Dag 318 van 365- Klaagliederen 3-5 en Hebreeën 10:19-39

₁Mi na wan man di sabi san na pina, te Gado e strafu nanga atibron.

₂A teki mi na mi anu dan A tyari mi go ini dipi dungru.

₃Trutru, na heri dei A e naki mi dorodoro.

₄Mi meti nanga mi buba no man teki en moro,

ala mi bonyo broko.

₅A lontu mi,

tapu mi fu ala sei nanga pina èn nanga problema.

₆A meki mi libi ini dungru presi, leki den wan di dede olanga kba.

₇A tapu mi fu ala sei, tai mi nanga kopro keti.

₈Awinsi mi e bari suku yepi A no e arki mi srefsrefi.

₉A tapu mi pasi nanga bigi ston, A meki mi lasi pasi.

₁₀A luru na mi tapu leki wan beer, leki wan lew ini en kibripresi.

₁₁A srepi mi puru fu a pasi,

A priti mi dan A libi mi wawan didon drape.

₁₂A hari a bo fu En span, marki en peiri na mi tapu.

₁₃A sutu mi ini mi ati nanga den peiri fu a kokro fu En.

₁₄Ibri dei a pipel fu mi e singi e dreigi mi.

₁₅A furu mi bere nanga bita nyanyan,

gi mi a moro bita dringi fu dringi.

₁₆A meki mi kaw ston broko mi tifi, A poti mi didon ini a santi.

₁₇Mi no sabi moro san a wani taki fu abi freide,

koloku mi no sabi srefsrefi moro.

₁₈Mi e prakseri taki: Mi no abi langa moro fu libi,

mi no abi howpu moro tapu MASRA.

₁₉Te mi prakseri a tranga ten

nanga a waka di mi e waka lontu nomo,

a de leki wan bita dresi ini mi mofo.

₂₀Ala leisi te mi prakseri baka mi e firi broko.

₂₁Ma mi no e lasi howpu, bika mi e hori mi na a sani disi:

₂₂dati na a bunfasi fu MASRA hori wi na libi,

a sari-ati fu En no abi kba.

₂₃ala mamanten baka A e sori wi den na tapu wan nyun fasi.

Sma kan bow ala ten na Yu tapu!

₂₄Mi e taki disi: MASRA na ala san mi abi fanowdu,

na dat' meki mi e tan howpu na En tapu.

₂₅MASRA bun gi den di e ferwakti ala sani fu En,

gi ala sma di e suku En.

₂₆A bun fu wakti tiri tapu MASRA, tapu a ferlusu fu En.

₂₇Na wan bun sani fu leri abi pasensi ini yu yongu yari.

₂₈Te Gado e meki sani miti un fu leri dati,

dan un mus sidon tiri unu wawan.

₂₉Un mus saka unsrefi, beni un ede te na gron, kande howpu de.

₃₀Un mus poti un seifesi gi a sma di naki unu,

un mus tan teki syen te un no man moro.

₃₁Bika MASRA no e poti sma na wan sei fu têgo.

₃₂Te A meki wan sma abi sari ini en libi

A e sorgu gi a sma tu

fu sori a sma a bunfasi fu En.

₃₃A no e prisiri te sma de ini benawtu, noso te den e sari,

₃₄te den e trapu strafuman alasei na grontapu.

₃₅te den no e gi wan sma a leti di a mus kisi

ala di den sabi taki a Moro Hei Gado e si ala sani.

₃₆Masra e si te krutu no e koti na tapu wan leti fasi.

₃₇Suma kan taki meki wan sani de, di no ben de?

Na MASRA wawan kan komanderi so.

₃₈Na a Moro Hei Gado e komanderi fu bigi ogri nanga bun sani psa.

₃₉Dan fu sanede sma e kragi te den de na libi?

Meki den kragi fu den sondu?

₄₀Meki un ondrosuku a fasi fa un e libi fin'fini,

èn meki un drai go na MASRA.

₄₁Meki un langa un anu, meki un begi Gado nanga wi heri ati:

₄₂Un sondu, un no ben wani du san Yu ben taki, èn Yu no gi wi pardon.

₄₃Na ini ala sani Yu meki wi si a atibron fu Yu,

Yu kon na un baka,

Yu kiri un sondro wan dropu sari-ati.

₄₄Yu tapu Yusrefi na ini wan wolku,

den begi fu wi no man psa srefsrefi kon na Yu.

₄₅Yu meki sma e si un leki doti,

un tron a moro lagi sani di de ini a ai fu den tra folku.

