Dag 314 van 365- Jeremia 48-49 en Hebreeën 7

“A kba gi a foto Nebo, a o tron wan broko pranasi.

Feyanti o teki a foto Kiryataim abra tu,

den kisi syen.

A presi fu unu srefi di tranga fu teki abra

kon na syen,

den sma di drape o lasi ati.

₂A kba nanga a bigi nen di Moab ben abi.

Ini Hesbon a feyanti e sidon prakseri fu du Moab ogri.

Den e taki: ‘Un kon, meki un puru a folku dati na pasi.

Pipel fu a foto Madmen, unsrefi wi o puru na pasi,

na ini bigi feti o puru un na pasi.’

₃Arki! Wan babari de fu yere ini a foto Horonaim:

‘Bigi ogri, bigi pori e kon na wi tapu.’

₄Moab broko,

den pikin fu en e krei trangatranga.

₅Den sma e krei tapu a pasi di e kren go na Lukit.

Srefi tapu a pasi di e saka kmopo fu Horonaim sma e krei den nowtu.

₆Sma fu Moab, un lowe! Un lon gi un libi!

Un luku wan fasi fu tan na libi,

leki a grangran ini a dreisabana.

₇Na fu di un fertrow na tapu san unsrefi kan du,

nanga tapu a gudu fu unu,

meki feyanti o teki a kondre abra.

Den o tyari Kemos, a gado fu un, nanga tranga gwe,

sosrefi den priester nanga den tra tiriman fu a kondre.

₈A feyanti di e pori ala sani o go na ibri foto,

no wan foto o kmopo ini en anu.

Den o pori ala sani na ini a Yordandal,

broko ala sani na tapu den opo wei.

leki fa MASRA ben taki na fesi.

₉Gi Moab frei,

bika nanga frei a mus lowe gwe.

Den foto fu en o tron broko pranasi,

presi pe sma no e libi.

₁₀Wan fluku mus de tapu a sma

di no e du a wroko fu MASRA nanga en heri ati.

Wan fluku mus de tapu a sma

di no wan kiri sma nanga en deigri.

₁₁Masra e taki disi:

Sensi di Moab de a ben de tiri fu en.

leki win di den poti na wan sei fu lepi.

Noiti sma no kanti en fu a wan bari go ini a trawan,

noiti feyanti tyari a pipel fu en nanga tranga go na den kondre.

Na dat' meki a tesi fu en tan bun,

na dat' meki a smeri fu en no kenki.

₁₂Ma yere, den dei e kon, na so MASRA taki,

dati Mi o seni sma fu kanti a win abra,

fu leigi den bari, fu naki den kroiki broko.

₁₃Dan a gado Kemos o meki den sma fu Moab fesi fadon,

leki fa a gado Betel ben meki den Israelitisma fesi fadon.

Na tapu en den ben poti den fertrow.

₁₄Man fu Moab, fa un kan taki:

‘Un na dyadya srudati,

srudati di man feti bun.’

₁₅Moab nanga ala den foto fu en tron broko pranasi.

Den srakti den moro bun yonkuman fu en,

na so MASRA fu ala sani, En di de Kownu, e taki.

₁₆A broko di Moab o broko de krosbei,

a bigi ogri di o miti en e kon es'esi.

₁₇Kondre di lontu Moab,

sosrefi un di sabi en bun,

un singi a lowsingi disi gi en:

‘Tye, a makti fu en broko,

a glori nanga a grani fu en no de moro.’

₁₈Sma fu a foto Dibon,

un saka kmopo fu den moi sturu go sidon ini a doti.

Bika a feyanti di e broko Moab,

a o hari kon broko den tranga foto fu yu.

₁₉Sma fu a foto Arower,

un go tnapu sei a pasi.

Dan un aksi den di ben kan lowe, taki:

‘San psa?’

₂₀Den o piki taki:

‘Bigi syen naki Moab, feyanti teki en abra.

Un krei èn un bari.

un go panya a nyunsu ini a kontren fu Arnonliba,

dati Moab broko pis'pisi te na gron.’

