Macedonia Molopai Achaia Pona Paul Utàtok
1Utaimelunpantok tùpo, Paul uya Jesus ya'lon kon kà'mappù tamùkke molopai tok meluntàlùnpappù ya. Tok nàmàppù ya molopai iitàppù Macedonia pona. 2Iitàppù, màlà yawolon kon nà pata yamùk yawàlà molopai kappon yamùk meluntàpappù ya kulu. Molopai iitàppù Greece pona. 3Molo iwechippù àsolùwau kapùi. Iwekonekappù màlà tuna polo Syria pona tùutà toppe, tùse Jew yamùk wekkussak tùwànà pàk yetappù ya màlà, màlàpàk Macedonia yawàlà tùwennappo pàk iwekkupùppù. 4Sopater, Phyrrhus mumu Berea pon, utàppù ya'là, Aristarchus molopai Secundus tawonnan tu'ma Thessalonica pon kon, Gaius Derbe pon, Timothy, Tychicus molopai Trophimus tawonnan Asia pon kon utàppù màlà ya'là. 5Tok utàppù màlà wapiya molopai ina màmukuppù tok uya Troas po. 6Ina utàppù màlà tuna po Philippi poi Iwapuluwetasak pen pùlomù pusak pàk Uta'lettàntok tùpo, molopai 5 pe wei tùpo ina uya molo tok yepoloppù Troas po. Molo tewin Suntayaka ina uko'mamùppù.
Paul uya tewin itekkwalok pe Troas Kaklanpatok
7Suntayakka yattai, ina wepilipùppù tamùkke pùlomù pusak pilipàsak pàk ata'lettàsse. Paul uya kappon yamùk yelupappù molopai tùuselupa pàk iwechippù anomlak ponalà, masapùla iwemassak yau tùutà pàk. 8Tukke lanppu yamùk pottàsak wechippù màlà kawon pan tau, ina wepilittok yau. 9Umoine Eutychus itesek wechippù màlà chichiu pe winto po. Paul wechi tùuselupa pàk tachinpe tùse Eutychus wenappù ewe'nùnpàpai, iwe'nùnpàtùppù, molopai nen uchi iwe'nùnkapùppù, màlàyau iwepukappù icholùwano kawon pan tapùi pùlankayi poi non pona. Tok uya yanùmùppù, màlàyau iwelichak wechippù. 10Tùse Paul uttàppù molopai ipona iwàpàppù molopai yachippù ya. “Kataimelunpatàu, pàli'yau lùppù man!” teppù ya tok pàk. 11Màlà tùpo iwennappoppù kakàik kawon pan tak molopai pùlomù pusak pilikappù ya molopai iita'lettàppù. Tachin pe wei wepakka tepose tok yelupa tùpo, Paul utàppù. 12Tok uya umoine yemeikkappù pàli'yau, molopai tok yewan uchipittàsak wechippù kulu màlà.
Troas Poi Miletus Pona
13Ina utàppù wapiya kanau yak, molopai ina utàppù Assos pona tuna po; molo Paul yanùntoppe tùuya'nokon, watesak ya pàk, masapùla tùutà màlà motak non polo pàk. 14Ina yeposak ya Assos po yau, yanùmùppù ina uya molopai ina utàppù Mitylene pona. 15Molopai ina utàppù tuna polo molopai yakon wei yattai ina welepamùppù Chios yessumla. Tewin wei tùpo ina uyàpùppù Samos pona, màlà ewanawàlà ina uya Miletus yepoloppù. 16Paul wekkupùppù màlà Ephesus po tùweleutaik pùla tùutà pàk. Masapùla Asia yawolon nà pata yau tùuko'mamà iche pùla tùwechi pàk. Ichemittàpappù Jerusalem pona tùwelepamùichek, Pentecost pàk Uta'lettàntok yattai.
