Genesis 18

₁Dan MASRA sori ensrefi na Abraham na den bigi bon fu Mamre pe Abraham ben e tan. Abraham ben e sidon na mofodoro fu en tenti. A ben de a moro faya yuru fu a dei. ₂Di Abraham opo en ede luku, wantronso a si dri man tnapu. Di a si den a opo, a waka es'esi go miti den dan a boigi gi den. ₃Dan a taigi wan fu den taki: “Mi Masra, efu yu abi prisiri nanga mi dan mi e begi tangitangi fu yu no psa a oso fu yu knekti. ₄Meki mi seni teki pikinso watra fu un wasi un futu, dan un rostu ondro a bon. ₅Fu di un kon na mi oso mi sa go teki pikinso nyanyan gi unu tu fu un kan kisi krakti baka. Baka dati un kan hari go moro fara.” Dan den piki Abraham taki: “A bun. Du san yu taki.”

₆So Abraham go es'esi na Sara di ben de ini a tenti, dan a taigi en taki: “Go es'esi go teki dri kan fu a moro bun blon. Masi en, dan yu e baka kuku fu en es'esi.” ₇Dan Abraham lon go na den kaw. A teki wan yonguwan di ben fatu moi. A langa en gi a knekti fu en, dan a knekti gwe es'esi go srakti a kaw fu a ben kan bori a meti fu en. ₈Di a meti ben klari fu nyan, Abraham poti en makandra nanga botro nanga merki gi den. Dan a tan tnapu nanga den ondro a bon di den ben e nyan.

₉Dan den aksi Abraham taki: “Pe yu frow Sara de?” A piki den taki: “A de drape ini a tenti.” ₁₀Ne wan fu den taki: “Fu tru, mi e taigi yu taki tra yari mi sa drai kon baka na yu, dan yu frow Sara sa abi wan boi.” Ma Sara ben tnapu na baka a man na mofodoro fu a tenti e arki. ₁₁Abraham nanga Sara ben grani srefsrefi kba. Sara no ben e kisi en munsiki moro. ₁₂Ne Sara lafu. A prakseri na ensrefi taki: “Mi skin kon owru kba. Mi masra srefi owru kba. Fa mi sa abi prisiri ete dan fu go na bedi nanga mi masra?” ₁₃Dan MASRA aksi Abraham taki: “Fu sanede Sara e lafu? Fu sanede a taki: ‘Mi sa kisi pikin ete tapu mi owru dei?’ ₁₄Yu denki taki wan sani de di MASRA no man du? Tra yari, te a ten doro, Mi sa drai kon baka na yu dan Sara sa abi wan manpikin.” ₁₅Ma Sara ben kon frede. Dat' meki a taki: “A no tru. Mi no lafu.” Ma MASRA piki taki: “A tru. Yu ben lafu.”

₁₆Dan den dri man kmoto fu drape go na wan presi pe den ben man si Sodom. Abraham ben waka go te drape nanga den di den e gwe. ₁₇MASRA ben e prakseri na ensrefi: “Mi sa kibri gi Abraham sa Mi wan du? ₁₈Bika den bakapikin fu en sa tron wan bigi èn tranga folku. Ala folku na grontapu sa winsi fu Mi blesi den leki fa Mi blesi en. ₁₉Na en Mi teki. A mus leri den pikin nanga den bakapikin fu en fu den libi leki fa Mi, MASRA, wani: Leki sma di bun ini Mi ai èn di e libi bun. Dan so Mi sa man meki den pramisi di Mi ben gi Abraham, kon tru.” ₂₀Ne MASRA taki: “Mi yere den hebi kragi fu den sani di e psa ini Sodom nanga Gomora, fa den sma fu drape e sondu hebi. ₂₁Mi wani saka go fu go luku efu den hebi kragi de trutru so. Mi wan sabi.”

₂₂So den tu man kmoto fu drape fu go na Sodom, ma MASRA ben tan tnapu nanga Abraham ete. ₂₃Abraham go pikinso moro krosbei dan a taki: “Yu sa figi sma di bun ini yu ai puru makandra nanga den sma di e du ogri? ₂₄Kande feifitenti bun sma de ini a foto. Yu sa figi a foto puru dan, sondro fu gi en pardon fu den feifitenti bun sma di de ini en? ₂₅Kwet'kweti! Yu no o du so srefsrefi! Yu no sa kiri den bun sma makandra nanga den ogriwan, neleki den bun sma nanga den ogriwan na a srefi. Nono. Yu na A Krutuman di e krutu heri grontapu. Yu e krutu nanga leti.” ₂₆Ne MASRA piki taki: “Efu Mi feni feifitenti bun sma ini Sodom, Mi sa gi a heri foto pardon fu den feifitenti sma dati ede.” ₂₇Abraham piki baka taki: “Tye, MASRA, gi mi pardon fu di mi leki wan libisma prefuru fu taki nanga yu. ₂₈Ma kande feifitenti bun sma no de. Kande feifi e mankeri. Yu sa figi a heri foto puru dan, fu di feifi e mankeri?” MASRA piki taki: “Mi no sa figi a foto puru efu Mi feni fotenti nanga feifi bun sma.” ₂₉Abraham aksi baka taki: “Kande fotenti nomo de.” MASRA piki en baka taki: “Mi no sa du en fu den fotenti sma ede.” ₃₀Dan Abraham taki: “MASRA, mi e begi no kisi atibron gi mi efu mi aksi ete wan leisi. Ma kande dritenti sma nomo de.” Ne MASRA piki taki: “Mi no sa du en efu Mi feni dritenti sma.” ₃₁Ma Abraham taki baka taki: “Tye, MASRA, gi mi pardon fu di mi e prefuru fu taki nanga yu. Kande tutenti sma de.” MASRA piki taki: “Mi no sa figi a foto puru fu den tutenti sma dati ede.” ₃₂Dan Abraham taki: “MASRA, mi e begi, no kisi atibron gi mi efu mi aksi ete wan leisi. Ma kande tin sma nomo de.” MASRA piki taki: “Mi no sa figi a foto puru fu den tin sma dati ede.”

₃₃Di MASRA kba taki nanga Abraham a gwe. Dan Abraham drai go na en tenti.