Dag 286 van 365- Jesaja 41-42 en 1 Tessalonicenzen 1

₁Kondre tapu se nanga den wan na a sekanti,

un tan tiri dan un arki Mi!

Folku, un kisi krakti baka,

un kon krosbei fu taki san un abi fu taki.

Meki un go makandra na krutu.

₂Suma meki a wan opo na oostsei,

a wan di e wini ala sei pe a poti en futu?

Suma e gi folku abra na en,

fu a kan naki den kownu fu den trowe?

A e wai den puru na pasi nanga en deigri,

leki fa sma e wai doti puru na pasi.

A bo fu en e meki den lon panya,

leki fa winti e wai aleisibuba.

₃A e teki na den baka,

a e go na tapu wan pasi pe a no ben waka noiti bifo,

sondro fu wan sani miti en.

₄Suma du dati? Suma meki dati psa?

Suma ben kari pikin nanga bakapikin sensi na a bigin?

Na Mi, MASRA, ben de a fosiwan,

èn Mi na a kriboiwan tu.

₅Den kondre tapu se nanga den wan na a sekanti si dati

èn den kon frede.

Den kondre na a kba pisi fu grontapu ben e beifi,

den kon krosbei te leki den kon makandra.

₆A wan e yepi a trawan, èn a e taigi en brada taki:

“Hori doro!”

₇A man di sabi meki sani fu udu e gi a gowtusmeti dek'ati,

a man di e naki sani plata nanga en ambra,

e gi a smeti dek'ati.

A e luku a sani di a bron kon na wan èn a e taki: “A bun.”

Dan a e naki en fasi nanga spikri fu a no kmoto fu en presi.

₈Ma Israel, yu na Mi knekti,

Yakob, di Mi teki spesrutu,

bakapikin fu Mi mati Abraham,

₉yu di mi teki puru te na a kbapisi fu grontapu,

èn kari kmopo na den fara uku fu en.

Mi taigi yu taki: Yu na Mi knekti,

Mi teki yu spesrutu,

Mi no poti yu na wan sei!

₁₀No frede, bika Mi de nanga yu.

No luku lontu fredefrede, bika Mi na yu Gado.

Mi sa gi yu krakti,

Mi sa yepi yu,

Mi sa kraka yu nanga a let'anu fu Mi di e ferlusu.

₁₁Yere, den alamala di ati ben e bron srefsrefi nanga yu,

o kon na syen,

den o broko saka.

Den feyanti fu yu di kon feti nanga yu,

den o de leki noti, den o dede,

₁₂Yu o suku den man di ben e feti yu,

ma yu no o feni den.

Den feyanti fu yu di ben e feti yu,

Den o de leki noti.

₁₃Bika Mi, MASRA, a Gado fu Yu,

Mi e gi yu krakti èn Mi e taigi yu taki:

No frede, na Misrefi e yepi yu.

₁₄No frede, Yakob,

yu di pikin leki wan woron,

pikin folku fu Israel,

Na Misrefi yepi yu. So MASRA e taki.

A Santa Wan fu Israel na yu ferlusuman.

₁₅Yere, Mi e poti yu leki wan wrokosani

nanga san den e masi a siri puru na a buba,

wan srapu wan, wan nyun wan,

wan nanga dobru nefi,

yu o masi bergi èn panya den,

yu o meki pikin bergi tron aleisibuba.

₁₆Yu o fringi den go na loktu,

èn a winti o tyari den go moro na hei,

bun tranga winti o panya den go na alasei.

Ma unu o prisiri fu MASRA ede,

unu o prijse Mi, a Santa Wan fu Israel.

₁₇Den mofinawan nanga den pôtiwan,

e suku watra, ma den no e feni noti.

Den tongo kon drei srefsrefi.

Mi, MASRA, e piki a begi fu den,

Mi, a Gado fu Israel, no poti den na wan sei.

₁₈Mi e meki liba lon tapu den bergi pe noti e gro,

watrabron ini den lagi presi mindri den bergi.

