1Dan Yob taki moro fara taki:
“Mi meki wan ferbontu nanga mi ai,
tak' mi no o luku yongu uma nanga takru lostu.
2San un kan ferwakti fu Gado ini heimel?
San a Wan di abi ala makti poti klari e wakti wi?
3Bigi ogri e wakti den wan di no e libi bun,
èn ongoloku den wan di e du ogri.
4Gado e luku ala san mi e du,
A e teri ala futu di mi e puru.
5Mi e sweri tak' noiti mi lei gi sma,
mi no bedrigi sma tu
fu puru mi srefi es'esi na ini wan tori.
6Gado kan wegi mi na tapu wan soifri wegi,
dan A o si tak' mi no du ogri.
7Efu mi futu kmopo tapu a pasi fu En,
mi ati waka baka den lostu fu mi ai,
èn sondu flaka den anu fu mi,
8tra sma kan nyan den nyanyan di mi koti,
meki den rutu ala den sani puru di mi prani.
9Efu mi ati meki mi angri na wan wefi,
efu a meki mi go seti luru gi a uma fu a man
di e tan na mi sei,
10a uma fu mi kan tron srafu fu wan tra man,
èn tra man kan didon na en tapu.
11Bika dati bo de wan bigi ogri, wan kruktudu,
gi san krutubakra srefi ben sa leisi strafu gi mi.
12A no abi misi tak' a huru di mi bo huru,
bo de leki wan faya di bo tyari mi go na mi grebi,
èn di bo bron ala san mi abi.
13Efu mi no ben wani sabi not'noti fu den leti
fu den mansrafu nanga mi umasrafu fu mi,
te un no ben agri fu wan tori,
14fa mi bo du te Gado bo opo fu koti krutu?
San mi bo piki En te A bo ondrosuku a tori?
15En di ben meki mi ini a bere fu mi m'ma,
meki den owktu.
Na a srefi Gado seti un poti drape.
16Mi ben e gi pôtisma ala ten san den ben e aksi,
uma di masra dede kba, mi ben e gi howpu.
17Mi no ben e nyan mi wawan,
ma mi ben e prati en nanga pikin
di no abi p'pa nanga m'ma moro.
18Mi heri libi mi ben de leki wan p'pa gi den,
mi heri libi mi sorgu tu fu uma di masra dede kba.
19Te mi ben e si wan sma di ben de fu dede,
fu di a no ben abi krosi fu weri,
noso wan pôtisma di no ben abi noti fu tapu en skin,
20a ben e blesi mi nanga en heri ati,
bika mi ben e gi en krosi di ben e gi en waran,
krosi di ben meki nanga a wiwiri fu den eigi skapu fu mi.
21Efu mi ben opo mi anu fu tapu skreki
gi wan pikin di no abi p'pa nanga m'ma moro,
fu di mi sabi tak' den krutubakra na a bigi doro fu a foto
ben o teki a sei fu mi,
22mi skowru kan kmopo fu en presi
èn mi anu kan broko na tu.
23Bika wan sani mi e frede:
fu Gado meki bigi ongoloku miti mi,
mi no bo man du noti efu A bo sori mi a makti fu En.
24Noiti mi poti mi howpu tapu gowtu,
noiti mi taigi fini gowtu taki: Tapu yu mi e bow.
25Noiti mi prisiri fu a bigi gudu fu mi,
noso fu di mi anu tyari someni gudu
kon na wan.
26Noiti mi meki a son,
te a ben e tnapu ini ala en krakti na loktu,
noso a moi munkenki,
te a ben e psa,
27kori mi ati wan kibrifasi
fu fringi bosi gi den fu anbegi den.
28Dati srefi bo de wan kruktudu
di bo meki krutubakra srefi leisi strafu gi mi,
bika nanga dati mi bo drai baka gi Gado.
29Noiti mi prisiri tu te ongoloku ben miti mi feyanti,
noso bari lafu te a ben de na ini benawtu.
30Nono, mi hori misrefi fu no sondu nanga mi mofo,
èn mi no winsi dede gi en.
31Den ososma fu mi e taki fu mi taki:
‘Ala sma ben kan nyan meti te a sari en.’
32Mi no ben meki no wan doroseisma sribi na strati,
èn mi ben e opo mi doro gi sma
di ben e go fu a wan presi na a trawan.
33Mi no kibri mi sondu tu, soleki fa tra sma e du,
fu tapu den fowtu fu mi poti ini mi krosi.
34Efu mi ben du dati, mi bo abi fu frede
te bun furu sma ben de makandra,
te den difrenti famiri bo broko mi saka.
Ma mi no ben abi fu hori mi mofo
èn tapu misrefi ini mi oso.
35O, efu wan sma ben sa wani arki mi!
Mi kan gi a dyaranti tak' ala san mi taki tru.
A de now na a Wan di abi ala makti fu A piki mi.
Efu a wan di tyari mi go na krutu
ben sa skrifi den kragi fu en poti tapu papira,
36a no abi misi tak' mi bo poti den tapu mi skowru,
fu ala sma ben kan si den,
èn tai den leki wan banti fu diri ston lontu mi ede.
37Mi kan gi En frantwortu fu ala sani san mi du,
waka miti En leki wan dyadyaman.
38Efu na fufuru mi ben fufuru a pranigron fu mi,
èn den bedi na en tapu ben e krei,
39efu mi nyan den sani di a gi sondro fu pai
èn tyari den gronman ini wan kwinsi,
40dan makamaka kan opo prefu tarwe
èn grasi prefu groto.”
Dyaso den sani di Yob taki kon na wan kba.
