Dag 104 van 365- 1 Samuel 25-26 en Lucas 12:33-59

₁Dan Samuel kon dede. Heri Israel ben kon na wan fu row gi en. Dan den beri en na a oso fu en ini Rama. Baka dati David hari gwe na a dreisabana fu Paran.

₂Wan guduman ben e libi na Maon. A ben e kweki skapu nanga krabita na Karmel. A man disi ben gudu srefsrefi. A ben abi dri dusun skapu nanga wan dusun krabita. A man ben de na Karmel fu koti a wiwiri fu den skapu fu en. ₃A man disi ben nen Nabal. A frow fu en ben nen Abigail. A frow ben abi wan bun ferstan èn a ben moi fu si. Ma Nabal ben de wan takru-ati man èn a ben grofu. A ben de wan bakapikin fu Kaleb. ₄David, di ben de ini a dreisabana, yere tak' Nabal ben e koti a wiwiri fu den skapu fu en. ₅So a seni tin man fu en go na Nabal. A taigi den taki: “Un go na Nabal na Karmel. Un taigi en taki mi seni aksi fa fu en. ₆Un taigi en tu taki mi e winsi tak' ala sani e go bun nanga en, nanga en famiri èn nanga ala san a abi. ₇Un taigi en tak' mi yere taki den e koti wiwiri fu den skapu fu en. Un taigi en tak' noiti wi du den skapuman fu en wan sani te den ben de ini a birti fu wi na Karmel èn noiti den lasi wan sani tu. ₈Meki a aksi den knekti fu en, dan den sa taigi en tak' a tru. Un aksi en efu a wan sori unu en bunfasi fu di un kon na en tapu wan fesadei èn gi unu nanga mi, David, awinsi san a abi fu nyan.” ₉Di den man fu David doro na Nabal, den taigi en ala sani di David taigi den fu taki. Dan den wakti fu yere san Nabal o taki. ₁₀Ne Nabal piki den man fu David taki: “Suma na David! San a manpikin fu Isai e prakseri fu ensrefi! Tide dei yu abi wan lo knekti di e lowe gwe fu den basi. ₁₁Mi no o teki a brede, a watra nanga den meti di mi srakti gi den man di e koti a wiwiri fu mi skapu, dan mi gi en na sma di mi no sabi srefi pe den kmopo.” ₁₂Ne den man fu David drai gwe. Di den doro na David den taigi en fa sani waka. ₁₃Ne David taigi den man fu en taki: “Un tai un deigri na un seibere!” So ala man tai en deigri poti. David srefi tai di fu en poti tu. Dan sowan fo hondro man hari gwe nanga David. Tu hondro man ben tan na baka fu luku den lai.

₁₄Ma wan fu den knekti fu Nabal ben go taigi Abigail, a uma fu Nabal, taki: “Yere, David seni boskopuman fu en kmoto fu a dreisabana, fu kon aksi wi basi fa a e go nanga en. Ma a bari den man. ₁₅Ma den man dati libi tumsi bun nanga wi. Den no ferferi wi èn wi no lasi noti a heri pisten di wi ben e wei skapu ini a birti fu den. ₁₆A heri pisten di wi ben e wei den skapu ini a birti fu den, den ben de leki wan skotu lontu wi, dei nanga neti. ₁₇Dat' meki yu mus sabi san yu o du now. Bika a no abi misi taki wi basi kari a ogri kon abra ensrefi nanga en heri oso. Na wan man nanga takru maniri èn sma no man taki nanga en.” ₁₈Ne es'esi Abigail meki den lai tu hondro brede, tu kroiki win, feifi losi skapu, feifitenti kilo losi karu, wan hondro rosenkuku nanga tu hondro pisi drei figa tapu buriki. ₁₉Dan a taigi den knekti taki: “Un hari go na mi fesi, mi e kon na baka.” Ma Abigail no ben taigi en masra Nabal noti.