₂₁Masra leisi strafu gi den hei kontren:

gi Holon, gi Yahas nanga gi Mefaat,

₂₂gi Dibon, Nebo nanga Bet-Diblataim,

₂₃gi Kiryataim, Bet-Gamul nanga Bet-Meon,

₂₄gi Keriot, Bosra nanga ala den foto ini Moab,

den foto di de krosbei nanga den wan di de farawe.

₂₅A makti fu Moab broko, a lasi en krakti, na so MASRA e taki.

₂₆Un drungu Moab, bika a ben naki tapu en borsu gi MASRA.

A sa lolo ini a morsu di ensrefi puru kon na doro,

fu sma teki en meki spot'popki.

₂₇Na yu ben teki Israel meki spotu.

Noiti den grabu en leki wan fufuruman.

Ma yu ben e taki nomo fu en, èn yu ben e lafu en e seki yu ede.

₂₈Sma fu Moab, un kmopo ini den foto,

un go kibri na ini den bergi-olo.

Un meki un tanpresi leki den doifi,

na a lantyi fu a dal.

₂₉Un yere fu a heimemre fu Moab,

fa a e naki tapu en borsu,

fa a abi bigifasi,

fa a e denki so hei fu ensrefi,

fa a e prakseri dati a de wan sani.

₃₀Mi sabi fa a no abi maniri,

na so MASRA taki,

Mi sabi den bigi taki fu en,

ma den sani di a e du no wani taki noti.

₃₁Na dat' meki mi ai e lon watra gi Moab,

bari krei gi a heri kondre,

nanga gi den man fu Kir-Heres.

₃₂Sibma, yu di de leki wan droifibon

Mi sa krei moro gi yu dan gi Yaser.

Den taki fu yu e doro te na a se.

Den ben doro srefi te na a se fu Yaser.

Ma a wan di e pori ala sani e pori den figa nanga den droifi fu yu.

₃₃Prisiri no e prisiri moro

ini den dyari fu Moab pe sani e gro so bun.

Mi meki taki win no e kmopo moro

ini den baki pe sma e masi den droifi.

Sma no sa masi droifi moro nanga babari fu prisiri.

Babari de fu yere, ma a no de babari fu prisiri.

₃₄Den sma fu Hesbon e bari so tranga taki a de fu yere te ini Elale,

te leki Yahas srefi.

Te ini Soar, Horonaim nanga Eglat-Selisia den sten de fu yere.

Bika den watra fu Nimrim srefi drei gwe.

₃₅Na so Mi e tyari wan kba kon ini Moab,

na so MASRA taki,

na den di e kren den altari fu bron wierook gi a gado fu den.

₃₆Dat' meki a ati fu Mi de leki wan froiti di e prei low singi.

A e prei en gi den sma fu Moab nanga gi den sma fu Kir-Heres.

Bika den lasi ala san den ben tyari kon na wan.

₃₇Den piri ala ede,

ala barba koti puru,

ala anu kot'koti,

ala sma weri den lowkrosi.

₃₈Tapu ala daki fu den oso fu Moab,

tapu ala den pren sma e sari e krei.

Bika Mi naki Moab broko leki wan prapi di sma no wani moro.

Na so MASRA taki.

₃₉Moab broko pis'pisi,

syen meki a e drai en fesi.

A no man opo en ede moro,

a tron wan spot'popki nanga wan groskin sani,

gi ala kondre lontu en.

₄₀Na disi MASRA e taki:

Yere, a feyanti sa saka leki wan aka kon tapu Moab,

èn a sa tapu en nanga den frei fu en.

₄₁A sa teki den foto fu un abra,

owktu den presi fu un di tranga fu teki abra.

Den dei dati a ati fu den dyadya fetiman fu Moab,

a sa naki leki a ati fu wan uma di de fu meki wan pikin.

₄₂Dan den o wai Moab puru na pasi,

a no o de wan folku moro.

Bika a ben naki tapu en borsu gi MASRA.

₄₃Bun hebi frede, olo, nanga net,

na dati o miti den sma fu Moab,

na so MASRA taki.

₄₄Den wan di lon fu di den e frede o fadon ini wan olo,

èn den di kren kmopo ini a olo o fasi ini a net.

Bika a momenti doro fu Mi strafu Moab,

Na so MASRA taki.

