Matthew 27

₁Ko'làma kulu tamù'nawolon kon paatele yamùk molopai tùnamasan Jew yamùk uya yà'là pe là Jesus kuttok tùuya'nokon konekappù, iwàtoppe. ₂Jesus yaulomùppù tok uya màlà. Tok uya yalàppù molopai Pilate, kopùna pe tùwessen, yemyak tok uya itùlùppù màlà.

₃Jesus welikù pe iwechi yensak tùuya yau, yeimipponàippù Judas Iscariot, usewankono'masak wechippù màlà molopai 30 pan chilùpa pun pùlayatta mùnappoppù ya eke ton paatele yamùk molopai tùnamasan yemyak. ₄“Wemakuimasak man àli pen kàyik teimippose, iwelittoppe!” teppù ya. “Yà'là peichi ina wettoppe? Eneneichi màlà!” tukaik tok uya yeikuppù. ₅Judas Iscariot uya pùlayatta solokappù Katù yùwùk tak molopai tok nàmàppù ya. Molopai nen uchi iitàppù màlà molopai iwe'mùtùntàppù.

₆Eke ton paatele yamùk yepulu ton uya pùlayatta yanukuppù molopai tok uya, “Sàlà màlà mùn yepek, molopai law yawàlà pùla iwechi màlà Katù yùwùk pùlayattayi yen yak itùlù yau,” teppù. ₇Tùusenumenka kon ipàk tùpo tok uya pùlayatta yanùmùppù màlà àinà ka'nài tumà ye'matoppe, kaklan yamùk uluwachi patasseppe. ₈Màlàpàk uchi màlà umà yesatù “Umà, mùn pata” tukaik sàlà wei tepose.

₉Màlàyau, màlà Katù Maimu yenpoikanài Jeremiah uya màlà kasa iwechi màlà teppù lùppù wekkupùppù ailon pe. “Tok uya 30 pan chilùpa pun yamùk yanùmùppù màlà. Màlà kaichalà itepek wechi màlà teppù Israel pon kon uya lùppù. ₁₀Molopai pùlayatta yapulàppù tok uya àinà ka'nài tumà ye'matoppe, Itepulu uya yekamappù upàk kasa,” tawon.

₁₁Jesus wechippù màlà satippe kopùna yemloto po, mùkkàlà uya yekamappoppù. “Jew yamùk kinù na' àmàlà?” tukaik. Jesus uya yeikuppù, “Wa mùkayaik làkku,” tukaik. ₁₂Yà'là teppù ya pen màlà eke ton paatele yamùk molopai eke ton tùnamasan uselupatok àli pe tùwinàkàik pàk. ₁₃Màlàpàk Pilate uya Jesus pàk, “Yetanpe' auya pùla nai sàlà yamùk àli pe uselupantok ewinàkàik?” teppù. ₁₄Tùse Jesus uya yeikuppù pen màlà, tewin itekkwa là tùwinàkàik uselupantok yeikuppù ya pen. Màlàpàk kopùna usenumenkasak wechippù màlà eke pe.

₁₅Usentaka'nàppà yattai Uta'lettàntok yattai màlà kopùna wechippù tewinnà patikichi tawon kappon yamùk nennappù nonkanài pe. ₁₆Màlà yattai tùttusen yachisak wechippù patikichi tau Barabbas itesek. ₁₇Màlàpàk ilinà pe kappon yamùk wepilichak yau, Pilate uya tok yekamappoppù, “I'nai nonka uya àponalok kon pe iche messatàu, Barabbas wapùla Jesus, Christ tukaik tesassen?” tukaik. ₁₈Ittuppù ya kan màlà tà tok uya Jesus tùsak temyak masapùla tùtalumayi kon pe ikupù tùuya'nokon pàk.

₁₉Pilate wechi chichiu pe ittutok patassek yau tùse, inoppù uya tùmaimu yeunossak wechippù màlà. “Yà'là là kukkupù pùsàlà àli pen kàyik winàkàik, masapùla we'neppà'nàtok yau wettalumattài kulu pùsàlà wenai sàlà pe,” tukaik.

