Dag 283 van 365- Jesaja 34-36 en Kolossenzen 2

₁Di kownu Hiskia ben de tin-na-fo yari na makti, kownu Sanherib fu Asur hari kon feti nanga ala den tranga foto fu Yuda èn a teki den abra. ₂Dan a kownu fu Asur seni wan hei ofisiri fu en nanga wan bigi legre fu Lakis go na kownu Hiskia ini Yerusalem. Di den doro drape den tan tnapu na a kba pisi fu den kokro di e tyari a watra kon fu a tapusei watrabaki. Dati ben de na a pasi di e go na a wei pe sma ben e wasi krosi. ₃Dan Elyakim, a manpikin fu Hilkia, a edeman fu den knekti fu en, go na den. A go makandra nanga Sebna, a sekretarsi fu kownu, nanga Yoak, a manpikin fu Asaf, di ben de a takiman fu a kownu. ₄Dan a ofisiri taigi den taki: “Un taigi Hiskia tak' a bigi kownu, a kownu fu Asur, seni aksi en disi: ‘Tapu san yu e poti yu fertrow? ₅Yu denki taki yu kan wini wan feti nanga moi wortu wawan? Tapu suma yu e poti yu fertrow so taki yu no wani saka yusrefi gi mi? ₆Efu na tapu Egipte yu e fertrow, di gersi wan broko tiki, a o boro yu anu te yu o anga na en tapu. Na dati e psa nanga ala sma di e fertrow tapu Farao, a kownu fu Egipte. ₇Efu yu taigi mi taki na tapu MASRA, a Gado fu unu, un e fertrow, dan mi o aksi unu efu a no den presi fu En pe sma e tyari ofrandi nanga den altari fu En Hiskia broko èn taigi den sma fu Yuda nanga Yerusalem taki na soso fesi a altari dyaso ini Yerusalem den mus boigi. ₈We dan, hori wan strei nanga a basi fu mi, a kownu fu Asur: Mi e gi un tu dusun asi efu un abi sma fu tyari den. ₉Yere, awinsi yu poti yu fertrow tapu den fetiwagi nanga den srudati tapu asi fu Egipte, yu no o man tapu wan enkri kapten srefi, wan fu den moro pikin knekti fu mi basi, te a hari kon fu feti nanga yu. ₁₀Na MASRA seni mi kon fu broko a kondre disi. Na MASRA srefi ben komanderi mi taki: Hari go na a kondre dati, dan yu broko en.’ ” ₁₁Dan Elyakim, Sebna nanga Yoak taigi a ofisiri taki: “Wi e begi yu fu yu taki Arameestongo nanga den knekti fu yu, bika wi e ferstan a tongo dati. Ma no taki ini a tongo fu den sma fu Yuda, bika den sma di de tapu a skotu e yere ala san un e taki.” ₁₂Ma a ofisiri piki taki: “Un no mus prakseri taki mi basi seni mi kon fu taki nanga unu èn nanga un basi wawan. Den sani di mi e taki de tu gi den man tapu a skotu. No langa moro dan den o nyan den eigi morsu èn den o dringi den eigi pisi, leki unu.” ₁₃Dan a ofisiri waka go na fesi, dan a bari trangatranga ini a tongo fu den sma fu Yuda taki: “Un arki san a bigi kownu, a kownu fu Asur, abi fu taki! ₁₄Na disi a kownu e taki: ‘No meki Hiskia kori unu, bika a no o man ferlusu unu. ₁₅Un no meki Hiskia taigi unu tu taki un mus poti un fertrow tapu MASRA, taki a no abi misi taki MASRA o ferlusu unu, fu a foto disi no o kon ini anu fu a kownu fu Asur.’ ₁₆Un no arki Hiskia, bika na disi a kownu fu Asur e taki: ‘Un saka unsrefi gi mi èn un gi unsrefi abra na mi, dan iniwan fu unu o man nyan fu un eigi droifibon nanga en eigi figabon èn dringi a watra fu en eigi peti, ₁₇te leki mi kon teki un tyari go na wan kondre leki di fu unu. Wan kondre fu graan nanga nyun win, wan kondre fu brede nanga droifidyari. ₁₈Un no meki Hiskia kori un nanga a sani di a e taki tak' MASRA o ferlusu unu. Bika no wan fu den gado fu den tra folku ben man ferlusu den fu a makti fu a kownu fu Asur. ₁₉Pe den gado fu Hamat, Arpad nanga den di fu Sefarwaim de? Den no ben man ferlusu Samaria fu a makti fu mi. ₂₀No wan fu den gado fu den kondre dati ben man ferlusu a kondre fu den fu a makti fu mi. MASRA no o man ferlusu Yerusalem tu.’ ” ₂₁Ma den sma tan tiri, den no piki a ofisiri noti, bika kownu ben komanderi den taki den no mus piki.