₄₆Ala den feyanti fu wi e kosi wi trangatranga.

₄₇Frede naki wi, den seti sani fu fanga wi, den broko wi, masi wi.

₄₈Mi ai e lon watra bogobogo, bika den kiri a lobi pipel fu mi,

₄₉Mi ai e tan lon watra, mi no man tapu fu krei,

sondro fu teki bro,

₅₀te leki MASRA luku fu heimel kon na gron, te leki A si mi.

₅₁Mi e firi wan dipi sari fu si den sani di miti den umasma fu a foto.

₅₂Den feyanti kon na mi baka leki fa sma e onti fowru,

ma mi no ben du den noti.

₅₃Den poti mi libilibi ini wan peti, dan den tapu en nanga ston.

₅₄A watra ben tapu ala mi ede, mi prakseri taki: Mi o sungu.

₅₅MASRA, mi e bari kari Yu fu te na gron fu a peti.

₅₆Yu e yere a sten fu mi,

no tapu Yu yesi gi a dyeme di mi e dyeme,

gi a bari di mi e bari kari suku yepi.

₅₇Yu de krosbei te mi e bari kari Yu, Yu e taigi mi: “No frede.”

₅₈MASRA, na Yu e feti a tori fu mi na krutu,

na Yu e ferlusu a libi fu mi.

₅₉Yu e si, MASRA, fa den feyanti fu mi du mi ogri,

tye, meki mi kisi mi leti.

₆₀Yu e si fa den de nomo fu pai mi baka,

ala den mofo di den meki fu du mi wan sani.

₆₁Yu e yere, MASRA,

fa den e teki mi meki spotu,

ala den mofo di den meki fu du mi wan sani,

₆₂a fasi fa den feyanti fu mi e taki nanga mi,

den sani di den e taki bakabaka, a heri dei.

₆₃Luku fa den e tyari densrefi:

na mi den e teki e meki spotu nanga den singi fu den.

₆₄MASRA, Yu o pai den baka fu den sani di den du.

₆₅Tranga a ati fu den, fluku den!

₆₆Meki a atibron fu Yu de nomo na den baka, figi den puru na grontapu.

₁Tye, fa a du kon dati a gowtu no e brenki moro,

dati a moi fini gowtu kon lasi en kloru?

Den santa ston fu a tempel didon tapu den uku fu ibri strati.

₂A pipel fu Sion di sma ben gi so furu grani,

a pipel di ben warti moro fini gowtu,

tye, a no de noti moro leki wan kleipatu,

wan sani di wan man meki di e wroko nanga kleidoti.

₃Bus'dagu srefi e gi den pikin fu den bobi fu dringi,

ma a lobi pipel fu mi no abi no wan dropu sari-ati,

den de leki den struisfowru fu a sabana

di e gwe libi den eksi fu den.

₄A tongo fu den nyunyun pikin drei,

pikin e begi fu wan pisi brede,

ma no wan sma ben langa wan pisi gi den.

₅Den sma di ben gwenti nyan switi nyanyan,

e dede now fu angri na tapu strati,

den sma di ben gro kon nanga bun diri krosi

e suku nyanyan tapu dot' ipi.

₆Bika den sondu fu a lobi pipel fu mi ogri moro den sondu fu Sodom.

Ini wan pingi fu wan ai Gado ben figi a foto disi puru na grontapu,

sondro fu wan sma ben sari fu dati.

₇Wan ten ben de pe den edeman fu Yerusalem ben krin ini Gado ai.

den no ben doti densrefi,

Den skin ben redi leki koraal, den fesi ben moi leki lasurston.

₈Ma now den kon blaka leki krofaya,

na strati sma no sabi moro taki na den.

Den kon mangri sote tu

èn den buba kon drei leki udu.

₉A moro betre fu dede ini bigi feti, dan fu dede fu angri:

den e dede gwe fu angri fu di den pranigron no e gi not'noti.

₁₀Uma nanga switi maniri abi fu bori den eigi pikin,

Di a lobi pipel fu mi ben de ini bigi benawtu

den ben abi fu nyan den pikin.

₁₁MASRA lusu En atibron na den tapu, a puru En atibron na den tapu,

Iya, A leti wan faya ini Sion, ala den fundamenti fu en bron.

₁₂No wan kownu fu grontapu ben bribi so wan sani,

no wan sma fu grontapu tu,

dati feyanti ben o man psa den bigi doro kon ini Yerusalem.

