Dag 191 van 365- Job 41-42 en Handelingen 16:25-40

₁Dan Yob piki taki:

₇Di MASRA ben kba taki nanga Yob, A taigi Elifas fu Teman taki: “Mi ati e bron srefsrefi tapu yu nanga den tu mati fu yu, bika un no taki wan leti fasi fu Mi. Mi knekti Yob wawan taki so fu Mi. ₈Dat' meki iniwan fu un mus teki seibi bulu nanga seibi man skapu, dan un e go nanga den na mi knekti Yob. Drape un mus bron den leki wan ofrandi gi Mi, dan Mi knekti Yob sa begi gi unu. Mi sa du san a o aksi Mi. So Mi no sa strafu unu fu a tak' di un no taki wan leti fasi fu Mi. Mi knekti Yob wawan taki so fu Mi.” ₉Dan Elifas fu Teman, Bildad fu Suak nanga Sofar fu Naama go du san MASRA taigi den. Èn MASRA du san Yob aksi En. ₁₀Dan baka di Yob begi gi den mati fu en, MASRA meki a tron wan guduman baka. MASRA gi Yob dobru fu ala san a ben abi fosi.

₁₁Baka dati ala den brada nanga s'sa fu Yob nanga ala den sma di a ben sabi go nyan nanga en ini en oso. Den taigi en taki den firi nanga en èn den trowstu en fu a hebi tesi di MASRA ben gi pasi fu miti en. Iniwan fu den gi en wan solfru moni nanga wan gowtu keti. ₁₂MASRA blesi Yob ini a ten di ben de na en fesi moro leki a ten di ben de na en baka. A kisi tin-na-fo dusun skapu nanga krabita, siksi dusun kameel, tu dusun kaw di e wroko tu na tu, nanga wan dusun umaburiki. ₁₃A kisi seibi manpikin nanga dri umapikin tu. ₁₄A fosi umapikin fu en a kari Yemima, a di fu tu Kesia nanga a di fu dri Keren-Hapuk. ₁₅Den umapikin fu Yob ben de den moro moi umasma fu a heri kondre. Yob seti en so taki den umapikin fu en kisi den pisi tu ini ala san a ben abi, neleki den brada fu den. ₁₆Baka dati Yob libi ete wan hondro nanga fotenti yari. A si den granpikin fu en nanga den pikin fu den. ₁₇Yob dede nanga wan moi libimarki, a libi te a sari en.

₂₅Ma kon miti mindrineti, Paulus nanga Silas ben e begi èn den ben e singi fu gi Gado grani. Den tra straf'man ben e arki den. ₂₆Dan wantron so a gron bigin seki so tranga tak' a straf'oso seki tapu en fundamenti. A srefi momenti dati ala den doro opo èn den bui fu ala den straf'man lusu. ₂₇Di a man di e hori wakti na a straf'oso skreki wiki, a si taki ala den doro fu a straf'oso opo. Ne a hari en owru fu kiri ensrefi, bika a ben prakseri taki den straf'man lowe. ₂₈Ma Paulus bari nanga tranga sten taki: “No du yusrefi noti! Wi alamala dyaso.” ₂₉A man aksi wan sma fu tyari faya kon, dan a lon go ini a kamra fu Paulus nanga Silas. Nanga beifi skin a fadon tapu en kindi na den fesi. ₃₀Dan a tyari den go na dorosei èn a aksi den taki: “Masra, san mi mus du fu Gado ferlusu mi?” ₃₁Ne den taigi en taki: “Teki bribi ini Masra Yesus, dan Gado sa ferlusu yu nanga den sma fu yu oso.” ₃₂Dan den ferteri a man nanga ala den sma fu en oso a wortu fu Masra. ₃₃A srefi yuru dati fu a neti, a man tyari den go dresi den soro fu a fonfon. Dan en nanga ala den sma fu en oso teki dopu wantron. ₃₄Baka dati a tyari den go inisei dan a poti nyanyan gi den. A ben breiti srefsrefi tak' en nanga den sma fu en ben e bribi ini Gado now.

₃₅Di dei opo, den edeman seni skowtu nanga a boskopu tak' Paulus nanga Silas kan lusu. ₃₆So a man di e hori wakti na a straf'oso taigi Paulus taki: “Den edeman seni a boskopu fu lusu unu. So un kan gwe. Un tan bun.” ₃₇Ma Paulus piki taki: “Wi na Romeinisma. Ma toku den fon unu fesi ala sma sondro fu tyari un go fesi krutu fosi, èn den tyari un go sroto. Dan now den wani lusu unu safri, sondro fu wan sma si. Dati no kan! Meki den srefi kon lusu unu.” ₃₈Den skowtu drai go taigi den edeman san Paulus taki. Di den yere taki Paulus nanga Silas na Romeinisma, den kon frede. ₃₉So den edeman go begi Paulus nanga Silas pardon. Dan den tyari den go na dorosei fu a straf'oso, èn den aksi den tangitangi fu kmopo ini a foto. ₄₀Di Paulus nanga Silas kmopo fu a straf'oso, den go na a oso fu Lidia, pe den miti nanga den tra bribisma. Den gi den dek'ati, dan den gwe.