John 8

₁Tùse Jesus utàppù Olive Tùpù pona. ₂Yakon wei yattai ko'làma iwennappoppù Katù yùwùk tak. Màlàyau kappon yamùk uyàpùppù ipyak, iweleutappù, molopai tok yenupa pàk iwessa'molùkappù. ₃Law pàk enupannan molopai Pharisee yamùk uya nossan tùtayappù pen pokonpe iwessak lùppù nepùppù. Tok uya ichalattàppù tamù'nawolon kon yemloto pona. ₄Molopai tok uya Jesus pàk, “Ticha, pùsà nossan wechi tùtayappù pen pokonpe yeposak man. ₅Law yau Moses uya màlà, ‘Sàlà kasa iwessak lùppù wànà màlà tàk ke ekek pe,’ tesak ina pàk. Tùse yà'là mùkayan nen màlà pàk?” teppù. ₆Wa tok uya yekamappoppù màlà yachitok tùuya'nokon iwinà pe, italumattàtok tùuya'nokon ipàkàlà pe. Tùse Jesus wepeimappù molopai non menukappù ya temyatù ke. ₇Tok uya lùppù tekamappopàtù yau iwà'mùssakkappù, “Tàwà ànù'là imakuyi pùn wapiya kulu tàk yenu'mai ipona,” teppù ya tok pàk. ₈Wate tùpo iweleutatukkappù molopai non menukappù ya. ₉Yetasak tùuya'nokon yau, tok wessa'molùkappù tùutà kon pàk, tewin pàk wapiya eke ton utàppù, Jesus neken tùnànse nossan pokonpe. ₁₀Jesus we'wuluukappù, “Nossan, i'nai mùkyamlo? Ànù'là na' atalumattà woton pùla nai?” teppù Jesus uya. ₁₁Nossan uya yeikuppù, “Kane, Uyepulu, ànù'là pùla man,” tukaik. Jesus uya ipàk, “Iulà uya nàlà atalumattà pen sàlà. Itàkà molopai tàwà amakuyi inonkakà,” teppù.

₁₂Màlà tùpo Jesus uya kappon yamùk yelupatu'mappù, “Iulà mùkkàlà sàlà wolù weyu. Ànù'là uya'là tùuyàssen usalà ewalupàttau pen màlà, tùse wema'nàtok weyu yesappe iwechi,” tukaik. ₁₃Màlàpàk Pharisee yamùk uya ipàk, “Eyiwalà, àponalok pe neken euselupa màlà, tùse euselupatok màlà ailon pen,” teppù. ₁₄Jesus uya tok maimu yeikuppù, “Uyiwalà là uponalok pe uselupa tùse ailon màlà uselupatok. Masapùla tùttuyaik i'nai motapai là uyàpùppù, molopai i'nai motak là utà. Tùse imotapai uyàpùppù wapùla imotak utàtok ittutok auya'nokon pùla messatàik. ₁₅Kappon yamùk yeselu yawàlà sà kasa messaik tawonnan amyamlo. Tùse ànù'là pàk watawon pen Iulà. ₁₆Tùse kappon pàk sà kasa messaik teuya pe iwechi yau, uselupatok wechi màlà ikasa. Masapùla tewincha pùla wechi pàk, Ukàipùnù uyeuno'nàippù mùkkàlà upyawon. ₁₇Iwe'menukasak man àmàlà' nokon Law yau, asa'lon kon uselupatok màlà ailon tukaik. ₁₈Iulà mùkkàlà upàk tùuselupasen molopai tùulon upàk tùuselupasen mùkkàlà Ukàipùnù, uyeuno'nàippù,” tukaik. ₁₉Màlàyau tok uya yekamappoppù, “I'nai ken uchi mùkkàlà Àkàipùnù?” tukaik. Jesus uya tok maimu yeikuppù, “Uyittu auya'nokon pùla messatàik, wapùla Ukàipùnù là. Uyittu auya'nokon yau Ukàipùnù nàlà ittu auya'nokon màlà,” tukaik.

₂₀Sàlà màlà Jesus uselupappù Katù yùwùk tawon pùlayatta pilittok yak motau echii'ma, tùse ànù'là uya yachippù pen, masapùla iweyu uyàssak pùla lùppù iwechi pàk.