₂₀Eke ton paatele yamùk molopai eke ton tùnamasan uya tukkan kon kappon yamùk yelupappù màlà Pilate pawanattàtoppe tok uya Barabbas nonkatoppe ya molopai Jesus tùtoppe ya iwelittoppe. ₂₁Pilate, kopùna pe tùwessen uya tok yekamappoppù, “I'nai ken uchi nonka uya àponalok kon pe pùsamo asa'lon kon kùlottapai iche messatàu?” tukaik. “Barabbas,” tukaik tok uya yeikuppù. ₂₂“Yà'là pe ken uchi Jesus, Christ tukaik tesassen kupù uya?” tukaik Pilate uya tok yekamappoppù. “Ipukapàtù màlà pulusuk pona!” tukaik tamù'nawolon kon uya yeikuppù. ₂₃Tùse Pilate uya tok yekamappoppù, “Yà'la ken uchi àli kussak ya nai?” tukaik. Màlàyau nen uchi tok wessa'molùkappù eke pe tùwentaime kon pàk, “Ipukapàtù màlà pulusuk pona!” tukaik. ₂₄Yà'là woton pe pùla sàlà kupù pàk tùwechi yensak tùuya yau, tùse wepanta'mantok wessepolo pàk, tuna yepoloppù ya, molopai temyatù kukappù ya tukkan kon kappon yamùk yemloto po, molopai, “Pùsàlà kàyik tùlù uya weli'nàtok yak pùn. Sàlà nai'nùk ànkupù kon!” teppù ya. ₂₅Tamù'nawàlà kappon yamùk uya yeikuppù, “Tàwà talumattàntok iwelittok yepeppù nùyàpùi ina pona molopai ina munkà yamùk pona!” tukaik. ₂₆Màlàyau nen uchi Pilate uya Barabbas nonkappù tok ponaloppe, Jesus ippoppàttoppe ikupùppù ya màlà, molopai itùlùppù ya ipukapàttoppe pulusuk pona.

₂₇Màlàyau Pilate soichayi yamùk uya Jesus yalàppù Kopùna patassek yak, molopai tamù'nawà tùtonpa kon yamùk pokonpe tok wepilipùppù Jesus woi. ₂₈Tok uya iponkappù molopai ichuweyu yak tok uya ipontàppù. ₂₉Màlàyau tok uya alok konekappù àmà'nà panta yamùk yapai molopai ippai pona itùlùppù tok uya, molopai yei tùlùppù tok uya itemyak kamik pen yak, màlàyau tok wenappù tese'mu kon yok molopai tok wàkklàppù ipàk. “Tàwàichi Jew yamùk Kinù nemapùi tachin pe!” teppù tok uya. ₃₀Tok wetattapàtùppù màlà ipona, molopai yei yekkwatùppù tok uya itemyapai molopai ippai yai tok uya ipippàtùppù. ₃₁Tùwàkklà kon wenukasak ipàk yau, tok uya ichuweyi pon yapai iponkappù molopai ipontàppù tok uya ipon yak, molopai tok uya yalàppù ipukapàsse pulusuk pona.

₃₂Tùutà kon yau, Cyrene pon kàyik Simon itesek yepoloppù tok uya, molopai soicha yamùk uya yeka'nonkappù màlà Jesus nalà pulusuk yatoppe ya. ₃₃Tok uyàpùppù Golgotha itesek pata motak, “Puppà yàppù Pata,” te ya pe iwechi. ₃₄Màlà motau tok uya tinchisen, yoi'masak maik ke, ke ilepappù. Tùse yonpa tùpo, Jesus uya inchi pùla iwechippù.

₃₅Ipukapàssak tùuya'nokon yau, tok uya ipon pantakappù tùklottau'nokon tàk walai tenu'mapàsse. ₃₆Màlà tùpo molo tok wechippù chichiu pe itenupàkà. ₃₇Ippai yepoi tok uya àli pe uselupantok iwinàkàik menukasak tùlùppù màlà, “Pùsàlà mùkkàlà Jesus, Jew yamùk Kinù,” tawon. ₃₈Màlàyau tok uya asa'lon kon kappon lapumannannùssan kaiwattàsak wechippù màlà pulusuk pona Jesus pokonpe, tewin ikamikù pen winà molopai tùulon ikamikù winà.

₃₉Kappon yamùk tùutàsan màlà yawàlà uya tùpai kon wùkùu'wùkùumappù molopai Jesus mottùpappù tok uya. ₄₀“Katù yùwùk yamokklopù lùkku auya tà molopai yamù auya àsolùwau wei yau neken! Epùikattàkàichi, Katù Mumu pe ewechi yau! Àwuttàkà pulusuk poi!” tukaik. ₄₁Màlà kasa làma eke ton paatele yamùk yepulu ton molopai enupannan Law pàk molopai tùnamasan eke ton wàkklàppù Jesus pàk. ₄₂“Tùulon kon pùikattànài lùk mùkkàlà tùse tùyiwalà iwepùikattà pùla man! Israel pon kon Kinù lùk uchi mùkkàlà! Tàwà nuttài sàlà pe pulusuk poi, molopai ailon te'nokon màlà ipàk! ₄₃Katù pàk ailon tawon mùkkàlà, tàwà Katù nùpùikattài iche tùwechi yau, masapùla Katù Mumu pe tùusesassen mùkkàlà. Masaichi Katù wechi ànpùikattàpai yenpai'nokon!” teppù tok uya. ₄₄Kappon lapumannannussan, ikaiwattàsak kon ipokonpe uya nàlà imottùnpappù, màlà kasa làma.

