Luke 21

₁Yene tùuya yau Jesus uya mamin yesak ton uya tùwe'lepatok kon tùlù pùlayatta yen yak yeneppù. ₂Molopai nàlà, itayappù iwelichak lùppù, yà'làlà pùn sa'ne uya asa'lon nùkkwà kalukuli pun nonka yeneppù ya. ₃“Ailon kulu sàlà, pùsàlà sa'ne itayappù iwelichak lùppù eke peiwa nùtùpàssan tùulon kon yentai. ₄Masapùla tùulon kon tùwe'lepatok kon tùlùi tukkan temamin kon kùlottapai tùse mùkkàlà sa'ne ipla echii'ma tùwemattok ipàk tùlùi tamù'nawàlà,” teppù ya.

₅Tùulon kon uselupappù màlà Katù yùwùk konekasak wakù ton tàk yamùk ke molopai lepantok itùsak lùssan Katù yemyak ke pàk.Tùse Jesus uya, ₆“Sàlà yamùk menyatàik, pata weyu uyàpù màlà tewinnà tàk wà'nàntok tùulon po yattai pen, tamù'nawàlà iwettùlùkkwa màlà,” teppù.

₇“Enupanài, yà'là yattai ken sàlà yamùk wechi? Molopai yà'là wechi ken màlà yentok ipàkàlà pe, iwekkuttok yattai uyàssak yekamanài pe?” tukaik tok uya yekamappoppù.

₈Jesus uya wateppù, “Enpen ettàk kon eyennaka kon kùsettak! Masapùla tukkan kon uyàpù màlà uyesek yau, ‘Iulàichi mùkkàlà Christ!’ molopai, ‘Pata weyu uyàssak uchi man!’ tei'ma. Tùse tok ya'là kùtàtàu. ₉Kettalipatàu wepanta'mantok molopai mùkyamlo tùpatà kon yesak yenu'maiche man te yeta auya'nokon yau, sàlà yamùk wekkupù màlà wapiya, tùse màlà uya iwenukattok wechi mei pùla yekama pen màlà. ₁₀Pata uya tùulon pata panta'ma màlà, kin yesappe nai'nùk pata uya tùulon kin yesak làma pata yeya'noma màlà. ₁₁Àsà tùlùpùnù wechi màlà molo, iwan pe we'nà màlà, àsà ton palan wechi màlà i'nailàlà, nalik ton wechi màlà molo, molopai eke ton tensan yekkwa ton pen wechi màlà kak yau,” teppù ya.

₁₂“Sàlà yamùk wekkupù wapiya ayachi kon màlà molopai atalumattà kon. Àtùlù kon màlà eyittu tok kon pe Jew yamùk wepili'nàtok itak tak, molopai patikichi tak, Kin yamùk molopai kopùna yamùk yemlotopona enepù kon màlà upàkànsau. ₁₃Sàlà wechi màlà Wakù Itekale yekamatok auya'nokon yattai pe. ₁₄Esenumenkatàk kon màlà wapiya ewenai ewechi kon pàk autaimelunpa kon tukaik. ₁₅Masapùla elepa kon uya màlà amaimu kon ke molopai pukkek ke, eyeyaton kon yamùk uya euselupatok kon nulunpa wapùla ailon pen màlà te tukaik. ₁₆Àkàipùnù kon nà molopai asan kon uya là àtùlù kon màlà, àlunan kon uya là, àtonpa kon yamùk uya là, ewechi yakon non uya là àtùlù kon màlà, molopai iwelittok yak àtonpa kon yamùk tùlù tok uya màlà. ₁₇Tamù'nawolon kon uya eyeya'noma kon màlà uwenai. ₁₈Tùse tewin nà appai kon pùpok wessenu'ma appai kon poi pen màlà. ₁₉Meluntà pe ettàk kon, masapùla sàlà kasa ewepùikattà kon màlà, ” teppù Jesus uya.

