1A ben de a gwenti fu Moses fu sorgu gi den skapu nanga krabita fu Yetro, a priester fu Midyan, di ben de a p'pa fu en frow. Wan leisi Moses ben tyari den meti psa a sabana, dan a kon doro na Horeb, a bergi fu Gado. 2Drape a Engel fu MASRA sori ensrefi na Moses leki wan faya di ben de ini wan pikin bon. Moses ben e luku èn a ben e si taki faya de na a bon, ma taki a bon no ben e bron. 3Ne a prakseri na ensrefi taki: “Meki mi go luku san na a ferwondru sani disi taki a bon no e bron.” 4Ma di MASRA si taki Moses ben o kon moro krosbei, A kari en. En sten ben de fu yere na a bon. A taki: “Moses, Moses.” Moses piki taki: “Iya? Mi e arki.” 5Ne Gado taigi en taki: “No kon moro krosbei. Puru yu susu na yu futu bika yu tnapu tapu santa gron.” 6Gado taigi en moro fara taki: “Mi na a Gado fu den afo fu yu. A Gado fu Abraham, a Gado fu Isak nanga a Gado fu Yakob.” Dan Moses tapu en fesi bika a ben frede fu luku Gado.
7MASRA taigi en taki: “Mi si bunbun fa mi folku e pina ini Egipte. Mi yere fa den e bari fu kan kon fri fu den wan di e basi den. Mi sabi a benawtu ini san den de. 8Dat' meki Mi saka kon fu puru den ini a makti fu den sma fu Egipte. Mi o puru den ini a kondre dati tu. Mi o tyari den go na wan bigi kondre pe a gron fatu. Wan kondre pe merki nanga oni de bogobogo. Dati na a kondre fu den Kananitisma, den Hetitisma, den Amoritisma, den Perisitisma, den Hiwitisma nanga den Yebusitisma. 9Arki, Mi yere fa den Israelitisma e bari suku yepi. Mi si tu fa den sma fu Egipte e pina den. 10Dat' meki Mi e seni yu go na Farao. Bika yu sa tyari mi pipel, den Israelitisma, kmoto ini Egipte.”
11Ma Moses taigi Gado taki: “Suma na mi fu go na Farao èn fu tyari den Israelitisma kmoto na ini Egipte?” 12Gado piki en taki: “Mi sa de nanga yu. Disi sa de a marki taki na Mi seni yu. Te yu tyari a pipel kmoto fu Egipte un sa anbegi Gado tapu a bergi disi.”
13Dan Moses aksi Gado baka taki: “Ma te mi go na den Israelitisma dan mi taigi den taki a Gado fu den afo fu den seni mi kon na den èn den aksi mi: ‘Fa a nen?’ San mi mus piki den dan?” 14Ne Gado taigi Moses taki: “Mi na, A Wan Di De.” A taigi en taki: “Na disi yu mus taigi den Israelitisma: ‘A Wan Di De, seni mi kon na unu.’ ”
