Matthew 25

₁“Màlà yattai itepulu pe we'nàtok epùn po wechi màlà sàlà kasa. Molo 10 pan kon ema'nomichi yamùk wechippù màlà, tùlanpuyi kon yanùnnàinan molopai iitàsak kon umoine tùwemali'ma woton wakkàse. ₂5 pan kon wechippù màlà pakkoton pe, molopai tùulon kon 5 pan kon wechippù pukkeppe. ₃Pakkoton uya tùlanpuyi kon yalàppù màlà, tùse tok uya tùulon pe tu'ma ipalu yalàppù pen, ₄pukkek ton uya iten yamùk yau tùlanpuyi kon palu yalà tùse. ₅Umoine tùwemali'ma woton wechippù màlà tachin pe tùuyàpù pàk. Màlàpàk ema'nomichi we'nùnpàtùppù molopai tok we'nùnkapùppù.

₆“Anomlak iwenakasak wechippù màlà wentaimensak yattai, ‘Pùsàlàichi yenkà, umoine tùwemali'ma woton uyàpù! Àittàk kon iwakkàse!’ tukaik. ₇10 pan kon ema'nomichi upakappù màlà molopai tùlanpuyi kon konekappù tok uya. ₈Màlàyau pakko ton uya pukkek ton pàk, ‘Eweyu kon palu pùkkù ke ina ilepatàk kon masapùla ina lanpuyi nùsà'nùssan,’ teppù. ₉‘Kane, ina ponaloppe neken nen man molopai àponalok kon woton kulu pùla. Itàtàk kon eyiwalà'nokon ichilanma yùwùk tak ye'mase,’ teppù pukkek ton uya. ₁₀Màlàpàk pakko ton utàppù tùweyu kon palu yepose. Molopai tok utàppù tùse umoine tùwemali'ma woton welepamùppù màlà. 5 pan kon iwekonekasak kon ema'nomichi wewomùppù màlà ya'là wemali'mantok yattai uta'lettàntok yak. Molopai manatta yakkoloppù màlà.

₁₁“Malalà tùpo tùulon kon 5 pan kon ema'nomichi welepamùppù. ‘Ina yepulu, ina yepulu! Manatta yakkokakà ina ponaloppe,’ teppù tok uya. ₁₂‘Ailon kulu sàlà, eyittu kon uya pùla man,’ tukaik tùwemali'ma woton umoine uya yeikuppù.” ₁₃“Enpen uchi ettàk kon, masapùla Kàyik Mumu uyàttok weyu ittu auya'nokon pùla man,” teppù Jesus uya.

₁₄“Sàlà kasaichi itepulu pe we'nà wechi màlà. Kàyik tùpata nàmà pàk nekkusai'nùk kasa. Tapyoto ton kà'mappù ya molopai itesappe tùwettok tùlùppù ya tok yemyak imainanpatoppe tok uya. ₁₅Tewin pàk tok lepappù ya màlà, ikupù tok tok uya kaichalà. Tewinan yemyak 5 pe kolù pun tùlùppù ya, tùulon yemyak asa'là, molopai tùulon yemyak tewin. Molopai nen uchi itàppù màlà mei. ₁₆Apyoto, 5 pe kolù pun yekkwa'nàippù utàppù màlà, molopai màlà pùlayatta yapai 5 pe làma yepoloppù ya màlà. ₁₇Màlà kasa làma asa'là yekkwanàippù uya asa'là làma yepoloppù. ₁₈Tùse apyoto tewin yekkwa'nàippù utàppù màlà, molopai non yakappù ya, màlà yak tepulu pùlayattayi kolù pun yonamùppù ya.

₁₉“Tachin pe tùpo apyoto ton yepulu wennappoppù, molopai tok pokonpe yà'là kaichalà là kolù pun tùlùppù tùuya ittu pàk iwekkupùpù. ₂₀Apyoto, 5 pe kolù pun yeponàippù uyàpùppù, molopai tùulon pe 5 pan tu'ma tùlùppù ya itemyak. ‘5 pe ulepappù auya kolù pun ke, Uyepulu. Sàlà nàlàichi yenkà tùulon 5 pan làma unepoloppù,’ teppù ya. ₂₁‘Wakù kussak auya man, wakù molopai ailon uyapyoto! Ailon pe ewessak man malalon nùkkwà pùlayatta pilipù pàk, màlàpàk àtùlù uya màlà eke yesappe ewechi pa. Àikkà utauchinpa tonpa pe ewechi pa!’ teppù itepulu uya. ₂₂Molopai apyoto, asa'là kolù pun ke ilepasak lùppù uyàpùppù màlà molopai ipàk, ‘Asa'là ulepappù auya, Uyepulu. Sàlà nàlàichi yenkà tùulon asa'là làma unepoloppù,’ teppù ya. ₂₃‘Wakù kussak auya man! Wakù molopai ailon uyapyoto, ailon pe ewessak man malalon nùkkwà pùlayatta pilipù pàk. Màlàpàk àtùlù uya màlà eke mainanpa pa. Àikkà molopai utauchinpa tonpa pe ewechi pa,’ teppù itepulu uya. ₂₄Màlàyau nen uchi apyoto tewin kolù pun yeponàippù uyàpùppù molopai, ‘Uyepulu, sa'man pe tùwessen kàyik, pe ewechi ittunài Iulà. Ànpàmàppù pen mokkanài àmàlà, molopai kùyali pili'nài ànpàmàppù pen yapai. ₂₅Usenalipappù màlà. Màlàpàk utàppù molopai àpùlayattayi yonamùppù uya non yak. Yenkà! Sàlàichi màlà itesappe ewettok,’ teppù ya. ₂₆‘Àli àmàlà molopai emya'nek apyoto! Ittunài àmàlà, unpàmàppù pen pilipù uya, molopai kùyali pilipù uya unpàmàppù pen yapai, ewaik na'? ₂₇Upùlayattayi tùlùppù nen auya sàlà eppaino pùlayatta mainanpatok tak, molopai eke peiwa iwenasak yepoloppù uya sàlà eppaino wennaposak yau,’ teppù itepulu uya. ₂₈‘Pùlayatta imokkatàk kon iwinàpai molopai itùtàk kon 10 pan kolù pun yesak yemyak. ₂₉Masapùla yà'làlà yesappe tùwessen, lepa màlà eke peiwa, molopai nen uchi eke pe itesappe iwechi màlà, tùse mùkkàlà yà'là pùla nai'nùk, winàpai malalon nà itesappe iwettok mokka màlà. ₃₀Pùsàlà tapulàsen pen apyoto, yenu'matàk kon polopona ewalupàttak. Molo ikalawù màlà molopai tùyà kàlàlài'ma ya,’ teppù,” teppù Jesus uya.

