Revelation 15
7 Pan Kon Inchelù Yamùk Tewinanùppù Talumattàntok Pokon Pan Kon
1Màlàyau tùulon eke molopai enumenkanài, tensan yekkwa pen yeneppù uya màlà epùn yau, 7 pe inchelù yamùk wechippù màlà, 7 pan talumattàntok pokon pan kon. Sàlà yamùk màlà tewinanùppù talumattàntok, masapùla màlà yamùk ke Katù we'naikatok wenukapù màlà.
2Molopai awai'nan pottolo walai palau yeneppù uya, yoi'masak apok ke. Yeneppù uya tu'ma mùkyamlo àsà ene yentaikannan nùssan molopai ikasa ikonekasak, molopai mùkkàlà itesek nonpayi itùsak lùppù yentaikannan nùssan. Satippe tok wechippù palau wanamali kasa tùusensen piyau, tewa ke'nan tùwayi kon yachi pàk tok wechippù màlà Katù uya tùlepatok kon. 3Moses, Katù yapyoto, yelemu pàk tok uselenpappù, molopai Kalinilu Mule yelemu,
“Itepulu Katù, Mùkkàlà neken Meluntà, eke pe molopai wakù kulu kupùppù auya man! Tamù'nawolon pata yamùk Kinù, ikasa molopai ailon pe eyeselu man! 4Ànùk usenalipa pen ken àpàk Itepulu? Molopai ànùk uya ken eyesek yapulàtok nepù? Masapùla àmàlà neken mùkkàlà Wakù esukenan. Tamù'nawolon patassek yamùk yawon kon uyàpù màlà ayapulàse eyemlotopo, masapùla wakù iwalai ànkupù usenpoikasak man,” tukaik.
5Sàlà tùpo epùn pon Katù uya ikupù uya màlà tetok yen patassek yeneppù uya màlà. 67 pan kon inchelù yamùk 7 pan tewin itekkwalok lùppù talumattàntok pokonpan kon wepakkappù Katù yùwùk tapai, tok wepontàsak wechippù esukenan molopai aimu'nan linen pon yak, molopai liuliupan kolù ittawolon pùlopo mùk wechippù tok pùlopo woi. 7Asakùlà'nan kon nulànan kon ànùkyan nànan walai tonpa uya 7 pan kon inchelù yamùk lepappù màlà 7 pan kolù pùsau yanùkkapàssak Katù we'naikatok ike, ke. Katù tàwàlàlà molopai tàwàlàlà tùwemassen. 8Katù yùwùk wanùssak wechippù màlà apok kelechin ke, eke pe Katù wettok molopai imeluntàlù winàpaino ke. Ànù'là wewomù Katù yùwùk tak pen, 7 pan talumattàntok nessak 7 pan kon inchelù yamùk uya wenukapù ponalà.
Patamuna New Testament Revised © United Bible Societies, 1973, 2019.