₄₅Inakattapailà wei tùse tamù'nawàlà pata wenappù màlà ewalupà pe, wei wetteilettà ponalà. ₄₆Wei wetteilettàsak yau Jesus wentaimeppù eke pe, Eloi, Eloi, lama sabachthani? “Ukatùyi, Ukatùyi, yà'là peichi iwechi pàk unonkasak auya sàlà?” te ya. ₄₇Kappon yamùk molo satippe tùwessan tonpa yamùk uya yetappù màlà molopai tok uya, “Elijah kà'mayan!” teppù. ₄₈Tok tonpa utàppù ase'ne aitun pe molopai kàtàkkwak walai yanùmùppù ya, ikipùppù ya so'li yak. Màlàyau nen uchi itùlùppù ya yei pàk molopai Jesus mùta pàk iki'mappù ya. ₄₉Tùse tùulon kon uya, “Masa, Elijah uyàpù ipùikattàse yenpai'nokon!” teppù. ₅₀Jesus wentaimeppù tu'ma màlà eke pe molopai iwelikùppù.

₅₁Màlàyau awenek solin pan Katù yùwùk tawon, iwàkkàttok wekalakappù màlà asa'là, kau winàpai non tepose. Non utatù'mappù màlà, tàk we'moppù. ₅₂Uluwaik yamùk utakkokappù, molopai tukkan kon Katù ponalok kon kappon yamùk iwelichak kon nùssan we'wuluukappù màlà wema'nàtok yak. ₅₃Tok wepakkappù màlà uluwaik yamùk yapai molopai Jesus we'wuluuka tùpo, tok utàppù Jerusalem pona, molo tukkan kon kappon yamùk uya tok yeneppù màlà.

₅₄Soicha yamùk yepulu, soicha yamùk pokonpe Jesus yelasu pe tùwessan uya tùlùpùnù molopai tamù'nawolon tùwekkussan yeneppù, tok wettalipasak wechippù màlà molopai, “Katù Mumu pe kulu iwechippù man!” teppù tok uya. ₅₅Molo tukke nossan yamùk wechippù màlà, Jesus yene pàk tùwessan mei echii'ma. Mùkyamlo wechippù màlà ya'là iitàsak kon Galilee poi molopai ipùikattànnannùssan pe. ₅₆Mùkyamlo kùlottau màlà Mary Magdalene, Mary, James molopai Joseph yan, molopai Zebedee munkà yan tawonnan wechippù.

₅₇Ko'man pe iwenask yau, mamin yesak Arimathea poino welepamùppù màlà, Joseph itesek, molopai nàlà Jesus nenupa pe iwechippù màlà. ₅₈Pilate yemloto pona iitàppù molopai Jesus yàkàpù yekamappoppù ya ipàk. Pilate uya Jesus yàkàpù tùtoppe Joseph yemyak yekamappù màlà. ₅₉Màlàyau Joseph uya yalàppù molopai iwontàppù ya ikopposak pen linen kuyalikku yak. ₆₀Molopai itùlùppù ya tùwuluwachi pe, tùnakappù tàk yai pena kulu pùla là yak. Màlàyau eke lùmà tàk pelenkappù ya uluwaik mùta pona molopai iitàppù. ₆₁Mary Magadalene molopai tùulon Mary tawonnan wechippù molo chichiu pe, uluwaik winàkàik itenpata.

₆₂Iwemassappe, Jew yamùk wàlàkkattok yattai eke ton paatele yamùk molopai Pharisee yamùk wessepoloppù màlà Pilate pokonpe. ₆₃Molopai tok uya, “Ina yepulu, ina nùttuyan mùkkàlà kasei uya nulà lùppù tùwechi yau, ‘We'wuluuka tu'ma màlà àsolùwau wei tùpo,’ teppù ya. ₆₄Wakù pe tennài ke uluwaik wettoppe ikukkà icholùwano wei ponalà, ya'lonkonnùssan utà itàkàpù yonanse tukaik, molopai nen uchi kappon yamùk pàk, ‘Iwuluukasak man weli'nàtok yapai,’ te tukaik. Sàlà àkàmlà'no kasei wechi màlà àli peiwa wapiyalok yentai,” teppù. ₆₅“Uluwaik yelasu pe mettàik, itàtàk imoka tukaik yentàk kon ànùttu kon yawàlà,” teppù Pilate uya tok pàk. ₆₆Màlàpàk tok utàppù, molopai uluwaik yakkosak tàk ke ki'nàmappù tok uya molopai yennàinan nàmàppù tok uya yene pàk.