Matthew 26

₁Jesus wenukassak sàlà yamùk pàk tùuselupa pàk yau, ta'lon kon pàk wateppù ya, ₂“Mùttuyatàik, asa'là wei tùpo Usentaka'nàppà Yattai Uta'lettàntok wechi, molopai Kàyik Mumu tùlù màlà ipukapàttoppe pulusuk pona.”

₃Màlàyau eke ton paatele yamùk molopai tùnamasan eke ton Jew yamùk wessepoloppù màlà tamùkke Caiaphas Eke kulu paatele patassek yak. ₄Molopai tok wekkupùppù màlà Jesus yachi pàk amak yai, iwàtoppe. ₅“Uta'lettàntok yattai ikupù'nokon pen màlà. Masapùla kappon yamùk wechi àsà pe màlà yattai pùla,” teppù tok uya.

₆Bethany po, Simon, weleippan sa'ne yùwùk tau Jesus wechi yattai, ₇nossan uyàpùppù màlà ipyak, wakù iten epekkek kalapa pokonpe. Kalapa ikkwamùppù ya màlà Jesus ippai pona uta'lettàn yapon piyau tùse. ₈Jesus ya'lon kon uya sàlà yeneppù màlà molopai tok we'naikappù. “Yà'là pe ken uchi iwechi pàk sàlà mattanùpù sàlà?” tukaik tok usekamappoppù. ₉“Sàlà kalapa chilanmappù sàlà eppaino epekkeppe molopai pùlayatta tùtoppe entuppa'nokon yemyak!” teppù tok uya. ₁₀Jesus uya tok uselupatok ittuppù màlà molopai tok pàk, “Yà'là pe iwechi pàk pùsàlà nossan wanittàpa auya'nokon màlà? Wakù kulu kussak ya màlà uponaloppe. ₁₁Tàwàlà là nen entuppa'nokon wechi apyau'nokon màlà, tùse tàwàlà là apyau'nokon wechi pen màlà. ₁₂Sàlà kalapa ikkwansak ya màlà upona ukonekanài pe u'nattàntok ponaloppe. ₁₃Ailon kulu sàlà, i'nailàlà sàlà Itekale usekama tamù'nawàlà wolù yawàlà yau, màlà nossan nùkupùppù yekama màlà, mùkkàlà ittutok ipàkàlà pe,” teppù Jesus uya.

₁₄Màlàyau 12 pan kon Jesus ya'lon kon tonpa, Judas Iscariot itesek utàppù màlà eke ton paatele yamùk piyak. ₁₅Molopai, “Yà'là ke ken ulepa auya'nokon Jesus tùlù uya eyemyakù'nokon yau?” teppù ya. Màlàpàk tok uya 30 pe chilùpa pun pùlayatta ittuppù, molopai tok uya itùlùppù itemyak. ₁₆Màlà motapai nen uchi Judas wechippù Jesus yeimippotok tùuya yattai yeneiche.

₁₇Wapiyalok wei iwapuluwetasak pen pùlomù pusak pàk Uta'lettàntok yattai, Jesus ya'lon kon uyàpùppù màlà ipyak molopai tok uya yekamappoppù, “I'nai motak ken Usentaka'nàppà yattai Uta'lettàntok konekase ina utà àponaloppe iche messan?” tukaik. ₁₈“Itàtàk kon mùkkàlà kàyik piyak Jerusalem pona.” teppù ya tok pàk, “Molopai ipàk ‘Uweyu uyàssak man, unenupa ton pokonpe Usentaka'nàppà Yattai Uta'lettàntok kupù uya màlà àyùwùk tau nùkapàssan Enupanài,’ mùkatàik,” teppù ya. ₁₉Jesus ya'lon kon uya inekamappù tùpàkù'nokon kupùppù, molopai Usentaka'nàppà Yattai Uta'lettàntok konekappù tok uya.

