Dag 49 van 365- Leviticus 23-24 en Marcus 1:1-28

₁MASRA taigi Moses taki: ₂“Taigi den sma fu Israel taki: ‘Disi na den fesadei fu Mi. Un sa hori wan santa konmakandra tapu den dei dati, den fesadei fu MASRA.

₃Un kan wroko siksi dei. Ma a di fu seibi dei sa de wan trutru sabatdei. Dan wan santa konmakandra sa de. No wan wroko un sa du a dei dati. A sa de wan trutru sabatdei gi MASRA, awinsi pe un e tan.

₄Disi na den fesadei fu MASRA. Un sa hori wan santa konmakandra tapu den spesrutu dei dati.

₅Tapu a di fu tin-na-fo dei, fu a fosi mun, te neti bigin e fadon, a Paskafesa fu MASRA e bigin. ₆A di fu tin-na-feifi dei fu a srefi mun disi na a fesa fu MASRA, pe un mus nyan brede di meki sondro dyesi. Seibi dei langa un sa nyan brede di meki sondro dyesi. ₇Tapu a fosi dei un sa hori wan santa konmakandra. Un no sa du no wan tranga wroko. ₈Seibi dei langa un sa bron ofrandi nanga faya gi MASRA. Tapu a di fu seibi dei wan santa konmakandra sa de. Dan un no sa du no wan tranga wroko.’ ”

₉MASRA taigi Moses taki: ₁₀“Taigi den sma fu Israel taki: ‘Te un doro ini a kondre di Mi sa gi na unu, èn un koti den fosi nyanyan fu un gron, un sa tyari a fosi bosu fu a karu di un koti go gi a priester. ₁₁Dan a priester sa beweigi en na MASRA fesi, fu Gado kan abi prisiri nanga en. A priester sa du disi a dei baka a sabatdei. ₁₂Tapu a srefi dei dati un sa tyari wan skapu fu wan yari kon, fu bron leki ofrandi gi MASRA. Noti no mus mankeri a skapu. ₁₃Makandra nanga a skapu un sa tyari wan graan-ofrandi fu sowan fo kilo blon kon, di moksi nanga oli. Dan den sa bron en nanga faya leki wan ofrandi nanga wan switi smeri, di e gi MASRA prisiri. Un sa tyari wan liter win so tu fu kanti leki wan ofrandi. ₁₄Fosi a dei disi un no sa nyan brede, losi karu noso karu di un koti a srefi dei dati. Baka te un tyari a ofrandi gi un Gado un kan du disi. Na wan sani di unu nanga den pikin fu unu di e kon na baka sa tan du fu têgo, awinsi pe un e tan.

₁₅Un sa teri seibi wiki kmoto fu a dei baka a sabatdei, dati na a dei di un tyari a fosi bosu fu a fosi nyanyan kon gi a priester. ₁₆Seibi sabatdei un sa teri. Un sa teri te leki a dei baka a di fu seibi sabatdei. Dati o de a di fu feifitenti dei. A dei dati un sa tyari wan graan-ofrandi gi MASRA baka. ₁₇Un sa tyari tu brede fu oso kon. Den brede disi mus meki fu sowan fo kilo fini blon èn nanga dyesi. Un sa tyari den kon gi MASRA, fu opo den go na loktu leki wan ofrandi fu a fosi nyanyan fu un gron. ₁₈Makandra nanga a brede un sa tyari seibi skapu fu wan yari leki ofrandi. Noti no mus mankeri den skapu. Moro fara wan yongu bulu nanga tu man skapu. Un sa bron den leki ofrandi gi MASRA, makandra nanga den graan-ofrandi nanga a win di un e kanti leki ofrandi. Den sa bron nanga faya leki wan switi smeri, di e gi MASRA prisiri. ₁₉Dan un sa tyari wan bokoboko leki ofrandi fu kisi pardon fu un sondu, nanga tu skapu fu wan yari leki freide-ofrandi. ₂₀A priester sa opo den tu skapu go na loktu leki ofrandi na MASRA fesi, makandra nanga a brede di meki fu a fosi nyanyan fu a gron. Dan so den sa de santa ofrandi gi MASRA. Ma den sa de gi a priester. ₂₁Tapu a srefi dei dati un sa seni kari ala sma, fu un hori wan santa konmakandra. Un no sa du no wan tranga wroko. Na wan sani san un nanga den pikin fu unu di e kon na baka sa tan du fu têgo, awinsi pe un e tan.

