Hebrewsma 9

₁A fosi ferbontu ben abi en fasi fa den sma ben mus anbegi Gado, èn a ben abi wan santa presi dya na grontapu. ₂Den ben meki wan tenti, dan den ben kari a fosi pisi fu en a santa presi. Drape yu ben abi a kandelaar nanga a tafra pe den brede ben de di den poti aparti gi Gado. ₃Baka a di fu tu garden, yu ben abi wan pisi san den ben kari a Moro santa presi. ₄Drape yu ben abi a gowtu altari pe den ben e bron switismeri, nanga a santa kisi fu a ferbontu. A kisi disi ben tapu na ala sei nanga gowtu. Ini a kisi yu ben abi wan gowtu kan nanga mana, a wakatiki fu Aaron san ben sproiti, nanga den ston tapu san a ferbontu ben skrifi. ₅Tapu a kisi yu ben abi tu Kerub leki marki taki Gado drape. Nanga den frei den ben e tapu a presi pe a granpriester ben e kon aksi Gado pardon fu sondu. Ma un no man taki fin'fini fu den sani disi now. ₆Na so a tenti ben seti. Dan ala leisi te den priester ben e kon fu du den wroko, den ben e kon soso ini a fosi pisi. ₇Ma na ini a di fu tu pisi, a granpriester wawan ben e go wan leisi ini wan yari. A ben mus go nanga brudu san a ben mus gi leki ofrandi gi sondu di ensrefi du, nanga fu den sondu san a pipel ben du sondro fu den ben sabi. ₈A Santa Yeye ben e sori wi nanga dati taki a pasi fu go ini a Moro santa presi no ben opo ete, solanga a fosi tenti ben de ete. ₉Den sani disi na wan eksempre gi now. Den sma fu fosi di ben e dini Gado, ben e tyari presenti nanga ofrandi, ma den sani disi no ben man krin den konsensi. ₁₀Bika a nyanyan, den dringi, nanga den difrenti fasi fu wasi ben de sani fu a skin nomo. Sma ben mus fu du den te leki Gado kenki ala sani kon nyun.

₁₁Ma Kristus kon leki a granpriester fu den bun sani di de now. A tenti pe A e du En wroko, moro betre èn a de leki fa a mus de. A no libisma meki en, dati wani taki a no de fu a grontapu disi. ₁₂A no go ini a Moro santa presi nanga a brudu fu bokoboko noso pikin kaw, ma A go nanga En eigi brudu. A du en wan leisi nomo, èn noiti moro a sa de fanowdu fu du en baka. So A ferlusu unu fu têgo. ₁₃Bika efu a brudu fu wan bokoboko noso wan bulu, noso a asisi fu wan yongu kaw, ben kan krin wan sma di no ben krin ini Gado ai fu a kan dini Gado baka, ₁₄dan a brudu fu Kristus sa krin wi moro ete! A Yeye di e libi fu têgo, meki taki A gi Ensrefi na Gado leki wan ofrandi di no e mankeri noti. A brudu fu En e krin wi konsensi fu den wroko di ben o meki taki wi dede, fu wi kan dini a libilibi Gado.

₁₅Dat' meki Kristus na a Mindriman fu wan nyun ferbontu. Fu di A dede, A meki den sma kon fri fu den sondu di den ben du di a fosi ferbontu ben de ete. So den sma di Gado kari kan kisi den sani san A pramisi, den sani di e tan fu têgo. ₁₆Efu wan testamenti de, dan den mus man sori taki a sma di meki en dede. ₁₇Bika wan testamenti abi warti soso te a sma di meki en dede. A no abi warti solanga a sma e libi ete. ₁₈Fu dat'ede brudu ben de fanowdu di a fosi ferbontu ben meki. ₁₉Dat' meki baka di Moses leisi ala den wèt gi a heri pipel, a teki a brudu fu pikin kaw nanga bokoboko èn a teki watra. Dan nanga redi wol nanga wan taki fu a hisopbon, a nat'nati a buku nanga a heri pipel. ₂₀A taki: “Disi na a brudu san e stampu a ferbontu san Gado meki nanga unu.” ₂₁Na a srefi fasi a nat'nati a santa tenti nanga ala sani ini en di ben de fanowdu fu anbegi Gado. ₂₂Leki fa a wèt e leri, dan wantu sani nomo de di no abi fu krin nanga brudu. Èn pardon fu sondu no e gi efu brudu no lon.

₂₃So a ben de fanowdu fu krin den eksempre fu den sani di de na heimel tapu sowan fasi. Ma den sani na heimel abi wan moro betre ofrandi fanowdu. ₂₄Bika Kristus no go na ini wan santa presi di libisma meki, sobun wan eksempre fu a trutru wan. Ma A go na ini heimel srefi fu tnapu drape na Gado fesi fu wi ede. ₂₅A no abi fu gi Ensrefi leki ofrandi ala yuru tu, leki fa a granpriester abi fu go ini a santa presi ala yari nanga brudu san no de en eigi brudu. ₂₆Efu A ben abi fu du dati, dan A ben o abi fu nyan pina furu leisi sensi na a bigin fu grontapu. Ma A kon wan leisi nomo na a kba fu a ten disi, fu tyari wan kba kon na sondu di A gi Ensrefi leki ofrandi. ₂₇A de so taki ala sma mus dede wan leisi nomo, èn baka dati Gado e krutu den. ₂₈Na so Kristus gi Ensrefi wan leisi nomo leki wan ofrandi fu teki a sondu fu furu sma na En tapu. Ma A o kon fu a di fu tu tron, no fu teki sondu na En tapu, ma fu ferlusu den sma di e ferwakti En.