₂₀Ko'man pe iwenasak yau, Jesus molopai 12 pan kon ya'lon kon weleutappù ata'lettàsse. ₂₁Tok uta'lettà tùse, Jesus uya tok pàk, “Ailon kulu sàlà, tewinannà àtonpa kon uya uyeimippo màlà,” teppù. ₂₂Jesus ya'lon kon usewankono'masak kulu wechippù màlà molopai tok wepyattàppù yekamappopàtù pàk esse'mappùpàk, “Iulà na', Uyepulu?” tukaik. ₂₃Jesus uya yeikuppù, “Mùkkàlà tùyu ki'nàippù pùsau yawon yak upokon pe uya uyeimippo màlà. ₂₄Kàyik Mumu welikù màlà Katù Maimu yau iwe'menukasak kasa, tùse àsà pe kulu iwechi màlà mùkkàlà Kàyik Mumu yeimipponài pona! Wakù peiwa iwettok pan, iwentu pùla iwessak yau!” tukaik. ₂₅Judas, yeimipponài uya, “Ticha, Iulà ken na' mùkkàlà?” teppù. Jesus uya yeikuppù, “Wa mùkayaik làkku,” tukaik.

₂₆Tùuta'lettà kon yau, Jesus uya pùlomù pusak yanùmùppù, Tenki tepe iwàpùlemappù, pùlomù pusak pilikappù ya, molopai itùlùppù ya ta'lon kon yemyak. “Yanùntàk molopai inattàk kon, sàlà màlà uyesak,” teppù ya. ₂₇Molopai nàlà pùsau yanùmùppù ya. Tenki teppù ya, molopai itùlùppù ya tok yemyak. “Inchitàk kon, tamù'nawolon kon amyamlo. ₂₈Masapùla sàlà màlà umùnù Katù uya ikupù tùuya tetok. Umùnù sàlà ikkwansak tukkan kon ponaloppe, àli kuttok pàk usentuppantoppe. ₂₉Tekamayaik àpàkù'nokon, sàlà tinchisen inchi uya pen nen uchi màlà, emennak inchi uya àpokonpe'nokon Ukàipùnù wettok itepulu pe patassek yau ponalà,” teppù ya. ₃₀Molopai nen uchi elen pàk tok uselenpappù molopai tok utàppù Olive Tùpù pona.

₃₁Màlàyau Jesus uya tok pàk, “Sàlà yewalupàyi tau tamù'nawàlà ewepe kon màlà molopai unàmà auya'nokon, masapùla Katù Maimu yau iwe'menukasak màlà, ‘Kalinilu mainanpanài wànà uya màlà, molopai kalinilu yamùk wetta'nùpù màlà,’ tukaik. ₃₂Tùse we'wuluuka tùpo, Galilee pona utà màlà awapiya'nokon,” teppù ya. ₃₃Peter uya Jesus pàk, “Ànàmà uya pen kulu màlà, tamù'nawolon kon uya là ànàmà tùse!” teppù.

₃₄Jesus uya,“Ailon kulu sàlà, sàlà yewalupàyi tau Kalicho tàwù wapiya, ‘Ittunài pen Iulà,’ te auya màlà àsolùwau itekkwa,” teppù Peter pàk.

₃₅Peter uya, “Ittunài pen Iulà te uya pen màlà, àpokonpe là welikù yau!” teppù. Molopai tamù'nawolon kon Jesus ya'lon kon uya wa teppù.

₃₆Màlàyau Jesus utàppù màlà ta'lon kon pokonpe Gethsemane yak, molopai tok pàk, “Masa talà chichiu pe ettàk kon, miya àpùlemase utà tùse,” teppù ya. ₃₇Peter molopai asa'lon kon Zebedee munkà yamùk yalàppù ya ta'là. Ichewankono'mappù kulu màlà molopai ittaimelunpappù. ₃₈Molopai tok pàk, “Usewankono'masak kulu man eke pe welikù yeselùkek uchittuyaik! Talà ettàk kon molopai upokon pe e'wetunkatàk kon,” teppù ya. ₃₉Iitàppù màlà mei lùiwa, molopai non pona itenpata iwekkawai'mappù molopai iwàpùlemappù, “Ukàipùnù, ikupù auya pe iwechi yau, sàlà wettalumattàntok pùsawù yamakà uwinàpai! Tùse iche wettok pen, tùse iche làkku ewettok,” tukaik.

