Mark 15

₁Màlàyau ko'làma kulu paatele yamùk yepulu ton, eke ton, Law pàk enupannan, molopai tamù'nawàlà Jew yamùk Yepulu ton pokonpe tok wepilipùppù eselupaik yà'là pe là Jesus kuttok tùuya'nokon pàk. Màlàyau Jesus yaulopàtùppù tok uya molopai tok uya yalàppù Pilate piyak. ₂Màlàyau Pilate uya yekamappoppù, “Àmàlà na' mùkkàlà Jew yamùk Yesak?” tukaik. Màlàyau yeikuppù, “Wa mùkayaik làkku tà,” tukaik. ₃Paatele yamùk yennàinan uya, “Tukke àliton ku'nài pe yekamappù. ₄Màlàyau Pilate uya yekamapo tukkappù, “Yeitok auya ike pùla na' nai? Metayan nùn pe' tukke àli ton pe àpàk tok uselupa?” teppù. ₅Tùse eneippai pùla lùppù Jesus wechippù, màlàpàk Pilate usenumenkappù.

₆Usentakantok yattai Uta'lettàntok yattai'ne, ànù'là yachichak lùppù nonkanài pe Pilate wechippù màlà patikichi tapai, kappon yamùk uya tùpàk yekekamapposak yau. ₇Molo iwechippù màlà kàyik Barabbas itesek patikichi tau tùulon kon kùlottau pata yesak winàkàik tùwepanta'maik kappon wànàippù. ₈Màlàyau tùwepilichak kon yau kappon yamùk uya Pilate yekamappoppù sàlà yekkwa tùnkussek kuttoppe ya tùponalok kon pe. ₉Màlàyau tok maimu yeikuppù ya, “Jew yamùk yesak nonka uya iche na' mesatàu àponalok kon pe?” tukaik. ₁₀Ittuppù ya là màlà paatele yamùk yennàinan uya Jesus tùsak tùpyak, masapùla ipàk tùkùlùmàlu kon pàk. ₁₁Tùse paatele yamùk yennàinan uya kappon yamùk yaimelunpappù Pilate uya Barabbas lùkku nonka toppe tùponalok kon pe. ₁₂Pilate uya tok yekamapo tukkappù, “Yà'là kasa ken uchi pùsàlà kupù uya Jew yamùk kinù tetok auya'nokon?” tukaik. ₁₃Màlàyau tok wentaime tukkappù, “Pulusuk pona ipukapàttàk!” tukaik. ₁₄Màlàyau Pilate uya tok yekamapoppù, “Yà'là wenai nan, yà'là ken uchi àli kussak ya nai?” tukaik. Tùse ekeiwa pe tok wentaimeppù, “Pulusuk pona ipukapàttàk!” tukaik. ₁₅Pilate wechippù kappon yamùk anauchinpap wa iwechi pàk, Barabbas nonkappù ya tok ponaloppe. Jesus ippopàssak tùpo itùlùppù ya ipukapàttoppe pulusuk pona.

₁₆Màlàyau soicha yamùk uya Jesus yalàppù Kopùna pùloloi pona, màlàyau tok uya tùulon kon soicha yamùk kà'mappù tùpyakù'nokon. ₁₇Tok uya Jesus pontàppù pon tùtalilen yak, molopai àmà'nà teimeik tok uya yalùkottàppù. ₁₈Màlàyau tok uya Jesus pàk, “Tachin pe emakkà, Jew yamùk Kinù,” teppù. ₁₉Màlàyau tok uya ippai yai iwànàppù yei ke, molopai tok wetattapàtùppù ipona, molopai tùwessekunkaik tok wepeimappù iwinàkàik. ₂₀Imottùnpakapù tùpo iponkappù tok uya pon tùtalilen yapai, molopai ipon yak nen uchi tok uya ipontàppù. Màlàyau tok uya yalàppù pulusuk pona ipukapàsse.

₂₁Màlàyau Simon itesek kàyik uyàpù yepoloppù tok uya asantau, iyàpù màlà pata yak. Màlàyau soicha yamùk uya yapyontàppù teka'nonkaik pulusuk ya toppe ya. (Saimon wechippù màlà Cyrene poino pe, Alexander molopai Rufus tawonnan kàipùnù.) ₂₂Jesus yalàppù nen uchi tok uya màlà Golgotha itesek pata yak. “Pupà yàppù patassek” te pe iwechi. ₂₃Molo myrrh ke yoi'masak (wine) ke tok wechippù iwoppaiche. Tùse Jesus uya inchippù pen. ₂₄Tok uya ipukapàtùppù pulusuk pona. Molopai dice tenu'mapàsse tok wenkaluppù ànù'là uya i'nai yekwa ipon nùppù yanùmù ittutok tùuya'nokon ipàkàlà pe. ₂₅Kakàik lùiwa wei wenussak tùse tok uya pulusuk pona ipukapàssak wechippù màlà. ₂₆Màlàyau iwàtok iwenai menukasak wechippù ippai yepoi pulusuk pàk, “Jew yamùk Kinù,” tukaik. ₂₇Molopai nàlà asa'là amak ton nùssan pukapàtùppù tok uya pulusuk yamùk pona, Jesus piyau sàwinà'ne. ₂₈[Sàlà wekkupùppù màlà pena Jesus pàk Katù Maimu yau iwe'menukasak lùppù. “Tok uya yeneppù wànnan tonpa pe iwechi,” tawon kasa.]

