Mark 14

₁Asa'là neken wei wechippù màlà, Usentakantok molopai Iwapuluwetasak pen pùlomù pusak pàk Uta'lettàntok weyu wapiya. paatele yamùk yepulu ton molopai Law pàk enupannan wechippù Jesus yachitok tùuya'nokon ittuiche amak yai kappon yamùk uya ittu pùla, iwàtoppe tùuya'nokon.

₂“Uta'lettàntok yattai pùla yachi màlà, masapùla kappon yamùk wesalatà nen kùpanta'maik,” teppù tok uya.

₃Jesus wechippù màlà Simon welei pokon yùwùk tau Bethany po. Tùuta'lettà pàk iwechi tùse nossan uyàpùppù apoi'nan awai'nan kalapa yesappe ten tanùkai'no epekkek esuken nard tetok konekasak. Iten i'moppù ya molopai kalapa ikwamùppù ya Jesus ipai pona.

₄Tùulon kon kappon yamùk wechippù molo tùwe'naika kon pàk tùyiwalà'nokon. “Yà'là pe ichi iwechi pàk apoi'nan awai'nan kalapa mattanùpù ya màlà? ₅Sàlà kalapa chilanmappù là nen sàlà epaino 300 pe kaichalà pùlayatta pun, molopai pùlayatta tùtoppe entuppa'nokon piyak,” tukaik. Molopai tok uya yàulàmappù àsà pe.

₆Tùse Jesus uya, “Tàwà tùyiwalà nechii. Yà'là pe iwechi pàk yaimelunpa auya'nokon màlà? Wakù kussak ya nai'nùk uwinàkàik ₇Masapùla apyau'nokon entuppa'nokon wechi màlà tàwàlàlà. Molopai yà'là yattai là mùkyamlo yekkwa ànpùikattàpai ewechi kon yau ikupù auya'nokon màlà. Tùse tàwàlàlà apyau'nokon wechi pen màlà. ₈Pùsàlà nossan uya wakù tùnkupù kussak màlà. Upun kalapaimasak ya ikoneka pe uwu'nattà wapiya. ₉Ailon kulu sàlà, mailàlà Wakù Itekale usekama sàlà wolù yawàlà yau, inkupùppù nàlà usekama màlà. Màlà pàkàlà kappon yamùk usenumenka màlà nossan pàk,” teppù.

₁₀Judas Iscariot, Jesus nenupa ton tonpa, utàppù paatele yamùk yennàinan piyak tok yemyak Jesus tù toppe tùuya.

₁₁Ichelupa yetasak tùuya'nokon pàk, tok utauchinpappù màlà, pùlayatta ke ilepa pàk tok wekkuppù. Màlà motapai Jesus tùtok tuùya tok yemyak yattai woton yeneiche iwechippù.

₁₂Màlàyau wapiyalok wei yattai Uta'lettàntok Iwapuluwetasak pen pùlomù pusak pàk, kalinilu munkà yamùk wàsak tùuya'nokon Usentakantok yatai Uta'lettàntok yataino pe yau, Jesus nenupa ton uya yekamapoppù, “I'nai yailà ina utà iche messan Usentakantok yataino Uta'lettàntok konekaik àponalok pe?” tukaik.

₁₃Màlàyau Jesus uya asa'là neken tùnenupa ton yeunokoppù molopai tok pàk, “Itàtàk kon pata yak kàyik uya tuna yalà wai yau uya eyepolo kon màlà.

₁₄Ya'là mùtàtàik, molopai i'nailàlà iwewomù yau tapùi yesak pàk, ‘I'nailà utonpa pokonpe wechi patassek woton nai, uta'lettàtoppe uneupa ton pokonpe?’ nùkai ina yenupanài mùkatàik. Molopai, ‘I'nailà uta'lettàntok unenupa ton pokonpe nai Usentakantok yataino Uta'lettàntok pàk?’ nùkai ina yenupanài mùkatàik. ₁₅Molopai eke kawonpan patassek yekama ya màlà ikonekasak, màlà motau kùponalok kon pe kùyali mùkonekatàik,” teppù ya.

₁₆Inenupa ton utàppù pata yak. Molopai tok uya yepoloppù Jesus uya yekamappù tùpàkù'nokon kasa. Molopai tok uya kùyali konekappù Usentakantok yataino pe.

