Ye'masak Kon Yelemu
1Màlàyau uyenu tùlùppù uya màlà, molopai uyemlotopo iwechippù Kalinilu Mule satippe Zion Tùpù po, ipyau tukkan kon kappon yamùk wechippù, 144,000 pe, itesek yesak ton molopai Ikàipùnù yesek menukasak ipeyeppà pàk ton. 2Yà'làlànan tàwù yetappù uya màlà epùn poi eke tuna melu tàwù kasa tùusetasen, molopai wala'napi wettoikkwa kasa. Màlà itàwù uneta usetappù màlà kappon yamùk uya tewa ke'nan tùwayi kon tàulùnpa kasa. 3Satippe tok wechippù màlà aponnok yemloto po, asakùlà'nan kon nulànan kon ànùkyan nànan molopai Katù ponalok kon wapiyalok kon kappon yamùk 24 pan kon yemlotopo. Molopai emennak elen yelenpappù tok uya ànù'là usenupatok ipàk pen tùse mùkyamlo 144,000 pan kon neken ye'masak kon non poi. 4Pùsamlo mùkyamlo kàyik yamùk esuken iwekkusak kon, ulichan yamùk là pokonpe iwessak kon pen. Tok uya Kalinilu Mule wenaima màlà i'nailàlà iità yau, tok ye'masak wechippù màlà kappon yamùk kùlottapai molopai wapiya tùtùsen Katù molopai nen uchi Kalinilu Mule yemyak pe tok wechippù. 5Tok mùta yau kasei là pùla kulu iwechippù màlà, iwalai pen pùla tok wechippù.
Àsolùwawon Kon Inchelù Yamùk
6Màlàyau tùulon inchelù wainùnsak kau kak yau yeneppù uya. Tàwàlàlà tùwemassen Wakù Itekale yesappe. Inekama non pon kon kappon yamùk pàk, tamù'nawolon kappon yamùk pata yamùk yawolon kon, pata kok molopai tùpatalo'nan mayin yamùk molopai kappon yamùk pàk. 7Eke pe wateppù ya, “Katù inamatàk kon, molopai eke pe iwettok yapulàtàk kon! Masapùla kappon yamùk ittutok ya yattai uyàssak man. Molopai epùn, kak, non, palau, molopai non yapai tùwepakkasan tuna yamùk konekanàippù yapulàtàk kon!” teppù ya.
8Yakon inchelù uyàpùppù ite'mappù pàk, “Iwekkawai'masak man! Eke Babylon wekkawai'masak man! Meluntà tùwuku inchitoppe tamù'nawolon pata yamùk yawon kon kappon yamùk uya ikupùppù ya. Sàlàichi wechippù màlà meluntà tinchisen àli pe tùtayappù pen pokonpe iwettok yeuku!” tei'ma.
9Icholùwano inchelù uya wapiyalok asa'lon kon wenaimappù, “Ànù'là àsà ene molopai ikasa ikonekasak lùppù yapulànài molopai pattàntok ya yanùnnài tùpeyeppà pàk wapùla temyatù pàk wechi molo yau. 10Mùkkàlà uya nàlà màlà Katù we'naikatok yeuku inchi. Meluntà kulu tùwe'naikatok kokù yak inmappù esukenan yà'là yekkwa là ke yoi'mappù pùn. Ewaik, mùkkàlà sàlà ku'nàippù talumattà màlà apok molopai kulupala kasa tùkà'nùnsen yau, wakù ton inchelù yamùk molopai Kalinilu Mule yemloto po,” teppù ya eke pe. 11“Tok talumattàtok apok kelechin wechi màlà tùwenuku pàk tàwàlàlà molopai tàwàlàlà. Wàlàkka'nàtok pùla iwechi màlà weinai wapùla ewalupàttau, mùkyamlo àsà ene molopai ikasa ikonekasak yapulà pàk iwessak kon, molopai ànù'là itesek ke ipattàsak lùppù ponaloppe,” teppù ya nàlà.
12Sàlà màlà pàlikantok iche tùwessen Katù ponalok kon kappon yamùk ponaloppe, mùkyamlo Katù uya enupantok maimu yawàlà tùwessan molopai ailon pe tùwessan Jesus pàk.
13Màlàyau mayin yetappù uya epùn poi, “Sàlà imenukakà, Tùutauchinpasan mùkyamlo sàlà motapai tùwelichan Itepulu Katù wotokoyi yau,” te ya. “Ewaik kulu nen,” nùkayan Wakù Akkwalù. “Wàlàkka'nàtok yepolo tok uya màlà sa'man pe tùwe'wotokomatok kon winàpaino, masapùla tùwe'wotokomatok kon yepeppù yalà tok uya màlà ta'là'nokon.”
Ipànsak Lùppù Non Po Pilittok
14Màlàyau uyenu tùlùppù uya, molopai aimu'nan katuppluk yeneppù uya. Molopai katuppluk po chichiu pe Kàyik Mumu kasa tùusensen wechippù, kolù alok ippai po, molopai yàkek kasupala walai woyoi pan itemyau. 15Molopai nàlà tùulon inchelù wepakkappù Katù yùwùk tapai molopai iwentaimeppù eke pe mùkkàlà katuppluk po chichiu pe tùwessen pàk,
“Akasupalayi yapulàkà molopai ipànsak ipilikkà, masapùla ipilittok yattai uyàssak man, non wappùsak man ipànsak pilittoppe!” tukaik.
16Màlàyau mùkkàlà katuppluk po chichiu pe tùwessen uya woyoi pan tùkasupalayi wùuwùumappù non yepoi molopai non po ipànsak pilipùppù ya.
17Molopai nàlà tùulon inchelù wepakka Katù yùwùk epùn pon tapai yeneppù uya, molopai mùkkàlà tu'ma wechippù màlà yàkek kasupala woyoi pan itemyau.
18Molopai tu'ma tùulon inchelù apok yesak uyàpùppù, Katù lepatok pottàtok patassek winàpai. Iwentaimepù màlà eke pe mùkkàlà inchelù yàkek kasupala woyoi pan yesak pàk,
“Akasupalayi yapulàkà molopai tamùkke'ne nai'nùk grape yamùk ipilikkà non pon itek poi, masapùla iwappùsak man,” tukaik.
19Màlàpàk inchelù uya tùkasupalayi wùuwùumappù non polo, kùyali yattàppù ya itek poi, molopai yenu'mappù ya eke Katù we'naikatok muluyi yak. 20Grape kakklàppù màlà mulu yai pata yenapo, molopai mùn uyàpùppù mulu yapai, iwu'mappù eke pe mei 1600 kaichalon ittutok ike molopai ikupai pe kawale pùmù yawàlà.