₄₅Den e lowe go na Hesbon,

den no abi krakti moro.

Faya broko na ini Hesbon

a oso fu kownu Sikon e bron.

A foto di kownu Sikon ben tiri wan ten, de ini faya.

A bigi foto fu den trobiman teki faya,

a e bron te na den moro fara uku fu en.

₄₆A kba gi yu Moab!

Wan kba e kon na a folku fu a gado Kemos.

A feyanti e tyari den mansma fu yu gwe nanga tranga,

den e teki den umasma leki srafu gi densrefi.

₄₇Ma wan dei Mi o tyari wan kenki kon gi Moab.

Na so MASRA taki.”

A gersi leki Israel no abi manpikin,

neleki a no abi sma fu libi den gudu fu en na baka.

Fa a gado Milkom ben kan teki a kontren fu Gad abra?

Fa a du kon taki na a pipel fu en e libi now ini den foto fu a lo fu Gad?

₂Dat' meki yere, den dei e kon,

na so MASRA taki,

dati Mi o meki babari fu feti de fu yere ini Raba,

a bigi foto fu den Amonitisma.

Feyanti o broko en tron bigi ipi broko ston.

Den o sutu faya gi den dorpu tu di lontu en.

Dan Israel sa puru a kontren dati baka

ini anu fu den sma di ben teki en abra,

Na so MASRA e taki.

₃Krei Hesbon, bika a foto Ai tron wan broko pranasi.

Un bari krei uma fu Raba,

un weri un lowkrosi èn un sari.

Un lon na ini den pranigron,

bika a feyanti e tyari Milkom gwe nanga tranga.

Sosrefi den priester nanga den tra tiriman fu a kondre.

₄Amon, fu sanede yu e meki bigi so fu den dal fu yu?

Fu den pranigron fu yu pe sani e gro bun?

Trangayesi pipel fu Amon,

Un e denki taki noti no kan miti unu

fu di den maksin fu un span.

Un e taki srefi: ‘Suma o man kon feti nanga unu?’

₅Yere, Mi e seni frede kon na yu tapu

Masra, MASRA fu ala sani e taki.

fu ala sei a o kon na un tapu,

A o meki un lon panya,

èn no wan sma o man tyari un kon na wan baka.

₆Ma baka wan pisten Mi sa tyari wan kenki kon gi den Amonitisma,

Na so MASRA taki.

A gersi dati koni sma no de ini Teman moro,

dati no wan sma kan gi bun rai moro,

dati sma di e si sani krin no drape moro.

₈Sma fu Dedan, un drai gwe, un lowe,

un go kibri ini den bergi-olo.

Bika a ten doro dati Mi o strafu den bakapikin fu Esau.

Mi o meki bigi ogri miti den.

₉Te den man di e piki droifi doro na yu,

no wan droifi ben o tan fu sma piki fu a di fu tu tron.

Te fufuruman e kon te neti

na soso san den abi fanowdu den e teki.

₁₀Ma Mi, Misrefi o gi den bakapikin fu Esau abra na den feyanti.

Mi e tyari ala den kibripresi fu en kon na doro.

Den o wani go kibri, ma den no o man.

A feyanti o puru den alamala na pasi,

Esau no o abi bakapikin moro.

No wan birtisma o taki:

₁₁‘Mi o sorgu gi den pikin fu unu di no abi p'pa nanga m'ma moro,

èn den uma di masra dede kba kan fertrow na un tapu.’

₁₄“Mi yere a boskopu fu MASRA

wan boskopuman go na den folku.

A mus taigi den taki:

‘Un tyari den legre fu un kon na wan,

un meki un klari fu go na feti,

dan un hari go feti nanga Edom.’ ”

₁₅MASRA e taigi Edom disi:

“Mi e meki yu tron wan folku di no prenspari srefsrefi

na mindri den tra folku.

Libisma o si yu leki noti.

₁₆Ala sma ben frede gi yu, na dati kori yu,

a meki yu kisi heimemre.

Yu go libi hei ini den bergi-olo,

yu teki den moro hei pisi fu den bergi gi yusrefi.

Ma awinsi yu meki yu tanpresi so hei leki den nesi fu aka,

Mi o hari yu puru te drape,

na so MASRA taki.