₂₀Abigail ben de tapu en buriki èn a ben e saka wan smara pasi mindri den bergi. David nanga den man fu en ben e saka fu a tra sei e kon di wantronso den miti nanga Abigail. ₂₁Pikinso na fesi David ben tak' ete taki: “Na fu soso mi ben e luku den sani fu a man ini a dreisabana. Not'noti a no lasi, dan a pai a bun fu mi nanga ogri now. ₂₂Gado kan gi mi wan hebi strafu, efu fosi mamanten mi no kiri ala den mansma fu en famiri nanga fu den wrokoman fu en.” ₂₃Di Abigail si David, a dyompo saka es'esi fu a buriki fu en. A fadon tapu en kindi na David futu. A boigi dipi gi en, ₂₄dan a taigi en taki: “Masra, na mi abi ala fowtu. Mi e begi tangitangi, gi mi a okasi fu tak' wan sani èn de so bun fu arki san mi abi fu taki. ₂₅Mi masra, no arki den sani di Nabal, a man dati nanga takru maniri, taki. Bika a de leki fa a nen fu en e taki: Nabal na en nen èn a de trutru wan man sondro ferstan. Ma mi no ben si den boskopuman di yu ben seni. ₂₆Mi e sweri na a libilibi MASRA, èn mi e sweri na a libi fu yu, taki MASRA kibri yu tide fu yu no teki a leti ini eigi anu èn meki a brudu lon fu sma di no du noti. Ma mi e winsi taki a srefi sani di o psa nanga Nabal, sa psa nanga den feyanti fu yu nanga den sma di e prakseri fu du yu ogri. ₂₇Disi na a presenti di mi, yu knekti, tyari kon gi yu. Mi e begi yu fu gi en na den man di e waka nanga yu. ₂₈Gi mi, yu knekti, pardon fu ini wan fowtu di mi meki, bika a no abi misi tak' MASRA sa meki yu nanga den bakapikin fu yu tron kownu, fu di na yu e feti den feti fu MASRA. Dat' meki yu no mus gi no wan ogri pasi na ini yu libi, yu heri libi langa. ₂₉Efu wan libisma sa prefuru fu kon na yu baka fu kiri yu, dan MASRA, yu Gado, sa kibri yu libi leki wan ston ini a saka fu libi. Ma A sa fringi a libi fu den feyanti fu yu gwe, leki fa wan sma e fringi wan ston gwe nanga wan slinger. ₃₀Te MASRA sa du ala den bun sani di A pramisi yu, èn te A sa poti yu leki tiriman fu Israel, ₃₁yu ati no sa krutu yu èn yu konsensi no o fon yu tu tak' yu meki brudu lon fu soso fu di yu ben teki a leti ini yu eigi anu. Èn te MASRA sori yu a bun fasi fu En, mi e begi yu fu yu prakseri mi.” ₃₂Ne David taigi Abigail taki: “Prijse MASRA, a Gado fu Israel, di seni yu fu kon miti mi tide! ₃₃Mi e gi Gado grantangi fu yu nanga fu a koni fasi fa yu tyari yusrefi. Yu tapu mi tide fu meki brudu lon fu soso èn fu teki a leti na ini mi eigi anu. ₃₄Ma mi e sweri na a libilibi MASRA, a Gado fu Israel, di kibri mi fu mi no du yu ogri, taki efu yu no ben kon miti mi es'esi, no wan mansma fu Nabal famiri ben o de na libi moro fosi tamara mamanten.” ₃₅Dan David teki den sani di Abigail ben tyari kon gi en, èn a taigi en taki: “Yu kan drai go ini freide na yu oso baka. Mi arki yu èn mi o du san yu aksi.”

₃₆Di Abigail doro baka na oso, a si taki Nabal ben hori wan bigi fesa, leki a fesa fu wan kownu. Nabal ben e meki prisiri èn a ben drungu srefsrefi. Dat' meki Abigail no taigi en noti a neti dati. ₃₇Ma a tra mamanten, di Nabal ben kisi ensrefi, en uma ferteri en ala san psa. Wantronso en ati naki en èn a tan didon leki wan dedesma. ₃₈Sowan tin dei baka dati, MASRA strafu Nabal so hebi tak' a dede.