₂₉Kappon yamùk yentakanàinan uya imottùnpappù, tùppai kon sùkùsùkùmai'ma, “Àmàlà lùk uchi, ‘Katù yùwùk ya'wokanài molopai àsolùwau wei neken yamù auya,’ ” teppù tok uya. ₃₀“Epùikattàkà ichi eyiwalà, àwuttàkà màlà pulusuk poi!” teppù tok uya ipàk. ₃₁Molopai paatele yamùk yepulu ton molopai Law pàk enupannan uya wa làma imottùnpappù màlà, “Tùulon kon pùikattànài lùkkan màtà, tùse nen uchi tùyiwalà iwepùikattà pùla iwechi! ₃₂Imasa yenpai'nokon Christ, Israel Kinù uttà pulusuk poi, molopai ailon te toppe nokon ipàk!” teppù tok uya. Mùkyamlo amak ton nùssan Jesus talumattà tonpa yamùk uya nàlà imottùnpappù.

₃₃Molopai inakatapailà wei wenasak yattai tamù'nawàlà pata wewalumamùppù wei wetteilettà ponalà. ₃₄Wei wetteilettà pe Jesus wentaimeppù eke pe, “ Eloi, Eloi, lama sabachthani? “Ukàippùnù, Ukàippùnù, yà'là pe iwechi pàk unonkasak auya màlà?” te ya pe iwechi. ₃₅Màlàyau mùkyamlo ipyau tùwessan uya yetasak tùuya'nokon yau, “Masa yetatàk kon, Elijah kà'ma ya,” teppù. ₃₆Màlàyau tewinnà kappon utàppù kàtàkkwak kiche so'li tinchisen kak, kusan molopai kulak walai pàk itùlùppù ya molopai Jesus lepa iche iwechippù ike. Màlàyau, “Masa, Elijah uyàpù ewaippe yenpai'nokon imokkase pulusuk poi!” teppù tok uya. ₃₇Màlàyau iwentaimeppù eke pe tu'ma, molopai iwelikùppù.

₃₈Molopai awenek ichin lùmà pon pùkkùlùppù Katù yùwùk tau iwakkàtùyi wessala'moppù kau winàpai non tepose. ₃₉Màlàyau soicha yamùk yepulu satippe echii'ma yene pàk iwessak lùppù uya yà'là kasa iwelikù yensak tùuya yau, “Ewaik, ailon kulu pùsàlà wechi Katù Mumu pe,” teppù. ₄₀Tùulon kon nossan yamùk wechippù molo mei lùiwa echii'ma yene pàk tùwessan. Tok kùlottau màlà Mary Magdala pon wechippù. James muleiwa molopai Joseph tawonnan yan wechippù molo molopai Salome. ₄₁Jesus ya'là iwessak kon lùssan Galilee po iwechi yau. Molopai tukke tùulon kon nossan yamùk Jerusalem pona iyàssak kon wechippù nàlà molo.

₄₂Ko'man pe iwena tùse Joseph Arimathea pon welepansak wechippù. ₄₃Tùnamasen nàlà Jew yamùk yepulu tonpa pe iwechippù màlà molopai Katù wettok Itepulu pe weyu yeneiche tùwessen weyu pe iwechippù màlà. Wekonekantok yattai pe iwechippù màlà, (wàlàkka'nàtok weyu lawàlà'no wei yattai iwechippù.) Màlàyau Joseph utàppù tùwettalipaik pùla Pilate piyak ipàk, Jesus yàkàpù yekamappose. ₄₄Màlàyau Pilate usenumenkappù, Jesus welichak yeta tùuya pàk soicha yamùk yepulu kà'mappù ya ailon pe iwelichak yekamappotoppe tùuya. ₄₅Màlàyau soicha yamùk yepulu uya, iwelikassak yekamasak yau, Pilate uya Joseph yemyak Jesus yàkàpù tùlùppù. ₄₆Joseph uya kuyalikku linen ye'mappù, ekek mokkappù ya pulusuk poi, molopai iwontàppù ya linen ke. Uluwaik yak itùlùppù ya eke pe tàk wechi yakasak yak. Molopai eke tàk pelenkappù ya yakkoloyi pe. ₄₇Mary Magdala pon, molopai Mary, Joseph yan uya tok uya Jesus yàkàpù tùlù yeneppù.