₄₀Màlàyau iwennappoppù màlà àsolùwawon kon ta'lon kon piyak molopai tok we'nùnsak yepoloppù ya, molopai Peter pàk, “Yà'là peichi iwechi pàk mala là upokon pe ewe'wetunka kon pùla iwechi màlà ?” teppù ya. ₄₁“Enpen ettàk, molopai àpùlematàk kon ittuntok yak àutà kon tukaik. Akkwalù ànkuppai man tùse pun attu'mùla man,” teppù ya.

₄₂Yakon itekkwa pe tu'ma Jesus utàppù, molopai iwàpùlemappù, “Ukàipùnù, sàlà wettalumattàntok pùsawù yama uwinàpai pùla iwechi yau, tùse inchichak uya yau neken, eyeselu wekkupù màlà,” tukaik. ₄₃Iwennapoppù màlà molopai ta'lon kon we'nùnsak yepoloppù ya. Tok wechi pàsàn pe yentai iwechippù.

₄₄Jesus uya tu'ma tok nàmàppù màlà, iitàppù molopai iwàpùlemappù màlà kasa lùppù. ₄₅Màlàyau iwennappoppù màlà ta'lon kon piyak molopai tok pàk, “Ewe'nùmù kon pàk lùppù na' messatàu, molopai àwàlàkkapù kon pàk? Yentàk kon! Kàyik Mumu tùtok àli ku'nàinan kappon yàmùk yemyak yattai uyàssak man. ₄₆E'wuluukatàk kon, utànpai'nokon. Yentàk kon, pùsàlàichi yenkà uyeimippo woton mei pùla!” teppù.

₄₇Tùuselupa pàk lùppù Jesus wechi tùse, Judas Iscariot, 12 pan kon ya'lon kon tonpa welepamùppù. Tukkan kon kappon yamùk wechippù ya'là, asa'lon yà kasupala molopai taikek tawon wechippù tok yemyau. Pùsamlo wechippù màlà eke ton paatele yamùk yepulu ton, molopai tùnamasan Jew yamùk neunokossan pe. ₄₈Eimipponài uya yentok tok uya ipàkàlà ke tok lepasak wechippù màlà “Kàyik unùkisma mùkkàlà nai'nùk iche ewettok kon. Machitàik!” tukaik. ₄₉Tùwelepansak yau, Judas Iscariot utàppù màlà Jesus piyak tossalà, molopai ipàk, “Tàwà wàlàkka'nàtok apyau nechii, Ticha,” teppù ya, molopai ikismappù ya. ₅₀Jesus uya yeikuppù, “Uwechi yakon, asse'neichi ikusse àuyàpùppù lùppù ikukkà!” tukaik. Màlàyau tok uyàpùppù molopai Jesus yachippù tok uya yatoppe. ₅₁Tewinannà Jesus ya'lon kon tonpa uya kusan tùta'tayi mokkappù molopai Eke kulu paatele yapyoto wànàppù ya ipana tattàkasse. ₅₂Màlàyau Jesus uya ipàk, “Ata'tayi inonkakà ipatassek yak, masapùla mùkyamlo pàlàu yapulànnan welikù màlà pàlàu ke. ₅₃Ittu na' auya'nokon pùla nai, Ukàipùnù yekamapposak uya upùikattàtoppe ya yau, asse'ne tukke, tùyinchelùyi yamùk yeunoko ya 12 pan kon itesappe'ne? ₅₄Tùse màlà kasa iwessak yau, yà'là kasa ken uchi iwekkupù ailon pe Katù Maimu uya iwekkupù màlà teppù yawàlà?” teppù.

₅₅Màlàyau tukkan kon kappon yamùk iyàssak kon pàk, “Tùtaikepu ke molopai tùkasupalayi ke'ne ken na' uchi àuyàssak kon màlà uyachiche nai'nùk, amak yense utàn kasa là? Wei kaichalà ku chichiu pe wechippù tà Katù yùwùk tau, kappon yamùk yenupa pàk, molopai uyachi auya'nokon pùn. ₅₆Tùse tamù'nawàlà sàlà yamùk wekkussak sàlà, Katù Maimu yawon Imaimu yenpoikannan uya màlà kasa iwekkupù màlà teppù kasa,” teppù ya.

Màlàyau tamù'nawàlà Jesus ya'lon kon uya inàmàppù, aitunpe tok wepeppù.

