Dag 22 van 365- Exodus 4-6 en Matteüs 14:22-36

₁Dan Moses aksi taki: “Ma efu den no wani bribi mi èn efu den no wani arki dan? Efu den taki: ‘A no tru taki MASRA sori ensrefi na yu.’ ” ₂Ne MASRA aksi en taki: “San yu hori drape na yu anu?” Moses piki taki: “Wan wakatiki.” ₃Ne MASRA taigi Moses taki: “Trowe en na gron.” Di Moses trowe en na gron, a tron wan sneki. Ne Moses dyompo es'esi go na wan sei. ₄Ma MASRA taigi Moses taki: “Langa yu anu, dan yu e grabu en na en tere.” So Moses langa en anu grabu en, dan a tron wan tiki baka ini en anu. ₅Ne MASRA taki: “Disi sa meki den bribi taki MASRA, a Gado fu den afo fu den, a Gado fu Abraham, a Gado fu Isak nanga a Gado fu Yakob, sori ensrefi na yu.” ₆MASRA taigi en tu taki: “Trusu yu anu go ondro yu dyakti.” So Moses trusu en anu go ondro en dyakti. Di a hari en kon na doro baka a si taki en anu ben abi gwasi. A ben kon weti leki katun. ₇Dan MASRA taigi en taki: “Trusu yu anu go baka ondro yu dyakti.” Moses trusu en anu go baka ondro en dyakti. Di a hari en kon na doro baka a si taki en anu ben kon bun baka leki en tra skin. ₈“Efu den no wani bribi yu noso a fosi marki, dan den sa bribi a di fu tu marki. ₉Efu den no wani bribi yu noso den tu marki disi, dan yu mus teki watra fu a Nijl-liba dan yu e kanti en tapu dreigron. A watra fu a Nijl-liba sa tron brudu tapu a dreigron.”

₁₀Dan Moses taigi MASRA taki: “Ma Masra, noiti mi ben de wan bun takiman. So a ben de ten na ten kba èn disi no kenki di Yu bigin taki nanga yu knekti. Te mi mus taki a gersi mi no man feni wortu es'esi fu taki san mi mus taki.” ₁₁Ne Masra aksi en taki: “Suma gi libisma mofo? Suma e meki taki wan sma babaw noso dofu? Suma e meki taki wan sma man si noso taki a breni? Na Mi, MASRA, e du dati. ₁₂So yu kan go. Mi sa yepi yu fu taki èn Mi sa taigi yu san yu mus taki.”

₁₃Ma Moses aksi baka taki: “Tye Masra, seni wan tra sma?” ₁₄Ne MASRA ati bron tapu Moses. A taigi en taki: “Mi sabi taki yu brada Aaron, a Lefitiman, sabi taki bun. Luku, a de na pasi fu kon miti yu. A o breiti fu si yu. ₁₅Taki nanga en. Taigi en san a mus taki. Dan Mi sa yepi yu nanga en fu taki èn Mi sa taigi unu san yu mus du. ₁₆Aaron sa taki nanga a folku gi yu. A sa de yu takiman èn yu sa de leki wan gado gi en. ₁₇Yu mus hori a tiki disi ini yu anu bika nanga dati yu o du den wondru.”

₁₈Dan Moses drai go baka na Yetro, a p'pa fu en frow. A taigi en taki: “Mi ben sa wani fu drai go baka na den famiri fu mi na ini Egipte, fu si efu den de na libi ete.” Yetro piki en taki: “A bun, go ini freide.” ₁₉MASRA ben taigi Moses na ini Midyan taki: “Drai go baka na Egipte, bika ala den sma di ben wani fu kiri yu dede kba.” ₂₀So Moses teki en frow nanga den boi fu en. A poti den sidon tapu wan buriki dan a drai go baka na Egipte. A ben hori a tiki ini en anu tu di Gado ben taigi en fu hori. ₂₁Dan MASRA taigi Moses taki: “Now di yu e drai go baka na Egipte, yu mus sorgu taki yu du ala den wondru fesi Farao, nanga a makti di Mi gi yu. Ma Mi sa meki a tranga en ati. A no o wani meki a folku gwe. ₂₂Dan yu mus taigi Farao taki: So MASRA taki: ‘Israel na Mi fosi manpikin. ₂₃Dat' meki Mi e taigi yu taki: Meki Mi manpikin go fu a kan dini Mi. Efu yu no wani fu a gwe, Mi sa kiri den fosi manpikin fu yu.’ ”