₃₁“Kàyik Mumu uyàssak tapulàtok yau tùyinchelùyi yamùk pokonpe yau, chichiu pe iwechi màlà akkwa wakù tapon po. ₃₂Molopai tamù'nawàlà pata yamùk yawolon kon non pon kon wepilipù màlà itemlotopo. Màlàyau nen uchi tok pantaka ya màlà asa'là, kalinilu yesak uya kalinilu yamùk pantaka kapala yamùk winàpai kasa. ₃₃Kalinilu yamùk tùlù ya màlà tùkamikù pen winàkàik molopai kapala yamùk tùlù ya màlà tùkamikù winàkàik. ₃₄Màlàyau nen uchi Kin uya kappon yamùk tùkamikù pen winon kon pàk, ‘Àittàk kon! Ukàipùnù nùpùlemassan. Àittàk kon itepulu pe ewettok kon patassek yepotanùttàk kon, ikonekasak lùppù àponalok kon pe wolù wekonekappù motapai. ₃₅Masapùla wapàkkassak wechippù molopai uyewetùppù auya'nokon. We'nakklipasak wechippù molopai uwoppappù auya'nokon. Kaklan pe wechippù molopai uyanùmùppù auya'nokon apatassek kon yak. ₃₆Ipon pùla wechippù molopai upontàppù auya'nokon. Eneppe wechippù molopai umainanpappù auya'nokon. Patikichi tau wechippù molopai ukakklanpappù auya'nokon,’ te màlà Kin uya. ₃₇Wakù ton uya nen uchi yeiku màlà, ‘Uyepulu, Yà'là yattai ken uchi ina awapàkkassak yentai molopai ina eyewettai, wapùla ewe'nakklipasak yentai ina molopai àwoppatai? ₃₈Yà'là yattai ken uchi kaklan pe ewechi yentai ina molopai ina ayanùntai tùpatassek kon yak, wapùla yà'là yattai ina ipon pùla ewechi yentai molopai àpontàtai ina? ₃₉Yà'là yattai ken uchi eneppe ewechi yentai ina, wapùla yà'là yattai ken uchi patikichi tau ewechi yentai ina, molopai akakklanpatai ina?’ tukaik. ₄₀Kin uya yeiku màlà, ‘Ailon kulu sàlà, yà'là yattai là sàlà kussak auya'nokon utonpa yamùk lùkkwà winàkàik yau, uponaloppe ikussak auya'nokon màlà!’ tukaik.

₄₁“Màlàyau nen uchi tùkamikù winon kon pàk, ‘Itàtàk kon uwinàpai, amyamlo ipa'nù'nàssak kon! Itàtàk kon tàwàlàlà tùuyassen apok yak, ikonekasak lùppù Tepùlù molopai itinchelùyi yamùk ponaloppe yak! ₄₂Wapàkkassak wechippù, tùse uyewetùppù auya'nokon pen, we'nakklipasak wechippù tùse uwoppappù auya'nokon pen. ₄₃Kaklan pe wechippù tùse uyanùmùppù auya'nokon apatassek kon yak pen. Ipon pùla wechi tùse upontàppù auya'nokon pen. E'neppe wechippù molopai patikichi tau wechippù tùse umainanpappù auya'nokon pen,’ te Kin uya màlà. ₄₄Màlàyau nen uchi tok uya yeiku màlà. ‘Uyepulu, yà'là yattai ken uchi awapàkkassak yeneppù ina uya, wapùla ewe'naklipasak là, wapùla kakklan pe, wapùla ipon pùla là, wapùla e'neppe, wapùla patikichi tau, molopai ina uya àpùikattàppù pen?’ tukaik. ₄₅Kin uya yeiku màlà, ‘Ailon kulu sàlà, yà'là yattai là pùsamlo entuppa'no kon yenpàssak auya'nokon yau, uyenpàssak auya'nokon màlà,’ tukaik. ₄₆Pùsamlo uchi yeunoko màlà tàwàlàlà talumattàntok yak. Wakù ton utà màlà tàwàlàlà wema'nàtok yak” teppù Jesus uya.