₃₉Di David yere taki Nabal dede, a taki: “Prijse MASRA, A krutu a tori fu mi, fu a afrontu di Nabal afrontu mi. So A tapu mi fu du wan ogri èn A meki Nabal kisi en strafu fu a ogri di a du.” Dan David seni boskopuman go na Abigail fu aksi en efu a wani trow nanga en. ₄₀Di den boskopuman doro na Karmel, den taigi Abigail taki: “David seni wi fu kon aksi yu efu yu wani tron en uma.” ₄₁Ne Abigail boigi nanga en fesi te na gron, dan a taki: “We, dyaso mi de. Mi klari fu tron a srafu di e wasi den futu fu den knekti fu mi basi.” ₄₂Baka dati Abigail meki ensrefi es'esi klari fu gwe. Dan a gwe tapu en buriki baka den boskopuman fu David. A ben tyari feifi fu den uma knekti fu en. Di den doro, David teki en leki en uma. ₄₃David ben abi Akinoam fu Yisreel leki uma tu. So a ben abi den ala tu leki uma now. ₄₄A pisten dati, Saul ben meki en umapikin Mikal, a fosi uma fu David, trow nanga Palti, a manpikin fu Lais fu a foto Galim.

₁Wan tu man fu Sif ben go na Saul na Gibea dan den taigi en taki: “Yu sabi taki David e kibri tapu a pikin bergi Hakila krosbei fu a Yesimonsabana.” ₂Ne Saul hari gwe fu go suku David na a dreisabana Sif. A ben teki dri dusun fu den moro bun srudati fu Israel nanga en fu go suku David. ₃Di Saul doro, den meki wan kampu tapu a pikin bergi Hakila sei a pasi. David srefi ben de ini a dreisabana. Di a kon yere taki Saul ben kon drape fu grabu en, ₄a seni wantu man fu go luku kibrikibri pe Saul ben de. ₅Dan David hari go na a presi pe a kampu fu Saul ben de. A si tak' Saul ben e didon e sribi sei Abner, a manpikin fu Ner. Abner ben de edeman fu a legre. Saul ben e didon mindrisei fu a kampu èn den srudati ben lontu en. ₆Dan David aksi a Hetitiman Akimelek, nanga Abisai, a manpikin fu Seruya, taki: “Sortu wan fu unu tu wani go nanga mi na Saul ini a kampu?” Abisai piki taki: “Mi sa go nanga yu.” Abisai ben de a brada fu Yoab. ₇Di neti tapu, David nanga Abisai go na den srudati. Dan den si Saul. A ben e sribi na mindrisei fu a kampu. A ben sutu a lansri fu en fasi ini a gron na en edesei. Abner nanga den tra srudati ben didon lontu en. ₈Ne Abisai taigi David taki: “Tide Gado gi yu feyanti abra na yu. We dan, meki mi dyuku en fasi na a gron nanga en eigi lansri. Wan leisi nomo mi o abi fu dyuku en. A di fu tu leisi no o de fanowdu.” ₉Ma David piki Abisai taki: “No kiri en. Bika iniwan sma di du wan sani nanga a wan di MASRA salfu, o kisi en strafu. ₁₀Ma mi e sweri na a libilibi MASRA, Ensrefi o puru Saul na pasi. A o dede te en yuru kisi, noso a o dede ini wan feti. ₁₁MASRA kibri mi fu mi no du wan sani nanga a wan di Ensrefi salfu. Ma meki wi teki a watrakroiki nanga a lansri na a edesei fu en dan wi gwe.” ₁₂Ne David teki a lansri nanga a watrakroiki na a edesei fu Saul, dan den gwe. No wan sma si san psa, no wan sma ben sabi san psa, no wan sma wiki. Den alamala tan sribi doro fu di MASRA ben meki den fadon na ini wan dipi sribi.

