tamù'nawolon kon yemloto po. Tok uya kaleta yepek ittuppù, màlàyau tamù'nawàlà iyàpùppù 50,000 kaichalà pùlayatta chilùpa pun. ₂₀Sàlà kasa meluntà pe Katù Maimu utalenkappù màlà molopai meluntà pe iwenappù.

₂₁Sàlà wekkupù tùpo Paul wekkupùppù tùutà pàk Wakù Akkwalù yau Macedonia molopai Achaia polo molopai miya Jerusalem pona. “Màlà motak utà tùpo Rome yense nàlà utà màlà,” teppù ya. ₂₂Màlàpàk Timothy molopai Erastus tawonnan tùpùikattàn nan yeunokoppù ya Macedonia pona. Molo lùiwa Asia yawolon pata yamùk yau iiko'mamùppù.

₂₃Sàlà yattai màlà àsà utaimelunpantok wechippù Ephesus po, Itepulu Jesus yeselu wenai. ₂₄Kàyik Demetrius itesek chilùpa pàk tùwe'wotokomasen uya, màlà chilùpa ke nossan katù Artemis yùwùk pe tukaik lùkkwà ikonekappù molopai sàlà iwotokoyi uya eke pe tùwe'wotokomasan pùlayattayittàppù. ₂₅Màlàpàk tok kà'mappù ya tamùkke, tùulon kon walai non nùn nàlà iwotokoyi ton pokonpe, molopai tok pàk: “Kàyik yamùk, mùttuyatàik sàlà eke pe pùlayattappe we'nàtok uyàppù sàlà wotoko winà. ₂₆Menyatàik molopai metayatàik pùsàlà Paul nùkussai'nùk. Kappon yamùk nùkonekasan katù yamùk mùkyamlo katù yamùk pen te ya, molopai tukke kappon yamùk uya ailon te toppe ikukkassak ya man, asakklàma talà Ephesus po molopai tamù'nawàlà làiwa lànen Asia yawolon pata yamùk po. ₂₇Sàlà kùwotokoyi kon uya lànen àli tesek yepolo pe man. Màlà pe neken pùla katù Artemis yùwùk wechi kupù nàlà màlà yà'là woton pe pùla. Molopai eke pe nàlà iwettok umatta màlà. Mùkkàlà tamù'nawolon kon Asia pon kon molopai tamù'nawàlà non pon kon wepeimatok ipàk!” teppù.

₂₈Yetasak tùuya'nokon yau, tok we'naikasak wechippù àsà pe molopai tok wentaimeppù, “Eke mùkkàlà Artemis, Ephesus pon!” tukaik. ₂₉Tok wessakolopasak wechippù tamù'nawàlà pata yau. Tamùkke àsà pe tùwessan wepilichak uya Gaius molopai Aristarchus tawonnan Macedonia pon kon yachippù, Paul ya'là tùutàsan molopai tok uya tok yalàppù aitun pe tamùkke wepili'nàtok patassek yak. ₃₀Paul wechippù itàpai tùmàlà pe tukkan kon kappon yamùk yemloto pona, tùse Jesus ya'lon kon uya kane teppù. ₃₁Eke pata yesak tonpa yamùk Ephesus pon, iwechi yakon pe tùwessan uya nàlà tùmaimu kon yeunokoppù ipyak, wepili'nàtok itak tak iità tukaik ipawanattàik. ₃₂Màlà yattai tukkan kon kappon yamùk utaimelunpasak wechippù masapùla tùulon kon kappon yamùk wentaimeppù yà'làlà tukaik. Molopai tùulon kon wentaimeppù tùulon pe, Molopai tukkan kon uya yà'là yense là tùwepilichak kon ittu pùla iwechippù. ₃₃Jews tonpa yamùk uya Alexander tùikappù tukkan kon kappon yamùk kùlottapai tok yemloto pona. Alexander uya tok yekamappoppù temyatù ke eppana tok wettoppe, molopai tùwenai tùuselupaiche iwechippù kappon yamùk yemloto po. ₃₄Tùse Jew pe iwechi ittusak tùuya'nokon yau, tamù'nawàlà tok wentaimepàtùppù 2 hours “Eke mùkkàlà nossan katù Artemis Ephesus pon,” tukaik.

₃₅Màlà yau nen uchi Pata yesak pùikattànài uya tukkan kon kappon yamùk yepaka'nùpùppù màlà, “Ephesus pon kon kappon yamùk, tamù'nawolon kon nùttuyan, Ephesus wechi eke Artemis pàk wàpùleman yùwùk patassek pe molopai tùnamasen tàk iwepukasak lùppù kau pai wechi molo. ₃₆Ànù'là uya ewetapamù tetok pùla iwechi màlà, màlàpàk eppana ettàk kon molopai àsà pe kettàu. ₃₇Pùsamo kàyik yamùk nessak auya'nokon man sàlà motak, katù yùwùk yama'masak tok uya wapùla yà'là tesa'là tok uya àli pe pùla tùse, nossan kùkatùyi kon pàk. ₃₈Demetrius molopai iwe'wotokoma tonpa yamùk uselupatok ànù'là winàkàik wechi molo yau, eke ton molo man molopai wekkotùmantok molo man, molopai tok uselupa màlà molo ànù'là winàkàik. ₃₉Tùse iche ewettok kon yentaino wechi molo yau, ikoneka màlà tùulon nà iwalai pata yawon kon wepilichak pokonpe. ₄₀Àsà yau màichi we'nà'nokon man tà ekamappopà'nàtok yau, màlà àsà sàlà pe nekkupàssai'nùk pàkànsau. Yà'là kasa là kùwenai we'nàtok kon pùla man law yawàla pùla sàlà utaimelunpantok wekkusak pàk, molopai wakù là sà kasa iwechi pàk tetok woton pùla man,” teppù ya. ₄₁Wa te tùpo tok nonkappù ya.