₂₄Ma di den de ondro pasi, MASRA miti nanga en ini a kampu pe den ben o psa a neti, dan A suku fu kiri en. ₂₅Ne Sipora teki wan ston nefi besnei a boi. A fasi Moses futu nanga a buba dan a taki: “Fu tru, soso nanga brudu mi ben man hori yu na libi leki mi trowmasra.” ₂₆Dan MASRA libi en. Na fu di Sipora ben besnei a boi, meki a taigi Moses taki soso nanga brudu a ben hori en na libi.

₂₇Dan MASRA taigi Aaron taki: “Waka go miti Moses ini a sabana.” So Aaron go. A miti Moses na a bergi fu Gado dan a bosi en. ₂₈Moses taigi Aaron ala den sani di MASRA ben taigi en nanga den marki di a ben mus du. ₂₉So Moses nanga Aaron go, dan den kari ala den fesiman fu den Israelitisma kon na wan. ₃₀Aaron taigi den ala den sani di MASRA ben taigi Moses, dan Moses du den marki meki den sma si. ₃₁Den Israelitisma bribi èn di den yere taki MASRA si san ben e miti den nanga a pina di den ben e pina, den kindi dan den gi En grani.

₁Baka dati Moses nanga Aaron go na Farao, dan den taigi en taki: “Na so MASRA, a Gado fu Israel taki: ‘Meki mi pipel go, fu den hori wan fesa ini a dreisabana fu gi Mi grani.’ ” ₂Ma Farao piki den taki: “Suma na MASRA? Fu sanede mi mus arki en fu meki Israel go? Mi no sabi MASRA, èn mi no o meki Israel go tu.” ₃Ne Moses nanga Aaron taigi en taki: “A Gado fu den Hebrewsma, sori ensrefi na wi. Dat' meki wi e aksi yu primisi fu meki wi waka dri dei langa go ini a dreisabana fu tyari wan ofrandi gi MASRA, a Gado fu wi. Efu wi no du dati A o meki takru siki kiri wi noso den o kiri wi na ini feti.” ₄A kownu fu Egipte piki den taki: “Moses nanga Aaron, fu sanede un e pruberi fu meki a folku tapu a wroko di den e du? Un gwe go wroko!” ₅Farao taigi den tu taki: “Luku fa a folku fu unu bigi kba, dan un wani fu den tapu nanga wroko.”

₆A dei dati Farao komanderi den basya nanga den fesiman fu den wrokoman taki: ₇“Un no mus gi den sma dreigrasi moro leki fa un ben gwenti, fu den meki ston. Un mus meki densrefi go suku a dreigrasi now. ₈Ma un mus meki den tan meki someni ston leki fa den ben gwenti. Ston no mus mankeri. Na lesi den lesi, dat' meki den e aksi nomo taki: ‘Libi wi meki wi go, fu go tyari ofrandi gi wi Gado.’ ₉Un mus meki den wroko moro tranga. Efu den e wroko moro tranga den no o abi ten fu arki lei.”

