Dag 109 van 365- 2 Samuel 6-8 en Lucas 15:1-10

₁David ben seni kari den moro bun fetiman fu Israel kon na wan baka. Makandra den ben de dritenti dusun. ₂Dan a hari go nanga den alamala na Baala ini Yuda. Den go drape fu go teki a santa kisi fu Gado, a santa kisi di e tyari a spesrutu nen: a nen fu MASRA fu ala sani, di sidon tapu den kerub. ₃Den ben go teki a santa kisi ini a oso fu Abinadab, di ben de tapu wan pikin bergi. Den poti a santa kisi fu Gado tapu wan nyun wagi èn Usa nanga Akio, den manpikin fu Abinadab, ben e tyari a wagi nanga a santa kisi fu Gado. ₄Akio ben e waka na fesi. ₅David nanga ala den Israelitisma ben e dansi gi MASRA. Den ben e meki poku nanga ala sortu instrumenti fu sipres-udu, citer, harp, tamboerijn, pikinpikin bel nanga cimbaal. ₆Ma di den ben doro na a presi pe Nakon e masi a buba puru na a graan, den kaw grati dan Usa langa en anu hori a santa kisi fu Gado. ₇Ne MASRA lusu a atibron fu En tapu Usa fu di a no prakseri san a du. A strafu en leti drape èn Usa dede leti na a santa kisi. ₈Dan David mandi taki MASRA ben strafu Usa so hebi. Dat' meki den e kari a presi Peres-Usa te leki tide. ₉Ma a srefi ten dati David kisi wan dipi lespeki gi MASRA tu, èn a aksi ensrefi taki: “Fa mi o man tyari a frantwortu fu a santa kisi fu MASRA?” ₁₀Fu dat'ede David no ben wani taki a santa kisi fu MASRA ben mus tan na en ini a foto fu David. A meki den tyari en go poti na a oso fu Obed-Edom, wan man fu Gat. ₁₁A santa kisi fu MASRA tan dri mun ini a oso fu Obed-Edom, èn MASRA ben e blesi Obed-Edom nanga ala sma di ben e libi na ini en oso.

₁₂Dan kownu David kisi fu yere tak' MASRA blesi Obed-Edom nanga ala sma fu en oso nanga ala san a ben abi fu a santa kisi ede. Ne David go teki a santa kisi fu Gado puru na ini a oso fu Obed-Edom. Nanga bigi prisiri den tyari a santa kisi go na ini a foto fu David. ₁₃Ala leisi te den man di ben e tyari a santa kisi fu MASRA ben naki siksi futu, David ben e tyari wan ofrandi fu wan bulu nanga wan yongu fatu kaw. ₁₄David ben weri soso wan efod èn a ben e dansi nanga en heri ati gi MASRA. ₁₅David nanga ala den Israelitisma ben e meki babari èn den ben e bro na tapu tutu di den e tyari a santa kisi fu MASRA kon. ₁₆Di den doro nanga a santa kisi fu MASRA na a foto fu David, Mikal, a umapikin fu Saul, luku na a fensre. Di a si fa kownu David ben e dyompo èn dansi gi MASRA, a ben si David fu noti. ₁₇Baka di den tyari a santa kisi fu MASRA kon, den poti en tapu en presi ini a tenti di David ben meki den span gi en. Dan David bron meti leki ofrandi èn a tyari freide-ofrandi gi MASRA. ₁₈Di David ben kba tyari den ofrandi a blesi a pipel ini a nen fu MASRA fu ala sani. ₁₉Dan a gi a heri pipel, ini wan fu den Israelitisma di ben drape, man nanga uma, wan brede, wan pisi meti nanga wan rosenkuku. Baka dati den alamala go na den oso. ₂₀Di David drai go na oso fu go taki den ososma fu en odi, Mikal, a umapikin fu Saul, waka miti en dan a taigi en taki: “A no spotu grani a kownu fu Israel kisi tide! Leki wan lawman di no abi syen yu meki den umasrafu fu den knekti fu yu si a skin fu yu!” ₂₁Ma David piki en taki: “Na gi MASRA mi dansi, na gi MASRA di poti mi leki kownu fu a pipel fu MASRA, abra Israel. A teki mi èn a poti yu p'pa nanga en heri famiri na wan sei. ₂₂Awinsi mi saka misrefi moro leki san mi du kba, awinsi mi saka misrefi ini mi eigi ai, ete mi sa abi grani na den umasrafu di yu e taki.” ₂₃Mikal, a umapikin fu Saul, no meki no wan pikin te leki a dede.