Mi o meki a dreisabana tron wan presi fu soso watra,

a kontren pe sani no e gro o tron wan presi fu soso watrabron.

₁₉Mi o prani sedrebon ini a dreisabana,

sosrefi acacia, mirte nanga oleifbon.

Mi o prani sipresbon nanga difrenti tra sortu bon

ini a kontren pe sani no e gro.

₂₀Dan so den o si, den o sabi,

den o poti prakseri na en tapu èn den o ferstan,

taki na a anu fu MASRA du dati,

èn dati na a Santa Wan fu Israel meki en.

₂₁MASRA e taki:

Un tyari a tori fu unu kon na fesi,

A Kownu fu Yakob e taki:

Un kon nanga sani di e sori taki un abi leti.

₂₂Meki den tyari den sani kon na fesi,

meki den taigi unu san o psa.

Meki den taki tu fu sani di psa bifo,

sani di o poti un na prakseri broki,

noso, meki un yere fu sani di musu psa ete,

dan un kan sabi san de fu kon.

₂₃Taki fu sani di o psa now,

fu wi kan sabi taki unu na gado.

Du wan sani,

a no abi trobi efu na wan bun sani noso wan ogri sani,

wan sani di kan meki wi tnapu nanga opo mofo,

wan sani di kan meki wi frede.

₂₄Un si, un na soso boto,

èn den wroko fu unu no de not'noti.

Iniwan sma di e waka na un baka na wan groskin sani.

₂₅Na Mi meki wan sma opo na noordsei, èn a kon.

Fu a sei pe a son e opo, a e kari Mi nen.

A e trapu tapu tiriman fu foto leki na tapu doti a e trapu,

leki fa wan man di e meki prapi e masi kleidoti.

₂₆Sortu wan fu unu taki en na a bigin,

fu wi ben kan sabi en?

Sortu wan fu unu ben taki en na fesi,

fu wi kan taki tak' a ben abi leti?

Kwet' kweti, no wan fu unu ben taki en,

no wan fu unu ben meki trawan yere en,

no wan sma ben yere un ben taki fu en.

₂₇Na Mi ben de a fosiwan di taigi Sion taki:

“Luku, luku den drape.”

Na Mi ben seni wan boskopuman,

Mi seni en nanga bun nyunsu go na Yerusalem.

₂₈Bika te Mi ben luku lontu,

no wan ben de fu si.

No wan de na den mindri di ben man gi rai,

no wan di ben kan piki Mi te Mi ben sa aksi en wan sani.

₂₉Yere, no wan fu den de wan sani.

Den wroko fu den na soso sani.

Den popki fu den na soso winti di no wan taki noti.

₁Luku a knekti fu Mi di mi e kraka.

Mi teki en fu Misrefi èn Mi abi prisiri nanga en.

Mi poti a Yeye fu Mi na en tapu.

A o tyari kon na krin gi ala kondre san na leti.

₂A no o bari, èn a no o opo en sten,

a sten fu en no o de fu yere tapu strati tu.

₃A no o meki En moro hebi gi den swakiwan,

èn A no o puru a pikinso howpu di den abi ete.

Tapu wan tru fasi a sa meki den kon sabi san na leti.

₄A no o lasi howpu, a no o lasi ati,

te leki sani bigin du nanga leti na grontapu,

èn tapu a leri fu en

den kondre tapu se

nanga den wan na a sekanti

e wakti.

₅Na so Gado, MASRA e taki,

di meki heimel èn di hari en span,

di meki grontapu nanga ala sani di e libi na en tapu,

di gi libisma di e libi na en tapu, bro,

èn den di e waka na en tapu, wan yeye:

₆Na Mi, MASRA, kari yu fu du san bun

èn Mi gi a anu fu yu krakti.

Mi kibri yu èn Mi poti yu leki wan ferbontu gi folku,

leki wan leti gi den kondre,

₇fu opo breniwan ai,

fu puru strafuman na dungru-oso,

fu puru den wan kon na doro di de na ini dungru na straf'oso.