₁₃Dan David koti a dal abra go na a tra sei. A go tnapu na tapu wan bergi di ben de fara fu a bergi pe Saul ben de. ₁₄Dan David bari kari den srudati nanga Abner, a manpikin fu Ner. A taki: “Abner, piki mi efu yu e yere mi.” Abner piki taki: “Suma e prefuru fu bari kari kownu?” ₁₅Ne David bari gi en taki: “Ma sortu man na yu! A no yu na a moro bun srudati fu Israel? Dan fu sanede yu no ori wakti gi yu basi, wi kownu? Yu no si srefi tak' wan man kon drape fu kiri yu basi, wi kownu. ₁₆Yu no du yu wroko bun. Mi e sweri na a libilibi MASRA tak' un fiti fu dede, bika un no hori wakti gi un basi, a wan di MASRA srefi salfu. Pe a lansri fu kownu nanga a watrakroiki de di ben de na en edesei?” ₁₇Saul ben yere na a sten tak' na David. Ne a bari aksi en taki: “Na yu sten mi e yere drape, mi boi David?” David piki taki: “Iya, masra mi kownu.” ₁₈Dan David tak' moro fara taki: “Fu sanede meki mi masra de nomonomo na mi baka? Sortu ogri mi du? San mi du di no bun? ₁₉Masra mi kownu, tangitangi arki san mi wani taki. Efu na MASRA e meki yu kon na mi baka, tyari wan ofrandi gi en nanga wan switi smeri, fu A kenki En prakseri. Ma efu na libisma, dan meki MASRA fluku den. Bika den e yagi mi puru fu a kondre fu MASRA, èn den e seni mi fu dini tra gado. ₂₀Ma mi e begi yu, no meki mi dede ini wan dorosei kondre, farawe fu MASRA. Fu sanede meki a kownu fu Israel mus hari kon suku wan loso leki mi, neleki fa sma e onti wan bus'fowru tapu den bergi?” ₂₁Dan Saul taki: “Mi sondu. Drai kon baka mi boi David. Mi no sa du yu ogri moro, bika yu ben kan kiri mi tide, ma yu no du en. Fu tru, mi du wan tumsi don sani èn mi meki bigi fowtu.” ₂₂Ma David piki en taki: “Kownu, luku a lansri fu yu de dyaso. Wan fu den man fu yu kan kon teki en. ₂₃MASRA e pai iniwan sma di e du bun èn di de fu fertrow. Tide MASRA ben gi yu na ini mi makti, ma mi no ben wani kiri a wan di MASRA srefi salfu. ₂₄Yere, soleki fa a libi fu yu ben diri ini mi ai tide, so mi e begi tak' a libi fu mi sa diri tu gi MASRA, èn tak' A sa puru mi na ini ala benawtu.” ₂₅Ne Saul taigi David taki: “Mi e begi tak' Gado sa blesi yu, mi boi David. Awinsi san yu o du, a o waka bun.” Baka dati David teki en pasi, èn Saul drai go baka na en tanpresi.

₃₃Un mus seri san un abi fu yepi den pôtisma. Un mus meki monisaka di no e kon owru, wan gudu na heimel di no e kba noiti. Drape fufuruman no man kon fufuru en, èn kakalaka no man nyan en. ₃₄Bika pe yu gudu de, na drape yu ati o de tu.”

₃₅“Un mus sorgu taki un tnapu klar'klari, èn tak' den lampu fu un leti. ₃₆Un mus de leki knekti di e wakti tapu den masra, di o drai kon baka fu wan trowfesa. Te a drai kon baka dan a naki, den kan opo a doro wantron gi en. ₃₇A masra o blesi den knekti di de na ai te a kon baka. Fu tru Mi e taigi un taki: A masra o seti en krosi fu wroko. A o meki den knekti teki presi sei a tafra, dan a o kon gi den nyanyan. ₃₈Awinsi a masra kon mindrineti noso musudei, a o blesi den knekti di a kon miti na ai. ₃₉Ma un mus sabi disi: Efu a man di abi a oso ben sabi sortu yuru a fufuruman ben o kon, a no ben o meki a broko kon ini en oso. ₄₀Na so un mus de klar'klari, bika a Manpikin fu Libisma o drai kon baka na wan yuru di un no ferwakti.”