₂₂Te un e koti nyanyan ini un gron, un no sa koti go te na a lantyi fu un gron. Un no sa piki a nyanyan tu di fadon. Un sa libi dati gi den pôtiwan nanga den doroseisma. Mi na MASRA, un Gado.’ ”

₂₃MASRA taigi Moses taki: ₂₄“Taigi den sma fu Israel taki: ‘Tapu a fosi dei fu a di fu seibi mun, un sa hori wan sabatdei. Un sa bro den tutu èn un sa hori wan santa konmakandra. ₂₅Un no sa du no wan tranga wroko èn un sa bron wan ofrandi nanga faya gi MASRA.’ ”

₂₆MASRA taigi Moses taki: ₂₇“Ma a di fu tin dei fu a di fu seibi mun na A Spesrutu Dei Fu Meki En Bun Nanga Gado. Un sa hori wan santa konmakandra, un sa faste a dei dati èn un sa bron wan ofrandi nanga faya gi MASRA. ₂₈Un no sa du no wan tranga wroko a dei dati, bika na a Spesrutu Dei Fu Meki En Bun Nanga Gado. A dei dati un sa meki en bun nanga Gado na fesi fu MASRA, un Gado. ₂₉A sma di no faste a dei dati, den mus yagi fu têgo kmoto na mindri fu den Israelitisma. ₃₀A sma di wroko a dei dati, Mi sa kiri puru na mindri fu en folku. ₃₁No wan wroko un sa du. Na wan sani di unu nanga den pikin fu unu di e kon na baka sa tan du fu têgo, awinsi pe un e tan. ₃₂Na wan trutru sabatdei èn un sa faste. A sabatdei e bigin tapu a di fu neigi dei fu a mun, te neti e fadon, te leki a neti fu a di fu tin dei.”

₃₃MASRA taigi Moses taki: ₃₄“Taigi den sma fu Israel taki: ‘Tapu a di fu tin-na-feifi dei fu a mun disi a fesa e bigin fu memre taki den ben e libi wan pisten ini kampu. A fesa na fu gi MASRA grani. Seibi dei langa a fesa disi sa hori. ₃₅Tapu a fosi dei un sa hori wan santa konmakandra. No wan tranga wroko un sa du. ₃₆Seibi dei langa un sa bron ofrandi nanga faya gi MASRA. Tapu a di fu aiti dei un sa hori wan santa konmakandra èn un sa bron wan ofrandi nanga faya gi MASRA. Na wan fesa. Un no sa du no wan tranga wroko.

₃₇Disi na den fesadei fu MASRA, tapu san un sa hori wan santa konmakandra, fu bron wan ofrandi nanga faya gi MASRA. Un sa bron ofrandi, un sa tyari graan-ofrandi, un sa srakti meti leki ofrandi èn un sa kanti win leki ofrandi, leki fa un leri fu du. ₃₈Un sa tyari den ofrandi disi sei den tra ofrandi di un gwenti gi MASRA tapu den sabatdei, sei den ofrandi di un ben pramisi fu tyari gi MASRA, nanga sei den ofrandi di un e gi nanga wan fri wani.