₈Na Mi na MASRA, dati na Mi nen.

A glori fu Mi, Mi no e prati nanga no wan trawan,

Mi no e gi a grani fu Mi tu na no wan popki fu ston noso udu.

₉Den sani di ben taki na fesi, yere, den kon tru,

Èn now Mi e taki fu nyun sani.

Mi e meki un yere fu den fosi den psa.

₁₀Un singi wan nyun singi gi MASRA.

Un prijse En na heri grontapu,

unu di de tapu a se nanga un boto,

nanga ala sani di e libi ini a se.

Den kondre tapu se, den wan na a sekanti nanga ala den sma fu den.

₁₁Meki a dreisabana nanga den foto fu en opo den sten,

den dorpu pe a lo fu Kedar e libi.

Un bari fu prisiri, unu di e libi ini den bergi-olo,

un bari kmopo fu a moro hei pisi fu den bergi.

₁₂Meki den gi MASRA glori,

meki den taki fu a grani fu En ini den kondre tapu se

nanga den wan na a sekanti.

₁₃MASRA e hari gwe leki wan dyadya fetiman.

A de fayafaya fu a feti, leki wan srudati.

A e meki wan feti babari, iya, A e bari en kon na doro.

Leki wan dyadya fetiman A e fon den feyanti fu en.

₁₄Bun langa yari Mi ben hori Mi mofo,

Mi ben tan tiri èn Mi hori Misrefi.

Ma now Mi e bari leki wan uma di e meki wan pikin,

Mi e dyeme èn Mi e soktu tapu a srefi momenti.

₁₅Mi o pori den bergi,

hei wan nanga lagi wan,

èn Mi o drei ala san e gro na den tapu.

Mi o meki liba tron drei gron,

èn Mi o meki kriki lon drei.

₁₆Mi o tyari breniwan waka tapu pasi di den no ben go bifo,

Mi o meki den poti den futu tapu pasi di den no sabi.

Mi o meki a dungru na den fesi tron leti,

olo-olo pasi Mi o grati gi den.

Dati na den sani di Mi o du, Mi no libi den.

₁₇Den sma di poti den fertrow tapu popki fu udu noso ston,

den di e taigi sani di meki fu gowtu noso solfru taki:

“Un na wi gado,”

drai den baka èn den e syen sote.

₁₈Un di dofu, un yere!

Un di breni, un luku fu un kan si!

₁₉No wan sma no breni so leki a knekti fu Mi,

no wan sma no dofu so leki a boskopuman di Mi e seni.

Suma breni so leki a wan di Mi poti fu dini Mi nanga en heri ati,

breni so leki a knekti fu MASRA?

₂₀A e si furu sani,

ma a no e hori den ini en ede,

den yesi fu en de opo-opo,

ma a no e arki.

₂₁A ben gi MASRA prisiri,

fu di A e du sani ala ten na tapu wan leti fasi,

fu sori o bigi a wèt fu En de èn fu gi en grani.

₂₂Ma sma fufuru a pipel disi,

èn teki ala den sani fu den tyari gwe.

Den sroto den alamala poti ini olo,

tapu den ini dungru-oso.

Den ben tron sma tapu san trawan ben onti,

èn den no ben abi wan sma fu ferlusu den.

Sma ben e kisi den tyari gwe,

èn no wan sma di ben e taki: “Gi mi den baka.”

₂₃Sortu wan fu unu kan poti yesi fu arki disi?

Sortu wan fu unu kan arki èn ferstan?

₂₄Suma ben gi Yakob abra,

fu sma ben kan fufuru ala sani fu en tyari gwe?

Suma gi Israel abra na fufuruman?

Na MASRA du dati.

Un ben du san A no ben wani.

Un no ben wani libi leki fa A ben wani,

èn du san a wèt fu En e taki.

₂₅Dat' meki A lusu a hebi atibron fu En na den tapu,

nanga a ogri fu bigi feti.

Faya ben lontu den na alasei,

ma ete den no ben e ferstan.

A faya bron den,

ma ete den no teki leri fu en.