₂₁Màlàyau Jesus uya tu'ma tok pàk, “Utà sàlà, molopai uyiwa auya'nokon màlà. Tùse ewelikù kon màlà amakuyi kon yau. Utàyai'nùk yak àutà kon pen,” teppù. ₂₂Màlàyau Jew yamùk uya, “ ‘Utàyai'nùk yak àutà kon pen,’ nùkayan. Tùwe'wànà pàk na' wate ya màlà?” teppù. ₂₃Jesus uya tok maimu yeikuppù, “Yo'non winon kon amyamlo, tùse Iulà mùkkàlà kaupaino. Sàlà wolù pon kon amyamlo, tùse Iulà mùkkàlà sàlà wolù pon pen. ₂₄Ewelikù kon màlà amakuyi kon yau teuya nettainùk. ‘Mùkkàlà Iulà’ teuya pàk ailon te auya'nokon pùla ewechi kon yau, ewelikù kon màlà amakuyi kon yau,” tukaik. ₂₅Tok uya yekamappoppù, “Ànùk ken uchi àmàlà?” tukaik. Jesus uya tok maimu yeikuippù, “Iweppyattà motapai àpàkù'nokon tekamatainùk Iulà. ₂₆Tùse tukke àpàkù'nokon uselupatok molo man, molopai suwa messatàik tetok uya. Tùse uyeuno'nàippù mùkkàlà ailon kulu molopai kappon yamùk wolù yawon kon pàk unetappù neken iwinàpai yekamanài Iulà,” tukaik.

₂₇Tok uya ittu pùla iwechippù Tùkàipùnù pàk telupa kon ya tùse. ₂₈Màlàpàk Jesus uya tok pàk, “Kàyik Mumu yekainùnpasak auya'nokon yau, Mùkkàlà pe nen uchi uyittu auya'nokon màlà,’ molopai uyiwalà nàlà yà'là là kupùppù uya pe pùla, tùse Ukàipùnù uya neken uyenupatok pàk uselupappù pe iwechi. ₂₉Uyeununo'nàippù mùkkàlà upyauwon, tewincha unànnài pen mùkkàlà. Masapùla tàwàlàlà yauchinpanài ku'nài Iulà,” teppù. ₃₀Wa tukaik ichelupa tùse, tukkan kon uya ailon teppù ipàk.

₃₁Màlàyau Jesus uya ailon tawonnan tùpàk Jew yamùk pàk, “Enupantok uya yawàlà ewechi kon yau, unenupa ton pe kulu ewechi kon màlà. ₃₂Ailon ittu auya'nokon màlà, molopai ailon uya apyoto pe pùla àkupù kon,” teppù. ₃₃Tok uya imaimu yeikuppù, “Abraham payanùssan nen ina, yà'là yattai là ànù'là yapyoto pe ina wessak pùla man. Yà'là te ken uchi auya uya màlà, ‘Appyoto pe pùla àkupù,’ te?” tukaik. ₃₄Jesus uya tok pàk, “Ailon kulu sàlà, ànù'là tùwemakuimasen mùkkàlà makui yapyoto. ₃₅Apoyoto mùkkàlà tàwàlàlà itepulu yùwùk tau tùtonpa yamùk kùlottau tùwessen pen, tùse imu neken molonnà tàwàlàlà. ₃₆Imu uya àmokkasak kon yau, imokkasak pe ewechi kon màlà apyoto pe làma pùla. ₃₇Tùttuyaik Abraham payanùssan pe ewechi kon, tùse neichi uwàpai messatàik ko, masapùla umaimu patassek pùla eyewan kon yau iwechi pàk. ₃₈Sàlà uselupa Ukàipùnù piyau wechi yau uneneppù pàk, molopai àkàipùnù kon nekamappù ku'nàinan amyamlo,” teppù.

₃₉Màlàyau tok uya, “Abraham nen mùkkàlà ina kàipùnù,” teppù. Jesus uya tok maimu yeikuppù, “Abraham munkà pe ewechi kon yau, inkupùppù kupù auya'nokon sàlà eppaino. ₄₀Màlà kasa uwàpai messatàik, mùkkàlà ailon yekamanàippù àpàkù'nokon Katù winàpai unetappù. Abraham uya nen sàlà walai kupù pùn! ₄₁Amyamlo mùkyamlo àkàipùnù kon nùkupù ku'nài nan,” teppù Jesus uya.