₂₀“Tùwepanta'masan uya Jerusalem woinottàsak yene auya yau, imattatok winàkàik iwechi ittu auya'nokon màlà. ₂₁Màlàyau Judea pon kon nepeik wùk yamùk pona. Tàwà eke pata yau tùwessan nùnàmài molopai elekkwà pata yau tùwessan kùttàtak eke pata yak. ₂₂Masapùla sàlàichi màlà talumattàntok wekkuttok yattai tamù'nawàlà Katù Maimu yau iwe'menukasak lùppù. ₂₃Àsà pe kulu iwechi màlà, màlà yamùk wei wechi nossan yamùk monok ton pona. Molopai mule yan yamùk ichikili ton imunkà pona! Àsà pe kulu wettalumattàntok uyàpù màlà sàlà pata pona, molopai Katù we'naikatok wechi màlà pùsamlo kappon yamùk winàkàik. ₂₄Kasupala ke tok wànà màlà, molopai yachisak kon pe tamù'nawolon pata yamùk yak tok yalà, Jew yamùk pen uya Jerusalem wasappàtù màlà tùweyu kon wenukapù ponalà,” teppù ya.

₂₅“Yentok ipàkàlà wechi màlà wei yau, kapùi molopai chilùkà yamùk yau. Non po, tamù'nawolon pata yamùk wechi màlà usewankono'mantok yau, palau tàwù molopai meluntà chipachipa tawon uya tok yenalippa màlà. ₂₆Kappon yamùk wenpulumanpàtù màlà tùusenalippa kon ke. Tamù'nawolon non pona nùyàssai'nan nùk màmuku tùuya'nokon yau. Masapùla epùn yapàikketù utattù'ma màlà. ₂₇Màlà yattai nen uchi Kàyik Mumu usenpoika màlà. Iyàpù màlà katuppluk yau meluntà pe molopai tapulàtok yau. ₂₈Sàlà yamùk weppyattà tùwekkupù kon pàk yau, mà'mùssakkatàik molopai appai kon manùntàik kakàik, masapùla ewepùikattàtok kon mei pùla man,” teppù Jesus uya.

₂₉Màlàyau Jesus uya sàlà panton yekamappù màlà tok pàk. “Fig yek yentàk kon, molopai tùulon kon yei yamùk. ₃₀Yale yamùk usenpoika yau, wei wenna winàkàik iwechi pe ittun nan amyamlo. ₃₁Màlà kasa làmaichi sàlà yamùk wekkupù yene auya'nokon yau, Katù wettok itepulu pe weyu iwechi mei pùla ittu auya'nokon màlà.

₃₂“Ailon kulu sàlà, tamù'nawàlà sàlà yamùk wekkupù màlà kappon yamùk nemassai'nannùk welikù tamù'nawàlà wapiya. ₃₃Epùn molopai non tawonnan utà màlà tùse umaimu utà pen màlà,” teppù Jesus uya.

₃₄“Enpen uchi ettàk kon! Eke pe uta'lettàntok molopai wetùnnàtok pàk kettàu, molopai salà motau wema'nàtok pàk utaimelunpantok ke kanùttàu, yattai pùla màlà wei uyàpù màlà àpona'nokon asse'ne ittu auya'nokon pùla male kasa. ₃₅Iyàpù màlà tamù'nawolon kon kappon yamùk sàlà non pon kon pona. ₃₆Enpen ettàk kon molopai àpùlematàk kon tàwàlà, meluntà pe ewechi kon pa sàlà yamùk wekkupù yawàlà àutà kon yau, molopai Kàyik Mumu yemloto po àwà'mùssakka kon pa,” teppù Jesus uya.

₃₇Jesus uko'manpàtùppù màlà Katù yùwùk tau kappon yamùk yenupa pàk, molopai ko'man pe iwenasak yau iitàpàtùppù Olives Tùpù pona, molo esse ewalupàttau. ₃₈Tamù'nawàlà kappon yamùk utàpàtùppù Katù yùwùk tak ko'làma'ne ichelupa yetase.