Dag 227 van 365- Psalm 91-93 en Romeinen 15:1-13

₁A sma di a Moro Hei Gado e kibri,

a sma gi san a Wan di abi ala makti e sorgu taki noti no miti en,

₂kan taigi MASRA taki:

“Na Yu mi e kon kibri,

Yu na a tranga kibripresi fu mi,

Yu na mi Gado, tapu Yu mi e fertrow.”

₃Na En na a wan di e ferlusu yu fu yu no kon ini problema,

leki fa wan fowru e fasi ini a net fu den sma di e fanga fowru,

na En na a wan di e kibri yu fu takru siki no kiri yu.

₄A e kibri yu na ondro En frei,

ondro En frei yu e feni wan kibripresi,

a bow di yu kan bow na en tapu

de leki wan schild di lontu yu fu ala sei.

₅Yu no abi fu frede gi den ogri di e waka te neti,

gi a peiri di sutu te deiten kon na yu tapu,

₆gi a takru siki di e waka lontu na ini a dungru,

noso gi ogri di e pori sani bigibigi dei.

₇Awinsi dusun e fadon dede na yu sei,

tin dusun na yu let'sei

not'noti sa miti yu.

₈Teki yu ai luku nomo,

dan yu o si fa den ogri-ati sma o kisi den strafu.

₉MASRA, na Yu na mi kibripresi.

Fu di yu teki a Moro Hei Gado leki yu kibripresi,

₁₀dan no wan bigi ogri o miti yu,

no wan siki sa kon krosbei fu yu oso.

₁₁A sa komanderi den engel fu En,

fu kibri yu alape pe yu e go.

₁₂Tapu den anu den sa tyari yu,

fu yu no stotu yu futu na no wan ston.

₁₃Yu sa waka psa tapu lew nanga takru sneki,

yongu lew nanga sneki yu o masi nanga yu futu.

₁₄“Mi o ferlusu en, fu di a lobi Mi

Mi o kibri en fu di a sabi Mi.

₁₅Mi o piki en efu a kari Mi,

Mi sa de nanga en te a de ini benawtu,

Mi sa ferlusu en fu a kisi grani.

₁₆Mi o gi en langa libi,

èn Mi o ferlusu en.”

₂Na wan bun sani fu prijse MASRA,

fu singi gi Yu, Yu a Moro Hei Gado,

₃fu taki te mamanten fu a bigi lobi fu Yu,

fu taki te neti fu a bow di wi kan bow na Yu tapu,

₄te a harp nanga tin snaar e prei,

te a citer de fu yere.

₅Bika Yu, MASRA, meki mi prisiri nanga den bigi wroko fu Yu,

mi e bari fu prisiri fu den sani di Yu du.

₆Den wroko fu Yu bigi fu tru MASRA,

den prakseri fu Yu dipi srefsrefi.

₇Don sma nanga sma di no abi ferstan,

no o man ferstan den sani disi:

₈taki sani e go bun nanga den ogri-ati sma,

taki sma di e du kruktudu e go na fesi,

ma Yu o figi den puru na pasi fu têgo.

₉MASRA, Yu abi ala makti fu têgo.

₁₀Luku den feyanti fu Yu MASRA,

luku fa den feyanti fu Yu o dede gwe,

ala den sma di e du ogri, o lon panya.

₁₁Yu e gi mi a srefi krakti leki di fu wan bofru,

Yu kanti nyun oli na mi tapu.

₁₂Mi si nanga mi eigi ai fa den feyanti fu mi fadon,

mi yesi yere fa den wan di e du ogri e bari.

₁₃A sma di e libi bun ini Gado ai o gro leki wan palmbon,

gro go na loktu leki den sedrebon fu Libanon.

₁₄Leki bon di prani ini a oso fu MASRA,

den e gro tapu den pren fu wi Gado.

₁₅Te den owru den o tyari froktu ete,

den o luku yongu èn den o de steifisteifi,

₁₆leki wan ketoigi taki MASRA e du sani tapu wan leti fasi,

a Trangawan fu mi, no wan kruktu de fu feni na En.

₁MASRA na Kownu!

A glori fu En de leki wan krosi na En skin,

a krakti fu en lontu En.

Grontapu tnapu steifi, a no e seki.

₂Yu na kownu sensi na a bigin,

Yu ben de ala ten kba.

₃MASRA, den bigi watra e opo den sten,

den bigi watra e meki babari.

₄Ma MASRA di abi ala makti,

bigi moro a babari di den watra e meki,

bigi moro den bigi skwala fu a se.

₅Den sani di Yu ben taki èn di wi mus memre de fu fertrow.

MASRA, santafasi na a sani di e moi a oso fu Yu,

fu têgo èn alaten.