Hebrewsma 8

₁A moro prenspari sani di wi wani tyari kon na fesi na taki wi abi sowan granpriester di e sidon na a let'anu sei fu a kownusturu fu a Bigi Gado na heimel. ₂A e du a wroko ini a santa presi, ini a trutru santa tenti di a no libisma meki, ma di Gado srefi meki. ₃A wroko fu ibri granpriester na fu tyari presenti nanga ofrandi gi Gado. Fu dat'ede a ben de fanowdu tu taki a granpriester disi ben abi wan ofrandi fu tyari. ₄Efu A ben de na grontapu, A no ben o de wan priester srefsrefi, bika sma de kba di e tyari ofrandi soleki fa a wèt e taki. ₅Ma a santa tenti pe den e du a wroko na wan prentyi nanga wan eksempre nomo fu a wan di de na heimel. Di Moses ben o meki a santa tenti, Gado taigi en taki: “Sorgu taki yu meki ala sani leki a eksempre san Mi sori yu tapu a bergi.” ₆A wroko di Yesus kisi fu du now leki priester, moro hei. Bika En de a Mindriman fu wan moro bun ferbontu di abi moro bun pramisi. ₇Bika efu noti no ben mankeri na a fosi ferbontu, dan a di fu tu no ben o de fanowdu. ₈Ma fu di Gado ben feni fowtu na den sma fu En, A taki: “Masra e taki: Luku, wan ten o kon pe Mi o meki wan nyun ferbontu nanga a pipel fu Israel èn nanga a di fu Yuda. ₉A no sa de leki a ferbontu di Mi ben meki nanga den afo fu den, na a ten di Mi ben langa anu gi den fu puru den na Egipte. Bika den no hori densrefi na Mi ferbontu, dan Mi drai Mi baka gi den. Na so Masra e taki.” ₁₀Masra e taki: “Disi na a ferbontu di Mi o meki nanga a pipel fu Israel baka den dei dati: Mi o poti den wèt fu Mi na ini den prakseri, èn Mi o skrifi den poti na ini den ati. Mi o de den Gado èn den sa de Mi pipel. ₁₁A no sa de fanowdu moro fu wan sma e taigi en kondreman noso en brada taki: ‘Yu mus kon leri sabi Masra.’ Bika ala sma sa sabi Mi, bigin fu den pikinwan kon miti den bigiwan. ₁₂Bika Mi o gi den pardon fu den ogri di den du èn Mi no sa memre den sondu fu den moro.” ₁₃Efu Gado taki fu wan nyun ferbontu, dan A e taki tak' a fosi wan kon owru. Èn efu wan sani de langa kba èn a kon owru, dan pikinso ete èn a no o de moro.