John 5

₁Màlà tùpo Jew yamùk uta'lettàtok yattai wechippù, màlàpàk Jesus utàppù Jerusalem pona. ₂Molo Jerusalem po, tuna wechippù màlà Kalinilu Mùlatta piyau, Hebrew Maimu yau, Bethesda tukaik tesassen. 5 pe wewonnàtok yai wechippù màlà tùwapu ke'nan. ₃Màlà motau tukke e'nek ton wechippù enpùnon, tùusasan pen, molopai iitokkassak kon. [Tuna welaika màmuku pàk tok wechippù. ₄Masapùla tùulon yattai'ne là Itepulu inchelùyi uttàpàtùppù màlà tunappai kak tuna laikapàsse. Mùkkàlà wapiya ilaikasak tùpo ikak iitàsak lùppù uchipittàppù màlà i'nai yekkwa pe là iwechi tepalan yapai.] ₅Molo kàyik wechippù tachin pe 38 pe kilichimochi e'neppe iwessak lùppù. ₆Molo aittoupe iwechi yene tùuya yau Jesus uya tachin pe màlà kasa molo iwechippù pe ittuppù. Màlàyau, “Echipittàpai na' messan?” teppù ya ipàk. ₇E'nek kàyik uya imaimu yeikuppù, “itepulu, ànù'là upùikattà woton pùla man, tuna laikasak kùlottau ikak unonka woton. Utàiche wechi tùse tùulonnà mùkkàlà uwapiyakkanài,” tukaik. ₈Màlàyau Jesus uya ipàk, “E'wuluukakà, ayapon yanùnkà molopai itàkà,” teppù. ₉Màlàpàk asse'ne kulu kàyik uchipittàppù, tapon yanùmùppù ya molopai iitàppù.

Sàlà kupùppù ya màlà Jew yamùk wàlàkkattok weyu yattai. ₁₀Jew yamùk uya mùkkàlà kàyik iichipittàsak lùppù pàk, “Wàlàkka'nà weyu sàlà. Law yawàlà pùla ayapon yalà auya wàlàkkattok weyu yattai wechi màlà,” teppù. ₁₁Tùse tok yeikuppù ya, “Kàyik nen uyipittànàippù, ‘Ayapon yanùnkà molopai itàkà,’ nùkai upàk,” tukaik. ₁₂Tok uya yekamappoppù, “Ànùk ken uchi mùkkàlà kàyik, ‘Ayapon yanùnkà molopai itàkà,’ tawonùppù àpàk?” tukaik. ₁₃Tùse kàyik iichipittàsak lùppù uya ànùk pe ittu pùla iwechippù, masapùla Jesus utàppù wechippù màlà asse'ne tukkan kon kappon yamùk molo tùwessan kùlottak.

₁₄Màlà tùpo Jesus uya yepoloppù Katù yùwùk tau, molopai ipàk, “Masa yenkà! Ewennasak man. Àli kùkkupùi sàlà yentak, yattai pùla màlà yentaino wekkupù àpàk,” teppù ya. ₁₅Kàyik utàppù molopai Jew yamùk pàk Jesus pe tipittànàippù wechi yekamappù ya. ₁₆Màlà wenai Jew yamùk yepulu yamùk wessa'molùkappù Jesus talumattà pàk, masapùla màlà kussak ya Jew yamùk Wàlàkkattok yattai pàk.

₁₇Tùse Jesus uya tok pàk, “Ukàipùnù mùkkàlà tùwe'wotokomasen tàwàlàlà, màlàpàk Iulà nàlà we'wotokoma màlà,” tukaik. ₁₈Màlà uya tùsa'molùkaik ànwàkappai tok wenappù màlà, Jew yamùk wàlàkkattok weyu ikkwàssak ya pàk neken pùla, tùse Tùkàipùnù pe kulu Katù yekama ya molopai Katù kaichalà iwekkupù pàk.

₁₉Jesus uya tok maimu yeikuppù, “Ailon kulu sàlà, Imu uya yà'làlà kupù tùyiwalà pen, tùse Tùkàipùnù uya neken ikupù yene tùuya yau ikupù ya. Yà'làlà Tùkàipùnù nùkupù ku'nài nàlà mùkkàlà Imu. ₂₀Masapùla Ikàipùnù uya màlà Tùmu pùnùnma molopai tamù'nawàlà tùnkupù yenpoikasak ya itemyak. Molopai sàlà yentaino kon lùiwa yenpoika ya màlà ikuttoppe ya, màlàpàk eusenumenka pa. ₂₁Ikàipùnù uya iwelichak wuluuka molopai iwemattok ke tok lepa ya, kasa làma màlà Imu uya wema'nàtok ke mùkyamlo enlepapai tùwettok kon lepa. ₂₂Masapùla Ikàipùnù mùkkàlà sà kasa messaik, wapùla sà kasa pùla messaik tawon pen ànù'là pàk, tùse ittuntok tùsak ya màlà tamù'nawàlà tùmu yemyak. ₂₃Tamù'nawolon kon uya Imu nama toppe, Ikàipùnù nama tùuya'nokon kasa. Ànù'là Imu namanài pen uya Ikàipùnù yeuno'nàippù nama pe pùla iwechi màlà.

