Dag 280 van 365- Jesaja 28-29 en Filippenzen 3

₁A o kba gi a moi kroon,

di e meki den drunguman fu Efraim firi densrefi bigi.

Drungudrungu fu a win den e prodo nanga a foto fu den,

a foto di de leki wan kroon fu a dal nanga bun doti.

Ma a moi sani fu den de leki wan bromki di e drei gwe.

₂Yere, Masra abi wan sma di tranga èn di abi krakti,

leki te pis'pisi ijs e fadon,

leki wan bun tranga winti,

leki bun bigi skwala,

a sa naki ala sani trowe na gron.

₃Feyanti sa traputrapu a kroon

nanga san den drunguman fu Efraim e meki bigi.

₄A moi kroon fu a dal nanga bun doti,

a moi sani disi, sa flaw gwe leki wan bromki,

leki wan figa di lepi fosi a ten doro fu puru figa.

Te wan sma si en,

a e broko en, èn nyan en wantron.

₅A ten dati MASRA fu ala sani

sa de a moi kroon nanga a banti nanga diriston

gi a pipel fu En di tan abra.

₆A o meki krutubakra krutu sani na tapu wan leti fasi,

èn A o gi krakti na den di e feti nanga a feyanti na a doro fu a foto.

₇Srefi den priester dringi win te leki den e misi futu,

profeiti dringi biri te leki den futu e frekti.

Den dringi biri te leki den e misi futu.

A win meki taki den no man denki krin moro,

a biri meki taki den futu e frekti.

Den no man tnapu bun tapu den futu te Gado e sori den wan sani,

den no man tnapu let'opo te den mus koti krutu.

₈Den tafra fu den furu nanga san den puru kon na doro baka,

den morsu a heri tafra.

₉“San a wan kon leri unu ete?

Suma a wan kon gi boskopu?

Wi a no nyunyun pikin di e dringi merki ete,

noso pikin di no kmoto langa na bobi?

₁₀Arki fa a e taki:

‘Tsav latsav, tsav latsav, kav lakav, kav lakav,

pikinso fu disi, pikinso fu dati.’ ”

₁₁Iya, A o meki sma taki nanga den ini wan tongo

di den no e ferstan,

ini wan doroseitongo A o taki nanga a pipel disi.

En di ben taigi den taki:

₁₂“Dyaso na a presi pe un kan bro.

Meki de wan di weri teki bro.

Na a presi disi un kan kisi unsrefi.”

Ma den no ben wani arki.

₁₃Na dat' meki den e yere now fu MASRA taki:

“Tsav latsav, tsav latsav, kav lakav, kav lakav,

pikinso fu disi, pikinso fu dati,”

fu den kan fadon nanga baka te den o waka,

fu a feyanti masi den,

fu den fasi ini a titei

èn fu a feyanti fanga den.

₁₄Dat' meki, un tiriman fu a folku ini Yerusalem,

un di e spotu,

un arki a wortu fu MASRA:

₁₅Fu di un e taki:

“Un meki wan ferbontu nanga dede,

èn un meki wan ferbontu nanga dedekondre.

Te a wipi o psa,

a no o kisi unu.

Bika un teki lei leki un kibripresi,

èn un e kibri na bedrigi.”

₁₆Fu dat'ede na so Masra MASRA e taki:

Yere, Mi poti wan ston leki fundamenti ini Sion

wan bun tranga ston,

wan bun diri ukuston.

A sma di e bribi, abi pasensi.

₁₇Dan Mi o teki a du di sma e du sani na tapu wan leti fasi,

leki Mi markitiki,

èn fu du san bun ini Gado ai,

leki a titei nanga san Mi e luku efu sani tnapu let'opu.

Dan pis'pisi ijs o fadon fu loktu,

èn wai a lei puru na pasi di un teki leki kibripresi.

Watra o wasi a presi gwe pe un go kibri.

₁₈Dan a ferbontu di un meki nanga dede o broko.

A ferbontu di un meki nanga dedekondre no o abi warti moro

Èn te a wipi o hari psa,

a o wipi unu sondro fu abi sari-ati nanga unu.

₁₉Ala leisi te a o hari psa, a o wipi unu.

Ala dei a o hari psa,

dei nanga neti.

Te un ferstan a boskopu, na soso frede a o tyari gi unu.

₂₀Bika a bedi fu unu o syatu tumsi fu un langa unsrefi,

èn a bedikrosi o smara tumsi fu un domru un skin.

₂₁Ma MASRA o opo baka,

leki fa A ben opo na a Perasimbergi.

A o beifi fu atibron,

leki fa A ben beifi ini a Gibeondal,

te A o du En wroko.

Na wan spesrutu wroko A o du!

A sani san A o du, no o de wan aladei sani!

₂₂We dan, un no meki spotu moro langa,

noso den bui di tai unu o hari span moro.

Bika na disi mi yere:

Tak' Masra, a MASRA fu ala sani,

teki a besroiti fu broko a heri kondre.

₂₃Un arki bun san mi o taki,

un kaka un yesi gi den wortu fu mi.

₂₄Te wan gronman o sai,

a no e drai a doti nomo go nanga langa.

A no e tan e broko a doti nomo.

₂₅Te a kba seti a gron

a e sai spesrei,

a e prani tarwe na ini rij,

a groto ini faki,

nanga a spelt na a lantyi fu a pranigron.

₂₆Na a Gado fu en leri en fu du en so,

na En leri en san a musu du.

