2 Korinte 6

₁Ma leki sma di e wroko makandra nanga Gado, wi e begi unu: Un no meki taki a bun-ati di Gado sori unu, de fu soso. ₂Bika A e taki: “Di a yoisti momenti doro, Mi piki yu begi. Di a dei doro fu ferlusu sma, Mi yepi yu.” Arki, disi na a yoisti momenti. Luku, disi na a dei fu ferlusu sma.

₃Wi e sorgu taki wi no e du no wan sma no wan sani fu den taki takru fu a wroko fu wi. ₄Ma ini ala sani wi e meki sma si taki wi na knekti fu Gado: te wi abi fu hori doro langa, te sma e pina wi, te wi de ini nowtu, te wi de ini bigi benawtu, ₅te den e fon wi, te den poti wi na straf'oso, te wi de ini dyugudyugu, te wi abi fu wroko tranga, te wi abi fu tan sondro sribi, te wi abi fu tan sondro nyanyan, ₆ini a krin fasi fa wi e libi, ini sabi, ini langa pasensi, ini switi maniri, ini den sani fu a Santa Yeye, ini trutru lobi, ₇te wi e preiki a tru boskopu, te Gado e gi wi En krakti, te wi hori den fetisani ini wi let'anu nanga wi kruktu-anu fu du sani di bun ini Gado ai, ₈te sma e gi wi grani èn te den e broko wi saka, te den e taki takru fu wi èn te den e taki bun fu wi. Den e kari wi bedrigiman, ma wi e sori taki wi de fu fertrow. ₉Sma no sabi wi, ma toku den sabi wi heri bun. A gersi wi e dede, ma luku, wi e libi. Den priti wi skin, ma wi no dede. ₁₀Wi e firi sari, ma wi e tan prisiri. Wi na pôtisma, ma wi e meki furu sma kon gudu. Wi no abi noti, ma toku wi abi ala sani. ₁₁Brada nanga sisa fu Korinte, wi taigi un krin san de tapu wi ati. Wi abi wan bigi presi na ini wi ati gi unu. ₁₂Wi no ben tapu wi ati gi unu, ma unu ben tapu un ati gi wi. ₁₃Mi e taki nanga unu leki mi eigi pikin. Un mus du a srefi sani san wi du: Un mus opo un ati gi wi tu.

₁₄Un no mus de wan nanga sma di no e bribi. Bika san wan sma di e du san bun ini Gado ai, abi fu du nanga sma di no e span nanga no wan wèt? Noso fa faya nanga dungru kan moksi makandra? ₁₅San Kristus abi fu du nanga Belial? Noso san wan bribisma abi fu du nanga wan sma di no e bribi? ₁₆Fa a santa presi fu Gado kan abi wan sani makandra nanga kruktu gado? Bika wi na a santa presi fu a libilibi Gado. Bika Gado srefi taki: “Mi o libi èn waka na den mindri. Mi o de a Gado fu den èn den o de a pipel fu Mi. ₁₇Na dat' meki Masra taki: Un mus kmopo na den mindri. Un mus prati nanga den. Un no mus abi noti fu du nanga sani di no krin. Dan Mi sa teki un leki sma fu Mi. ₁₈Masra di abi Ala Makti, taki moro fara: Mi sa de un P'pa èn un sa de Mi manpikin nanga Mi umapikin.”