₁Baka di kownu David go libi na ini en kownu-oso èn MASRA ben meki taki fu no wan sei feyanti ben e feti nanga en, ₂David taigi a profeiti Natan taki: “Luku, mi e libi na ini wan oso di meki fu sedre-udu, ma a santa kisi fu Gado de na ondro wan tenti.” ₃Ne Natan piki kownu taki: “Du ala san yu ati firi fu du, bika MASRA de nanga yu.” ₄Ma a srefi neti dati MASRA taki nanga Natan. A taigi en taki: ₅“Go na Mi knekti David, dan yu taigi en taki: ‘Na disi MASRA e taki: A no yu na a sma di o meki wan oso gi Mi fu Mi libi. ₆Sensi a dei di Mi puru den sma fu Israel ini Egipte te kon miti now, mi no libi na ini wan oso. Wan tenti, wan santa tenti, ben de Mi oso alape a pipel ben e go. ₇Di Mi ben e hari fu a wan presi go na a trawan nanga den sma fu Israel, noiti Mi taigi wan fu den edeman fu den lo fu Israel, di Mi ben poti fu tiri Mi pipel, taki: fu sanede un no e bow wan oso fu sedre-udu gi Mi? ₈We dan, taigi Mi knekti, taigi David taki: Na disi MASRA fu ala sani, e taki: Na Mi ben puru yu ini a wei, pe yu ben e luku skapu, èn Mi meki yu tron tiriman fu Mi pipel, fu Israel. ₉Alape yu ben e go Mi ben de nanga yu. Ala yu feyanti mi puru na pasi gi yu. Mi sa gi yu wan bigi nen tu leki di fu den bigiwan fu grontapu. ₁₀Mi gi Mi pipel, Israel, wan tanpresi. Mi poti den drape fu den kan abi den eigi tanpresi. Den ati no o de na dyompo drape èn ogri-ati folku no sa pina den moro leki fosi, ₁₁leki ini a ten di Mi ben poti krutubakra fu tiri Mi pipel Israel. Mi meki tak' no wan feyanti e feti yu. Mi, MASRA, e taigi yu now taki: na MASRA o bow wan oso gi yu. ₁₂Te yu dede èn den beri yu pe den afo fu yu beri, Mi o meki yu eigi manpikin teki yu presi, èn Mi o meki a de wan tranga kownu. ₁₃Na en o meki wan oso gi Mi, èn Mi o sorgu tak' no wan sma o man puru en leki kownu. ₁₄Mi o de leki wan p'pa gi en, èn a sa de leki wan manpikin gi Mi. Efu a sondu, Mi o fon en nanga wipi, leki fa wan p'pa e du. ₁₅Mi sa tan sori en a bigi lobi fu Mi. Mi no sa tapu fu sori en, soleki fa Mi ben tapu fu sori en na Saul, di Mi ben poti na wan sei fu yu ede. ₁₆Na a famiri fu yu sa de kownu ala ten, èn noiti wan sma sa man puru unu leki kownu.’ ”

₁₇Dan Natan go taigi David ala san a si nanga ala san a yere. ₁₈Dan kownu David go ini a tenti, a go sidon na MASRA fesi dan a begi taki: “Masra MASRA, suma na mi èn suma na mi famiri tak' Yu du disi gi wi? ₁₉Masra MASRA, efu dati no sari, Yu taki tu fa a o de nanga a famiri fu Yu knekti ini wan ten di de fara na wi fesi. Masra MASRA, a no wan gwenti fu Yu fu du den sani disi gi libisma. ₂₀San mi kan taigi Yu moro. Yu sabi Yu knekti Masra, MASRA. ₂₁Fu di Yu e du san Yu e taki èn soleki fa Yu besroiti na ini Yu ati, Yu du ala den bigi sani disi èn taki nanga Yu knekti fu den. ₂₂Masra MASRA, a de leki fa wi yere, Yu bigi, no wan no de leki Yu èn no wan Gado no de boiti Yu. ₂₃Sortu folku de leki Yu pipel Israel? Den na a enkri folku na grontapu di Yu ferlusu fu meki den tron Yu eigi folku, fu Yu kan kisi bigi nen. Yu du bigi èn ferwondru sani gi den. Bika gi Yu pipel di Yu ferlusu puru ini Egipte, Yu yagi tra folku nanga den gado fu den. ₂₄Na so Yu meki Yu folku Israel tron Yu eigi folku fu têgo èn Yu, MASRA, na den Gado. ₂₅We now, MASRA Gado, mi e begi fu Yu hori Yu ala ten na den sani di Yu pramisi mi nanga mi famiri. Meki a psa soleki fa Yu taki. ₂₆Dan sma sa opo Yu nen fu têgo, fu di den o taki: ‘MASRA fu ala sani na a Gado fu Israel.’ Na so wawan den famiri fu mi sa tan leki tiriman fu a kondre. ₂₇Bika Yu, MASRA fu ala sani, Gado fu Israel, ben meki Yu knekti kon sabi taki na Yu o bow wan oso gi en. Na dat' meki a teki a dek'ati fu begi a begi disi. ₂₈We, Masra MASRA, Yu na Gado, san Yu taki Yu e du tu. Na Yu taki den bun sani disi fu Yu knekti. ₂₉Abi prisiri now fu blesi Yu knekti nanga en famiri, fu wi kan tan tiriman fu têgo na Yu fesi. Bika na dati Yu pramisi Masra MASRA èn efu Yu blesi mi nanga mi famiri, a blesi fu Yu san tan na wi tapu fu têgo.”

