Dag 21 van 365- Exodus 1-3 en Matteüs 14:1-21

₁Disi na den nen fu den manpikin fu Israel di ben kon nanga Yakob na Egipte. Ibriwan fu den ben tyari den ososma fu en. ₂Yu ben abi Ruben, Simeon, Lefi nanga Yuda. ₃Isakar, Sebulon nanga Benyamin. ₄Dan, Naftali, Gad nanga Aser. ₅Ala nanga ala den pikin nanga granpikin fu Yakob ben de seibitenti sma. Yosef srefi ben de na Egipte kba. ₆Dan Yosef, den brada fu en nanga ala den sma fu a ten dati kon dede. ₇Ma den bakapikin fu den Israelitisma ben e meki pikin es'esi èn so den ben kon furu srefsrefi. Den ben kon furu sote taki yu ben e feni den ini a heri kondre.

₈Dan wan nyun kownu kon na a makti ini Egipte di no ben sabi Yosef. ₉A taigi den sma fu en folku taki: “Luku, den Israelitisma furu moro wi èn den tranga moro wi. ₁₀Dat' meki un mus feni wan koni fasi fu den no kon moro furu. Bika efu feti broko nanga wan tra kondre, den kan span anu makandra nanga den feyanti fu wi fu feti nanga wi, dan den gwe fu a kondre.” ₁₁So den kon poti basya di ben mus sorgu taki den Israelitisma du hebi wroko. Tapu a fasi disi den ben wani broko den Israelitisma. Den Israelitisma ben mus bow den foto Pitom nanga Ramses gi Farao. Den foto disi ben de spesrutu foto di ben o de leki maksin fu kibri nyanyan. ₁₂Ma o moro den ben e pruberi fu broko den Israelitisma, o moro den ben e kon furu èn o moro den ben e panya ini a kondre. Te fu kba den ben e bigin frede den Israelitisma. ₁₃Dan den sma fu Egipte bigin pina den Israelitisma èn dwengi den fu wroko leki srafu gi den. ₁₄Den ben e hebi a wroko srefsrefi gi den leki srafu. Den Israelitisma ben mus wroko nanga ston nanga smenti èn den ben mus du ala sortu wroko ini den gron tu.

₁₅A kownu fu Egipte ben komanderi Sifra nanga Pua, den frow di ben e yepi den Hebrew-uma te den ben e kisi pikin, taki: ₁₆“Te un e yepi den Hebrew-uma fu kisi pikin, un mus luku bun san den e kisi. Efu na wan boi, un mus kiri en. Efu na wan umapikin, a kan tan na libi.” ₁₇Ma den frow disi ben abi lespeki gi Gado. So den no du san a kownu fu Egipte taigi den. Den no ben e kiri den boi. ₁₈Ne a kownu fu Egipte seni kari den frow disi, dan a aksi den taki: “Fu sanede un no e kiri den boi ma un e meki den tan na libi?” ₁₉Den frow piki en taki: “Den Hebrew-uma no de leki di fu Egipte. Den tranga. Den meki a pikin kba fosi a frow doro di mus yepi den.” ₂₀Gado ben meki taki sani ben e go bun gi den tu frow disi di ben e yepi den Hebrew-uma fu kisi den pikin. Den Israelitisma ben e meki furu pikin èn so a folku ben e kon furu srefsrefi. ₂₁Fu di den tu frow disi ben e lespeki Gado, Gado ben meki taki densrefi kon kisi pikin. ₂₂Ne Farao komanderi a heri folku taki: “Un mus fringi ala den boi di e gebore ini a Nijl-liba. Ma den umapikin kan tan na libi.”

₁Wan man fu a lo fu Lefi ben trow nanga wan uma fu a srefi lo dati. ₂A uma kon hori bere, dan a kisi wan boi. Di a si fa a boi moi a kibri en dri mun langa. ₃Baka dati a no ben man kibri en moro langa. So a teki wan baskita, a lobi tara gi en, a poti a pikin didon na ini, dan a poti en mindri a langa grasi di ben e gro na seisei fu a Nijl-liba. ₄A sisa fu a boi ben tan tnapu ini a birti fu si san bo psa nanga en.