₁₇Ko'man pe kulu iwenasak yau, Jesus uyàpùppù 12 pan kon tùnenupa ton pokonpe. ₁₈Màlàyau tùuta'lettà kon yau, Jesus uya, “Ailon kulu sàlà, tewinan nà uya utùlù màlà uwàtoppe. Upokon pe là nùta'lettàyai'nùk, mùkkàlà uya,” teppù.

₁₉Tok usewankono'masak wechippù molopai esse'mappù pàk tok uya yekamappoppù, “Iulà na'tàwà?’ tukaik.

₂₀Jesus uya tok yeikuppù, Tewinan nà 12 pan kon tonpa molopai tùyu kichai'nàk palapi yak upokon pe.

₂₁Màlàpàk Kàyik Mumu utà màlà tùwelitok yak itekale yau iwe'menukasak tùpàk kasa. Àsà pe kulu iwechi màlà mùkkàlà kàyik pona. Kàyik Mumu tùsak ya man iwàtoppe. Wakù pe iwechippù epaino mùkkàlà wentusak pùla iwechi yau,” teppù.

₂₂Tùuta'lettà kon yau, Jesus uya pùlomù pusak yanùmùppù molopai tenki teppù ya Katù pàk, màlàyau ipilipàtùppù ya tùnenupaton yemyak molopai itùlùppù ya tok yemyak. “Yanùntàk molopai inattàk kon, sàlà màlà upun,” teppù Jesus uya tok pàk. ₂₃Molopai pùsau yanùmùppù ya Katù pàk ‘tenki’ teppù ya Katù pàk tok yemyak itùlùppù ya, Màlàyau tamù'nawolon kon uya inchippù.

₂₄Jesus uya tok pàk, “Sàlà màlà umùnù iwekkwansak tukkan kon ponaloppe. Umùnù, Katù uya ikupù tùuya tetok wemyakanma pùla iwechi yekamanài,” teppù.

₂₅“Ailon kulu sàlà, sàlà kùyali chi'nak yepelu yeuku inchi tu'ma uya pen màlà. Emennak pe inchi uya Katù wettok itepulu pe yau ponalà,” teppù Jesus uya tok pàk.

₂₆Màlàyau yapulàtok yelempa tùpo nokon, tok utàppù Olive Tùpù pona.

₂₇Màlàyau Jesus uya tok pàk, “Tamù'nawàlà ewepe kon màlà molopai unàmà auya'nokon iwe'menukasak kasa kulu Katù Maimu yau, ‘Katù uya kalinilu yamùk yesak wànà màlà, molopai kalinilu yamùk wetta'nùppù màlà,’ tukaik,” teppù.

₂₈“Tùse uwuluukasak nulà tùpo, utà màlà awapiya'nokon Galilee pona,” teppù ₂₉Peter uya Jesus yeikuppù, “Tamù'nawolon kon uya ànàmà tùse Iulà uya ànàmà pen màlà,” tukaik. ₃₀Màlàyau Jesus uya Peter pàk, “Ailon kulu sàlà, sàlà yewalupàyi tau asak itekkwa kalicho tàwù wapiya, àsolùwau itekkwa, ‘Unùttu pen mùkkàlà,’ te auya màlà upàk,” teppù. ₃₁Tùse Peter uya meluntà pe molopai sa'man pe, “Tok uya là uwànà àpokonpe yau, ‘Unùttu pen mùkkàlà,’ te uya pen,” teppù. Molopai tamù'nawàlà tok uya wa teppù.

₃₂Màlàyau tok utàppù Gethsemane itesek umà yak. Màlàyau Jesus uya tùnenupa ton pàk, “Sàlà motau eleutatàk kon wpùlema tùse,” teppù. ₃₃Peter, James, molopai John tawonnan yalàppù ya ta'là. Eke pe kulu ittaimelunpatok molopai ichewankono'matok wechippù itewan yau. ₃₄Màlàyau tok pàk, “Uyakkwalù sa' tùusewankono'matok yau kulu man, uyelikka ya kasa lànen! Talà ettàk kon molopai enpen ettàk kon,” teppù ya. ₃₅Màlàyau iitàppù mei lùiwa, molopai tùlappak iwenappù non pona molopai iwàpùlemappù màlà. Tùwekkussen pe iwechi yau, tàwà tùwettalumattàtok usentaka toppe tùwinàpai. ₃₆Màlàyau iwàpùlemappù, “Ukàippùnù, Ukàippùnù, tamù'nawolon kuttok auya yapàiketù molo man. Sàlà wettalumattàtok yamakà uwinàpai. Tùse iche wettok kùkkupùi iche làkku ewettok ikukkà,” tukaik ₃₇Iwennapoppù tùnenupa ton piyak, molopai tok we'nùnsak yepoloppù ya. Màlàyau Peter pàk, “Simon, ewe'nùnsak na' màlà? Mala lùkwà là na' enpen ewechi meluntàlù pùla iwechi màlà?” teppù ya. ₃₈“Enpen ettàk kon molopai àpùlematàk eyittutok yak àutà kon tukaik. Ayakkwalù kon nen alikyek pe man, tùse atu'mùla àpun kon man,” teppù Jesus uya tok pàk.