₂₂Dan Elyakim, a manpikin fu Hilkia, a edeman fu den knekti fu kownu, Sebna, a sekretarsi fu kownu, nanga Yoak, a manpikin fu Asaf, a takiman fu kownu, priti den krosi fu sori taki den e sari, dan den go na Hiskia go taigi en ala den sani di a ofisiri taki.

₁Bika mi feni en fanowdu fu un sabi o bigi a strei de san mi mus strei gi unu, gi den wan di de na Laodisea, nanga gi ala den trawan di noiti no si mi fesi. ₂Mi du dati fu gi den dek'ati èn fu tyari den kon na wan ini lobi, fu den sa kisi ala sabi nanga koni. Dan so den sa kon sabi Kristus, di de a kibritori fu Gado. ₃Na ini En ala den gudu fu koni nanga sabi kibri.

₄Mi e taigi unu a sani disi fu no wan sma no kon kori unu nanga moi wortu. ₅Bika awinsi mi srefi no drape, na ini mi prakseri mi de nanga unu. Èn mi breiti fu si taki ala sani e waka na unu soleki fa a musu, èn taki a bribi fu unu na ini Kristus tranga.

₆Now di un teki Kristus Yesus leki Masra, un mus tan libi leki wan nanga En. ₇Un mus beri rutu ini En èn dan un mus gro na ini En. Un mus kon tranga moro nanga moro na ini bribi, soleki fa un ben leri, èn un ati mus furu nanga tangi tak' a e lon abra. ₈Un mus luku bun taki no wan sma no meki un tron srafu fu den soso leri nanga prakseri fu den. Den prakseri disi na gwenti fu libisma. Den gronprakseri fu den na fu grontapu. Den no e kmopo fu Kristus. ₉Bika a heri fasi fa Gado de, e libi na ini a skin fu Kristus. ₁₀Èn fu di un de wan nanga En, meki un de leki fa un mus de. Kristus na a basi fu ala den yeye di de edeman èn di abi makti. ₁₁Fu di un de wan nanga En meki A besnei unu. A no wan libisma du a sani disi, ma na Kristus. A koti a heri sondufasi fu unu puru. ₁₂Di un teki dopu, un beri makandra nanga En. Un kon baka na libi nanga En tu, fu di un bribi ini a krakti fu Gado di meki A kon baka na libi. ₁₃Fos'fosi un ben dede fu di un ben sondu, èn a sondufasi fu unu no ben koti puru ete. Ma toku Gado meki un kon na libi makandra nanga Kristus. A gi wi pardon fu wi sondu. ₁₄A figi a wèt nanga den komanderi fu en puru, di ben e sori wi tak' wi fowtu èn di ben e krutu wi. A wai en puru na pasi, spikri en na a kroisi. ₁₅A puru a makti na a anu fu den yeye di de edeman èn di abi makti. Nanga a dede fu En na a kroisi, A gi den syen meki ala sma si, èn na so a wini a feti.

₁₆Un no mus meki no wan sma krutu un tu fu san un e nyan noso dringi. Un no meki den krutu un taki un no e hori wan santa fesadei, nyunmunfesa noso sabatdei. ₁₇Bika ala den sani disi ben e waka na fesi fu a tru sani san ben mus kon, èn dati na Kristus srefi. ₁₈Un no meki no wan sma meki un lasi un paiman san un o kisi, fu di a e leri un wan sortu sakafasi san no de sakafasi srefsrefi, èn fu di a e leri un fu anbegi engel. A e du leki na si a si den sani disi. Na fu soso sowan sma e denki bigi fu ensrefi, bika den prakseri fu en na libisma prakseri. ₁₉A no e hori ensrefi na Kristus, di de a Ede fu a skin. Na En e sorgu taki a skin, di titei nanga skrufu e hori na wan, e gro leki fa Gado wani. ₂₀Efu un dede makandra nanga Kristus, èn efu tapu sowan fasi un kon fri fu den gronprakseri fu grontapu, dan fu sanede un e meki sma poti wèt gi unu neleki un na fu grontapu ete? ₂₁Den e taki: “No meri disi, no nyan dati, no fasi so.” ₂₂Ala den sani disi na sani di e lasi gwe te yu kebroiki den. Den na wèt nanga leri di e kmopo fu libisma. ₂₃A gersi leki den sani disi na koni sani, ma na libisma meki sowan bribi, di e meki den sma broko densrefi saka èn pina den skin. Ma a no abi no wan warti èn na soso densrefi den e gi prisiri.