John 4

₁Pharisee yamùk uya, “Jesus, John yentai tùnenupa ton yepoyan molopai tok yenpataukayan,” te yetappù. ₂Jesus uya kappon yamùk yenpataukappù pen màlà. Tùse inenupa ton uya làkku. ₃Yetasak tùuya yau, Judea nàmàppù Jesus uya molopai iwennappotukkappù Galilee pona. ₄Màlà yattai Samaria polo iitàtok wechippù màlà. ₅Màlàyau iwelepamùppù Samaria pon pata Sychar itesek pona, mei pùla là iwechippù pata Jacob nùtùlùppù tùmu Joseph yemyak lùppù piyau. ₆Jacob tunakkwa yennùppù inakappù lùppù wechippù molo molopai Jesus usetakkasak wechippù tùutà ke, iweleutappù màlà tuna yen piyau. Inakattapailà wei wechippù màlà.

₇Màlàyau nossan Samaria pon uyàpùppù tuna yepose. Jesus uya ipàk, “Tuna ke ka' uwoppa auya lù?” teppù. ₈Inenupa ton utàppù wechippù màlà pata pona kùyali ye'maik. ₉Samaria kok nossan uya ipàk, “Jew àmàlà molopai Samaria pon molopai Iulà nossan Samaria pon, yà'là pe ken uchi iwechi pàk, ‘Kùwoppakà,’ te auya nai'nùk upàk?” teppù. Masapùla Samaria kok yamùk pokonpe wakù pe tùwessan pe pùla Jew yamùk wechippù màlà. ₁₀Jesus uya ipàk, “Katù uya lepantok ittu auya yau, molopai ànùk uya tùwuku woton yenna iitu auya yau, ‘Kùwoppakà,’ làkkunne, te auya eppaino. Molopai elepatoppe ya wema'nà tunakkwa ke,” teppù. ₁₁Nossan uya ipàk, “uyepulu, yanùntok auya yai pùla kunaik molopai nàlà i'nau tuna yen naikko. I'nai motau ken uchi wema'nà tunakkwa yepolo auya? ₁₂Ina tamo Jacob yentaino ken na' àmàlà? Sàlà màlà ina lepatok ya tuna yen, inchippù ya tùmàlà pe sàlà tuna yen yapai, imunkà yamùk molopai itùkùnnon nàlà uya inchippù,” teppù. ₁₃Màlàyau Jesus uya imaimu yeikuppù, “Tamù'nawolon kon sàlà tuna inchinnan we'nakklipa tu'ma màlà. ₁₄Tùse ànù'là sàlà tuna untùlù inchinài we'nakklipa tu'ma pen màlà. Tùse i'nakkwa pe yau iwena, tàwàlàlà iwu'ma molopai tàwàlàlà iwemattok ke ilepa ya,” tukaik. ₁₅Nossan uya ipàk, “uyepulu, kùlepakà sàlà tuna ke we'nakklipa tu'ma tukaik, sàlà motak echipalà u'nakkwa yepose use'mattà tukaik,” teppù. ₁₆Jesus uya ipàk, “Itàkà atayappù ikà'mata, molopai menappoik sàlà motak,” teppù. ₁₇Nossan uya imaimu yeikuppù, “Itayappù pùn nen Iulà,” tukaik. Jesus uya yeikuppù, “Ikasa meselupayaik, ‘Itayappù pùn Iulà,’ tukaik. ₁₈Masapùla 5 pe kaichalà kàyik yamùk pokon pe ewechippù man, tùse sàlà pe ipyau messai'nùk mùkkàlà atayappù pen. Màlàpàk ailon pe upàk mekamapàssaik,” teppù. ₁₉Nossan uya ipàk, “ uyepulu, Katù Maimu yenpoikanài pe ewechi pe tùttuyaik,” teppù. ₂₀“Ina Samaria kok tamo yamùk wàpùlemapàtùppù sàlà wùk po, tùse amyamlo Jew yamùk uya màlà Jerusalem nen màlà wàpùleman patassek tesak,” teppù nossan uya. ₂₁Jesus uya ipàk, “Nossan, ailon kakkà upàk, pata weyu nùyàssan màlà yattai sàlà wùk po wapùla Jerusalem po Ukàipùnù nama pe yapulà pen nen uchi màlà. ₂₂Amyamlo Samaria kok yamùk mùkyamlo inama pe anapulà kon ittunnan pen, tùse inama pe tùnapulà kon ittunnan ina, masapùla wepùikattàntok uyàssak màlà Jew yamùk winàpai. ₂₃Pata weyu nùyàssan molopai iyàkkassak man ailon pe yapulànnan uya Ukàipùnù nama pe yapulà màlà, ailon pe molopai takkwalù kon ke, masapùla mùkyamlo yekkwa ton tùnama pe tapulànnan iche màlà Katù wechi. ₂₄Katù mùkkàlà akkwalù, màlàpàk mùkyamlo yapulànnan uya yapulà màlà molopai inana yakkwalù yau molopai ailon pe,” teppù.

₂₅Nossan uya ipàk, “Mùkkàlà nen Messiah tùttuyaik,” Christ tukaik tesassen uyàpù. “Tùuyàssak yau tamù'nawolon yekama ya màlà ina pàk,” teppù. ₂₆Jesus uya ipàk, “Iulà Mùkkàlà eyelupayai'nùk, Mùkkàlà,” teppù.

