1 Tesalonika 2

₁Brada nanga sisa, un srefi sabi taki wi no ben kon fu soso na unu. ₂Un sabi taki fosi wi ben kon na unu, wi ben kisi fonfon èn den ben du hati sani nanga wi na Filipi. Ma Gado gi wi a dek'ati fu tyari a bun nyunsu fu En gi unu, aladi sma ben du ala muiti fu tapu wi. ₃Wi no e tyari a boskopu nanga takru prakseri, noso fu kori unu, noso fu kisi unu. ₄Nono, na Gado srefi feni taki wi bun fu wroko gi En, èn A fertrow wi nanga a bun nyunsu. Dat' meki wi no e taki sani fu gi sma prisiri. Wi e taki fu gi Gado prisiri, di sabi wi ati dorodoro. ₅Soleki fa un srefi sabi, wi no pruberi noiti fu kisi unu nanga moi wortu. Èn noiti wi ben prakseri fu abi wini na unu. Gado na wi kotoigi. ₆Sosrefi wi no ben suku fu kisi grani fu sma: no fu unu, no fu tra sma. ₇Leki boskopuman fu Kristus wi ben abi a leti fu poti wi sorgu na un tapu. Ma wi no du en. Di wi ben de na un mindri, wi sori unu switi maniri neleki wan m'ma di e kweki èn sorgu den pikin fu en. ₈A lobi san wi abi gi unu bigi sote taki wi no ben de klar'klari wawan fu gi unu a bun nyunsu fu Gado, ma wi eigi libi srefi. Na so tranga wi lobi unu. ₉Brada nanga sisa, un sabi o tranga wi ben wroko èn fa wi ben meki muiti a ten di wi ben preiki a bun nyunsu fu Gado gi unu. Wi ben e wroko dei nanga neti fu no poti wi sorgu na un tapu. ₁₀Unu na wi kotoigi, èn Gado srefi na wi kotoigi, fa wi ben tyari wisrefi na mindri unu di e bribi. Wi ben libi wan santa fasi èn tapu wan fasi di bun ini Gado ai. Sma no ben man taki ogri fu wi. ₁₁Un srefi sabi taki leki fa wan p'pa e du nanga en eigi pikin, na so wi ben du tu nanga ibriwan fu unu: ₁₂wi ben taki nanga unu, wi ben gi un dek'ati, èn wi ben sori un taki un mus tan libi leki fa Gado wani. Na En kari unu fu kon ondro a tiri fu En èn fu teki prati ini En glori.

₁₃Moro fara wi no man tapu fu taki Gado tangi, bika di un yere a wortu fu Gado di wi ben preiki gi unu, un bribi en. Un no teki en leki wan boskopu fu libisma, ma un teki en leki san a de, sobun a wortu fu Gado. Èn a wortu disi e wroko na ini unu di e bribi. ₁₄Brada nanga sisa, san psa nanga unu na a srefi leki san psa nanga den gemeente fu Gado ini Yudea, di de wan nanga Kristus Yesus. Bika leki fa den Dyusma pina den, na so un eigi kondreman pina unu. ₁₅Den Dyusma dati kiri Masra Yesus nanga den profeiti, èn den ben de nomonomo na wi baka fu du wi ogri. Den sani san den e du no e gi Gado prisiri, èn den de leki feyanti fu ala sma. ₁₆Bika den e tapu wi fu tyari a boskopu gi den sma di no de Dyu, fu den sma dati no feni a libi fu têgo. Na sowan fasi den e lai moro sondu na tapu densrefi. Ma te fu kba Gado lusu En atibron na den tapu.

₁₇Brada nanga sisa, na wan pisten kba di wi no si unu fu di wi ben mus fu gwe libi unu. Ma un no kmopo na ini wi prakseri. Wi meki ala muiti fu kon na unu, fu di wi abi wan tranga angri fu si unu ai na ai. ₁₈Wi ben de fu kon na unu èn mi, Paulus, ben du muiti moro leki wan leisi fu kon. Ma Satan tapu pasi gi wi. ₁₉Wi ben wani kon na unu, bika unu na wi howpu nanga prisiri. Unu na a pai nanga san wi o prodo te wi Masra Yesus kon baka èn te wi o tnapu na En fesi. ₂₀Iya, na unu na wi grani nanga wi prisiri.