₅Dan a umapikin fu Farao kon wasi ini a Nijl-liba. Den umasrafu fu en ben e koiri na a libakanti. A umapikin fu Farao si a baskita mindri a langa grasi, dan a seni wan fu den umasrafu fu en go teki en kon. ₆Di a opo a baskita a si a boi. A boi ben e krei èn a bigin sari en. Dan a taki: “Na wan Hebrewpikin.” ₇Ne a sisa fu a boi aksi a umapikin fu Farao taki: “Mi sa go kari wan Hebrew-uma kon gi yu, fu gi a pikin bobi?” ₈A umapikin fu Farao pikin en taki: “Iya.” Dan a pikin go kari a m'ma fu a boi kon. ₉A umapikin fu Farao taigi a uma taki: “Teki a pikin disi dan yu e sorgu gi en gi mi. Mi sa pai yu fu en.” So a m'ma tyari a pikin gwe dan a sorgu gi en. ₁₀Di a boi kon bigi a tyari en go gi a umapikin fu Farao. A umapikin fu Farao teki a boi leki en eigi pikin, dan a gi en a nen fu Moses. A taki: “Mi o kari en Moses fu di na ini watra mi puru en.”

₁₁Di Moses ben kon bigi, a kmoto wan dei fu go luku den sma fu en folku dan a si o tranga den ben abi fu wroko. Dan a si fa wan man fu Egipte ben e naki wan Hebrewman, wan man fu Moses eigi folku. ₁₂Moses drai luku na alasei. Di a si taki no wan sma e luku en a naki a man fu Egipte kiri dan a tapu en nanga santi. ₁₃A tamara fu en a si fa tu Hebrewman e feti. Ne a taigi a wan di ben suku a trobi taki: “Fu sanede yu e naki wan sma fu yu eigi folku?” ₁₄Ma a man piki en taki: “Suma poti yu leki edeman noso krutubakra fu wi? Yu denki taki yu o kiri mi leki fa yu kiri a man fu Egipte?” Dan Moses kon frede. A prakseri na ini ensrefi taki: “A tori kon na krin.” ₁₅Di Farao yere fu a sani disi a ben wani kiri Moses. Ma Moses lowe go tan na Midyan.

Drape a go sidon na wan peti ₁₆Now a ben de so taki a Priester fu Midyan ben abi seibi umapikin. Den ben kon peti watra fu furu den watrabaki meki den meti fu den p'pa dringi. ₁₇Ma wantu skapuman yagi den gwe. Ne Moses opo yepi den umapikin meki den meti fu den dringi. ₁₈Di den doro na oso, den p'pa Reuel aksi den taki: “Fa un doro tide so fruku na oso?” ₁₉Den piki taki: “Wan man fu Egipte kon yepi wi nanga den skapuman. Boiti dati a peti nofo watra gi wi fu den meti dringi.” ₂₀Ne a p'pa aksi den taki: “Dan pe a man de? Fu sanede un libi en drape? Un go aksi en fu a kon nyan nanga wi.” ₂₁Na so Moses go tan na a man oso. Dan a man gi Moses en umapikin Sipora leki frow. ₂₂A frow kisi wan boi, dan Moses kari en Gersom. A taki: “Mi kari en Gersom fu di mi na wan doroseisma na ini wan doroseikondre.”

₂₃Wan heri pisten baka dati a kownu fu Egipte kon dede. Ma den Israelitisma ben e dyeme ete fu a hebi wroko di den ben abi fu du. Den ben e bari suku yepi èn Gado ben yere fa den ben e bari suku yepi. ₂₄Gado yere fa den ben e kragi, dan A prakseri a ferbontu di A ben meki nanga Abraham, Isak nanga Yakob. ₂₅Gado ben e si den Israelitisma èn A ben sabi san ben e miti den.