₂₄“Ailon kulu sàlà, mùkkàlà umaimu yetayai'nùk molopai ailon nùkayai'nùk uyeuno'nàippù pàk wechi màlà tàwàlàlà wema'nàtok yesappe. Italumattàtok yak itùlù pen màlà, tùse weli'nàtok yentakasak ya màlà wema'nàtok yak. ₂₅Ailon pe kulu àpàkù'nokon yekama uya sàlà, pata weyu nùyàssan, iyàkkassak man, mùkyamlo iwelichak kon uya Katù Mumu maimu yeta màlà, molopai mùkyamlo yetannan wemapù màlà. ₂₆Ikàipùnù yau wema'nàtok wechi kasa làma màlà Tùmu kussak ya wema'nàtok wettoppe yau. ₂₇Molopai ilepasak ya màlà kappon yamùk ittutok ya yapàikketù ke, masapùla Kàyik Mumu pe iwechi pàk. ₂₈Kesenumenkatàu kulu sàlà pàk, pata weyu nùyàssan, tamù'nawàlà uluwaik yawon kon uya imaimu yetatok yattai. ₂₉Molopai tok we'wuluuka màlà uluwaik yapai, mùkyamlo wakù ku'nàinan nùssan we'wuluuka màlà wema'nàtok yak. Molopai mùkyamlo àli ku'nàinan nùssan we'wuluuka màlà wettalumattàntok yak,” teppù Jesus uya.

₃₀“Uyiwalà yà'làlà kupù uya pen màlà. Katù uya neken yekama yeta uya pàkàlà màlà ittu uya, màlàpàk ittuntok uya wechi màlà ailon pe. Masapùla uyiwalà iche wettok kupù uya pen sàlà, tùse Ukàipùnù uyeuno'nàippù yeselu kupù uya.

₃₁“Upàk uselupa yau, ailon tetok uselupatok pàk pùla iwechi màlà. ₃₂Tùse tùulon molo man tùuselupasen upàk, molopai ailon pe upàk ichelupatok wechi ittunài Iulà. ₃₃John piyak amaimu kon yekaman nan yeunokoppù auya'nokon, molopai ailon pàk ichelupappù. ₃₄Kappon yamùk wechi uyekamannan pe iche kulu pùla wessaik, tùse sàlà yekama uya sàlà ewepùikattà kon pa. ₃₅John wechippù màlà lanppu uyatù kasa akkwa pe, màlà yattai iweyu yau autauchinpa kon pàk alikyek pe ewechippù tachinpe là pùla. ₃₆Tùse uponalok pe yekamanài yesappe wessaik, John yentaino. Màlà kulu wotoko ukàipùnù uya ulepatok yenuka'nùtoppe uya, tùkussai'nùk uya yekama màlà ukàipùnù uya uyeunossak pe. ₃₇Molopai Ukàipùnù uyeuno'nàippù uya uyekamasak màlà tùmàlà pe. Tùse imaimu yetasak là auya'nokon pùla man, intenpata yensak là auya'nokon pùla. ₃₈Wapùla Imaimu wemapù là ayau'nokon pùla, masapùla ailon te auya'nokon mùkkàlà ineunokoppù pàk pùla iwechi pàk. ₃₉Wakù pe Katù Maimu pàk eusenupa kon, masapùla màlà winà là tàwàlàlà wema'nàtok yepolo auya'nokon yeselùkek ittu auya'nokon pàk. Molopai sàlà yamùk Katù Maimu uselupasak màlà upàk. ₄₀Tùse upyak àuyàpù kon pùla man wema'nàtok yepolo kon pa.

₄₁“Kappon yamùk uya apulàntok iwa uya pen sàlà. ₄₂Tùse eyittuyatàu Iulà, Katù pùnùnmatok pùla eyewan kon yau ewechi kon tùttuyaik. ₄₃Uyàssak man Ukàipùnù yesek yau, tùse uyanùmù auya'nokon pùla man. Tùse ànù'là uyàssak tùyiwalà tesek yau yanùmù nen uchi auya'nokon màlà. ₄₄Essentak atapulàpainokon amyamlo, tùse Katù winàpaino neken apulàntok yepoloiche ewechi kon pen. Yà'là kasa ken ailon te auya'nokon? ₄₅Ukàipùnù yemlotopo atalumattà kon pe uselupa pe kùsekamatàu. Moses nen mùkkàlà tùuselupasen àli pe àpàkù'nokon. Mùkkàlà enpen ipàk ewechippù kon nùppù. ₄₆Moses pàk ailon tesak auya'nokon yau, upàk ailon tetok auya'nokon pan. Masapùla uyekale menukappù ya màlà. ₄₇Tùse inmenukappù pàk ailon tei'ma'nokon pùla, yà'là kasa nen ken uchi ailon te auya'nokon uselupatok pàk?” teppù nàlà Jesus.