₂₇Màlà kùlottau inenupa ton wennapposak wechippù. Tok usenumenkappù kulu nossan pokonpe ichelupa pàk. Tùse tok uya, “ Tùse yà'là iche messan?” teppù pen, wapùla “Yà'là pe iwechi pàk nossan pokonpe euselupa màlà?” teppù pen.

₂₈Màlàyau nossan uya tù'nakkwa yen nàmàppù, iwennappoppù pata pona, molopai kappon yamùk pàk, ₂₉“Àittàk kon, kàyik yense tamù'nawàlà unkupùppù lùssan yekamapàsan. Christ pe na' iwechi màlà?” teppù ya. ₃₀Màlàyau kappon yamùk utàppù pata poi Jesus yense.

₃₁Màlà notau inenupa ton uya, “Ticha, ata'lettàkà,” teppù Jesus pàk. ₃₂Tùse tok pàk, “Uyekkyali molo man ànùttu kon pen,” teppù ya. ₃₃Màlàpàk inenupa ton uya tùyiwalà'nokon, “Ànù'là uya na' màlà kùyali nepùppù ipyak pe iwechi?” teppù. ₃₄Jesus uya tok pàk, “Uyekkyali màlà uyeuno'nàippù yeselu kupù molopai wotoko intùlùppù ikuttoppe uya yenuka'nùppù.

₃₅‘Àwàppànsak yau, asakùlà'ne kapùi lùppù ikko'mamù màlà tùpo ipilipù tawonnan pen na' amyamlo?’ Àpàkù'nokon tekamayaik, umà yawàlà yentàk kon, yawon kon wappùkassak man molopai ipilittok yattai man. ₃₆Mùkkàlà ipili'nài uya tepeppù yepolo màlà, molopai kùyali pilipù ya tàwàlàlà wema'nàtok ponaloppe. Mùkyamlo ipànnài molopai ipili'nài tawonnan utauchinpa màlà tamùkke. ₃₇Sàlà màlà mayin ailon, ‘Tewinan uya ipàmà molopai tùulon uya ipilipù,’ tawon. ₃₈Eyeunossak kon uya man ànpàmàppù kon pen piliche. Tùulon kon uya sa'man kulu wotoko kukkapùppù molopai ewettùsak kon màlà tok wotokoyi yak,” teppù.

₃₉Tukke Samaria kok yamùk uya ailon teppù ipàk masapùla nossan uya ipatakasak pàk, “Tamù'nawàlà unkupùppù lùssan yekamapàssan,” tukaik. ₄₀Màlàyau Samaria kok yamùk uyàpùppù ipyak ipawanattàse, tok uya yekamappoppù tùpyau'nokon iwettoppe. Màlàyau asa'là wei Jesus uko'mamùppù molo.

₄₁Tukkan kon uya tu'ma ailon teppù itekale yekama ya tetase, ₄₂tok uya nossan pàk, “Ina nen uchi ailon nùkayan yekamasak auya pàk neken pùla, tùse tùyiwalà'nokon nen uchi ina netapàssan molopai ina nùttuyan sàlà wolù Pùikattànài pe kulu iwechi pe,” teppù.

₄₃Asa'là wei molo tùuko'mamù tùpo, Jesus utàppù Galilee pona. ₄₄Jesus uya tùmàlà pe, “Katù Maimu yenpoikanài mùkkàlà itonpa yamùk ipata yawon kon nùnama pen,” teppù. ₄₅Iwelepansak Galilee pona yau molonkonnà uya yanùmùppù, masapùla tok utàppù màlà Jerusalem pona Usentaka'nàppà yattai uta'lettàntok yak molopai tamù'nawolon inkupù yeneppù tok uya màlà yattai.

₄₆Màlàyau Jesus uyàpùppù tu'ma Cana, Galilee pon pona, tuna lattàppù tùuya wain pe motak. Molo iwechippù itepulu, kin poitolù, e'neppe imu wechippù Capernaum po. ₄₇Jesus welepansak Judea poi Galilee pona yetasak tùuya yau, iitàppù ipyak molopai ipawanattàppù ya tùmu ipittàik iyàttoppe, iwelikù piyau iwechi pàk. ₄₈Jesus uya ipàk, “Ailon te auya'nokon pen tùse neken tensanyek ton pen eke wotoko kupù yene auya'nokon yau,” teppù. ₄₉Kin poitolù uya Jesus pàk, “Itepulu, àikkà tàwà uya'là umle welikù wapiya,” teppù. ₅₀Jesus uya ipàk, “Itàkà, àmu wenna màlà,” teppù. Màlàyau ailon teppù kàyik uya Jesus maimu pàk, molopai iwemeikuppù. ₅₁Asantawàlà lùppù iità tùse, ipoitolù ton uya yepoloppù, “Àmu pàli'yau man,” teppù tok uya. ₅₂I'nai yailà wei tùse tùmu wennappù yekamapposak ya yau, “Ko'manyak 1 o'clock yattai nàkkàmi'makattai,” teppù tok uya. ₅₃Ikàipùnù uya ittupù, màlà yattai kulu Jesus uya, “Àmu wenna màlà,” teppù. Màlàpàk itùwùk tawon kon molopai mùkkàlà tawonnan uya ailon teppù Jesus pàk.

₅₄Sàlà màlà yakon itekkwa pe tensenyek pen wotoko kupùppù Jesus uya Judea poi tùuyàpù tùpo Galilee po.