₁₀Dan den basya nanga den fesiman fu den wrokoman go na a folku dan den taigi den taki: “Na so Farao taki: Un no o kisi a dreigrasi moro. ₁₁Unsrefi o abi fu gwe go suku pe un kan feni en, ma un mus tan meki someni ston leki fa un ben gwenti.” ₁₂So den sma bigin fu suku dreigrasi na alasei ini heri Egipte. ₁₃Den basya ben de nomo na den baka èn den ben e tan taigi den nomo: “Un mus klari un wroko. Un mus meki someni ston leki di un ben e kisi a dreigrasi.” ₁₄Den basya fu Farao, ben e fon den man fu Israel di den ben poti leki fesiman fu den wrokoman. Den ben e aksi den taki: “Fu sanede un no meki someni ston leki fa un ben gwenti?” ₁₅Dan den fesiman fu den wrokoman go aksi Farao taki: “Fu sanede yu e du so nanga den knekti fu yu? ₁₆Den no e gi wi dreigrasi moro, ma den e taigi wi taki wi mus meki ston. Luku fa den e fon den knekti fu yu. Ma a fowtu didon na den sma fu yu folku.” ₁₇Farao piki den taki: “Na lesi un lesi! Dat' meki un e aksi taki: ‘Libi wi meki wi go, fu go tyari ofrandi gi MASRA.’ ₁₈Un gwe go wroko baka! Un no o kisi dreigrasi ma un mus tan meki someni ston leki fa un ben gwenti.”

₁₉Dan den fesiman fu den wrokoman kon ferstan o takru sani ben de gi den, di Farao taigi den taki: “Un mus tan meki someni ston leki fa un ben gwenti fu meki ibri dei.” ₂₀Di den e kmoto fu Farao den miti Moses nanga Aaron di ben e tnapu wakti den. ₂₁Ne den fesiman taigi den taki: “Wi e winsi taki MASRA strafu yu nanga Aaron fu di un pori en gi wi na Farao nanga den knekti fu en. Now yu gi den a okasi di den ben e suku fu den kiri unu.”

₂₂Dan Moses drai go na MASRA baka. A taki: “Masra, fu sanede Yu e meki sowan sani miti a pipel disi? Fu sanede Yu seni mi? ₂₃Sensi di mi kon taigi Farao san Yu taki, a bigin libi takru nanga a folku disi èn Yu no yepi Yu folku no wan fasi.” ₂₄Ma Gado piki Moses taki: “Now yu o si sa Mi o du nanga Farao. Mi o sori en Mi makti fu a meki den go. Mi o sori en Mi makti taki a sa yagi den puru fu en kondre.”

₉Dan MASRA taigi Moses taki: ₁₀“Go na Farao, a kownu fu Egipte, dan yu e taigi en taki a mus libi den Israelitisma fu den gwe fu a kondre.” ₁₁Moses piki MASRA taki: “Efu den Israelitisma no ben wani arki mi, fa Farao o wani arki dan? Mi no man taki wan bunfasi srefi.”

₁₂Ma MASRA taki nanga Moses nanga Aaron. A seni den go na den Israelitisma nanga Farao, a kownu fu Egipte, fu den tyari den Israelitisma kmoto ini Egipte.

₁₃Disi na den edeman fu den famiri. Den manpikin fu Ruben, a fosi manpikin fu Israel, ben de: Hanok, Palu, Hesron nanga Karmi. Na den bakapikin fu den e meki a famiri fu Ruben. ₁₄Den manpikin fu Simeon ben de: Yemuel, Yamin, Ohad, Yakin, Sokar nanga Saul. A m'ma fu Saul ben de wan Kananiti uma. Na den bakapikin fu den e meki a famiri fu Simeon.

