Dag 279 van 365- Jesaja 26-27 en Filippenzen 2

₁A ten dati a singi disi o singi ini Yuda taki:

“Wi abi wan tranga foto!

Gado e kibri wi leki wan skotu,

leki wan tranga skotu.

₂Opo den bigi doro fu yu,

fu wan folku di e libi na tapu wan leti fasi kon na ini,

wan folku di e tan sori tak' a de fu fertrow.

₃Yu e gi trutru freide na den wan di e tan bribi ini Yu,

fu di den poti den fertrow na tapu Yu.

₄Tan fertrow tapu MASRA fu têgo,

bika fu têgo MASRA, MASRA, na a Trangawan pe wi e kibri.

₅Bika A broko den sma nanga bigimemre saka,

di e libi hei ini den tranga foto fu den.

A broko a foto fu den,

A broko en pis'pisi te na gron,

noti fu en no libi.

₆Dan futu o waka na en tapu,

den futu fu den mofinawan o traputrapu en,

den futu fu den di no de noti.”

₇Ma a pasi fu den sma di e libi na tapu wan leti fasi grati.

Yu e sorgu tak' a pasi fu den no abi olo-olo.

₈Wi poti wi fertrow na Yu tapu, MASRA,

wi e tan hori wi na den sani fu Yu.

Nanga wi heri ati wi e angri fu kon sabi Yu,

èn fu sma kon sabi den sani di Yu du.

₉Nanga mi heri ati mi e angri fu Yu te neti,

nanga ala san de ini mi, mi e suku Yu.

Bika na te grontapu kon sabi den besroiti fu Yu

den sma o leri fu libi tapu wan leti fasi.

₁₀Ma winsi MASRA sori wan ogri-ati sma a bun-ati fu En,

a no o leri fu libi tapu wan leti fasi,

a e du ogri ini a kondre pe sani e du soso tapu wan leti fasi,

èn a no e si a glori fu En.

₁₁MASRA, a anu fu Yu de opo-opo kba,

ma a no man si en.

Meki den si en, èn meki den kon na syen,

te den si fa Yu abi wan tranga angri ini Yu fu du sani gi Yu pipel!

Iya, meki a faya fu Yu bron den feyanti fu Yu.

₁₂MASRA, na Yu o gi un freide,

bika srefi a wroko di wi ben mus du,

Yu du gi unu.

₁₃MASRA, wi Gado,

boiti Yu tra masra ben tiri wi tu,

ma Yu nen wawan wi e gi grani.

₁₄Den dede kba, den no o kon na libi baka,

den yeye fu den no e opo moro.

Yu strafu den èn Yu puru den so wan fasi na pasi,

tak' no wan sma e memre den moro.

₁₅Ma Yu meki a pipel fu Yu kon moro furu MASRA,

Yu meki den kon moro furu.

Yu gi Yusrefi bigi nen,

Yu meki a kondre fu den kon moro bradi na ala sei.

₁₆MASRA, di nowtu miti den, den suku Yu.

Den kari Yu, di Yu ben strafu den

₁₇MASRA, leki fa wan uma di de fu kisi wan pikin,

e krempi èn bari fu pen

na so wi ben de na Yu fesi.

₁₈Agersi un ben de nanga bere.

wi ben e krempi tu fu pen.

Ma na soso winti un puru kon na doro,

no wan yepi gi a kondre un tyari,

no wan sma kon gebore moro na grontapu.

₁₉Den dedewan fu Yu o kon na libi baka,

den dedeskin o opo.

Un di didon ini a doti,

un opo èn un prisiri.

Bika a dow fu Yu na wan dow di e gi libi,

èn grontapu e meki den yeye fu den dedewan

kon na libi baka.

₂₀Un go Mi pipel,

un go ini un kamra, dan un sroto den doro.

Un go kibri drape fu wan syatu pisten,

te leki a hebi atibron fu Mi kon na wan kba.

₂₁Bika yere, MASRA e kmopo fu En tanpresi,

fu strafu den sma fu grontapu fu den kruktudu fu den.

Dan grontapu o tyari a brudu kon na krin

di lon na en tapu,

èn a no o kibri den dedeskin moro langa tu

fu den wan di trawan ben kiri.

₁Ini a ten dati MASRA o teki en tranga bigi deigri,

dan A o strafu a Lefiatan,

a sneki di e kroipi es'esi,

di e kronkron ensrefi,

èn A o kiri a bigi takru meti fu a se.

₂Ini a ten dati wan droifidyari o de di lai froktu.

Un mus singi fu en!

₃Mi, MASRA, o luku a droifidyari.

Mi o sorgu tak' a e kisi watra dorodoro,

èn fu no wan sma kon pori en.

Mi o hori wakti gi en dei nanga neti.

₄Mi ati no e bron tapu Mi droifidyari.

Ma efu Mi miti nanga makamaka nanga krasiwiwiri,

Mi o feti nanga den wantron èn sutu faya gi den.

₅So a moro betre efu den kon kibri na Mi,

a moro betre efu den kon meki en bun nanga Mi,

Iya, fu kon meki en bun nanga Mi.

₆Ini a ten di de na wi fesi den rutu fu Yakob o gro baka.

Israel o gi bromki èn a o gi pransun.

A o furu heri grontapu nanga den froktu fu en.

₇A no naki Israel leki fa A ben naki den wan di ben naki Israel.

A no kiri Israel leki fa A ben kiri den wan di ben kiri den?

₈Yu panya den go na alasei, Yu yagi den gwe,

Tapu a fasi dati Yu strafu den.

Nanga wan tranga winti fu a oostsei

Yu wai den gwe.

₉Na a fasi dati A meki en bun baka nanga Yakob,

fu den kruktudu di a ben du.

Disi o sori taki Yakob tapu trutru nanga ala sondu:

a o naki ala den ston fu den altari tron puiri,

no wan fu den postu pe den ben e anbegi den gado

o tan tnapu na en presi,

no wan wierookaltari tu.

₁₀A tranga foto didon drape en wawan,

wan tanpresi sondro wan enkri sma,

a leigi leki wan dreisabana.

Kaw e nyan grasi drape now,

drape den e didon e bro,

èn den e nyan ala wiwiri puru na den taki.

₁₁Te den taki drei, den e broko fadon,

èn umasma e kon piki den fu meki faya nanga den.

Fu di a pipel dati no e ferstan sani,

a Wan di meki den no e sari den,

a Wan di meki den nanga En anu no e sori den sari-ati.