John 9

₁Tùutà yau, Jesus uya enpùn kàyik yeneppù tùwentuppù motapaino. ₂Inenupa ton uya yekamappoppù, “Ticha, ànùk wemakuimasak pàk ken màlà enpùla pùsàlà kàyik wentuppù, pùsàlà ka'lù wapùla ikàipùnù, ichan tawonnan?” tukaik. ₃Jesus uya tok maimu yeikuppù, “Pùsàlà kàyik wapùla ikàipùnù, ichan tawonnan wemakuimasak pàkànsau pùla là, tùse Katù meluntàlù usenpoikatok yai pe iwechi màlà. ₄Uyeuno'nàippù wotokoyi kupù'nokon sàlà akkwa pe iwechi kùlottau. Ewalupà nùyàssan ànù'là we'wotokomatok yattai pen. ₅Sàlà wolù po wechi kùlottau, Iulà mùkkàlà wolù weyu,” tukaik. ₆Wate tùpo, Jesus wetattappù non pona. Non kùloimappù ya tetaku ke. Molopai itùlùppù ya enpùn kàyik yenu pona. ₇Màlàyau ipàk, “Itàkà, ikolùkata Siloam itesek tuna kak,” teppù ya. Sàlà uya ‘yeunossak’ te pe iwechi màlà. Màlàyau iitàppù ikolùkappù ya, molopai iwemeikuppù pata nen uchi tense.

₈Itonpa yamùk molopai tùulon kon wapiya enkui pe iwechi yennàinanùssan uya, “Pùsàlà ken na' mùkkàlà kàyik chichiu pe echii'ma enkui pe iwessak lùppù pen?” teppù. ₉Tùulon kon uya, “Pùsàlà mùkkàlà,” teppù. Tùse tùulon kon uya, “Kane, mùkkàlà kasa neken iichensak man,” teppù. Kàyik uya, “Iulà mùkkàlà,” teppù. ₁₀Màlàpàk tok uya ipàk, “Yà'là kasa ken uchi eyenu nùtakkokatai?” teppù. ₁₁Tok maimu yeikuppù ya, “Kàyik nen, Jesus itesek, non kùloimatai molopai uyenu pàk nùki'matai molopai upàk, ‘Itàkà, tuna Siloam kak ikukata!’ nùkatai. Màlàyau utàtai ikukaik molopai nen uchi tentai,” tukaik. ₁₂Tok uya ipàk, “I'nai ken uchi mùkkàlà?” teppù. “Ittu uya pùla man,” teppù ya.

₁₃Tok uya mùkkàlà kàyik enpùla echippù nepùppù Pharisee yamùk piyak. ₁₄Jew yamùk Wàlàkkattok weyu yattai màlà Jesus uya non kùloimappù molopai enpùn yenu yakkokappù. ₁₅Màlàyau tukka Pharisee yamùk uya yekamappoppù, “Yà'là kasa ken uchi eyenu nùtakkokatai?” tukaik. Màlàyau tok pàk, “Kàyik uya non kùloimasak tùlùppù uyenu pona, màlà kukappù uya molopai yeneppù uya,” teppù ya. ₁₆Tùulon kon Pharisee yamùk tonpa uya, “Pùsàlà kàyik wechi Katù winàpaino pe pùla man, masapùla Wàlàkka'nàtok weyu yeselu yawàlà pùla iwessak pàk,” teppù. Tùulon kon uya, “Yà'là kasa kulu ken uchi kàyik tùmakuyi yau tùwessen uya ittutok ipàkàlà kupù?” teppù. Ekkaichalà pùla tok usenumenkatok wechippù.

₁₇Tok uya tukka kàyik yekamappoppù, “Yà'là mùkayan ken eyenu yakkokanàippù pàk?” tukaik. “Katù Maimu yepoikanài nen mùkkàlà,” teppù ya. ₁₈Jew yamùk yepulu yamùk uya lùppù ailon te pùla iwechippù pùsàlà kàyik enpùla iwessak lùppù wenasak pata yennài pe pàk. Ikàipùnù, ichan tawonnan kà'mà tùuya'nokon ponalà. ₁₉Màlàyau tok uya tok yekamappoppù, “Pùsàlà ichi mùkkàlà emle kon, enpùla iwentusak mùkatantàunùk? Atta nen ken uchi sàlà pe yene ya nai'nùk?” tukaik. ₂₀Ikàipùnù, ichan tawonnan uya tok maimu yeikuppù, “Ina nùttuyan pùsàlà ina mule, enpùla iwentusak lùppù. ₂₁Tùse yà'là kasa iwessak uya sàlà pe yene wapùla ànùk uya itenu yakkokasak ittu ina uya pùla man. Kàyik pe iwechi màlà. Yekamappokà, tùmàlà pe iichelupa toppe,” tukaik. ₂₂Ikàipùnù molopai ichan tawonnan uya màlà wateppù, masapùla Jew yamùk yepulu yamùk pàk tùusenalipa kon pàk. Masapùla “Ànù'là uya pùsàlà mùkkàlà Christ tesak yau yenpakka màlà Jew yamùk wepilittok itak tapai,” te kasak tok uya pàk. ₂₃Màlàpàk màlà ikàipùnù molopai ichan tawonnan uya, “Kàyik pe iwechi màlà, yekamappokà!” teppù.

