Dag 228 van 365- Psalm 94-96 en Romeinen 15:14-33

₁MASRA, Gado di e strafu den feyanti fu En,

Gado di e strafu, kon ini wan krin faya.

₂Du wan sani, Krutubakra fu grontapu,

strafu den sma nanga hei memre.

₃MASRA, olanga Yu o libi den ogri-ati sma,

olanga Yu o libi den ogri-ati sma fu den e prisiri?

₄Den e koti odo èn den e taki bradi,

ala den ogri-ati sma e meki bigi.

₅Den e trapu a pipel fu Yu, MASRA,

den e pina den sma di Yu teki gi Yusrefi.

₆Den e kiri den uma di masra dede kba,

den doroseisma nanga den pikin di no abi p'pa nanga m'ma moro.

₇Den e tak' srefi taki:

“MASRA no e si san wi e du,

a Gado fu Yakob no sabi srefsrefi.”

₈Un kisi unsrefi, un di no abi ferstan,

oten un o kon koni, un donman?

₉Fa un kan prakseri taki En di meki a yesi, no o yere,

èn taki En di meki a ai no o si?

₁₀Na En e strafu den folku

dan fa A no o strafu unu?

Na En e gi libisma sabi?

₁₁Masra sabi den prakseri fu libisma,

den prakseri fu den na soso sani.

₁₂MASRA, a sma di Yu e strafu na wan blesi sma,

a sma di Yu e leri a wèt fu Yu.

₁₃Yu no o meki noti no miti en ini ten fu bigi ogri,

ma gi a ogri-ati sma wan grebi-olo e diki kba.

₁₄Bika MASRA no sa drai En baka gi En pipel,

A no sa gwe libi den wan di A teki gi Ensrefi.

₁₅Strafu o leisi na tapu wan leti fasi baka,

ala den sma di e du Gado wani o tnapu baka a sani dati.

₁₆Suma feti gi mi nanga den ogri-ati sma?

Suma ben tnapu na mindri mi nanga den sma di e du kruktudu?

₁₇Na MASRA wawan yepi mi nanga den,

noso mi ben de na dedekondre kba.

₁₈MASRA, te mi ben prakseri taki: mi e grati gwe,

dan Yu ben kraka mi nanga a bigi lobi fu Yu.

₁₉Te sorgu ben e moro mi,

a trowstu fu Yu ben meki mi prisiri baka.

₂₀Yu no abi not'noti fu du nanga den ogri-ati krutubakra,

den di e tyari soso problema nanga a wèt di den e leisi.

₂₁Den e span anu fu kiri den sma di bun ini Gado ai,

den e leisi dedestrafu gi sma di no du noti.

₂₂Ma MASRA ben de wan tranga kibripresi gi mi,

èn a Gado fu mi ben de a Trangawan pe mi ben kibri.

₂₃A pai den fu den ogri di den du,

A puru den na pasi fu den kruktudu fu den.

MASRA, a Gado fu wi, puru den na pasi.

₁Kon, meki wi bari fu prisiri gi MASRA,

meki wi bari gi a Trangawan di e ferlusu wi.

₂Meki wi kon na En fesi nanga singi fu gi En tangi,

singi fu opo En nen nanga instrumenti di abi snaar.

₃Bika MASRA na wan bigi Gado,

A de Kownu fu ala tra gado.

₄Na En e tiri heri grontapu,

fu a moro dipi presi go te na den moro hei bergi.

₅Den se na fu En, bika na En meki den,

a drei gron, bika na En ben meki dati nanga En anu.

₆Un kon na inisei meki wi anbegi, meki wi boigi,

meki wi kindi gi MASRA, a wan di meki wi.

₇Bika na En na a Gado fu wi

èn wi na a pipel di A e tiri,

leki fa wan skapuman e tiri den skapu fu En.

Tye, efu un ben wani arki tide san A e taigi unu:

₈“Un no tranga un yesi, leki fa a ben psa na Meriba,

leki fa a ben psa na Masa ini a bigi dreisabana,

₉di den afo fu unu ben wani tesi Mi,

di den ben wani luku san Mi ben o du,

aladi den ben si den wroko fu mi.

₁₀Fotenti yari langa Mi nyan Mi niri

nanga den sma fu a ten dati,

Mi ben taigi Misrefi taki:

Na wan pipel tapu san Mi no man bow,

wan pipel di no wani libi soleki fa Mi wani.

₁₁Dat' meki Mi sweri na ini Mi atibron taki:

Noiti den sa doro na a presi pe Mi o gi den bro.”

₁Singi wan nyun singi gi MASRA,

heri grontapu, singi gi MASRA!

₂Singi gi MASRA, prijse a nen fu En,

ferteri ibri dei fu a ferlusu di A e tyari.

₃Ferteri den folku fa A bigi,

ferteri ala den kondre fu den wondru di A e du.

₄Bika MASRA bigi èn A fiti fu kisi ala grani,

A fiti fu kisi lespeki moro ala gado.

₅Ala den gado fu den folku na kruktu gado,

ma na MASRA meki heimel.

₆Grani nanga glori e go na En fesi,

krakti nanga glori e furu a santa presi fu En.

₇Ala folku fu grontapu, prijse MASRA,

un gi MASRA a grani di fiti a glori nanga a krakti fu En.

₈Gi MASRA a grani di fiti a nen fu En,

un kon nanga ofrandi tapu a dyari fu En tempel.

₉Un boigi te a glori fu a santa MASRA de fu si

heri grontapu, lespeki En.

₁₀Ferteri den folku taki: “MASRA na Kownu.

Grontapu tnapu steifi, a no e seki.

A e krutu folku soleki fa a fiti.”

₁₁Meki heimel prisiri,

meki grontapu bari fu prisiri,

meki den se nanga ala san de na den ini meki babari,

₁₂a wei nanga ala san de na en tapu mus breiti,

ala den bon fu a busi singi fu prisiri.

₁₃Meki den du en gi MASRA, bika A e kon,

A e kon fu krutu grontapu.

A o krutu grontapu na tapu wan leti fasi,

nanga den folku soleki fa a fiti.