₄₁Dan Petrus aksi En taki: “Masra, gi suma Yu e gi a agersitori disi? Gi unu wawan, noso gi ala den tra sma dyaso?” ₄₂Masra piki en taki: “Suma na a koni knekti tapu san en masra kan bow? Na a wan di a o poti fu luku den tra knekti, èn fu gi den a nyanyan san den mus kisi na a yuru di fiti. ₄₃A masra o blesi a knekti dati efu te a kon baka, a si taki a e du en wroko soleki fa a fiti. ₄₄Fu tru Mi e taigi un taki: A masra sa poti en fu luku ala den sani san a abi. ₄₅Ma kon un taki a knekti prakseri taki: ‘A masra fu mi no o kon ete,’ dan a bigin fon den tra man nanga uma di e wroko gi en masra, èn a e nyan, dringi te leki a drungu. ₄₆Dan a masra fu en o kon tapu wan dei di a no ferwakti, èn tapu wan yuru di a no sabi. A o meki den kapu en pis'pisi, meki a kisi a srefi strafu leki den sma di no de fu fertrow. ₄₇A knekti di sabi san en masra wani, ma di no seti ensrefi èn a no du san en masra wani, o kisi bun hebi fonfon. ₄₈Ma a knekti di no sabi san en masra wani, no o kisi hebi strafu efu a du wan sani san fiti fu kisi strafu. Bika a sma di kisi furu, den o aksi fu gi furu. Èn a sma di kisi moro furu, den o aksi fu gi moro furu.”

₄₉“Mi kon fu sutu wan faya na grontapu, èn fu Mi sei a ben kan leti kba. ₅₀Mi mus nyan wan hebi pina èn a sani dati de leki wan hebi lai na tapu Mi ati solanga a no psa. ₅₁Un no mus prakseri taki Mi kon fu tyari freide na grontapu. Nono, na pratifasi o kon. ₅₂Bika bigin fu now, pratifasi o de mindri den sma ini wan oso. Efu feifi sma de ini wan oso, tu no o agri nanga den dri trawan, èn den dri trawan no o agri nanga den tu. ₅₃A p'pa no o feni en nanga en boi, èn a boi no o feni en nanga en p'pa. A m'ma no o feni en nanga en umapikin, èn a umapikin no o feni en nanga en m'ma. A m'ma fu a boi no o feni en nanga a uma fu a boi, èn a uma fu a boi no o feni en nanga a m'ma fu a boi.”

₅₄Dan Yesus taigi a bigi grupu sma taki: “Te un si taki wolku e kmopo fu westsei, wantron un e taki: ‘Alen o kon.’ Èn a e kon tu. ₅₅Te un si taki a winti e wai kmopo fu a zuidsei, un e taki: ‘A o faya tide.’ Èn a e psa tu. ₅₆Un hoigriman! Un sabi luku efu alen o kon, noso efu a son o faya. Ma fu sanede un no man ferstan san e psa ini a ten disi? ₅₇Fu sanede un no wani du muiti fu kon ferstan san bun? ₅₈Kon un taki wan sma di abi wan sani nanga yu, e tyari yu go na krutu. Dan yu mus meki muiti fu seti a tori te un de na pasi ete. Efu yu no du dati, a o tyari yu go na fesi krutubakra. Dan a krutubakra sa gi yu abra na skowtu di sa poti yu na ini straf'oso. ₅₉Fu tru Mi e taigi yu taki: Yu no o kmopo drape solanga yu no pai te nanga a laste koprosensi.”