₁₉Leki fa wan lew e broko go na tapu wan grupu meti

na a bus'busi fu a Yordanliba,

na so Mi broko go tapu Edom.

Mi e meki a heri folku lon panya.

Dan Misrefi o teki wan man poti fu tiri a kondre dati.

Suma de a srefi leki Mi?

Suma kan kari Mi kon na frantwortu?

Sortu tiriman o man hori feti nanga Mi?

₂₀Dat' meki, un yere san MASRA besroiti fu du nanga Edom,

èn san A prakseri fu du nanga den sma fu Teman:

Fu tru, a feyanti o srepi srefi den pikin fu den tyari gwe.

Ini wan sma o tnapu nanga opo mofo.

₂₁Grontapu o seki fu a fadon di Edom o fadon,

a bari di den o bari krei o de fu yere te na a Riet Se.

₂₂Un yere, a feyanti o opo èn frei leki wan aka go na Bosra,

a o bradi ala en frei.

A dei dati a ati fu den dyadya srudati fu Edom,

a o naki leki a ati fu wan uma di de fu meki wan pikin.

A pipel fu den foto Hamat nanga Arpad kon frede sote.

Den yere nyunsu di no bun srefsrefi.

Na den inisei den de leki a se te a watra e rigeri,

den e broko den ede,

den no man de tiri fu den.

₂₄A pipel fu Damaskus lasi ati.

Den bruya sote dati den lowe gwe.

Den de na ini benawtu, na ini pen,

leki wan uma di de fu meki wan pikin.

₂₅A foto dati di ben abi so wan bigi nen,

a leigi now.

Na presi dati di ben tranga fu teki abra,

a presi pe prisiri ben e prisiri sote.

₂₆Den dei dati feyanti o kiri den yonkuman tapu den pren,

ala den srudati den o kiri tu,

MASRA fu ala sani e taki.

₂₇Mi o sutu faya gi den skotu fu Damaskus,

èn a faya dati o bron den kownu-oso fu Benhadad.

Hari go feti nanga Kedar,

puru den sma dati fu oostsei na pasi.

₂₉Teki den tenti, den krabita nanga den skapu fu den,

teki ala san den abi tyari gwe.

Teki den kameel fu den tu,

bari taigi den taki:

‘Bruya e teki un na alasei!’

₃₀Sma fu Hasor, un lowe,

un lon gwe es'esi, un go kibri ini den bergi-olo,

na so MASRA taki.

Bika kownu Nebukadnesar fu Babel,

poti na en ede kba san a o du nanga unu.

₃₁Nebukadnesar, hari go feti nanga a folku dati,

a folku di e si leki noti kan miti en,

di e libi tiri fu en,

na so MASRA taki.

Den foto fu den no abi bigi doro, den no abi greni,

èn den e libi fara fu tra sma.

₃₂Teki den kameel nanga ala den meti fu den tyari gwe.

Den di e piri den sei ede,

Mi o panya den go na ala sei.

Fu ala sei Mi o meki bigi ogri miti den tu,

na so MASRA taki.

₃₃Hasor o tron wan presi pe busi dagu o libi,

a o tron wan broko pranasi fu têgo.

no wan enkri sma o tan moro drape.”

₃₅“Na disi MASRA fu ala sani e taki:

Yere, a krakti fu Elam na den man di e sabi sutu bo,

ma Mi o broko den bo fu den.

₃₆Mi e meki tranga winti kon tapu Elam kmoto fu alasei.

Mi o panya a pipel dati go na alasei tu.

No wan kondre o de pe feyanti no o tai den sma fu Elam tyari go.

₃₇Mi o meki Elam beifi gi den feyanti fu den,

gi den di wani kiri den.

Mi e meki bigi ogri miti den, bika Mi ati teki faya fu tru,

na so MASRA taki.

Mi e seni feyanti go na den baka te leki Mi puru den na pasi.

₃₈Baka dati Mi o poti Mi kownusturu ini Elam fu leisi strafu,

dan Mi o puru kownu nanga tra tiriman na pasi,

na so MASRA taki.

₃₉Ma bakaten Mi o tyari wan kenki kon gi Elam,

na so MASRA taki.”