Genesis 17

₁Di Abram ben abi neigitenti-na-neigi yari MASRA sori ensrefi na en, dan a taigi en taki: “Mi na A Gado di abi ala makti. Libi leki fa Mi wani taki yu mus libi. No meki mi feni fowtu na yu. ₂Mi o meki wan ferbontu nanga yu. Mi o gi yu furu bakapikin.” ₃Dan Abram trowe ensrefi nanga fesi na gron. Gado taigi en moro fara taki: ₄“Luku, Mi e meki a ferbontu disi nanga yu: den bakapikin fu yu sa tron bigi folku. ₅Fu dat'ede den no sa kari yu Abram moro langa, ma yu sa nen Abraham. Bika Mi o meki den bakapikin fu yu tron bigi folku. ₆Mi o meki yu kisi furu bakapikin di o tron bigi folku. Sonwan fu den o tron kownu srefi. ₇Mi e meki a ferbontu disi nanga yu, ma a o de fu den bakapikin fu yu tu. A ferbontu disi o de fu têgo. Mi sa de Gado gi yu, den pikin fu yu nanga den bakapikin fu yu. ₈Mi sa gi yu nanga den bakapikin fu yu a kondre disi pe yu e libi now leki wan doroseisma. A heri kondre Kanaan sa de fu unu fu têgo èn mi sa de un Gado.”

₉Gado taigi Abraham moro fara taki: “Yu, den pikin fu yu nanga den bakapikin fu yu mus hori unsrefi fu unu sei na a ferbontu fu mi. ₁₀Disi na fa un mus hori unsrefi na a ferbontu: ala mansma na un mindri mus besnei. ₁₁Un sa koti a fesibuba fu un manpresi puru. Dati sa de a marki fu a ferbontu fu Mi nanga unu. ₁₂Fu têgo ala manpikin mus besnei aiti dei baka te den gebore. Disi de gi yu eigi folku, gi ala sma di gebore ini yu oso, nanga gi den sma di yu bai nanga moni ma di no de sma fu yu folku. ₁₃Ala srafu di gebore ini yu oso nanga den wan di yu bai nanga moni mus fu besnei. Tapu a fasi disi a marki na yu skin sa sori taki Mi abi wan têgo ferbontu nanga yu. ₁₄A man di no besnei sobun a man di no meki den koti a fesibuba fu en manpresi puru, den mus yagi fu têgo kmoto na mindri fu den Israelitisma, fu di a broko a ferbontu nanga Mi.”

₁₅Gado taigi Abraham tu taki: “Yu no sa kari yu wefi Sarai moro, ma yu sa kari en Sara. ₁₆Mi sa blesi en. Ensrefi sa gi yu wan manpikin tu. Iya, Mi sa blesi en taki den bakapikin fu en tron bigi folku. Bakapikin fu en sa de kownu srefi.” ₁₇Dan Abram trowe ensrefi nanga fesi na gron. A lafu dan a prakseri na ensrefi: “Wan man fu wan hondro yari o man tron p'pa ete? Sara o man meki wan pikin ete nanga en neigitenti-na-neigi yari?” ₁₈Ne a taigi Gado taki: “Tye, meki a pramisi fu yu de gi Ismael.” ₁₉Ma Gado taigi en taki: “Kwet'kweti. Yu wefi Sara sa kisi wan manpikin èn yu mus kari en Isak Mi sa meki wan ferbontu nanga en. Disi sa de fu têgo èn a sa de tu gi den bakapikin fu en. ₂₀Mi yere yu begi tu gi Ismael. Arki, Mi sa blesi en tu fu a kisi furu bakapikin. Den o tron wan bigi folku èn twarfu bakapikin fu en sa de kownu. ₂₁Ma a ferbontu fu Mi na fu Isak wawan, a manpikin di Sara o meki tra yari gi yu, a srefi pisten disi.” ₂₂Di Gado kba taki nanga Abraham a gwe libi en.

₂₃A srefi dei dati ete Abraham teki en boi Ismael, ala den srafu di gebore ini en oso nanga den wan di a ben bai nanga moni, dan a besnei den. A koti a fesibuba fu den manpresi puru, leki fa Gado ben taigi en fu du. ₂₄Abraham ben abi neigitenti-na-neigi yari di a besnei. ₂₅Ismael, a manpikin fu en, ben abi tin-na-dri yari di a besnei. ₂₆Abraham nanga en boi Ismael besnei tapu a srefi dei. ₂₇Tapu a srefi dei dati ala den mansma ini en oso besnei tu. Ala srafu di gebore ini en oso nanga den wan di a ben bai nanga moni.