1 Tesalonika 3

₁Ma fu di wi no ben man hori en moro langa, meki wi teki a besroiti fu tan wi wawan na Atena. ₂Dan wi seni wi brada Timoteus kon luku unu. A de wan fu den wrokoman fu Gado di e panya a bun nyunsu fu Kristus. Wi ben seni en kon fu gi un krakti nanga dek'ati fu un kon moro tranga ini un bribi. ₃A ben mus du dati fu no wan fu unu no degedege te un e nyan a pina disi. Un srefi sabi taki den sani disi o miti unu. ₄Bika di wi ben de ete nanga unu, wi ben taigi unu kba taki un alamala ben o abi fu nyan pina. Leki fa un sabi, a psa so tu. ₅We, na fu di mi no ben man hori en moro langa meki mi seni Timoteus kon na unu fu mi ben kan sabi fa a e go nanga a bribi fu unu. Mi ben frede taki kande didibri ben kon tesi unu, dan ala muiti san wi ben meki ben o de fu soso.

₆Ma now di Timoteus drai kon baka na wi, a tyari bun nyunsu kon fu a bribi nanga a lobi fu unu. A ferteri wi fa unu e prisiri ala leisi te un e memre wi, èn fa unu e angri fu si wi soleki fa wi e angri fu si unu. ₇Brada nanga sisa, wi de na ini nowtu nanga pina, ma wi ati firi bun fu di wi yere taki un tan bribi. ₈Di wi yere taki un tan hori doro na Masra, wi kisi libi baka na ini wi skin. ₉Un no kan taki Gado nofo tangi fu a bigi prisiri di A e meki wi abi nanga unu. ₁₀Dei nanga neti wi e begi Gado fayafaya fu wi kan miti ai na ai nanga unu. Dan wi o man yepi unu nanga san e mankeri ete na ini un bribi. ₁₁Wi e begi meki Gado wi P'pa srefi, nanga wi Masra Yesus, sa meki pasi gi wi fu wi kan kon na unu. ₁₂Wi e begi Masra tu, fu A meki a lobi fu unu gro moro nanga moro gi makandra nanga gi ala tra sma, soleki fa wi srefi lobi unu. ₁₃Na so un sa kisi krakti fu un kan de santa èn sondro fowtu fesi Gado wi P'pa te wi Masra Yesus sa drai kon baka nanga ala den sma fu En.