A no Egipte, ma na MASRA e ferlusu
1Na so MASRA taki:
A kba gi den pikin disi di no wani arki!
Den e du sani di a no Mi taigi den fu du.
Den e meki wan ferbontu,
ma a no Mi meki den du dati.
So den e lai sondu tapu sondu na densrefi tapu.
2Sondro fu aksi Mi rai den e lon go na Egipte
fu go suku wan kibripresi na Farao,
èn fu go kibri ini a kowrupe fu Egipte.
3Ma a kibri di un go kibri na Farao
o meki un kisi syen,
èn a kibri di un go kibri ini a kowrupe fu Egipte
o broko un saka.
4Awinsi den tiriman fu unu go na Soan,
den heihei boskopuman te na Hanes,
5den alamala o kon na syen,
bika a pipel dati no man du noti gi unu.
A no o tyari yepi noso wini gi unu,
ma syen nanga brokosaka.
6Disi na san Gado taki fu den meti fu a Negebsabana.
Den e hari psa ini wan kontren di ogri,
èn di de fu frede,
wan kondre pe lew e libi, manwan nanga umawan,
wan kondre fu takru sneki nanga makasneki di gaw sote.
Tapu a baka fu buriki èn tapu den kundu fu kameel.
Den e syow den gudu fu den go na wan folku
di no o man du noti gi den.
7Egipte no warti noti!
A yepi di den e gi no de noti!
Dat' meki Mi e kari en:
Rahab di no man du noti.
8Go now!
Tyerfi den sani dati tapu wan plata ston leti na den fesi.
Skrifi en poti ini wan buku,
fu a tan leki wan ketoigi gi a ten di e kon,
fu a tan fu têgo.
9Bika na wan trangayesi pipel,
pikin di e bedrigi,
pikin di no wani arki san a wèt fu MASRA e taki.
10Den e taigi den wan di Gado e sori sani taki:
“No si sani moro.”
Den profeiti den e taigi taki:
“No taigi un san tru,
ma taigi un swit'switi sani di un wani yere,
taigi un sani di yu no e si trutru.
11Kmoto fu a pasi,
beni kmopo na en tapu.
No ferferi un moro nanga a Santa Wan fu Israel.”
12Dat' meki a Santa Wan fu Israel e taki disi:
Fu di un no teki a wortu disi,
ma bow tapu ogri
èn fertrow tapu bedrigifasi,
13meki a kruktudu fu unu
o de leki wan broko pisi fu wan hei skotu,
wan di kan fadon ala momenti.
Èn wantronso a e fadon, ini wan pingi fu wan ai.
14A e fadon broko pis'pisi leki wan kleipatu.
Den e broko en so finifini tak' no wan fu den pisi fu en
bigi nofo fu puru pikinso asisi fu wan udu faya,
noso fu teki pikinso watra puru fu wan bari.
15Bika na so Masra MASRA, a Santa Wan fu Israel, e taki:
“Efu un wani libi leki fa Mi wani èn de tiri fu unu,
un o si a ferlusu fu unu.
Efu un abi pasensi èn tan fertrow,
un o kisi krakti.”
Ma un no ben wani.
16Un taki: “No!
Un o lowe gwe tapu asi.”
Dat' meki lowe nomo un sa lowe.
Un tak' tu taki:
“Un o gwe bun esi.”
We, bun esi a feyanti o doro un tu.
17Wan dusun fu unu o lowe
te wan enkri feyanti tapu skreki gi unu,
èn te feifi tapu skreki gi unu
un alamala o lowe.
A pikinso fu unu di o tan
o de leki wan postu loktusei fu wan bergi,
leki wan fraga tapu wan pikin bergi.
18Ma now MASRA e wakti fu sori unu a bun-ati fu En,
A opo fu sori unu a sari-ati fu En,
bika MASRA na wan Gado di e du sani nanga leti.
Ala sma di wani wakti na En tapu na blesi sma.
Gado sa blesi En pipel
19Sma ini Sion, unu di de ini Yerusalem, un no o tan krei. A no abi misi tak' MASRA o sori un a sari-ati fu En, te un o kari En. A o piki un wanten te A yere unu. 20A tru tak' A ben meki un nyan brede ini tranga ten èn meki un dringi watra di un ben de ini benawtu. Ma a Wan di e gi unu leri no o kibri moro gi unu. Nanga un eigi ai un o si En. 21Te un o drai fu go na un let'sei noso na kruktusei, un o yere wan sten na un baka di o taki: “Disi na a pasi di yu mus waka.” 22Dan un o si taki den udu noso ston popki di un ben meki fu den kruktu gado, èn di un ben tapu nanga solfru noso gowtu, no krin ini Gado ai. Un o fringi den gwe leki doti, èn un o taki: “Kmoto fu dyaso.”
23Dan Gado o meki alen fadon tapu den siri di un sai ini un pranigron. A nyanyan di un o koti o switi èn bun fu nyan. A ten dati den meti fu unu o nyan grasi tapu bun bigi wei. 24Den kaw nanga den buriki di e wroko un gron, o kisi a moro bun nyanyan baka te den sma prati a buba puru fu a siri nanga den wrokosani. 25Watra sa lon bogobogo kmoto fu ibri hei bergi nanga tapu ibri pikin bergi, tapu a dei pe furu brudu o lon te tranga hei toren o fadon kon na gron. 26Tapu a dei di MASRA o tai a mankeri di a pipel fu En kisi, èn te A o dresi den marki fu a fonfon di A ben gi den, a faya fu a munkenki sa de leki a faya fu a son, èn a faya fu a son sa tranga seibi leisi moro, leki a faya fu seibi dei.
Gado o strafu Asur
27Yere, MASRA srefi e kmopo farawe e kon.
En ati e bron srefsrefi,
deki smoko e kmopo fu En noso.
A e taki nanga hebi atibron,
a tongo fu En de leki wan faya di e bron ala sani.
28A bro fu En de leki wan liba di e lon abra
èn di e doro te na a neki fu sma.
A e seki folku ini wan manari fu A kan puru den na pasi,
A e poti a isri sani nanga san den e tiri meti ini den mofo,
fu A kan tyari den nanga tranga gwe.
29Ma singi o de fu yere na unu,
leki fa den de fu yere tapu a neti fu a santa fesa.
Un sa prisiri ini un ati leki den wan di e bro tapu froiti
te den e hari go na a bergi fu MASRA,
a Bergiston fu Israel.
30Dan MASRA o meki a makti sten fu En de fu yere,
èn A o meki den si fa a anu fu En e saka nanga hebi atibron:
wan faya di e bron ala sani,
liba di e lon abra,
bun tranga alen,
nanga pis'pisi ijs.
31Asur o bruya gi a sten fu MASRA,
te A o naki den nanga tiki.
32Ibri leisi te MASRA o naki den nanga a tiki,
tamboerijn nanga citer o prei.
Nanga En anu opo na loktu A o feti nanga den.
33Wan presi pe den ben o bron ben seti langa ten kba.
A ben seti gi a kownu tu.
A olo fu a faya o dipi èn a bradi,
udu nanga faya de bogobogo.
A bro fu MASRA o de leki kroiti di o sutu faya gi en.