₃₉Molopai ittà tukkappù àpùlemaik, màlà lùppù pe iwàpùlemappù. ₄₀Màlàyau iwennappoppù tukkappù tùnenupa ton piyak molopai tok we'nùn tu'masak yepoloppù ya. E'molonnùppe tok wechi. Màlàyau yà'là tukaik imaimu yeitok tùuya'nokon ittu tok uya pùla iwechippù.

₄₁Icholùwano itekkwa pe tu'ma iyàpùppù. Màlàyau tok pàk. “Mewe'nùnyatàu lùppù ichi? Màlàka'satàu lùppù na'?” tukaik tok yekamapoppù ya. “Eichilà man, Yattai iwenasak man! Kàyik Mumu tùsak man àliton yemyak,” teppù ya. ₄₂“E'wuluukatàk kon. Utàn nokon sàlà. Yentàk utùnàippù mei pùla man!” teppù Jesus uya.

₄₃Màlàyau Jesus uselupa lùppù tùse Judas, inenupa ton tonpa, uyàpùppù. Tukkan kon wechippù ya'là kasupala yesak pe'ne molopai taikek yamùk itemyau. paatele yamùk yepulu ton molopai Law pàk enupannan molopai eke ton uya tok yeunossak. ₄₄Judas uya yentok ipàkàlà woton yekamappù kappon yamùk pàk, “Kàyik unùkisma mùkkàlà iche ewettok kon. Machitàik, molopai matàik,” teppù.

₄₅Molopai tùuyàssak yau, Judas utàppù Jesus piyak asse'ne. Màlàyau, “Ticha,” teppù ya, molopai kismappù ya. ₄₆Màlàyau Jesus yachippù tok uya. ₄₇Tùse mùkyamlo satippe tùwessan tonpa uya tùkasupalayi mokappù, màlàyau eke kulu Katù yùwùk tau tùuwe'wotokomasan yennài yapyoto pana yatàkapùppù ya. ₄₈Màlàyau Jesus uya tok pàk, “Àuyàsak kon na' màlà uyachiik kasupala yamùk molopai taikek yamùk yesak pe'ne amak yachi kasa?” ₄₉“Wei kaichalà apyau'nokon wechippù Katù yùwùk tau eyenupa kon pàk, tùse uyachi auya'nokon pùn. Tùse sàlà wekkupù màlà Katù Maimu we'menukasak nai'nùk kasa,” teppù Jesus uya. ₅₀Màlàyau tamù'nawàlà inenupa ton uya inàmàppù, tok wepeppù.

₅₁Umoine utàppù Jesus ya'là ipon pùla tùse iwe'wontàsak linen ke neken. Màlàyau yachiiche tok wechippù, ₅₂tùse iwepeppù ipon pùla pon pùkkùlùppù tùnùnse tok yemyau.

₅₃Màlàyau tok uya Jesus yalàppù, eke kulu Katù yùwùk tau tùwe'wottokomasan yepulu ton piyak. Tamù'nawàlà paatele yamùk yenàinan molopai Law pàk enupannan wepilichak wechippù molo. ₅₄Peter uya iwenaimappù mei, eke kulu paatele yamùk yepulu pata yak. Màlàyau chichiu pe iwechippù achinài nan piyau, tùwa'no pàk apok piyau. ₅₅Màlàyau eke ton paatele yamùk yepulu molopai tamù'nawàlà Jew yamùk Yepulu ton uya ikasa pùla Jesus wettok iwappù iwàtoppe, tùse tok uya yepolo pùla iwechippù. ₅₆Màlàpàk tukkan kon uya Jesus kaseipappù, tùse yeimippotok pe pùla tok uselupatok wechippù ipàk.