₂₄Yakon itekkwa pe tok uya enpùla echippù kàyik kà'mappù. Tok uya ipàk, “Katù yapulàtok auya itùkà, ailon pe wa kakkà! Ina nùttuyan pùsàlà kàyik wechi tùmakuyi yawon pe,” teppù. ₂₅Tok maimu yeikuppù ya, “Tùmakuyi yawon pe là wapùla ipla là iwechi ittu uya pùla man. Tùse tewinannà tùttuyaik enpùla wechippù tùse sàlà pe nen uchi tenyaik,” tukaik. ₂₆Molopai tok uya ipàk, “Yà'là pe ken uchi àkuttai? Atta ken eyenu yakkokatai?” teppù. ₂₇Tok maimu yeikuppù ya, “Tekamakapùi kuichi àpàkù'nokon tà, tùse yeta auya'nokon pùn. Yà'là pe ken uchi iwechi pàk enetatu'mapai messatàu? Inenupa ton pe ka' enapai messatàu lù?” tukaik. ₂₈Màlàyau tok uya imottùnpa pe, “Àmàlà nen mùkkàlà inenupa tùse ina mùkyamlo Moses nenupa ton. ₂₉Ina nùttuyan Katù uya Moses yelupappù, tùse i'nailàpài là pùsàlà uyàssak ittu ina uya pùla man,” teppù tok uya. ₃₀Kàyik uya tok maimu yeikuppù, “Tùttusen yekkwa pe pùla uyenu ipittàtai, tùse inailàpai là iyàssak ittu auya'nokon pùla man! ₃₁Ittu'nokon man Katù uya tùmakuyi yawon maimu yeta pen. Tùse ànù'là Katù namanài molopai teselu ku'nài, mùkkàlà maimu yeta ya màlà. ₃₂Non weppyattàppù motapai ànù'là uya enpùla iwentusak lùppù yenu yakkokasak man te yetasak pùla man. ₃₃Pùsàlà kàyik wechi Katù winàpaino pe pùla yau yà'là là kupù ya pen sàlà epaino,” tukaik. ₃₄Tok uya imaimu yeikuppù, “Amakuyi yau ewentuppù i'napailà, tùse na' ina yenupaiche ewechi màlà?” tukaik. Molopai tok uya yenpakkappù.

₃₅Jesus uya, tok uya yenpakkappù yekale lùppù yetappù, iitàppù molopai yepoloppù ya. Màlàyau “Kàyik Mumu pàk uchi ailon mùkayan?” teppù ya. ₃₆Imaimu yeikuppù ya, “ Itepulu anùk ken uchi mùkkàlà, yekamakà upàk ailon te toppe uya ipàk,” tukaik. ₃₇Jesus uya ipàk, “Yenkasak auya man. Pùsàlà mùkkàlà àpokonpe nùselupayai'nùk sàlà pe,” teppù. ₃₈Molopai Jesus pàk, “Ailon ukayaik àpàk uyepulu,” teppù ya. Molopai tese'mu yok iwenappù itemloto po.

₃₉Jesus uya, “Uyàssak sàlà, sàlà non pona kappon yamùk yeselu wechi wakù pe wapùla àli pe là yenpoikaik. Enpùnon uya yentoppe molopai yennài nan wenatoppe enpùla,” teppù. ₄₀Molopai tùulon kon Pharisee yamùk ipyau tùwessan uya wate ya yetappù, màlàyau tok uya, “ ‘Yà'là? Ina wechi nàlà na'nai'nùk enpùla?’ ” teppù ipàk. ₄₁Jesus uya tok pàk, “Enpùla ewessak kon yau àli pe euchittuppù pen sàlà eppaino, tùse ‘Ina nenyan,’ te auya'nokon yau, molo lùppù àli kuttok auya'nokon man,” teppù.