₃₉Tapu a di fu tin-na-feifi dei fu a di fu seibi mun, te un koti a nyanyan fu un gron, a fesa fu MASRA e bigin di un mus hori seibi dei. A fosi dei nanga a di fu aiti dei sa de dei fu rostu. ₄₀A fosi dei un mus broko moi froktu èn un mus koti palmtaki nanga taki fu tra bron. Dan un mus meki prisiri, seibi dei langa, na MASRA fesi. ₄₁Ala yari un sa hori a fesa disi fu MASRA seibi dei langa. Un mus hori en ini a di fu seibi mun. Na wan sani di unu nanga den pikin fu unu di e kon na baka sa tan du fu têgo. ₄₂Seibi dei langa un sa tan na ini kampu. Ala sma di gebore na ini Israel, sa tan na ini kampu. ₄₃Un sa du disi fu memre den pikin fu unu di e kon na baka, taki Mi ben meki un tan na ini kampu, di Mi ben puru un na ini Egiptekondre. Mi na MASRA, un Gado.’ ”

₄₄Na so Moses meki den sma fu Israel kon sabi den fesadei fu MASRA.

₁MASRA taigi Moses taki: ₂“Taigi den sma fu Israel taki den mus tyari soifri oli kon gi yu di den stampu puru fu oleif. A oli disi na gi den olilampu di mus tan bron na a kandelaar. ₃A kandelaar disi tnapu fesi a garden di anga fesi a kisi fu a ferbontu. Aaron mus sorgu taki den lampu disi tan bron heri neti na MASRA fesi, ini a tenti pe yu kan miti nanga Gado. Disi na wan sani di unu nanga den pikin fu unu di e kon na baka sa tan du fu têgo. ₄Aaron mus sorgu taki den olilampu tapu a gowtu kandelaar tan bron na MASRA fesi.

₅Teki fini blon, dan yu e baka twarfu brede fu en. Ibri brede sa meki fu sowan fo kilo blon. ₆Seti den ini tu ipi fu siksi brede na MASRA fesi, tapu a tafra fu lala gowtu. ₇Tapu ibri ipi yu mus poti soifri wierook, dan a sa de leki na ala a brede bron leki wan ofrandi di bron nanga faya gi MASRA. ₈Ala sabatdei a sa du disi na MASRA fesi. Disi na wan sani na san den Israelitisma mus hori densrefi fu têgo. ₉A brede na gi Aaron nanga den manpikin fu en. Den sa nyan en tapu wan santa presi. Na wan tumsi santi sani gi den. Na wan pisi fu den ofrandi di e bron nanga faya gi MASRA. Disi na wan sani di den sa tan du fu têgo.”

₁₀Na mindri den Israelitisma wan man ben de. En mama ben de fu Israel, en papa ben de fu Egipte. A man disi kisi trobi nanga wan man fu Israel na ini a kampu. ₁₁Dan a manpikin fu a frow disi fu Israel, fluku, dan a kosi Gado. A man en mama ben nen Selomit èn a ben de wan umapikin fu Dibri, fu a lo fu Dan. Ne den tyari a man go na Moses, ₁₂dan den poti en sranga na strafu te leki MASRA ben taigi den san bo psa moro fara nanga en. ₁₃Ne MASRA taigi Moses taki: ₁₄“Meki den tyari a man di fluku go na dorosei fu a kampu. Ala sma di yere fa a fluku sa kon dan den poti den anu tapu en ede. Baka dati a heri folku sa fringi ston na en tapu. ₁₅Yu sa taigi den sma fu Israel taki: ‘Iniwan sma di fluku en Gado, fiti fu kisi strafu. ₁₆A sma di afrontu a nen fu MASRA, mus dede. A heri folku sa fringi ston na en tapu. A no abi trobi efu na wan doroseisma noso wan sma fu Israel. Suma afrontu a nen fu Gado, mus dede. ₁₇Efu wan sma kiri wan trawan, den mus kiri a sma dati tu. ₁₈Ma efu wan sma kiri wan meti, a sa pai a sma di ben abi a meti. A sa gi en wan libi meti baka. ₁₉Efu wan sma gi wan trawan wan mankeri, den mus gi en a srefi mankeri baka. ₂₀Efu na broko a broko wan presi fu a trawan, den mus broko a presi dati fu en tu. Efu na wan ai a broko fu a trawan, den mus broko en ai tu. Efu na wan tifi a broko fu a trawan, den mus broko en tifi tu. A srefi sani di a du nanga a trawan, den mus du nanga en tu. ₂₁Efu wan sma naki wan meti kiri, a sa pai fu en. Ma efu wan sma naki wan tra sma kiri, den sa kiri a sma dati tu. ₂₂Den srefi wèt di de gi den sma fu Israel, sa de tu gi den doroseisma di e libi na un mindri.’ ”