₁A ben de a gwenti fu Moses fu sorgu gi den skapu nanga krabita fu Yetro, a priester fu Midyan, di ben de a p'pa fu en frow. Wan leisi Moses ben tyari den meti psa a sabana, dan a kon doro na Horeb, a bergi fu Gado. ₂Drape a Engel fu MASRA sori ensrefi na Moses leki wan faya di ben de ini wan pikin bon. Moses ben e luku èn a ben e si taki faya de na a bon, ma taki a bon no ben e bron. ₃Ne a prakseri na ensrefi taki: “Meki mi go luku san na a ferwondru sani disi taki a bon no e bron.” ₄Ma di MASRA si taki Moses ben o kon moro krosbei, A kari en. En sten ben de fu yere na a bon. A taki: “Moses, Moses.” Moses piki taki: “Iya? Mi e arki.” ₅Ne Gado taigi en taki: “No kon moro krosbei. Puru yu susu na yu futu bika yu tnapu tapu santa gron.” ₆Gado taigi en moro fara taki: “Mi na a Gado fu den afo fu yu. A Gado fu Abraham, a Gado fu Isak nanga a Gado fu Yakob.” Dan Moses tapu en fesi bika a ben frede fu luku Gado.

₇MASRA taigi en taki: “Mi si bunbun fa mi folku e pina ini Egipte. Mi yere fa den e bari fu kan kon fri fu den wan di e basi den. Mi sabi a benawtu ini san den de. ₈Dat' meki Mi saka kon fu puru den ini a makti fu den sma fu Egipte. Mi o puru den ini a kondre dati tu. Mi o tyari den go na wan bigi kondre pe a gron fatu. Wan kondre pe merki nanga oni de bogobogo. Dati na a kondre fu den Kananitisma, den Hetitisma, den Amoritisma, den Perisitisma, den Hiwitisma nanga den Yebusitisma. ₉Arki, Mi yere fa den Israelitisma e bari suku yepi. Mi si tu fa den sma fu Egipte e pina den. ₁₀Dat' meki Mi e seni yu go na Farao. Bika yu sa tyari mi pipel, den Israelitisma, kmoto ini Egipte.”

₁₁Ma Moses taigi Gado taki: “Suma na mi fu go na Farao èn fu tyari den Israelitisma kmoto na ini Egipte?” ₁₂Gado piki en taki: “Mi sa de nanga yu. Disi sa de a marki taki na Mi seni yu. Te yu tyari a pipel kmoto fu Egipte un sa anbegi Gado tapu a bergi disi.”

₁₃Dan Moses aksi Gado baka taki: “Ma te mi go na den Israelitisma dan mi taigi den taki a Gado fu den afo fu den seni mi kon na den èn den aksi mi: ‘Fa a nen?’ San mi mus piki den dan?” ₁₄Ne Gado taigi Moses taki: “Mi na, A Wan Di De.” A taigi en taki: “Na disi yu mus taigi den Israelitisma: ‘A Wan Di De, seni mi kon na unu.’ ” ₁₅Gado taigi Moses moro fara taki: “Na disi yu mus taigi den Israelitisma: ‘MASRA, a Gado fu den afo fu unu, a Gado fu Abraham, a Gado fu Isak nanga a Gado fu Yakob, seni mi kon na unu.’ Disi na Mi nen fu têgo. Na so Mi wani taki unu nanga den bakapikin fu unu mus kari Mi. ₁₆Go, tyari den fesiman fu Israel kon na wan, dan yu e taigi den taki: ‘MASRA, a Gado fu den afo fu wi, a Gado fu Abraham, Isak nanga Yakob, sori ensrefi na mi.’ A taigi mi taki: ‘Mi si bunbun san e miti unu, nanga san den sma fu Egipte e du nanga unu. ₁₇Mi e taigi unu taki Mi sa puru unu ini a pina ini Egipte. Mi sa tyari un go na a kondre fu den Kananitisma, den Hetitisma, den Amoritisma, den Perisitisma, den Hiwitisma nanga den Yebusitisma. Wan kondre pe merki nanga oni de bogobogo.’ ₁₈Den sa arki yu. Dan yu mus go makandra nanga den fesiman fu Israel na a kownu fu Egipte. Yu mus taigi en taki: ‘MASRA, a Gado fu den Hebrewsma, sori ensrefi na wi. Dat' meki wi e aksi yu primisi fu meki wi waka dri dei langa go ini a dreisabana fu tyari wan ofrandi gi MASRA, a Gado fu wi.’ ₁₉Mi sabi taki a kownu fu Egipte no o wani fu un go. A no o wani nanga tranga srefi. ₂₀Ma Mi sa sori Egipte Mi makti. Mi sa strafu den sma fu Egipte èn Mi sa du ala sortu wondru na den mindri. Baka dati a sa meki un go. ₂₁Mi sa meki taki den sma fu Egipte du un bun. Mi sa meki taki te un e gwe un no gwe nanga soso anu. ₂₂Ibri umasma mus aksi a frow di e libi na en sei nanga den tra umasma di e libi ini a oso dati tu, gowtu nanga solfru sani nanga krosi gi den pikin fu unu. Tapu a fasi disi un o puru gudu na den sma fu Egipte anu.”