Eichilà Tetok Paul Uya Sochi Yennàinan Ephesus Pon Kon Pàk
17Paul uya tùmaimu yeunokoppù Miletus poi Ephesus pona, sochi yennàinan utàtoppe tepose. 18Tok welepansak yau tok pàk, “Mùttuyatàik yà'là kasa là wemapùppù, apyau'nokon wechi yau wapiya welepamùppù Asia yawon pata yak motapai. 19Tamù'nawàlà àssà'mùla we'nàtok yau molopai eke pe itenu palu uwotokoyi kupùppù uya Itepulu Jesus yapyoto pe, sa'man ton uyàssak Jew yamùk wekkussak upàk winà. 20Mùttuyatàik yà'làlà àpùikattànài'nokon pe tùwessen pùnùnmappù uya pùla iwechi ewinàpai'nokon, itekale yekama uya yau, molopai eyenupa kon uya yau wepili'nàtok itak tau, molopai apatassek kon yau'ne. 21Asakklàma Jew yamùk molopai Jew yamùk pen panama pe kulu tok yelupappù uya, tok welattà toppe tùmakuyi kon winàpai Katù winàkàik, molopai ailon te toppe tok uya Kùyepulu kon Jesus pàk. 22Sàlà nen uchi, Wakù Akkwalù Maimu yawàlà utà Jerusalem pona, molo yà'là pe là wechi ittui'ma pùla. 23Tùttuyaik neken Wakù Akkwalù uya yekamasak kulu man upàk tamù'nawàlà pata yamùk yau patikichi uya molopai wettalumattàntok uya umàmuku. 24Tùse wemattok tùkussaik yà'là pe pùla là, uwotokoyi yenuka'nùttoppe uya, molopai wotoko Itepulu Jesus uya ulepatok unkupùpe kutoppe uya, màlà Wakù Itekale tekamasen wakù pe Katù wettok yekama toppe uya.
25“Utàppù man tamù'nawàlà àkklottawàlà'nokon Katù wettok itepulu pe yekama pe. Molopai tùttuyaik sàlà pe ànù'là uya uyentu'ma pe pùla iwechi. 26Màlàpàk yekama uya sàlà àpàkù'nokon, sàlà wei yattai. Wàkù pe wechi sàlà tamù'nawolon pàk. Ànù'là wettalumattà toppe iku'nàippù pe pùla. 27Masapùla tamù'nawolon Katù yeselu yekamappù uya àpàkù'nokon. 28Amyamlo pe esentàk kon molopai tamù'nawàlà kalinilu yamùk anmainanpa kon pe Wakù Akkwalù nùtùlùssan yentàk kon. Kalinilu yesan kasa, Katù sochiyi tawon kon yewettàk kon, tùponaloppe ine'massan tùmu mùnù yai. 29Masapùla tùttuyaik ànàmà kon uya tùpo, àsà ton ene yamùk uyàpù màlà àkklottakù'nokon, molopai tok uya Katù kaliniluyi yamùk, mattanùpù màlà. 30Àtonpa kon yamùk là wettok kasei pe woton, molopai Jesus ya'lon kon lattà tok uya màlà tùpàkàlà'nokon. 31Enpen uchi ettàk kon, molopai ittutàk kon eke pe uyenu palu pokonpe, weinai molopai ewalupàttawàlà, tamù'nawàlà tewinpàk eyenupatantàu Iulà àsolùwau kilichimochi.
32“Sàlà nen uchi ànonka kon uya Katù yemyak wakù pe imaimu wettok yak. Eyemokkanài pe iwechi màlà molopai elepaya màlà enepolo ke tamù'nawolon kon esuken iwekonkasak kon kùlottau. 33Ànù'là chilùpayi, wapùla ikolùyi, wapùla ipon nà iche useka'nonkasak pùla man. 34Amyamlo nùttuyan we'wotokomappù sà yamùk uyemyatù ke, molopai tamù'nawàlà iche kulu wettok molopai upyawon kon wettok iche yepotoppe uya. 35Yenpoikasak uya man tùpatalo'nan yau àpàkù'nokon sàlà kasa sa'man pe tùwe'wotokomase atu'mùnon pùikattà màlà, Itepulu Jesus uselupappù ittui'ma, ‘Eke peiwa utauchinpantok wechi màlà we'lepantok yau, yekkwattok yau iwechi yentai,’ ” tawon.
36Tùwenukassak yau, Paul wenappù tese'muyok tamù'nawàlà tok pokonpe molopai iwàpùlemappù. 37Tok kalawùppù màlà yachipàtùi'ma molopai kismapàtùi'ma. 38Tok usewankono'masak kulu wechippù màlà, ‘Uyentu'ma auya'nokon pen màlà,’ tesak ya pàk. Màlàpàk tok utàppù ya'là kanau piyak.
