Dag 360 van 365- Haggai 1-2 en Openbaring 17

₁Tapu a fosi dei fu a di fu siksi mun di kownu Darius ben de tu yari na a makti kba, MASRA gi a profeiti Hagai wan boskopu. A boskopu ben de gi Serubabel a manpikin fu Sealtiyel, di ben de granman fu Yuda, nanga gi Yosua, a manpikin fu Yosadak, di ben de granpriester. ₂“Na so MASRA fu ala sani taki: A folku disi e taki tak' a ten no doro ete fu bow a oso fu MASRA.” ₃Èn Na disi na a boskopu di MASRA ben gi a profeiti Hagai gi folku: ₄“Un taigi Mi efu disi na a ten fu un libi ini den moi oso fu unu, dan a oso fu Mi didon brokobroko? ₅Dat' meki na disi MASRA fu ala sani e taki: Un denki bun san miti unu. ₆Un sai furu, ma un koti pikinso nomo. Un nyan, ma un bere no furu. Un dringi, ma a no e sari unu. Un weri krosi, ma un e kowru ete. Un e wroko gi trawan, ma te un kisi un moni a gersi leki un saka boro. ₇Na disi MASRA fu ala sani e taki: Un denki bun san miti unu. ₈So, un kren go tapu den bergi go teki udu fu bow Mi oso. Dan dati sa gi Mi prisiri èn Mi sa kisi grani. Dati na san MASRA taki. ₉Un ben ferwakti furu, ma luku, un feni pikinso nomo èn san un feni tyari go na oso, Mi bro na tapu fu a kba es'esi. Fu sanede un denki taki Mi du dati, MASRA fu ala sani taki? Mi du dati fu di Mi oso didon brokobroko, ma ala sma e lon meki den eigi oso. ₁₀Na fu dat'ede a heimel no e gi dow èn a gron no e gi nyanyan. ₁₁Mi meki wan dreiten kon abra a kondre nanga den bergi, abra a karu, a win, a oli, abra ala sani di e gro, abra libisma, abra meti nanga ala san un e du.”

₁₂Dan Serubabel, a manpikin fu Sealtiyel, makandra nanga granpriester Yosua, a manpikin fu Yosadak, nanga den sma di ben de ini a kondre ete, gi yesi na san MASRA, den Gado ben taki. Den arki san MASRA, den Gado ben taigi a profeiti Hagai fu taigi den èn a folku ben abi bigi lespeki gi MASRA. ₁₃Dan Hagai, a boskopuman fu MASRA, gi a folku a boskopu disi fu MASRA. A taki: “Na disi MASRA taki: ‘Mi de nanga unu.’ ”

₁₄Dan MASRA wiki a prisiri na ini Serubabel, a manpikin fu Sealtiyel, di ben de granman fu Yuda, sosrefi na ini granpriester Yosua, a manpikin fu Yosadak, nanga ini den sma di ben de ini a kondre ete, fu bigin bow a oso fu MASRA fu ala sani, a Gado fu den.

₁Den bigin nanga a wroko tapu a di fu tutenti-na-fo dei, fu a di fu siksi mun, fu a di fu tu yari di kownu Darius ben de na makti.

₂Tapu a di fu tutenti-na-wan dei, fu a di fu seibi mun, MASRA gi a profeiti Hagai wan boskopu. A taigi en taki: ₃“Taigi granman Serubabel, a manpikin fu Sealtiyel, nanga granpriester Yosua, a manpikin fu Yosadak, nanga den sma di de ini a kondre ete taki: ₄‘Suma fu unu dyaso sabi a oso disi fu fosi di a ben de wan moi oso ete? Ma san a gersi now? A no de not'noti moro ini un ai.’ ₅‘Ma MASRA taki: Hori doro, Serubabel, hori doro, granpriester Yosua, manpikin fu Yosadak, hori doro, sma fu a kondre. Na dati MASRA taki. MASRA fu ala sani taki: Un wroko doro bika Mi de nanga unu. ₆Na dati Mi ben pramisi unu di un ben e kmoto na ini Egipte èn Mi Yeye ben de na un mindri: No frede.’ ” ₇Na disi MASRA fu ala sani e taki: “No langa moro, wan syatu pisten ete, dan Mi o seki heimel nanga grontapu, a se nanga a drei gron. ₈Iya, Mi o seki ala den folku, dan den alamala o tyari den gudu fu den kon, dan Mi o furu a oso disi nanga den gudu dati. ‘Na dati MASRA fu ala sani taki.’ ” ₉MASRA fu ala sani taki: “Ala a solfru nanga ala a gowtu na fu Mi.” ₁₀“A glori fu a oso disi sa bigi moro a fosiwan,” MASRA fu ala sani taki. “Dyaso Mi sa meki freide de.” Na dati MASRA fu ala sani taki.