₅₇Mùkyamlo Jesus yachinnannùssan uya yalàppù màlà Caiaphas Eke kulu paatele piyak, law pàk enupannan molopai tùnamasan wepilittok yak motak. ₅₈Peter uya iwenaimappù màlà mei, Eke kulu paatele yùwùk pùloloi motak. Iwewomùppù molopai iweleutappù pata yennàinan piyau, yà'là kasa là tamù'nawolon wekkupù yene pàk. ₅₉Paatele yamùk molopai tamù'nawàlà eke ton wechippù iwalai pen yepoloiche Jesus winàkàik, iwàtoppe. ₆₀Tùse yà'là là iwalai pen yepoloppù tok uya pen màlà, tukkan kon nànen kappon yamùk wessalattàpàssak molopai kasei pe tok uselupasak iwinàkàik tùse. Tùse àkàmlàk lùppù asa'lon kon kàyik yamùk wessalattàppù. ₆₁Molopai, “Pùsàlà kàyik, ‘Katù yùwùk yamoklo'nài yek Iulà molopai àsolùwau wei tùpo yamù tu'ma uya,’ nùkatai,” teppù tok uya.

₆₂Eke kulu paatele we'wuluukappù molopai Jesus pàk, “Sàlà na' àli pe àpàk uselupantok yeiku auya pen màlà?” teppù. ₆₃Tùse Jesus wechippù eppana. Molopai Eke kulu paatele uya tu'ma, “Tàwàlàlà tùwemassen Katù yesek tesassse, euselupakà. Ina pàk yekamakà Christ pe na' ewechi màlà, Katù mumu pe?” teppù. ₆₄Jesus uya yeikuppù, “Wa mùkayatàik làkku tà. Tùse tekamayaik àpàkù'nokon, sàlà motapai yene auya'nokon màlà Kàyik Mumu wechi chichiu pe apàikeppe tùwessen kamikù pen winà, molopai iyàpù katuppluk po epùn poi!” tukaik. ₆₅Màlà yau Eke kulu paatele uya tùpon kalakappù molopai, “Àli pe Katù winàkaik nùselupapàssan. Uselupantok tu'ma iche we'nà'nokon pùla man. Àli pe ichelupa metakappàssatàik! ₆₆“Yà'là tukaik mesenumenkayatàu?” teppù ya. “Àli pe man molopai tùwelichen yeppe man!” tukaik tok uya yeikuppù.

₆₇Màlàyau nen uchi tok wetattapàtùppù itenpata pona. Molopai tok uya ippoppàtùppù, molopai inta'monnannùssan uya, ₆₈“Ina pàk yenpoikakà, Christ, ànùk àwànài!” teppù.

₆₉Peter wechippù màlà chichiu pe polopo pùloloi po, Eke paatele yapyoto yamùk tonpa ema'non uyàpùppù ipyak, molopai, “Àmàlà nàlà wechippù ku Jesus Galilee pon ya'là,” teppù ya. ₇₀Tùse Peter uya tamù'nawàlà tok yemloto po, “Ipàk meselupayai'nùk ittu uya pùla man,” tukaik yeikuppù. ₇₁Molopai iitàppù pùloloi yak wewonnàtok motak. Tùulon apyoto ema'non uya yeneppù molopai kàyik yamùk molonkonnà pàk, “Pùsàlà nàlà sa' Jesus Nazareth pon ya'là nettai,” teppù. ₇₂Molopai tu'ma Peter uya, “Usennaka pen kulu, mùkkàlà kàyik ittunài pen Iulà!” teppù. ₇₃Malalà tùpo, kàyik yamùk molo satippe tùwessan uyàpùppù Peter piyak. “Ewaik, tok tonpa sa' àmàlà. Euselupatok nen eyeimippo yan!” teppù tok uya. ₇₄Màlàyau Peter uya, “Ailon pe kulu tekamayaik. Tàwà làichi Katù utalumattài ailon pe pùla uselupa yau! Pùsàlà kàyik ittunài pen Iulà!” teppù. Màlà yattai nen uchi kalicho tàwùppù màlà. ₇₅Molopai Peter uya Jesus uya tùpàk, “Kalicho tàwù wapiya, àsolùwau, itekkwa, ‘Ittunài pen Iulà,’ te auya màlà,” teppù ittuppù. Iwepakkappù, molopai ikalawùppù tùuseka'nonkaik.