₂₃Baka di Moses taigi den sma fu Israel den sani disi den tyari a man di ben fluku go na dorosei fu a kampu, dan den fringi ston kiri en. Na so den sma fu Israel du san MASRA ben taigi Moses fu du.

₁Disi na a bun nyunsu fu Yesus Kristus, a Manpikin fu Gado.

₂A bigin soleki fa a profeiti Yesaya ben skrifi taki:

₉Na a ten dati Yesus kmopo fu Nasaret ini Galilea, go na Yohanes. Dan A meki Yohanes dopu En ini a Yordanliba. ₁₀A srefi momenti di Yesus kmopo ini a watra, A si fa heimel opo èn fa a Santa Yeye e saka leki wan doifi kon na En tapu. ₁₁Ne wan sten kmopo fu heimel taki: “Yu na Mi Manpikin di Mi lobi. Mi abi prisiri nanga Yu.”

₁₂Dan wantron a Santa Yeye seni Yesus go na ini a dreisabana. ₁₃Fotenti dei langa Satan ben tesi En ini a dreisabana. Drape A tan na mindri den bus'meti, èn den engel ben sorgu gi En.

₁₄Baka di den kisi Yohanes poti na ini straf'oso, Yesus go na Galilea fu tyari a bun nyunsu fu Gado. ₁₅A taki: “A ten doro kba. Her'esi Gado o bigin tiri libisma. Un drai un libi èn bribi a bun nyunsu.”

₁₆Di Yesus ben e waka na a syoro fu a Meer fu Galilea, A si Simon nanga en brada Andreas e fisi nanga den tyasneti. Den man disi ben de fis'man. ₁₇Yesus taigi den taki: “Un kon waka nanga Mi, dan Mi o meki un tron fis'man fu libisma.” ₁₈Wantron den poti den tyasneti na wan sei, èn den bigin waka na Yesus baka.

₁₉Di Yesus waka go pikinso moro fara, A si Yakobus nanga Yohanes, den tu manpikin fu Sebedeus. Den ben de ini den boto e lapu den tyasneti fu den. ₂₀Fa Yesus si den, A kari den kon. Dan den libi den p'pa Sebedeus nanga den wrokoman fu en ini a boto, èn den bigin waka na Yesus baka.

₂₁Dan Yesus nanga den man di ben e teki leri fu En go na Kafarnaum. Tapu a sabatdei, Yesus go wantron na ini a kerki dan A bigin gi den sma leri. ₂₂Den sma no ben sabi san fu taki fu a leri fu En. Bika A no ben gi leri leki fa den sabiman fu Gado wèt ben e du, ma A ben du en leki a sma di kon nanga a leri. ₂₃A srefi momenti dati wan man ben de ini a kerki di ben abi wan takruyeye na en tapu. ₂₄A bari taki: “Yesus fu Nasaret, san Yu wani nanga unu? Na kon Yu kon fu puru un na pasi? Mi sabi suma na Yu. Yu na a Santa Wan fu Gado.” ₂₅Ma Yesus bari en taki: “Tapu yu mofo èn kmopo na a man tapu!” ₂₆Ne a takruyeye naki a man stoipi, èn nanga bigi babari a kmopo tapu a man. ₂₇Ala den sma ben ferwondru. A wan ben aksi a trawan taki: “San na a sani disi? Na wan nyun leri nanga makti! A e taigi den takruyeye san den mus du, èn den e du san A taki.” ₂₈Wantron a nyunsu fu san Yesus du, panya ini a heri kontren fu Galilea.