₁₁Tapu a di fu tutenti-na-fo dei, fu a di fu neigi mun, fu a di fu tu yari di kownu Darius ben de na makti, MASRA gi a profeiti Hagai wan boskopu. A taigi en taki: ₁₂“Na so MASRA fu ala sani taki: ‘Aksi den priester fu den leri yu san a wèt e taki fu a sani disi. ₁₃Aksi den efu te wan sma abi wan pisi meti ini en krosi di ben de fu wan ofrandi gi Gado, dan a krosi tuka nanga brede, nyanyan, win, oli noso awinsi sortu nyanyan sani, efu den sani disi e kon santa tu.’ Den priester piki: ‘nono.’ ₁₄Dan Hagai aksi den taki: ‘Ma efu wan sma di no krin ini Gado ai, fu di a tuka nanga wan dedeskin, fasi wan fu den sani disi, den sani disi e kon doti tu?’ Den priester piki: ‘Iya, den sani dati e kon doti tu ini Gado ai.’ ₁₅Ne Hagai taki: ‘Ini MASRA ai na so a de nanga a folku disi èn na so a de nanga a kondre disi. Na dati MASRA taki. Na so a de tu nanga ala sani di den e du. Noti fu den sani krin di den e tyari leki ofrandi.’

₁₆‘Ma un mus prakseri bun fa sani ben e go nanga unu fosi un ben bigin poti a wan ston baka tapu a trawan fu bow a tempel fu Mi. ₁₇Fosi, te un ben prakseri taki un ben o feni tutenti saka karu, un ben feni tin nomo. Te un ben doro pe den e masi droifi fu meki win èn un ben prakseri taki un o lai feifitenti bari win, un ben feni tutenti nomo. ₁₈Mi ben meki a karu di un ben prani kisi ala sortu siki. Mi ben meki pis'pisi ijs fadon kmoto fu heimel pori ala a wroko san un ben du, ma un no ben e prakseri fu drai kon baka na Mi. Na dati MASRA taki.’ ₁₉‘Ma un mus prakseri bun fa sani ben e go nanga unu fosi a di fu tutenti-na-fo dei fu a di fu neigi mun. Dati na a dei di un poti a fundamenti fu a tempel fu MASRA. ₂₀Un prakseri bun: karu no de ini a maksin moro. Srefi a droifibon, a figabon, a granaki-aprabon nanga a oleifbon no gi nyanyan. Ma bigin fu a dei disi Mi o blesi unu.’ ”

₂₁Tapu a di fu tutenti-na-fo dei fu a mun dati MASRA gi Hagai ete wan boskopu. A taigi en taki: ₂₂“Taigi Serubabel, a granman fu Yuda, taki: ₂₃‘Mi o seki heimel nanga grontapu. Mi o tyari wan kba kon na a makti fu den kownu, Mi o broko a makti fu ala den folku na grontapu. Mi o pusu den fetiwagi nanga den wan di e tyari den, trowe. Mi o meki den asi nanga den wan di e tyari den asi, fadon. Den o kiri densrefi nanga deigri.’ ” ₂₄“Na so MASRA fu ala sani taki: ‘A pisten dati Mi sa teki yu, Mi knekti Serubabel, manpikin fu Sealtiyel, èn Mi o gi yu makti bika na yu Mi teki.’ ‘Na so MASRA fu ala sani taki.’ ”

