Revelation 13

₁Màlàyau àsà ene usenpo palau kapai yeneppù uya. 10 pe iletù wechippù molopai 7 pe ippai, alok wechippù iletù yamùk pàk, ikaichalà. Àli esek Katù talumattàtok menukasak wechippù ikaichalà ippai yamùk pàk. ₂Mùkkàlà, uneneppù wechippù eke kaikuchi kasa. Itta wechippù bear pùta kasa molopai palauya mùta kasa inta. Ulupelu uya ilepasak wechippù tùmeluntàlù ke, tapon ke, molopai eke tapàikketù ke. ₃Molopai ippai tonpa wàsak wechippù telikkase kasa, tùse àsà iwàsak elikkanài yek uchipittàsak wechippù. Tamù'nawolon kon non pon kon kappon yamùk usenumenkasak kulu wechippù molopai iwenaimappù tok uya. ₄Kappon yamùk uya ulupelu yapulàppù, masapùla tapàikketù tùsak ya itemyak pàk. Tok uya nàlà yapulàppù, “Ànùk ken pùsàlà àsà ene walai? Ànùk wepanta'ma ken iwinàkàik?” tukaik.

₅Àsà ene lepasak wechippù ànùk yentai uselupantok ke, Katù pàk àli pe mottùnpan pe iichelupatoppe, molopai tapàiketù yapulàtoppe ya ilepapù 42 pe kapùi. ₆Katù pa'nùpù pàk iwepyattàppù, molopai itesek nàlà, molopai patassek iwemattok yau, molopai tamù'nawolon kon epùn po tùwemassan. ₇Katù ponalok kon kappon yamùk pokonpe iwepanta'matoppe ikussak wechippù molopai tok yentaikatoppe ya. Apàikkek ke ilepasak wechippù tamù'nawàlà tùpatalo'nan ikkok yamùk, tùpatalon kon kappon yamùk, tùpatalo'nan mayin molopai kappon yamùk pata yamùk non pon yawolon kon yepoi. ₈Tamù'nawolon kon non po tùwemassan uya màlà yapulà, mùkyamlo kappon yamùk itesek imenukasak kon wema'nà kaletayi yau pen. Màlà kaleta màlà Kalinilu Mule iwàsak lùppù non koneka wapiya ponalok.

₁₁Molopai nàlà tùulon àsà ene wepakka non yapai yeneppù uya màlà. Asa'là iletù iwechippù kalinilu mule letù kasa, molopai ichelupappù ulupelu kasa. ₁₂Eke apàikkek wapiyalok àsà ene yapàikketù yapulàppù ya itemlotopo. Non molopai tamù'nawolon kon yau tùwemassan yeka'nonkappù ya wapiyalok àsà ene yemloto po tok wepeimatoppe, mùkkàlà àsà pe iwàsak elikkanài yek pe uchipittàsak lùppù. ₁₃Yakon ene uya eke ton tensen yekkwa pen kupùppù. Apok uttà toppe kaupai non pona ikupùppù ya, kappon yamùk uya yene tùse. ₁₄Tamù'nawolon kon kappon yamùk non po tùwemassan yennakappù ya tensen yekkwa pen kuttok tùuya winà, tùlepatok ikuttoppe tùuya wapiyalok àsà ene yemloto po. Pùsàlà yakon àsà ene uya tamù'nawolon kon kappon yamùk non pon kon pàk yekamappù, wapiyalok àsà ene kasa ikonekatoppe tok uya, yapulà pe mùkkàlà iwàsak lùppù asa'lon yà kasupala ke tùse iwennasak lùppù. ₁₅Yakon àsà ene lepasak wechippù apàikkek ke we'netukkantok tùtoppe ya wapiyalok àsà ene kasa ikonekasak yak iichelupatoppe molopai tamù'nawolon kon tapulànnan pen wàtoppe ya. ₁₆Mùkkàlà uya tamù'nawolon kon kappon yamùk yeka'nonkappù, eke ton molopai echikili ton, temamin kenan kon molopai itemamin pùnon, apyoto ton molopai apyoto ton pen, tok pattàtoppe kamik pen tok yemyatù pàk wapùla tok peyeppà pàk. ₁₇Ànù'là uya yà'làlà ye'ma wapùla ichilanma yentai iwechippù, sàlà pattàntok, màlà àsà ene yesek wapùla inonpayi pùla echii'ma.

₁₈Sàlà màlà pukkek ichelok. Ànù'là ittunài pe nai'nùk yà'là tetok là àsà ene uya pe pattàntok ittui, masapùla inonpayi màlà kappon nonpayi pe tùwessen. Inonpayi màlà 666 tawon.