₁₅Disi na den nen fu den manpikin fu Lefi. Fu a bigiwan go na a pikinwan yu ben abi: Gerson, Kehat nanga Merari. Lefi ben libi wan hondro dritenti-na-seibi yari. ₁₆Den manpikin fu Gerson ben de Libni nanga Simi. Den famiri ben kisi den nen fu den tu manpikin disi. ₁₇Den manpikin fu Kehat ben de: Amram, Yishar, Hebron nanga Usiyel. Kehat libi wan hondro dritenti-na-dri yari. ₁₈Den manpikin fu Merari ben de Makli nanga Musi. Disi na den famiri fu Lefi fu a bigiwan kon na a pikinwan. ₁₉Amram ben teki en tanta Yokebed leki frow. Dan Yokebed kisi Aaron nanga Moses gi en. Amram libi wan hondro dritenti-na-seibi yari. ₂₀Den manpikin fu Yishar ben de Korak, Nefeg nanga Sikri. ₂₁Den manpikin fu Usiyel ben de Misael, Elsafan nanga Sitri. ₂₂Aaron ben teki Eliseba, a umapikin fu Aminadab, leki frow. Dan Eliseba kisi Nadab, Abihu, Eleasar nanga Itamar gi en. A brada fu Eliseba ben nen Nakson. ₂₃Den manpikin fu Korak ben de: Asir, Elkana nanga Abiasaf. Na den bakapikin fu den e meki a famiri fu Korak. ₂₄Eleasar, a manpikin fu Aaron, ben teki wan fu den umapikin fu Putiyel leki frow. A frow disi kisi Pinekas gi en. Disi ben de den edeman fu den famiri fu a lo fu Lefi.

₂₅Na a Aaron nanga Moses disi MASRA ben taigi taki: “Un mus tyari ibri lo fu den Israelitisma kmoto na ini Egipte.” ₂₆Na den ben taigi Farao, a kownu fu Egipte, taki a mus libi den Israelitisma fu den gwe fu Egipte. Na a Moses nanga a Aaron disi.

₂₇Di MASRA taki nanga Moses ini Egipte, ₂₈A taigi en taki: “Mi na MASRA. Yu mus taigi Farao, a kownu fu Egipte ala sani san Mi taigi yu.” ₂₉Ma Moses ben piki MASRA taki: “Fa Farao o wani arki mi dan? Mi no man taki wan bunfasi srefi.”

₂₂Yesus taigi den man di ben e teki leri fu En fu den bigin go nanga a boto na a tra sei fu a meer. Dan En ben o kon te A seni a bigi grupu sma gwe. ₂₃Baka di Yesus seni den gwe, A kren go tapu a bergi pe En wawan ben kan de fu begi. Di neti tapu na En wawan ben drape. ₂₄A ten dati a boto ben de fara fu a syoro kba, èn wan tranga winti ben e tyari bigi skwala kon na en tapu. ₂₅Ma musudei mamanten Yesus waka tapu a watra go na den. ₂₆Di den man di ben e teki leri fu En si taki A e waka tapu a watra, den skreki. Den bari fu frede taki: “Na wan takrusani!” ₂₇Ma Yesus taigi den wantron taki: “No lasi ati! Na Mi! Un no abi fu frede!” ₂₈Dan Petrus taigi En taki: “Masra, efu na Yu, dan taigi mi meki mi waka tapu a watra kon na Yu.” ₂₉Ne Yesus taigi en taki: “Kon!” So Petrus kmoto ini a boto, èn a bigin waka tapu a watra go na Yesus. ₃₀Ma di Petrus si den skwala, a kon frede dan a bigin sungu. Ne a bari: “Masra, yepi mi!” ₃₁Wantron Yesus langa En anu grabu en. Dan A taigi en taki: “A bribi fu yu pikin! Fu sanede yu no tan bribi Mi?” ₃₂Di den go ini a boto, a winti tapu fu wai. ₃₃Den wan di ben de ini a boto fadon tapu den kindi gi En. Den taki: “Fu tru, Yu na a Manpikin fu Gado.”

₃₄Di den doro na a tra sei fu a meer, den go na syoro na a kontren di den e kari Genesaret. ₃₅Fa den sma drape si taki na Yesus, wantron den panya a boskopu ini a heri birti. Dan den sma tyari ala den sikisma kon na En. ₃₆Den begi En efu den sikisma ben kan fasi a lantyi fu En krosi nomo. Èn ala sma di fasi En ben kon betre.