7 Pan Pùsau Yamùk Katù We'naikatok Yen
1Màlàyau eke mayin uselupa Katù yùwùk tapai 7 pan kon inchelù yamùk pokonpe yetappù uya,
“Itàtàk kon molopai 7 pan pùsau yawon Katù we'naikatok ikkwantantàk non pona!” tukaik.
2Wapiyalok inchelù utàppù molopai tùssawù yawon ikkwamùppù ya non pona. Àsà molopai e'nek sukkwek yamùk usenpoikappù mùkyamlo àsà ene uya pattàntok yesak ton molopai ikasa ikonekasak yapulà pe iwepeimasak kon pàk.
3Màlà ye'mappùtak yakon inchelù uya tùssawù yawon ikkwamùppù palau kak. Tuna wenappù iwelichak kappon mùnù kasa, molopai tamù'nawàlà nulà palau kau tùwessan welikùppù màlà.
4Molopai nàlà icholùwano inchelù uya tùssawù yawon ikkwamùppù tuna yamùk kak molopai non yapai tùwepakkasan tuna kak, molopai mùn pe tok wenappù. 5Inchelù tuna yesappe tùwessen uya, “Iwalai àmàlà, sàlà yamùk talumattà pàk, Àmàlà mùkkàlà wakù esukenan kulu, sàlà pe nai'nùk molopai iwechippù nai'nùk! 6Katù ponalok kon kappon yamùk molopai imaimu yenpoikannan mùnù ikkwamùppù tok uya, màlàpàk tok lepasak auya man mùn ke tok uya inchitoppe. Tepeppù kon yepoyan tok,” teppù ya. 7Màlàyau mayin Katù ponalok pottà patassek winàpaino yetappù uya, “ Ewaik, Itepulu tewinan Katù, Mùkkàlà neken Meluntà! Ailon molopai iwalai màlà talumattàntok auya!” te ya.
8Màlàyau ichakùlà'no inchelù uya tùssawù yawon ikkwamùppù wei pona, molopai meluntà ke wei lepappù màlà kappon yamùk pottàtoppe ya a'neppe kulu tùwettok ke. 9Kappon yamùk pottàppù a'neppe iwa'mintasak uya, molopai Katù yesek pa'nùpùppù tok uya, mùkkàlà sàlà yamùk talumattàntok kon yapàikketù yesak. Tùse tok welattàppù pen tùmakuyi kon winàpai, molopai eke pe iwettok yapulàppù tok uya pen.
10Màlàyau 5 pe iku'nài inchelù uya tùssawù yawon ikkwamùppù àsà ene yapon pona. Ewalupà wechippù màlà itepulu pe iwettok patassek po. Molopai kappon yamùk uya tani kon ikkapàtùppù ti'nimù kon pàk. 11Molopai Katù epùn pon pa'nùpùppù tok uya ti'nintok kon molopai sukkwek yamùk pàkànsau. Tùse àli tùnkupùppù kon winàpai tok welattàppù pen.
12Màlàyau 6 pe iku'nài inchelù uya tùssawù yawon ikkwamùppù eke tuna Euphrates pona. Tuna wa'munappù màlà, wei wepakkatok winàpaino kon kin yamùk uyàpù ye'ma koneka pe. 13Màlàyau àsolùwawon kon àli ton akkwalù yamùk yeneppù uya, pàlàtuku kasa'ne tok wepakka ulupelu mùta yapai, àsà ene mùta yapai, molopai iwalai pen itekale yekamanài mùta yapai. 14Mùkyamlo wechippù màlà makui yakkwalù yamùk tensen pen ku'nàinan pe. Pùsamlo àsolùwawon kon àli akkwalù yamùk mùkyamlo tùutàsan tamù'nawolon kon kin yamùk non pon kon piyak, tok nesse tamùkke wepanta'mantok ponaloppe Eke wei, tewinan Katù, Mùkkàlà neken Meluntà weyu yattai.
15“Yentàk kon! Uyàssaik amak kasa! Tùutauchinpasen mùkkàlà kappon tùwe'nùnsen pen molopai tùpon mainanpanài, ipon pùla tùusalà molopai tùwekuli'ma ayupo kappon yamùk yemloto po tukaik!” teppù ya nàlà.
16Màlàyau akkwalù yamùk uya kin yamùk nepùppù tamùkke patassek Hebrew Maimu yau tesassen Armageddon tukaik yak.
17Màlàyau 7 pe iku'nài uya tùssawù yawon ikkwamùppù kakàik. Eke mayin uyàpùppù aponnok Katù yùwùk tawon winàpai, “Nenukapàssan!” tukaik. 18Pata wekamlippàtùppù, eke pe, wala'napi wettoippàtùppù, molopai àsà pe kulu tùlùpùnù wechippù molo. Màlà yekkwa tùlùpùnù pùla iwechippù màlà kappon konekappù motapai. Sàlà tùlùpùnù wechippù màlà àsà pe kulu. 19Màlà Eke kulu pata wessala'moppù màlà àsolùwau, molopai kappon yamùk pata yamùk non pon yawolon kon mattanùpùppù màlà. Katù uya eke Babylon yenumenkappù, molopai wain inchitoppe ya ikupùppù ya tùkokù yapai, àsà pe tùwe'naikatok yeuku. 20Tamù'nawàlà tuna iwoino pata yamùk utamappù tùumattase, tamù'nawolon wùk yamùk waliwomùppù. 21Eke ton tàk tuna usa'mansak, 100 pounds pan iteme'netù, wepukappù kaupai kappon yamùk pona. Molopai kappon yamùk uya Katù pa'nùpùppù màlà, tuna usa'mansak ke talumattàntok wenai, masapùla àsà pe kulu talumattàntok wechippù màlà.