₁Baka dati David wini den Filistijnsma èn den ben abi fu saka densrefi gi en. Den Filistijnsma no ben abi primisi moro tu fu densrefi tiri a mamafoto fu den. ₂David wini den Moabitisma tu. A poti den didon na gron dan fu ala dri moabitisma a meki den kiri tu fu den èn meki wan tan na libi. Den Moabitisma tron knekti fu David di ben mus tan tyari sani gi en di a ben komanderi den fu tyari kon. ₃David wini kownu Hadadeser tu, a manpikin fu Rekob, a kownu fu Soba. A du dati di Hadadeser ben e go fu tyari a kontren na a Eufratliba kon baka ondro a tiri fu en. ₄David grabu wan dusun seibi hondro srudati fu en di ben e sidon tapu asi nanga tutenti dusun srudati di ben de nanga futu. A meki den srudati fu en hori wan hondro nomo fu den asi di ben e hari den fetiwagi. Fu ala den trawan a meki den koti den bakafututitei. ₅Dan den Arameesma fu Damaskus kon fu yepi kownu Hadadeser fu Soba. Ma David kiri tutenti-na-tu dusun fu den. ₆Baka dati David poti srudati na difrenti prenspari presi ini Damaskus èn den Arameesma tron knekti fu David di ben mus tan tyari sani gi en di a ben komanderi den fu tyari kon. MASRA ben e meki David wini alasei pe a ben e go.

₇David teki den gowtu schild di den waktiman fu Hadadeser ben e tyari dan a tyari den go na Yerusalem. ₈David teki bun furu kopro tyari gwe tu fu Betak nanga Berotai, tu foto di Hadadeser ben e tiri. ₉Di kownu Toi fu Hamat yere tak' David wini a heri legre fu kownu Hadadeser, ₁₀a seni en manpikin Yoram go na kownu David fu aksi en fa a e meki en èn fu fersteri en nanga a wini di a wini Hadadeser. Toi du dati fu di en nanga Hadadeser ben de feyanti. Yoram ben tyari solfru, gowtu nanga kopro sani leki kado gi David. ₁₁Kownu David poti den kado dati aparti gi MASRA tu, neleki fa a ben du nanga a solfru nanga a gowtu fu den folku di a ben tyari kon ondro a tiri fu en. Dati ben de: ₁₂den Arameesma, den Moabitisma, den Amonitisma, den Filistijnsma, den Amalekitisma, nanga kownu Hadadeser fu Soba, a manpikin fu Rekob.

₁₃Di David ben e drai kon baka, a wini den Edomitisma ini a Sowtudal. Tin-na-aiti dusun srudati fu den a kiri. Dati gi en moro grani. ₁₄Alasei ini a kondre fu den Edomitisma David ben poti srudati èn so ala den Edomitisma ben tron knekti fu en. MASRA ben e meki David wini alasei pe a ben e go.

₁₅Baka di David tron kownu fu heri Israel, a ben e tiri a heri folku na tapu wan bun èn leti fasi. ₁₆Yoab, a manpikin fu Seruya, ben de edeman fu a legre. Yosafat, a manpikin fu Akilud, ben de a takiman fu kownu. ₁₇Sadok, a manpikin fu Akitub, nanga Akimelek, a manpikin fu Abyatar, ben de den priester. Seraya ben de a sekretarsi fu kownu. ₁₈Benaya, a manpikin fu Yoyada, ben de edeman fu den Keretitiman nanga den Peletitiman. Den manpikin fu David ben de priester tu.

₁Ala den man di e piki lantimoni nanga den sondusma, ben e kon na Yesus fu arki san A e leri. ₂Ma den Fariseiman nanga den sabiman fu Gado wèt ben e knoru taki: “A man disi e meki den sondusma kon na En, èn A e nyan nanga den.” ₃Dan Yesus gi den a agersitori disi. A taki: ₄“Efu yu abi wan hondro skapu, èn wan fu den lasi, san yu o du? A no libi yu o libi den neigitenti-na-neigi trawan ini a dreisabana, fu go suku a wan di lasi te leki yu feni en? ₅Dan te yu feni en, yu o opo en nanga prisiri, poti na tapu yu skowru. ₆Te yu doro na oso, yu o kari ala den mati nanga den birtisma fu yu kon na wan, dan yu o taigi den taki: ‘Un prisiri nanga mi, bika mi feni a skapu fu mi di ben lasi.’ ₇We, Mi e taigi un taki: Na so moro prisiri de na heimel fu a wan sondusma di drai en libi, dan fu den neigitenti-na-neigi bun sma di no abi fu drai den libi.”

₈Yesus gi ete wan agersitori. A taki: “Efu wan uma abi tin solfrumoni, dan a lasi wan fu den, san a o du? A o leti wan lampu, sibi a oso, èn a o suku bun te leki a feni en. ₉Te a feni en, a o kari den kompe nanga den birtisma fu en kon, dan a o taigi den taki: ‘Un prisiri nanga mi, bika mi feni a solfrumoni fu mi di ben lasi.’ ₁₀Mi e taigi un taki: Na so den engel fu Gado e prisiri te wan sondusma drai en libi.”