₅₇Màlàyau tùulon kon we'wuluukappù molopai kasei pe tok uselupappù Jesus winàkàik. ₅₈“Ina netatai, ‘Sàlà Katù yùwùk matanùpù uya màlà kappon yamùk nùkonekappù, molopai àsolùwau wei tùpo tùulon yamù uya màlà kappon yamùk nùkonekappù pe pùla!”’ tukaik. ₅₉Wa tesak là nen tok uya tùse yeimippo ya pùla iwechippù tok uselupatok wechippù.

₆₀Màlàyau paatele yamùk yennài wà'mùsakappù kappon yamùk yemloto po. Jesus yekamappose, “Yeitok auya ike pùla na' ewechi màlà? Yà'là walai ken sàlà tamù'nawolon pàk pùsamo kappon yamùk uselupa nai'nùk ewinàkàik?” tukaik. ₆₁Tùse Jesus wechippù eppana imaimu yeikuppù ya pen. Molopai paatele yamùk yennài uya yekamappo tukkappù, “Christ na' àmàlà Katù tapulàsen molopai tùnamasen Mumu?” tukaik. ₆₂Jesus uya imaimu yeikuppù, “Iulà mùkkàlà,” molopai Kàyik Mumu wechi màlà chichiupe yene auya'nokon tùmeluntàlù kenan kamik pen. Tamù'nawàlà Apàikkek winà, molopai iyàpù yene nàlà auya'nokon màlà epùn poi katuppluk yau,” tukaik. ₆₃Màlàyau paatele yamùk yennài uya tùpon kalakappù tùwe'naika pe, molopai, “Yà'là pe ichi iwechi pàk tùselupasan iwinàkàik woton kon iche kulu we'nà sàlà?” teppù ya. ₆₄“Metayatàik ichelupa Katù winàkàik tùwe'namaik pùla. Yà'là tukaik mesenumenkayatàu?” tukaik tok yekamapoppù ya. “Tamùkke nen uchi iwàtoppe tok uya yeya'nomappù.

₆₅Màlàyau tùulon kon wetattapàtùppù ipona, molopai tok uya itenpata waputtàppù pon pùkkùlùppù ke molopai tok uya iwàpàtùppù temyatù kon ke. “Ànùk ken àwànài? Yenpoikakà!” teppù tok uya ipàk. Molopai achinnan uya yalàppù molopai itenpata yai tok uya iwàpàtùppù.

₆₆Peter wechi kawon pan tapùi yo'no lùppù tùse ulichan paatele yamùk yennài yapyoto tonpa uyàpùppù. ₆₇Màlàyau Peter wa'no yeneppù ya molopai itenupàkàlà iwechippù, molopai, “Àmàlà nàlà mùkkàlà Jesus Nazareth poino ya'lon,” teppù ya. ₆₈Tùse, “Kane, ittunài pen Iulà, yà'là pàk nàlà euselupa ittu uya pùla man,” teppù Peter uya. Màlàyau iwepakkappù. Màlà yattai là kalicho tàwùppù. ₆₉Ulichan uya yentukkappù, molopai, “Pùsàlà mùkkàlà tok tonpa,” teppù ya molon kon nà kappon yamùk pàk. ₇₀“Ailon pen màlà,” teppù tu'ma Peter uya. Màlàyau malalà tùpo molonkonnà uya tu'ma Peter pàk, “Ailon kulu tok tonpa, àmàlà, masapùla Galilee pon àmàlà,” teppù. ₇₁Màlàyau Peter uselupappù tùumayintaik, “Tàwà pa'nùnàtok upo nechii ailon pe yekama uya pùla iwechi yau.Ailon sàlà pùsàlà ittu uya pùla man meselupayatài'nùk ipàk!” tukaik. ₇₂Màlàyau màlà yattai kulu kalicho tàwùppù yakon itekkwa pe. Peter uya nen uchi Jesus uya, “Asak itekkwa kalicho tàwù wapiya, ‘Unùttu pen mùkkàlà,’ te auya màlà àsolùwau itekkwa,” teppù Jesus uya tùpàk ittuppù. Màlàyau tenumenkaik ikalawùppù.