“Yapàka yamùk pen nen ina. Tewinan neken nen mùkkàlà ina kàipùnù Katù, ” teppù tok uya Jesus pàk.

₄₂Jesus uya tok pàk, “Katù wechi àkàipùnù kon pe yau, u'nùnmatok auya'nokon pan. Masapùla Katù winàpai uyàsak pàk, molopai sàlà pe talà wessaik. Uyiwalà uyàsak pen, tùse mùkkàlà uya uyeunossak. ₄₃Yà'là pe iwechi pàk uselupa ittu auya'nokon pùla ewechi kon? Masapùla uselupatok enetapai pùla ewechi kon pàk,” teppù. ₄₄“Àkàipùnù kon Makui, ponalok kon amyamlo, molopai iche iwettok ku'nàinan. Iweppyattàppù motapai wànài pe iwessak màlà molopai kasei pe, masapùla ailon pùla iwechi màlà, yau. Kasei pe iichelupa yau iteselu màlà, masapùla kasei mùkkàlà molopai kasei kàipùnù. ₄₅Tùse ailon yekama uya pàk, ailon te auya'nokon pùla man upàk. ₄₆Ànùk amyamlo kùlottau àli ku'nài pe uyittuyan? Ailon pe uselupa tùse yà'là pe iwechi pàk ailon te auya'nokon upàk pen màlà. ₄₇Katù ponalok kon mùkyamlo Katù Maimu yetannan. Tùse iponalok pe pùla ewechi kon pàk màlà yeta auya'nokon pùla iwechi,” teppù Jesus uya tok pàk.

₄₈Jew yamùk yepulu yamùk uya yeikuppù, “Ikasa pùla na' iwechi màlà, ‘Samaria kok àmàlà molopai Makui nakkwalùttàppù,’ te ina uya yau?” tukaik. ₄₉Jesus uya tok maimu yeikuppù, “Makui yakkwalù pùla nen man uyau. Ukàipùnù namanài Iulà, tùse amyamlo unamannan pen. ₅₀Unamatok iwa uya pùla man. Tùse molo man tewinannà unamatok iwanài, ikasa ittunài mùkkàlà. ₅₁Ailon kulu sàlà, ànù'là umaimu yawolonnà wechi yau, weli'nàtok yene ya pen màlà,” tukaik. ₅₂Tok uya ipàk, “Ina nen uchi nùttuyan Makui wechi ayau pe. Abraham welikùppù molopai Katù Maimu yenpoikannan nàlà, tùse ‘Ànù'là umaimu yawàlà tùwessen welikù pen,’ te auya. ₅₃Abraham uchi ina kàipùnù yentaino àmàlà? Iwelikùppù man molopai Katù Maimu yenpoikannan nàlà. Ànùk pe nen mechittuyan?” teppù.

₅₄Jesus uya tok yeikuppù, “Uyiwalà utapulà yau, utapulàtok màlà yà'là pen. Tùse Ukàipùnù, Ukatùyi mùkayatài'nùk ipàk mùkkàlà uyapulànài. ₅₅Ittu auya'nokon pùla là man, tùse tùttuyaik. Mùkkàlà ittu uya pùla man te uya yau, akasa'nokon kasei pe wechi màlà. Tùse unùttu mùkkàlà, imaimu yawàlà wettok. ₅₆Atamo kon, Abraham utauchinpappù uyàpù weyu yene tùuya pe iwechi pàk. Yeneppù ya màlàpàk iitauchinpappù,” tukaik. ₅₇Màlàyau Jew yamùk yepulu yamùk uya Jesus pàk, “50 pe kilichimochi yentakappù auya pùla messaik, tùse yà'là kasa Abraham yeneppù auya?” teppù. ₅₈Jesus uya tok pàk, “Ailon kulu sàlà, Abraham wentu wapiya iwemassak lùppù Iulà. Molonnà Iulà,” teppù. ₅₉Màlàpàk tàk yanùmùppù tok uya ipona yenu'matoppe tùuya'nokon. Tùse Jesus uso'namùppù, molopai iwepakkappù Katù yùwùk tapai.