Dag 282 van 365- Jesaja 32-33 en Kolossenzen 1

₁Efu wan kownu sa rigeri soleki fa a fiti,

èn tiriman e tiri na tapu wan leti fasi,

₂dan iniwan fu den o de leki wan skotu gi tranga winti,

leki wan kibripresi gi bigi alen,

leki watra na ini wan dreisabana,

leki a kowrupe fu wan bigi bergiston ini wan drei kontren.

₃Dan den wan di e si, sa si krin,

den wan di e yere sa arki bun.

₄Den sma di e du sani es'esi sondro fu denki bun fosi,

sa prakseri bun now fosi den du sani.

èn den wan di e gagu sa man taki bun.

₅Dan sma no o taki moro tak' wan don sma

na wan sma di yu mus lespeki moro,

noso taki wan bedrigiman na wan bun sma.

₆Bika wan don sma e tak' don èn soso ogri a e prakseri:

a e du sani di Gado no lobi srefsrefi,

a e ferteri lei fu MASRA,

a e libi a sma di angri e kiri nanga angri

èn a no wani gi watra na a wan di watra e kiri.

₇Wan bedrigiman e du sani tapu bedrigi fasi,

den sani di a e prakseri fu du na ogri sani.

Nanga den lei di a e ferteri a e broko den mofinawan,

srefi te den pôtiwan e feti gi den leti.

₈Ma wan lespeki sma e prakseri fu du sani di e gi en lespeki,

èn a e tnapu baka den sani dati tu.

₉Uma di no abi broko ede, un opo!

Yongu uma di no abi fu span nanga noti,

un kaka un yesi gi den wortu fu mi.

₁₀Un di no abi fu span nanga noti,

baka wan yari nanga wantu dei un o skreki srefsrefi.

Bika lepi droifi no o de moro fu puru na den bon,

droifi no o de srefsrefi moro fu puru.

₁₁Un beifi, un di no abi broko ede,

un skreki, un di no abi fu span nanga noti!

Un puru ala un krosi na un skin,

dan un weri wan lowkrosi.

₁₂Un naki tapu un borsu fu sori taki un e sari,

fu den moi pranigron nanga bun doti,

nanga den droifibon di e gi froktu bogobogo.

₁₃Un sori taki un e sari tu fu den pranigron fu mi pipel,

pe makamaka nanga krasiwiwiri e gro now,

fu ala den oso pe prisiri ben e meki,

nanga den foto pe lafu ben e lafu.

₁₄Bika sma o gwe libi a kownu-oso,

a foto di ben dyugudyugu so, o leigi.

A tranga kibripresi nanga a toren fu den waktiman,

o broko pis'pisi didon na gron fu têgo.

Busiburiki o prisiri nanga a presi disi,

a o de wan presi pe meti e kon nyan grasi.

₁₅Sani o tan so te leki a Yeye kon fu loktu na wi tapu.

Dan a dreisabana o tron wan dyari nanga froktubon,

èn wan dyari nanga froktubon o tron wan busi.

₁₆Dan sani o du tapu wan leti fasi ini a dreisabana,

èn ini a dyari nanga froktubon sani o du leki fa a fiti.

₁₇Freide o de pe sma e du sani tapu wan leti fasi,

èn dati o tyari tirifasi nanga fertrow fu têgo.

₁₈Dan so a folku sa tan na wan presi pe freide de,

wan presi pe den no abi frede gi noti,

wan presi pe dyugudyugu no e kon pori a tirifasi,

₁₉awinsi pis'pisi ijs o naki a heri busi plata,

èn a foto naki broko te na gron.

₂₀Den sma di e sai na presi pe nofo watra de, na blesi sma,

den di e meki den kaw nanga den buriki waka pe den wani.

₁A kba gi a wan di e broko sani te na gron,

ma ensrefi sma no broko go te na gron ete.

A kba gi a wan di e gi sma abra na en feyanti,

ma ensrefi sma no gi abra na en feyanti ete.

Te yu kba broko sani te na gron,

yusrefi o broko te na gron tu.

Te yu kba fu gi sma abra na en feyanti,

sma o gi yusrefi abra na yu feyanti tu.

₂MASRA, sori un a sari-ati fu Yu.

Na tapu Yu wi e howpu.

Hori baka gi un ala mamanten.

Iya, ferlusu un te feyanti lontu unu.

₃Kondre e lon gi a bigi babari.

Folku e lon panya te Yu opo.

₄Dan sma o tyari den sani kon na wan

di yu ben teki fu den feyanti fu yu,

leki fa sprenka e nyan ala sani di de na den pasi,

leki fa wan ipi sprenka e fadon na wan sani skin.

₅MASRA bigi,

èn A e libi hei na loktu.

A meki taki sani e psa ini Sion soso tapu wan leti fasi,

èn tak' ala sma e libi soleki fa a fiti.

₆Na En e hori baka gi un tu, un heri libi langa.

