A fosi singi: A benawtu ini san Yerusalem de
1Tye:
Yerusalem di ben furu nanga sma,
de sondro wan enkri libisma now.
Wan fu den moro prenspari folku,
de now leki wan uma di masra dede kba.
Wan gudu uma di ben abi makti mindri den folku,
tron wan srafu now.
2Heri neti a e krei, watra ai e lon na en sei fesi.
No wan sma e trowstu en, no wan nanga a san a ben e meki lobi srefi.
Ala den mati fu en bedrigi en, den tron feyanti fu en.
3Feyanti tyari Yuda gwe nanga tranga
ini wan ten fu nowtu nanga hebi benawtu.
Den sma fu en e libi mindri tra folku,
den no man feni rostu.
Feyanti de nomo na den baka,
no wan presi den man go.
4Den pasi di e go na Sion e sari,
sma no e go na den fesa moro fu anbegi Gado.
Den priester e soktu, sma no e psa na den doro moro.
Den yongu uma e sari, a tempel e pina srefsrefi.
5A feyanti teki Yerusalem abra,
a go den feyanti bun.
Na MASRA ben pina en so
fu den furu kruktudu fu en.
Den yongu pikin ben mus waka na fesi,
a feyanti ben e tyari den gwe leki strafuman.
6Sion lasi ala a moi fu en.
Den tiriman fu en de leki dia di no man feni weigron.
Den lowe gwe gi den sma di de na den baka,
den no abi krakti moro.
7Aladi bigi ogri miti Yerusalem èn den e waka lontu,
den e tan prakseri den gudu di den ben abi bifo.
Di a pipel fu en fadon ini anu fu a feyanti,
no wan sma kon yepi den.
Den feyanti fu den di si dati ben e lafu, fu si fa a foto e broko.
8Yerusalem sondu hebi,
dat' meki sma e kmopo na pasi gi en
leki wan sma di no krin ini Gado ai.
Ala den sma di ben gi en grani, e fisti fu en now,
bika den si en nanga sososkin
Ensrefi e dyeme, soso syen meki a e drai en fesi.
9A doti di a doti ensrefi de fu si na en krosi.
A no ben prakseri noiti dati na so sani ben o waka gi en.
Na dat' meki a fadon so,
no wan sma de di e trowstu en.
A e taki: “Tye MASRA,
luku a benawtu ini san mi de,
bika a feyanti wini mi.”
10A feyanti fufuru ala den gudu fu en teki.
Iya, luku nomo a ben kan luku
fa dorosei folku ben poti den futu ini a santa presi,
a santa presi di ben tapu gi den sma dati.
11Ala den sma fu en e dyeme,
nyanyan nomo den e suku so.
Den e kenki den gudu di den abi gi nyanyan,
fu kan kisi krakti baka.
“Tye MASRA, luku. Luku fa den e si mi fu noti.”
12Na du a no e du un noti? Un di e waka e psa?
Un luku dan un taigi mi,
sma de di e pina so leki mi?
Na fu di MASRA ati teki faya A meki a hebi pina disi miti mi.
13A seni faya kmopo na loktu di e bron ini mi leki hebi korsu.
A span wan net gi mi,
A meki mi hari go nanga baka.
A pori a libi fu mi,
pen e nyan mi dei fu dei.
14A bondru den kruktudu fu mi kon na wan,
A anga den na mi neki.
Den hebi fu tyari,
mi krakti gwe libi mi.
Masra gi mi abra ini anu fu den wan gi san mi no man kaka futu.
15Masra poti ala den dyadya srudati fu mi na wan sei.
A tyari wan legre kon na wan fu feti nanga mi,
fu masi ala den yonkuman fu mi.
A traputrapu a yongu uma fu Yuda,
leki droifi ini win baki.
16Na dat' meki mi e krei,
na dat' meki bogobogo watra e lon na mi ai.
Mi no abi no wan sma tu fu trowstu mi,
no wan sma fu gi mi dek'ati baka.
A pipel fu mi no abi howpu moro,
a feyanti tranga sote.
17Sion e langa en anu suku yepi,
ma no wan sma de fu yepi en.
MASRA komanderi den kondre lontu Israel fu tron feyanti fu en.
Yerusalem tron wan groskin sani gi den.
18Yerusalem taki: MASRA abi leti,
bika na mi no ben wani du san A komanderi.
Folku, un alamala, un luku fa mi e pina:
feyanti tai den yongu uma nanga den yonkuman fu mi,
den tai den leki strafuman tyari go na den kondre.
19Mi bari kari den mati fu mi, ma den kori mi.
Den priester nanga den edeman fu mi,
den dede ini a foto,
den dede di den ben suku nyanyan fu tan na libi.
20Tye MASRA, luku a hebi benawtu ini san mi de,
mi heri inisei e drai.
Mi ati broko, bika mi ben trangayesi sote.
A deigri e kiri den pikin fu mi na tapu strati,
a takru siki di panya e rigeri na ini mi oso.
21Yere fa mi e dyeme, ma no wan sma de fu trowstu mi.
Ala den feyanti fu mi yere fu a bigi ogri di miti mi,
den e prisiri nanga den sani di Yu du.
Ma now a dei doro di Yu ben poti fu strafu den,
du nanga den leki fa Yu du nanga mi.
22Krutu den fu ala den ogri di den du.
Du a srefi sani nanga den san Yu du nanga mi
fu den kruktudu fu mi ede.
Bika mi abi fu dyeme furu, mi ati kon siki.