₁Dan wan fu den seibi engel di ben abi den seibi skarki, kon na mi. A taigi mi taki: “Kon, dan mi sa sori yu fa Gado o krutu a bigi motyo, di e sidon krosbei fu furu liba. ₂Nanga a bigi motyo disi den kownu fu grontapu ben e motyo, èn a win fu den takru lostu fu en ben drungu den sma di e libi na grontapu.” ₃Dan a Yeye fu Gado kon na mi tapu, èn a engel tyari mi go ini wan dreisabana. Drape mi si wan uma sidon tapu wan redi meti. A meti disi ben abi seibi ede nanga tin tutu. Tapu en heri skin sani ben skrifi san e afrontu Gado. ₄A uma ben weri dungru lila nanga redi krosi, èn a ben weri bun furu gowtu sani, diri ston nanga parelkrara. Ini en anu a ben hori wan gowtu kan san ben lai nanga groskin sani èn nanga a syen fu den takru lostu fu en. ₅Wan nen ben skrifi na en fes'ede san de wan kibritori. A skrifi taki: “A bigi foto Babilon. A mama fu ala motyo nanga ala groskin sani fu grontapu.” ₆Dan mi si taki a uma ben drungu fu a brudu fu den sma fu Gado, èn fu a brudu fu den sma di kotoigi fu Yesus. Di mi si en, mi ben ferwondru srefsrefi. ₇Dan a engel aksi mi taki: “Fu sanede yu ferwondru? Mi sa taigi yu san na a kibritori fu a uma nanga a meti tapu san a e sidon, a meti nanga den seibi ede nanga den tin tutu. ₈A meti san yu si ben de na libi, ma now a dede. Ma a sa opo kmopo ini a olo san no abi gron fu kisi en strafu fu têgo. Den sma di e libi na grontapu sa ferwondru te den si a meti, bika a ben e libi, èn a ben dede now, ma a e libi baka. Ala den sma di nen no skrifi ini a buku fu libi sensi bifo grontapu ben meki, na den sa ferwondru.

₉Wan sma mus abi koni fu ferstan a sani disi: Den seibi ede na seibi bergi tapu san a uma e sidon. ₁₀Den seibi ede na seibi kownu tu. Feifi fu den no de moro, wan fu den de kownu now, èn a trawan mus tron kownu ete. Te a kon, a sa rigeri fu wan syatu pisten nomo. ₁₁A meti san ben libi, ma di dede now, na wan kownu tu, a di fu aiti. A de wan nanga den seibi trawan, èn a o kisi en strafu fu têgo. ₁₂Den tin tutu san yu si, na den tin kownu di no e rigeri ete leki kownu. Ma den o kisi makti fu rigeri leki kownu fu wan syatu pisten makandra nanga a meti. ₁₃Ala den tin kownu disi abi a srefi prakseri, èn den o gi a meti a makti fu den nanga a leti san den abi fu rigeri. ₁₄Den o feti nanga a Lam, ma a Lam o wini den, bika En na Masra fu ala masra, nanga Kownu fu ala kownu. Den sma di e waka na En baka, na den sma di Gado ben kari èn teki gi Ensrefi, èn di e tan bribi ini En.” ₁₅Dan a engel taigi mi moro fara taki: “Den furu liba san yu ben si krosbei pe a motyo sidon, na den folku. Den na a bigi grupu sma di e taki ala sortu tongo ini den difrenti kondre. ₁₆Den tin tutu san yu si, nanga a meti, den no o man si a motyo na ai. Den o puru ala sani san a abi, èn den o poti en nanga sososkin. Den o nyan en meti, èn den o bron en nanga faya. ₁₇Bika Gado poti en ini den prakseri fu du san En wani. Leki wan man den o gi a makti fu den na a meti, te leki den sani san Gado ben taki kon psa. ₁₈A uma di yu ben si, na a bigi foto san abi makti abra ala den kownu fu grontapu.”