₂₇Den no e masi den siri fu spesrei puru na a bosu

nanga wan hebi pisi udu di wan kaw e hari,

noso fu lolo psa nanga wan wiel na en tapu.

Ma nanga wan tiki den e naki den siri puru na a bosu.

₂₈A tarwe mus mara fu den kan meki brede nanga en.

Ma a gronman no e masi en go, masi en kon.

A e meki den asi psa nanga a wiel na en tapu,

ma a no e masi en tumsi.

₂₉A koni dati srefi kmopo fu MASRA fu ala sani.

Den rai di A e gi de fu ferwondru,

a koni fu En bigi.

₁Tye Ariyel, Ariyel,

foto pe David ben meki en legrekampu wanten.

Meki den yari psa, a wan baka a trawan,

un hori den fesa fu unu ala yari baka.

₂Ma Mi o tyari Ariyel kon na ini benawtu.

Sari nanga dyeme sa de,

bika Mi o meki a foto tron wan altari pe sani o bron nanga faya.

₃Mi o poti mi legrekampu lontu en,

Mi o lontu en fu alasei nanga srudati,

Mi o seti den hei fetisani poti na a skotu fu en tu.

₄Yu o taki kmoto dipi fu ondro a gron.

Yu sten o de fu yere fara fu ondro a doti.

A sten fu yu di o kmoto fu ondro a gron,

gersi a sten fu wan yorka,

safrisafri a sten fu yu o de fu yere ini a doti.

₅Ma dan wantronso, ini wan pingi fu wan ai

a bigi ipi feyanti fu yu o de leki fini doti.

A bigi ipi fu den di no sabi san na sari-ati,

o de leki aleisibuba di a winti e wai gwe.

₆Bika MASRA fu ala sani o du wan sani.

Dondru o bari,

a gron o seki,

bigi babari o de fu yere,

draiwinti,

bun tranga winti

nanga wan bigi faya di e bron ala sani.

₇Dan a bigi ipi fu ala den folku di ben hari kon feti nanga Ariyel,

o psa gwe leki wan dren,

leki wan sani di sma e si ini den sribi,

iya, a heri legre di ben feti nanga a tranga foto,

den di ben tyari en ini benawtu.

₈Leki fa wan sma nanga angri e dren tak' a e nyan,

ma te a wiki angri e kiri en ete,

leki te wan sma di watra e kiri e dren tak' a e dringi,

ma te a wiki a swaki a srefi fasi èn watra e kiri en ete,

na so a o de nanga a bigi ipi fu ala folku

di ben hari kon fu feti nanga Sionbergi.

₉Un tnapu nomo nanga opo mofo,

sondro fu man taki wan sani.

Un tapu un ai nomo leki un breni,

sondro fu un man si wan sani.

Un drungu, ma a no fu win,

un e misi futu, ma a no fu sopi.

₁₀Ma na MASRA meki den go ini wan dipi sribi.

Na so A tapu den ai fu unu, dati na den profeiti,

èn A poti wan duku tapu den ede fu unu,

dati na den man di Gado e sori sani.

A pipel disi e taki tak' den e waka na Mi baka,

den e gi Mi grani nanga den mofo,

ma a ati fu den, dati de fara fu Mi.

A lespeki di den e sori Mi,

na wan lespeki di libisma leri den

èn komanderi den tak' den mus du en.

₁₄Dat' meki, yere, Mi o du wondru baka gi a pipel disi,

wondru di o meki den tnapu nanga opo mofo,

sani di bigi moro den ferstan.

Dati o meki a koni fu den koniwan o lasi gwe,

èn a ferstan fu den di srapu no o de fu si.

₁₅A kba gi den,

den di wani kibri den sani di den wani du,

dipi gi MASRA.

Den e du den wroko ini dungru dan den e taki:

“Suma e si unu? Suma sabi san un e du?”

₁₆Un wani drai den sani!

A man di e wroko kleidoti no kan de a srefi leki a kleidoti.

A sani di a man meki no kan taki tak' a no a man meki en.

A kleipatu no kan tak' tu fu a man di e wroko en

tak' a no abi ferstan.

₁₇A no e teki langa moro,

dan a Libanon busi o tron wan gron nanga froktubon,

èn wan gron nanga froktubon o tron wan busi.

₁₈A ten dati dofusma o man yere den sani di sma

e leisi fu wan buku.

Brenisma ai o opo tu,

den o kon fri fu a dipi dungru.

₁₉Den sma nanga sakafasi o prisiri moro nanga moro nanga MASRA,

den moro mofinawan o bari fu prisiri

gi a Santa Wan fu Israel.

₂₀Bika a kba gi den di e du sani nanga tranga,

nanga den di e spotu.

Ala sma di e prakseri fu du ogri o lasi den libi:

₂₁den di e taki sani di no tru fu krutubakra kan leisi strafu gi sma,

nanga den di wan kori den krutubakra di e krutu tori na a bigi doro fu a foto.

Nanga den soso sani di den e tyari kon na fesi,

den e meki taki sma di mus kisi den leti no e kisi en.

₂₂Dat' meki na so MASRA, a Gado di ferlusu Abraham,

e taigi den bakapikin fu Yakob:

Yakob no o kon na syen moro,

syen no o de fu si tapu a fesi fu den moro.

₂₃Bika te den pikin fu en,

si san Mi du na den mindri,

den o gi a nen fu Mi grani.

Den o gi a Santawan fu Yakob grani,

den o abi bigi lespeki gi a Gado fu Israel.

₂₄Sma di ben bruya ini den denki, o si sani krin,

èn den di ben lobi e krutukrutu, o teki leri now.