₁₃Na a bakapisi fu den sondu fu den profeiti fu en,

a bakapisi fu den kruktudu fu den priester fu en.

Den ben meki a brudu fu sma di bun ini Gado ai lon ini a foto.

₁₄Leki brenisma den profeiti nanga den priester ben e waka tapu strati,

den ben doti densrefi nanga brudu,

sma ben e koti pasi gi den.

₁₅Sma ben bari gi den taki: “Un gwe! Un no krin ini Gado ai!

Un gwe, un no fasi mi!”

Na so den hari kmopo drape go waka lontu nomo.

Ala sei sma ben taki: “Dyaso den no kan tan!”

₁₆MASRA srefi panya den go na ala sei,

A no e luku den moro na wan ai.

Sma no abi lespeki moro gi den priester,

sari-ati no de moro tu gi owrusma.

₁₇Un luku te un no man luku moro fu sma fu yepi unu,

ma fu soso.

Un tnapu ini den hei wakti-oso fu un e luku,

ma a folku di un e ferwakti no man tyari yepi gi unu.

₁₈A feyanti ben e hori un na ai, tapu den pren srefi un no ben man go.

Un ben kan teri den dei fu unu, a libi fu un ben e kon na wan kba.

₁₉Den wan di ben de na un baka,

gaw moro den aka di e frei kon grabu wan meti.

Den e kon na un baka tapu den bergi,

den ben seti luru gi unu ini a bigi dreisabana.

₂₀A kownu, a libibro fu unu,

a wan di MASRA ben salfu,

a fadon ini wan olo di den ben diki.

A wan fu san un ben prakseri

taki na en bo kibri unu na mindri den tra folku.

₂₁Sma fu Edom, un mus breiti, un mus prisiri srefsrefi,

un di e libi ini a kondre Us.

A kan o doro na yu mofo tu,

yu o dringi drungu

èn yu o kon ini bigi syen.

₂₂Yu kba pai fu den sondu fu yu, Sion,

A no o meki feyanti tyari yu gwe moro nanga tranga,

ma A o strafu den kruktudu fu yu, Edom, A o tyari den kon na krin.

₁Tye MASRA, prakseri san miti unu, luku, èn si a syen di kisi unu:

₂A kondre fu unu kon ini anu fu doroseisma,

den oso fu unu ini anu fu sma fu tra folku.

₃Un tron pikin di no abi p'pa nanga m'ma moro,

den m'ma fu unu tron uma di masra dede gwe libi den.

₄Un mus pai fu dringi un eigi watra, un mus bai un eigi udu.

₅Un feyanti e kon fayafaya na un baka,

un weri, ma den no e meki un teki bro.

₆Un suku yepi na Egipte, begi Asiria fu gi un nyanyan.

₇Ma na den afo fu unu ben sondu, den no de moro,

ma na unu e tyari a bakapisi fu den kruktudu fu den.

₈Den wan di e tiri wi srefi na srafu,

ma un no abi no wan sma fu puru wi na ini den anu.

₉Te un e go koti un nyanyan un kan lasi un libi,

bika fufuruman nanga deigri de ini a sabana.

₁₀Angri e meki korsu priti un skin, a buba fu un faya leki wan onfu.

₁₁Nanga tranga a feyanti sribi nanga den uma ini Sion,

nanga den yongu uma ini Yuda.

₁₂Den anga den tiriman fu unu, den edeman den no teri srefsrefi.

₁₃Yonkuman mus drai den hebi ston fu den miri,

yongu boi e fadon nanga udu di den mus syow.

₁₄Den edeman no e sidon moro na a bigi doro pe den ben koti krutu,

yongusma tapu fu prei instrumenti.

₁₅No wan prisiri de moro ini un ati, a dansi fu wi tron sari now.

₁₆Un lasi ala grani fu wi, a kba gi unu, bika un sondu.

₁₇Un ati firi siki, un ai dungru:

₁₈bika a bergi Sion tron wan broko pranasi,

na soso krab'dagu e waka lontu drape.

₁₉Ma Yu, MASRA, e rigeri fu têgo, Yu e tan kownu fu ala ten.

₂₀Fu sanede Yu no wani prakseri un srefsrefi moro?

Fu sanede Yu gwe libi unu fu no drai kon noiti moro?

₂₁Tyari un kon baka na Yu MASRA, meki un drai kon baka.

Meki un de baka leki fa un ben de bifo.

₂₂No poti un fu têgo na wan sei, meki wan kba kon na a atibron fu Yu.