₁Ini a srefi pisten dati Herodes, a tiriman fu Galilea, ben kisi fu yere san den sma e ferteri fu Yesus. ₂Dan a taigi den knekti fu en taki: “A mus de Yohanes a Dopuman, di kon na libi baka. Na dat' meki A abi makti fu du den bigi sani.” _3-4Herodes taki so bika a ben trow nanga Herodias, a uma fu en brada Filipus. Ma Yohanes ben taigi en taki: “Yu no kan trow nanga en.” Dan Herodes meki den grabu Yohanes, bui en poti na ini straf'oso. ₅A ben wani kiri en, ma a ben frede a folku, bika den ben e si Yohanes leki wan profeiti.

₆Ma tapu a friyari dei fu Herodes, a umapikin fu Herodias ben dansi gi Herodes nanga den sma di a ben kari. Herodes ben abi sowan prisiri nanga a pikin, ₇taki a meki wan sweri. A taki: “Awinsi san a pikin sa aksi, mi sa gi en.” ₈Dan a m'ma fu a pikin meki a aksi Herodes fu a gi en a ede fu Yohanes a Dopuman na ini wan preti. ₉Kownu ben sari fu a sani disi. Ma fu di a ben meki a sweri na fesi ala den sma di ben de na tafra nanga en, a komanderi den srudati fu gi a pikin san a ben aksi. ₁₀So a meki den kapu Yohanes ede puru ini a straf'oso. ₁₁Dan den tyari a ede ini wan preti kon gi a pikin, èn a pikin tyari en go gi en m'ma. ₁₂Baka dati den man di ben teki leri fu Yohanes kon teki a dedeskin tyari go beri. Dan den go taigi Yesus san psa.

₁₃Di Yesus yere taki den kiri Yohanes, A kmoto fu pe A ben de, dan A teki wan boto go na wan presi pe En wawan ben kan de. Ma bun furu sma yere dati. So den libi den foto, dan den waka nanga futu go na En baka. ₁₄Di Yesus kmoto ini a boto, A si wan bigi grupu sma. Ne A kisi wan dipi sari gi den, èn A dresi ala den sikisma di ben de na den mindri.

₁₅Di a son bigin saka, den man di ben e teki leri fu Yesus kon na En, dan den taigi En taki: “Sma no e libi dya pe un de, èn a lati kba. Seni ala den sma gwe, fu den kan go bai nyanyan ini den dorpu.” ₁₆Ma Yesus piki den taki: “Den sma no abi fu gwe. Na unu mus gi den wan sani fu nyan.” ₁₇Den man piki En taki: “Ala san un abi dya na feifi brede nomo, nanga tu fisi.” ₁₈Yesus taki: “Tyari den kon gi Mi.” ₁₉Dan A taigi ala den sma fu go sidon ini a grasi. A teki den feifi brede nanga den tu fisi, A luku go na heimel dan A blesi den. Baka dati A broko den brede, dan A gi den man di ben e teki leri fu En fu den prati gi den sma. ₂₀Ala den sma nyan te den bere furu. Baka dati den man di ben e teki leri fu Yesus furu twarfu baskita nanga den pis'pisi di ben tan abra. ₂₁Wan feifi dusun mansma so ben nyan. Umasma nanga pikin no ben teri ete.