Na En e kibri a gudu fu wi.

Koni, sabi nanga lespeki gi MASRA,

dati na a gudu fu En.

₇Yere! Ariyel e bari na tapu strati

den boskopuman fu freide e krei.

₈Den bigi pasi leigi!

Sma no e waka tapu a pasi moro.

Sma e broko ferbontu,

Sma no e bribi moro san ketoigi e taki!

No wan sma e teri wan trawan.

₉A kondre e sari èn a e dede gwe,

a busi fu Libanon drei gwe èn a e syen.

Saron tron wan dreisabana,

ala den bon fu Basan nanga den di fu Karmelbergi

e seki den wiwiri trowe.

₁₀Dan MASRA taki:

Now Mi o opo tnapu!

Now Mi o sori Mi makti!

Now Mi o kisi grani!

₁₁Den prakseri fu unu de leki drei buba,

den sani di un e du na leki drei grasi.

A bro fu unu na wan faya, di o meki unsrefi teki faya.

₁₂Folku o bron te leki den tron karki,

den o bron leki fa makamaka e bron ini faya.

₁₃Un di e libi farawe, un arki san Mi du!

Un di de krosbei, un si Mi krakti èn un taki tak' na so a de.

₁₄Den sondu sma ini Sion e beifi,

frede e naki den sma di no krin ini Gado ai.

“Sortu wan fu unu sa man tan na wan faya

di e bron ala sani?

Sortu wan fu unu sa man tan na wan faya

di e bron fu têgo?”

₁₅Na a sma di e libi tapu wan leti fasi,

a sma di e taki sani leki fa den de,

a sma di no wani pina trawan fu kon gudu,

a sma di no e opo en anu fu teki sani ondro tafra,

a sma di e tapu en yesi te trawan e taki fa den o kiri wan sma,

a sma di e tapu den ai fu en fu no luku kruktudu.

₁₆Na so wan sma wawan kan libi hei na loktu.

A e kibri na den tranga kibripresi ini den bergi.

En nyanyan a o kisi èn watra a no o mankeri.

₁₇Den ai fu yu o si a kownu ini ala a moi fu en,

den o si wan bun bigi kondre tu.

₁₈Now na prakseri wawan yu o prakseri a bigi benawtu:

Pe a wan de di e skrifi sani?

Pe a wan de di e wegi sani?

Pe a wan de di e teri den toren?

₁₉Yu no o si a grofu pipel dati moro,

a pipel di e tak' wan fasi di no de fu ferstan,

èn di e tak' wan dorosei tongo di no wan sma e ferstan.

₂₀Luku go na Sion dan,

a foto pe sma e kon makandra fu hori fesa.

Den ai fu yu o si Yerusalem,

wan tiri presi fu libi,

wan tenti di no wan sma kan puru fu en presi.

Den pen fu en no e hari puru noiti moro,

èn no wan fu den titei fu en sa koti kmoto.

₂₁Èn MASRA o de drape ini a glori fu En.

Drape o de wan presi nanga furu watra,

wan presi fu bradi liba.

No wan sma o pari boto na den tapu,

no wan bigi sipi o psa na den tapu.

₂₂Fu tru, na MASRA o de wi krutubakra,

na MASRA o de wi tiriman,

na MASRA o de wi kownu,

na En o ferlusu wi.

₂₃Den titei di e hori a fraga anga lus'lusu,

den no e hori a fragatiki tnapu let' opo moro,

a fraga no e wai moro.

Dan yu abi a okasi fu prati den furu gudu di un teki fu den.

Srefi lansma o go teki san den man teki.

₂₄No wan sma o tak' a ten dati taki:

“Mi e siki.”

A pipel di e libi drape o kisi pardon fu den sondu.

₁₅A Manpikin na a prentyi fu a Gado,

di wi no kan si nanga ai.

Na En na a moro prenspari wan

di ben de fosi iniwan sani meki.

₁₆Bika nanga yepi fu En

ala sani di de na heimel nanga grontapu

ben meki.

Dati na den sani di wi kan si

nanga den sani di wi no kan si,

den moro hei yeye,

den di e rigeri,

den di de edeman,

nanga den di abi makti.

Nanga yepi fu En den ben meki,

èn gi En den ben meki.

₁₇A ben de fosi iniwan sani meki,

èn na En e hori ala sani na makandra.

₁₈A Manpikin na a ede fu a skin,

dati na a gemeente.

Na En na a bigin.

Na En na a fosiwan tu,

di kon baka na libi fu no dede moro.

Na so A abi a fosi presi

na ini ala sani.

₁₉Bika Gado nanga En heri fasi fa A de,

ben prisiri fu libi na ini En.

₂₀A ben meki ala sani

di de na heimel nanga grontapu,

kon bun baka nanga Ensrefi,

fu san a Manpikin du.

Bika A tyari freide kon,

fu di A gi En brudu di A dede na tapu a kroisi.