Philippians 2

₁Ewemattok kon na' Christ yau meluntà pe àkussatàu? I'nùn na' eyewan kon ipittàyan? Wakù Akkwalù pokonpe na' echitonpa pe we'nàtok yesappe messatàu? Usentupantok molopai ànù'là kappon pùnùnmatok auya'nokon yesappe na' messatàu? ₂Màlà kasa iwechi yau apawanattàyatàu Iulà, kùyauchinpatàk kon kulu nen uchi ekkaichalà usenumenkantok yesappe ewechi kon winà, pùnùnmantok winà molopai tùwe'wotokomaik tamùkke tewin itewan ewechi kon winà. ₃Amlek pe kettàu. Tùulon kon yentai wakù peiwa ewekkupùiche'nokon kettàu. Àssà'mùla ettàk kon, tùulon kon yentai tùuchittuik pùla. ₄Àponalok kon pe neken ànkupù kon pàk kesenumenkatàu, tùse alikyeppe ettàk tùulon kon pùikattà pàk eusenumenka kon pàk. ₅Eusenumenkatok kon yau Jesus Christ kasa ettàk .

₆Katù là mùkkàlà tàwàlà, tùse Katù pokonpe ekkaichalà tùwenaiche iwechippù pen.

₇Tùse làkku, tùyiwalà tamù'nawolon nonkappù ya, molopai apyoto pe iwenappù kappon pe kùkasa.

₈Kappon pe là iwechippù. Àssà'mùla iwenappù màlà molopai mayin yawàlà weli'nàtok yanùmùppù ya, pulusuk po weli'nàtok.

₉Sàlà wenai Katù uya iwuluukappù kawon pata yak namantok patassek yak, molopai ilepappù ya tùulon kon ese yamùk yentaino ese ke,

₁₀Tamù'nawolon kon epùn pon kon, molopai non pon kon, molopai non yo'non kon wenatoppe tese'mu kon yok.

₁₁Molopai tamù'nawolon kon uya ayupo yekama màlà Jesus Christ wechi Itepulu pe, Katù Kùkàipùnù yapulàtoppe.

₁₂Màlàpàk uchi, utonpa yamùk, tàwàlà mayin yawàlà ewechippù kon apyau'nokon wechi yau. Tùse sàlà pe apyau'nokon pùla là wechi tùse màlà yentak lùiwa yawàlà ewechi kon màlà. Màlàpàk e'wotokomatàk kon, tùwe'namaik molopai tùplànài'nùnse Katù ponaloppe ewechi kon yekama pe. ₁₃Masapùla Katù mùkkàlà tùwe'wotokomasen ayau'nokon tàwàlà, alikyeppe molopai meluntà pe amatok kon pe tùuya, teselu yawàlà ewechi kon pa.

₁₄Tamù'nawolon ikuttàk kon, tùusàulàmaik pùla wapùla tùwesseippàsse pùla. ₁₅Àli ku'nài nan pe pùla esuken Katù munkà pe, wakù pe tùwemassan pe ewechi kon pa. Molopai ikasa pùla àli pe kulu tùwemassan kappon yamùk wolù yawon kon kùlottau elenpantàk kon. Chilùkà yamùk ulenpansak kak yau kasa. ₁₆Wema'nàtok yekale yekamai'ma tok pàk. Màlà pàkànsau àpàkù'nokon utauchinpatok yesappe wechi màlà Christ Weyu yattai; màlà uya yekama màlà yà'là woton pe pùla là we'wotokomappù pe pùla iwechi.

₁₇Ailon tetok auya Itepulu yau molopai ewe'wotokomatok màlà lepantok walai Katù pona. Msolopai umùnù wekkwamù sàlà lepantok pona. Sàlà wekkupù yau utauchinpa màlà, molopai tamù'nawàlà àpokonpe' nokon utauchinpa. ₁₈Màlà kasa làma atauchinpatàk kon, molopai utauchinpanpai'nokon upokonpe.

₁₉Ailon ukayaik Itepulu Jesus pàk sàlà pe'ne là Timothy yeunoko uya apyakù'nokon pe iwechi pàk, umeluntàtatoppe eyekale kon winà. ₂₀Mùkkàlà neken mùkkàlà uyewan kaichalon itewan àpùikattà kon pàk alikyeppe kulu tùwessen. ₂₁Tamù'nawolon kon nen tà tùnkupù kon pàk neken tùusenumenkasan, Jesus Christ pàkànsau pùla. ₂₂Tùse Timothy mùttuyatàik. Tùwe'wotokoma pàk iwessak man upokon pe, tùkàipùnù pokonpe imu we'wotokoma kasa. Ina we'wotokomasak man tamùkke, Wakù Itekale pàkànsau. ₂₃Apyakù'nokon màichi yeunoko uya ukayaik tà, yà'là kasa là talà tamù'nawolon wechi uwinàkàik ittusak uya yau. ₂₄Molopai Itepulu Jesus pàk ailon te uya sàlà, Iulà nàlà uyàpù pe tùuchittuik apyakù'nokon tachin pe tùpo pùla là.

₂₅Kùtonpa kon, Epaphroditus yeunoko uya kulu apyakù'nokon pàk usenumenkasak man. Iwe'wotokomasak lùppù ukaichalà molopai iwepanta'masak lùppù upyau, amaimu yekamanài nàlà eneunokoppù lùppù upùikattàtoppe ya. ₂₆Eyenpai'nokon kulu man tamù'nawàlà molopai ichewankono'masak man e'neppe tùwechi yekale yetasak auya'nokon pàk. ₂₇Ewaik e'neppe kulu iwechippù, iwelikùiwappù. Tùse Katù usentupappù ipàk. Molopai mùkkàlà pàk neken pùla, tùse upàk nàlà. molopai upùikattàppù ya màlà yentak usewankono'matok yapai. ₂₈Eneunoppai kulu wessaik apyakù'nokon, autauchinpa kon pa tu'ma yene auya'nokon yau. Molopai usewankono'matok pùla iwenatoppe. ₂₉Manùntàik uchi, tamù'nawàlà tùutauchinpaik, àtonpa kon pe Itepulu yau. Tamù'nawolon kon pùsàlà yekkwa ton kappon yamùk mùnamatàik. ₃₀Masapùla iwelikùiwappù Christ wotokoyi pàkànsau, alikyeppe tùwemattok tùlù tùuya yau ànkupù kon yentaino pàk upùikattà tùuya yau.